Mátyuu 21

Jisos o/nung ké Jerúsélem ne Akpee

(Mâk 11:1-11; Lûk 19:28-40; Jǒn 12:12-19)

1Ké nkéré mú ba-kú ba-nung ng Jerúsélem, ba/ribi ké Bét-Féje, ké kaku ńké badakó Ólif. Ányi nké Jisos o/twóm bǎmgbán emen ashí afee o/fu, babwóp ǎ kashú. 2O-sét kámbé o/fu, ca n̂g ké oshê mú mu běn ányi ké kashú, ne â ba-nung ng ba-câ, ba/chi ba-ri kaanyam-atû ńké ba/tú kánké, ne kyisu emen nkyi ányi to ne nké. Firi n̂g kámbú ba-ba-kye mě. 3Â nang onet o/raa chwǒm, sét n̂g ǎ ba/fu, bonchí eten nké mu o-ryuu ng kámbú. Ne nyǐ o/chi o-mîng kámbú bu-dim ké abe ké abe.

4Ńkyín něen kyi/chi, eringe nyí ńkyí mkpábé mú odasét byiraa-Osówo o/mû o/raa, kyidakyú ntûntû. 5O/fu, sét n̂g oshê mú Záyon ba/fu, otu eyên mu o-bâ o-kâm ǒ kántîk. Nyǐ mu ne dyityém ńdyí degere, ne nyǐ o/yú ké kyisu-kaanyam-atû.

6Bǎmgbán-Jisos ámbe kâng ba-bwóp kashú ba-da-chi ńkyí Jisos o/sét kámbé o/fu, bachi. 7Ba-bâ ne kaanyam-atû ánke ne kyisu emen, ba-pii byídí ebe ba-cít kámbú ké byiko. Jisos o-yú o-kyú ányi me. 8Bujê-banet chwóó ba-tát éfim ebe ké bukwóp, bakíri ba-két byire-byichí ba-tát kámbyí ké bukwóp. 9Bujê-banet ḿbé ba/mû mbe ba-câ Jisos ké kashú ne ḿbé ké esim ba-kpet ekwán ba/fu, akpee akyú ne wǎn-Otu Dívit. Ojware okyú ne onet mú mu o-bâ ké bubwô ḿbú Otu Kyítá. Akpee akyú ne Osówo.

10Ké nkéré mú Jisos o/nung ké Jerúsélem, oshê omúmú o-buu. Banet ba-kpet ebí ba/fu, nyǐ o-chi i ebóng dyizong-onet.

11Bujê-banet ámbe ba-faa ba/fu, nyín něen mkpábé mú odasét byiraa-Osówo, mú odabángê Jisos, mú o/fím Názáret mú mu ké esí nyí Gályílyi.

Jisos o/ce ké Kiǐtí-Kyise-Kyifen-Osówo echi

(Mâk 11:15-19; Lûk 19:45-48; Jǒn 2:13-22)

12Jisos o-nung ké kafâ-kiǐtí-kyise-kyifen-Osówo echi, o-ró kángkáng banet ḿbé mbe ba-ré ng byěm ne ḿbé mbe ba-shee ng to oshěng ké kafâ-kyise ánkyi. O-kpán ékpákpúrúk-banyánge akpuga ne biincincîm ḿbyí banshee bootǒmtǒm o-cít bashú kyísí. 13O-raa ne mbé o/fu, ba/sáng ké ejá-Osówo nyí ba/sáng kyísí ba/fu, Osówo o/fu, kyise ejí ba/chi ba-kûkó kánkyí kyise-banshwam efé. Nké ben bamu ba-chi i kánkyí kyi-firi kyikit ńkyí banet-kajii badarem.

14Bansêe achi ne bankwa ba-bâ ba-kâm ǎ ké kiǐtí-kyise-kyifen-Osówo echi, nyǐ o-chi kámbé ba-nyange. 15Batu-banchi kyifen-Osówo ne bantánge Byije-Músis ba-kpet esa kafâ ké nkéré mú mbé ba/ri biinkaa byiko-byěm ḿbyí nyǐ mu o-chi i, ne bwǎsíng to ḿbé ba/ri kámbé mbe ba-wonge e ba-kwán n ké kafâ-kiǐtí-kyise-kyifen-Osówo echi ba/fu, akpee akyú ne wǎn-Otu Dívit.

16Ne mbé ba-bí Jisos ba/fu, wo amu a-jwo ng ńkyí mbe ba-raa ng dí.

Jisos o-faa kámbé o/fu, ké ntûntû, me mu n-jwo ng. Nâng ben baa/kó ejá-Osówo nyí ba/sáng kyísí nyí e/fu, ben baa/tángê bwǎn-ojújwô akpee nyí a/kwárê ekye.

17Jisos o-mîng kámbé o-dim ké oshê ámu o-wâa Bétányi, kyikit ńkyí o/rí ányi dyicí dyi-cé.

Jisos o/shú Kyichí ńkyí badakó Fyîk

(Mâk 11:12-14, 20-24)

18Ké nkéré mú o-kú o-bwa ng esim ké Jerúsélem, pirípirí ké orî-dyicí, Jisos esong e/mû e-kú e-nwa ng ǎ. 19O-ri kyichí ńkyí badakó fyîk ké bukô-bukwóp, o-dim o-wâa ké nkyí, nké o*da/ri chwǒm ké nkyí* kyi-cibi ne eshǎan*. Ne o-raa kâng ne nkyí o/fu, wo aa*ba/chi a-chîzím byirim*. Ké abe ányi, kyichí ánkyi kyi-waa kyi-jwóm kyi-kpú.

20Ké nkéré mú bǎmgbán emen ba/ri ńkyín, ba-waa ocím ké dyishí fúú, ba-raa ba/fu, kyichí ńkyín kyi/cen nǎ ne kyi-jwóm něen ké abe ké abe.

21Jisos o-faa kámbé o/fu, zîim m̂ ńkyín. Â ben ba/fé dyityém enen ne Osówo, ne ba*fí ne atyém afee* ben ba-man n echi ńkyí me nn/chi kyichí ńkyín. *Chí nang ńkyín nkyí nkyi* ben ba-man n esét nang kaku ńkén ba/fu, bûu a-da-róng ké baya, ne ka/chi ka-chi éné. 22Â ben ba/fé dyityém enen ne Osówo, ben ba/chi ba-koo nang ebóng chwǒm ńkyí ben bamu ba-bí ng ké nshwam efé.

Ḿbím kyi-kim ne Busa ḿbú Jisos

(Mâk 11:27-33; Lûk 20:1-8)

23Jisos o-bwa esim ké kiǐtí-kyise-kyifen-Osówo echi. Ne ké nkéré mú nyǐ mu o-tángê e, batu-banchi kyifen-Osówo ne bakínkán-banet-Jûs ba-bâ ba-kâm ǎ, ba-bí ǎ ba/fu, ebóng busa ḿbú wo amu ne mbú, ḿbú adachi byěm ḿbyín. Yeě o/kye ǒ busa ḿbún.

24Jisos o-faa kámbé o/fu, me n/chi m-bí běn ḿbím obónge mǔ mu, ne â ben ba/faa mě kámú, me n/chi n-sét běn dyizong-busa ḿbú me mu ne mbú, ḿbú ndachi byěm ḿbyín. 25Busa ḿbú Jǒn mú o/mû o-kyâ banet osoo mú Osówo bu/fím nyá. Bu/fím ne Osówo aa, aa bu/fím ne banet.

Mbé ba-kpet ekán barî ké dyishí ba/fu, be byi/chi byi-fu nǎ. Â be byi/faa byi/fu, bu/fím ne Osówo, nyǐ o/chi o-bí bě o/fu, ebóng kyi/chi kâng ne ben ba*da/bángê ne Jǒn*. 26Nké â byi/fu, bu/fím ne banet, be byimu byi-shî ng ńkyí bujê-banet ba/chi ba-chi, ké ebóng, mbé kángkáng mbe ba-nyît ng ba/fu, Jǒn o/mû mkpábé mú odasét byiraa-Osówo. 27Ne mbé ba-faa kâng Jisos ba/fu, be byi*fí byi-nyît ng*.

Ne Jisos o-sét kámbé o/fu, nang me to mm*ba/chi n-sét běn kâng busa ḿbú me mu n-chi i byěm ḿbyín*.

Dyitím-Ekan ńdyí Bwǎn-Banyinchéng Ashí Afee

28Kántîk, ben ba/kabe nǎ. Onyinchéng obónge o/mû ne bwǎn-banyinchéng ashí afee. O-dim o-kâm wǎn emen mú okínkán, o-sét ǎ o/fu, wǎn ejí, ca a-da-chi bǎmkpóngé ké kyifát ejí kurún. 29Wǎn emen ámu o-faa ǎ o/fu, nn*ce*. Nké ké nkéré mú kaa/bwon, o-yángê okabe emen, o-dim o-wâa ké kyifát ánkyi. 30Bonchí emen kâng o-dim o-kâm wǎn emen mú obónge, o-sét ǎ to eringe ebónge. Wǎn ámu o-faa ǎ o/fu, n/jwo, ǎ bonchí. Nké o*da/ce*. 31Bwǎn ámbe ashí afee orá mú o/chi ńkyí bonchí emen mu o-ryuu ng.

Mbé ba-faa ǎ ba/fu, mú okínkán.

Jisos o-faa kámbé o/fu, me mu n-sét ng běn ńkyín n/fu, bankoo akpuga-dyishí ne banet-asâasâa ba-bwóp ng běn kashú kpá ba-nung ké Butu ḿbú Osówo. 32Ké ebóng, Jǒn mú Nkye banet osoo mú Osówo o/bê o-kâm běn, o-tông běn kiǐfáng ńkyí kyinong ńkyí badacen, nké ben ba*da/fé dyityém enen ne nyǐ*. Nké bankoo akpuga-dyishí ne banet-asâasâa ba/fé atyém ebe ne nyǐ. Nang ké nkéré mú ben ba/ri ńkyín, ben ba*da/saa byiko ba-mîng byibî echi* ba-fé atyém enen ne nyǐ*.

Dyitím-Ekan kyi-kim ne Banet ḿbé ba/yámê Kyifát-Byirim-Byichí

(Mâk 12:1-12; Lûk 20:9-19)

33Jisos o-raa o/fu, fwôo n̂g atông ba-jwo dyitím-ekan dyikíri. Onyinchéng obónge o/mû ne esí nyí o/kwón byirim-byichí ké nyǐ, o-fé oro o-wáp kámbyí o-fé ké kafâ, o-sím dyibíng ńdyí badanwárê byirim-byichí ámbyi ba-fîm m babî. O-bi kiǐnyáám-kyikit-mbâm. O-kúng kâng kyifát ánkyi o-kye banet ba-yámê, o-dim o-wâa bucen. 34Ké nkéré mú nkéré oo/fyi mú badabóng byirim-byichí ámbyi, nyǐ o/twóm básóng emen kyikit-banyáme kyifát ámbe o/fu, bada-koo kyicê-byirim-byichí ḿbyí emen. 35Banet ḿbé ba/yámê kyifát éné ba-níbî básóng ámbe, ba-mín obónge, ba-ju obónge, ba-tím mú obónge aká. 36Onyinchéng ámu o-chîtwóm básóng bakíri ba-jê ba-shwôm ḿbé o/twóm ké mbwôp kashú, banet ḿbé ba/yámê kyifát éné ba-chîchi kámbé to eringe ebónge. 37Ké nkuli kyikû, o-twóm kámbé wǎn emen. O-raa o/fu, ké ntûntû, mbé ba/chi ba-kye wǎn ejí ofê. 38Nké ké nkéré mú banet ḿbé ba/yámê kyifát ánkyi ba/ri wǎn emen ámu, ba-raa ne barî ba/fu, nyín něen wǎn-oyén-kyifát ńkyín. Bâ n̂g byi-ju ǎ, ne be byi/chi byi-ryí bukyû emen. 39Ba-níbî ǎ kâng ba-twóp ké esim-oro-kyifát, ba-ju.

40Jisos o-bí kâng o/fu, ké nkéré mú oyén-kyifát oo/bê, nyǐ o/chi o-chi banyáme kyifát ámbe ebóng,

41Mbé ba-faa ǎ ba/fu, ké ntûntû, nyǐ o-man o-ju banchi byibî ámbe, o-kúng kyifát ánkyi o-kye banet bakíri ba-yámê, ḿbé ba/chi ba-kû ǎ ekye kyicê-byirim-byichí ḿbyí emen ké ochíchí-nkéré.

42Jisos o-bí kámbé o/fu, nâng ben baa/kó ejá-Osówo nyí ba/sáng kyísí nyí e/fu, ochíchí-buká ḿbú bambi byise ba/né bu/firi buká ḿbú bu/rêe bu-shwôm. Otu Kyítá nké o/chi ńkyín, kyi/kaa banet byiko kanong kanong.

43Jisos o-chîraa o-ca kashú o/fu, ké bubwô ámbu, me mu n-sét ng běn n/fu, ba/chi ba-koo běn Butu ḿbú Osówo ba-kye banet ḿbé ba/chi ba-zím byirim ḿbyí byi/kwárê. [44Nang yeě nké â o/myii ké buká ḿbún, o/chi o-bún byikit emen kángkáng. Ne â buká ḿbún bu/róng onet ké byiko, bu/chi bu-sé ǎ degedege.]

45Batu-banchi kyifen-Osówo ne banet-ncibi mú badakó Fárasyî ba/jwo atím-ekan nyí Jisos o/tím, ne ba-nyît ba/fu, nyǐ mu o-raa ng kyi-kim ne mbé, 46ne ba-kan ǎ ekám kâng. Nké mbé ba/mû mbe ba-shî ng bujê-banet ḿbé ba/kabe ba/fu, Jisos o-chi i mkpábé mú odasét byiraa-Osówo.

Currently Selected:

Mátyuu 21: BKY

Highlight

Copy