Mátyuu 16

Banet ba/bí ba/fu, Jisos ochi Akat o-tông Kámbé

(Mâk 8:11-13; Lûk 12:54-56)

1Kyicê-banet-ncibi mú badakó Fárasyî ne kyicê-banet-ncibi to mú badakó Sádusyî ba/bê ba-kâm Jisos. Mbé ba/mû mbe ba-ryuu ng ba/fu, mbé ba-kan n ǎ ba-ri. Ba-bí ǎ kâng ba/fu, ochi akat o-tông kámbé, eringe nyí kyidatông kyi/fu, busa emen bu/fím ne Osówo. 2Nké Jisos o/faa kámbé o/fu, ké nkéré mú esû e-kú e-ríbî ng, ben ba-raa ng ba/fu, be byi/chi byi-já dyicí ńdyí dyinong, ké ebóng, bubóng mbu bu-bwam m. 3Ne ké dyicófóróng pirípirí, ben ba-raa ng ba/fu, omu o/chi o-na, ké ebóng, bubóng mbu bu-bwam m bu-jîi ng. Ben ba-man n esét kyi-kim ne dyicí ké otûn mú badatún bubóng. Nké ben baa*man esét kyikû kyi-kim ne ekap nyí bankéré ḿbé kántîk*. 4Bwǎn-bafî ba/bên kanong kanong, nang Osówo to ba*fí ba-fâ ǎ*. Ben ba/bí mě ba/fu, nchi akat? Aa*wááng*. Akat nyí ben ba/chi ba-ri, kyi*da/shwôm nyí Osówo o/tông Jóna*.

O-mîng kámbé kâng o-dim.

Bukye ḿbú badafé ké Berêt ne o-mut, ḿbú Banet-Fárasyî ne Banet-Sádusyî

(Mâk 8:14-21)

5Ké nkéré mú bǎmgbán-Jisos ba/nyáng ba-jâ ké bukô-baya ḿbú bubónge, ba/ráp nang onyin-berêt ekúng. 6Jisos o-raa ne mbé o/fu, bám m̂ byiko enen to kyi-kim ne bukye ḿbú badafé ké berêt ne o-mut, ḿbú banet-Fárasyî ne banet-Sádusyî.

7Mbé ba-kpet epem ne barî ba/fu, nyǐ mu o-raa ng ńkyín, ké ebóng, be byi*da/kúng nang onyin-berêt*.

8Jisos o/nyît ńkyí ba/mû mbe ba-raa ng, o-bí kámbé kâng o/fu, ebóng ńkyí ben bamu ba-pem m ne barî kyi-kim ne nang onyin-berêt mú o*fí běn*. Dyityém enen ńdyí ba/fé ne me dyi*da/jê*. 9Ben ba*da/jwo ne kyikû*? Ben ba*fí to ba-zîim m ńdyí me n/ját byirim-berêt byitánge n-kye égot-banyinchéng bujam esim batánge*? Ben ba/fé bookye bu-sú bufěng. 10Kyi-kim to kâng ne byirim-berêt káchâtkányi ḿbyí n/kye égot-banyinchéng bujam. Ben ba/fé bookye bu-sú bufěng. 11Ebóng kâng ńkyí ben baa*man ejwo kyikû* ba-nyît ba/fu, me m/mû n*fí n-raa ng ne ben kyi-kim ne berêt*. Bám m̂ byiko enen kyi-kim ne bukye ḿbú badafé ké berêt ne o-mut, ḿbú banet-Fárasyî ne banet-Sádusyî.

12Ne bǎmgbán emen kâng ba-jwo dyishí ba-nyît ba/fu, nyǐ o/mû o*fí o-sét ng kámbé o/fu, babám byiko ebe kyi-kim ne bukye ḿbú badafé ké berêt* nké mu o-sét ng kámbé kyi-kim ne ńkyí banet-Fárasyî ne banet-Sádusyî mbe ba-tángê e.

Pyíta o/sét Wááng kyi-kim ne Jisos

(Mâk 8:27-30; Lûk 9:18-21)

13Jisos o/dim o-wâa ké esí nyí e/fárâng ne Sizaryâ Fyilyípa, ne o-bí bǎmgbán emen o/fu, banet mbe ba-raa ng ba/fu, Wǎn mú Onet o-chi i ebóng dyizong-onet.

14Mbé ba-faa ba/fu, banet bakíri ba/fu, o-chi i Jǒn mú Nkye banet osoo mú Osówo. Bakíri ba/fu, o-chi i Elája, bakíri ba-bwa ba-fu, o-chi i Jeryimáya, kakíri mkpábé mú odasét byiraa-Osówo okíri.

15O-bí kámbé o/fu, nké ben ba/kabe ba/fu, me yeě.

16Sámon Pyíta o-faa o/fu, wo a-chi i onet mú Osówo o/kúng ǎ butu, Wǎn mú Osówo mú mu okpó.

17Jisos o-faa ǎ o/fu, bunyîn-dyityém mbu ne wo, ǎ Sámon mú wǎn-Jǒn. Ké ebóng, ntûntû mún o*da/fím ké bubwô ḿbú onet nang obónge ne o-kâm ǒ* nké Bonchí ejí mú kyíbóng nké o/kye ǒ kámú ké abwô nyí emen nyǐ oyén. 18Ké bubwô ámbu, me mu n-sét ng ǒ n/fu, wo a-chi i buká, ǎ Pyíta. Ne ké buká ḿbún, ḿbú kyikû-ekpe nké me n/chi m-bi ékwâbashi ejí nyí nang bukyû boo*ba/chi bu-man bu-kpógê kányí ne banyá*. 19Me n/chi n-kye ǒ agbókóró nyí Butu ḿbú Osówo. Ne nang ebóng chwǒm ńkyí wo a/né ké ejíí, ba/chi ba-né kánkyí kyíbóng. Ne nang ebóng chwǒm ńkyí wo a/bángê ne nkyí ké ejíí, ba/chi ba-bángê ne nkyí to kyíbóng.

20Ne Jisos o-kuri kâng bǎmgbán emen ekó o/fu, ba*dachi ba-sét onet nang obónge ba/fu, nyǐ o-chi i onet mú Osówo o/kúng ǎ butu*.

Jisos o/raa kyi-kim ne Busông ne Bukyû Emen

(Mâk 8:31-38; 9:1; Lûk 9:22-27)

21Kyi-fím ké nkéré ámu kyi-ca kashú, Jisos o/kpet eraa ne bǎmgbán emen wááng wááng o/fu, me m-man n-ca Jerúsélem n-ri busông chwóó ké abwô nyí bakínkán-banet-Jûs ne batu-banchi kyifen-Osówo ne bantánge Byije-Músis. Ba/chi ba-ju mě, ne ké ací achât, Osówo o/chi o-jwóbê mě ké bukyû.

22Pyíta o-níbî ǎ ba-bwom ké bukô, o-kpet eraa ne nyǐ. O/fu, Osówo oo*bángê kánkyí* ǎ Otu Kyítá*. Ńkyín kii*man kyi-chi ǒ ne banyá*.

23Jisos o-bírî kashú o-raa ne Pyíta o/fu, dim mě nyín, ǎ Sátan. Wo amu a-ku ng mě bukwóp ḿbú ejí, ké ebóng, okabe eyên mún o-chi i mú banet, *chí mú Osówo*.

24Ne Jisos o-raa kâng ne bǎmgbán emen o/fu, nang yeě nké mu o-ryuu ng o/fu, nyǐ o-bâ ne me ké kyikû o-man o-ráp kyi-kim ne byiko emen, o-kúng kyikwap emen ńkyí bada ǎ eshwân, o-bâ ne me ké kyikû. 25Ké ebóng, nang yeě nké mu o-jang ng eryú kyi-kim ne dyikpen emen, dyikpen emen dyi/chi dyi-tánê ǎ. Nké nang yeě nké dyikpen emen dyi/tánê ǎ ké dyishí ejí o/chi o-kpen. 26Ebóng mpún mú onet o/chi o-ryí, â ejíí emúmú e/já ǎ, o-tánê dyikpen emen. Ké ntûntû, mpún o*fí*. Chwǒm kyi*fí* ńkyí onet odakye ne o-chîkoo dyikpen emen*. 27Ké ebóng, Wǎn mú Onet o-kú o-bâ ebê ké busan ḿbú Bonchí emen ḿbú ragerage, ne barím emen ḿbé banong, ne nyǐ o/chi o-só nang yeě nang yeě wǎ eringe nyí onet ámu o/chi bǎmkpóngé emen. 28Zîim m̂ ńkyín ba/fu, banet bakíri mbe nyín ḿbé baa*ba/chi ba-kpú* tete ba-ri Wǎn mú Onet o-byí wǎ Otu.

Currently Selected:

Mátyuu 16: BKY

Highlight

Copy