Mátyuu 17

Byiko ḿbyí Jisos byi/yángê

(Mâk 9:2-13; Lûk 9:28-36)

1Ké nkéré mú kii/shwôm ací nyâchât, Jisos o-kpî Pyíta ne Jêmsyi ne Jǒn mú wǎn-boné-Jêmsyi, ba-dim ne nyǐ ba-yú kyíbóng-kaku ńké ka/nyâam mbé mbé mbe. 2Ké nkéré mú mbe ba-tún n ǎ, enyam-byiko emen e-yángê dyizong. Bushú emen bu-kpet esan wǎ óbyísû, byídí emen byi-kpet ecé kpárádádát wǎ busan-esû. 3Bǎmgbán-Jisos ámbe ashí achât ba-ri kâng okúsí-Músis ne okúsí-Elája ké mbe ányi ba-pem m ne Jisos. 4Pyíta o-raa kâng ne Jisos o/fu, Otu Kyítá, nkyi chwǒm ńkyí kyinong eringe nyí byimu něen nyín. Â kyi/nyîn ǒ, me n/chi m-bi boompyep buchât nyín, kabónge ńké eyên, kabónge ńké Músis, ne kabónge ńké Elája.

5Ké nkéré mú nyǐ mu o-raa ng éné, ófíbí mú kpárádádát o/byí o-cít kámbé, ne ejá e-fím ké ófíbí ámu e-raa e/fu, nyín něen wǎn ejí mú dyityém, mú dyityém ndyi dyi-nyîn n mě ne nyǐ kanong kanong. Tî n̂g atông ba-jwo ǎ.

6Ké nkéré mú bǎmgbán-Jisos ba/jwo ejá ányi, bushî bu/kám kámbé kanong kanong ba-myii bashú kyísí. 7Jisos o-bâ o-ba-kâm kámbé, o-ta kámbé abwô ké byiko. O-raa ne mbé o/fu, dim m̂ nensang. *Da n̂g eshî*. 8Ne mbé ba-bêem bashú kyíbóng kâng ba*da/chîri onet okíri* kyi-cibi ne Jisos*.

9Ké nkéré mú mbe ba-shû ng kaku ba-bâ, Jisos o-nyibi kámbé butông o/fu, *da n̂g echi ba-sét onet nang obónge kyi-kim ne ńkyí ba/ri* tete Osówo o-jwóbê Wǎn mú Onet ké bukyû.

10Ne bǎmgbán emen ba-bí ǎ kâng ba/fu, kyi/cen nǎ kâng ne bantánge Byije-Músis mbe ba-sét ng ba/fu, Elája o-man o-bâ kpá.

11Jisos o-faa o/fu, ké ntûntû, Elája o-bâ kpá, ne nyǐ o/chi o-nap kángkáng byěm o-tî. 12Nké me mu n-sét ng běn ńkyín n/fu, Elája oo/bê, ne banet ba*da ǎ ecêe*. Nké ba/chi ǎ wǎ eringe nyí kyi/nyîn kámbé. Éné to nké banet ámbe ba/chi ba-chi Wǎn mú Onet byibî-byěm ké dyizong-bukwóp ándyi to dyibónge.

13Ne bǎmgbán emen kâng ba-nyît ba/fu, nyǐ o/mû mu o-raa ng ne mbé kyi-kim ne Jǒn mú Nkye banet osoo mú Osówo.

Jisos o/chi Wǎsíng-Onyinchéng mú mu ne Kyibî-Bucí o-nyange

(Mâk 9:14-29; Lûk 9:37-43)

14Ké nkéré mú ba/bwa esim ba-kâm bujê-banet ḿbé ba/mû ányi, onyinchéng obónge o-bâ o-ba-kâm Jisos, o-tím arông kyísí ké bushú emen, 15ne o-raa ne nyǐ o/fu, bonchí, ri wǎn ejí bafip. Nyǐ mu o-myii ng kyikóng, ne mu o-ziri ng banê ḿbé baa*nwa eri* ḿbé mbe ba-chi i ǎ o-róng ng ké okwâ nang ké kace, kángkáng nkéré. 16N/kúng ǎ m-ba-kye bǎmgbán eyên, nké ba*da ǎ eman echi o-nyange*.

17Jisos o-raa ne banet ḿbé ba/mû ányi o/fu, ben ba*fí dyizong-banet ńdyí ba/mû ba/chi ba-kyú* obánge o*fí běn*. Me n-rí i nǎ ne ben. N-cíp ng dyityém n-kyú ne ben ké aje afěng. Bâ n̂g ne wǎn ámu nyín. 18Jisos o-nyán kyibî-bucí ánkyi kyi-byí wǎn ámu ké byiko. O-waa o-nyange kâng ké abe ányi.

19Bǎmgbán-Jisos ba-ba-kâm ǎ kâng ké kadip ba-bí ǎ ba/fu, ebóng kyi/chi ne be byi*da/man eró kyibî-bucí ánkyi*.

20Jisos o-faa kámbé o/fu, nkyi, ké ebóng, dyityém enen ńdyí ba/fé ne Osówo dyi*da/jê*. Zîim m̂ ńkyín. Â ben ba/fé dyityém ne Osówo dyi-jê wǎ baryên-kaǎsáng-kyichí ńké badakó mósatat, ben ba-man n esét kaku ńkén ba/fu, dim nyín a-jâ kú, ne ka-dim m to. Ne chwǒm kii*ba/chi kyi-kyú nang kyibónge ńkyí ben baa*ba/chi ba-man echi*. [21Nké nshwam efé ne esong ecíp nké nke nké byidaman eró dyizong-kyibî-bucí ńdyín, chwǒm kyikíri kyi*fí*.]

Jisos o/chîraa kyi-kim ne Bukyû Emen

(Mâk 9:30-32; Lûk 9:43-45)

22Ké nkéré mú bǎmgbán emen kángkáng ba/bacibi ne barî kyikit kyibónge ké Gályílyi, Jisos o/sét kámbé o/fu, ba-kú ba-bâ eníbî Wǎn mú Onet ba-kye banet 23ḿbé ba/chi ba-ju ǎ. Nké ké ací achât, Osówo o/chi o-jwóbê ǎ ké bukyû.

Bǎmgbán emen ba-firi bafip báfip.

Akpuga ekye nyí Kiǐtí-Kyise-Kyifen-Osówo echi

24Ké nkéré mú Jisos ne bǎmgbán emen ba/bê ké Kapánum, banet ḿbé badakoo akpuga nyí kiǐtí-kyise-kyifen-Osówo echi ba/bê ba-kâm Pyíta, ba-bí ǎ ba/fu, ntánge byiraa-Osówo enen mu o-kyâ akpuga nyí kiǐtí-kyise-kyifen-Osówo echi?

25Pyíta o-faa o/fu, âa.

Ké nkéré mú Pyíta o/dim ké kyise, Jisos o/raa kpá ne nyǐ, o-bí ǎ o/fu, Sámon, wo a/kabe nǎ. Be yeě mbe ba-kyâ batu ḿbé ké ejíí ńnyín akpuga-bukwóp ne nyí dyishí. Bayén-oshê aa, aa bacinbánet.

26Pyíta o-faa ǎ o/fu, bacinbánet.

Jisos o-faa ǎ kâng o/fu, éné kâng ńkyí nkyí kyi/byí kyi/fu, bayén-oshê ba*fí ne bukwóp ḿbú badakye kányí*. 27Nké be byi*fí byi-ryuu ng byi/fu, byi-chi i banet ḿbén ba-kûsa kafâ*. Ca kâng ké baya a-da-twóp byílôp. Fîm kakworê ńké mbwôp kashú ńké kadakúng, ne ké kafâ-ocím emen wo a/chi a-ri akpuga nyí adakwárê nyí ndakye ké kiǐtí-kyise-kyifen-Osówo echi, ne nyí eyên. Kúng kányí a-kye kámbé ké dyishí ńdyí ejí ne ńdyí eyên.

Currently Selected:

Mátyuu 17: BKY

Highlight

Copy