Mátyuu 15
15
Byěm ḿbyí Banet-Jûs ḿbé Kpákpá ba/tángê
(Mâk 7:1-13)
1Kyicê-banet-ncibi mú badakó Fárasyî ne kyicê-bantánge Byije-Músis ḿbé ba/fím Jerúsélem ba/bê kâng ba-kâm Jisos. Ba-bí ǎ ba/fu, 2ebóng ńkyí bǎmgbán eyên mbe ba-né ng byěm ḿbyí banchí eten ḿbé kpákpá ba/tángê bě. Mbé ba*fí ba-soo ng abwô ké ochíchí-bukwóp* ne ba-kûryí byiryíng*.
3Jisos o-faa kámbé o/fu, ebóng ńkyí ben to bamu ba-né ng ńkyí Osówo o/sét, ba-kûchi ńkyí ben bayén ba/tángê. 4Ké ebóng, Osówo o/fu, fé ńchân ne ńnân. Ne nang yeě nké o/raa byibî-byěm kyi-kim ne bonchí emen nang ne boné emen, ba-man ba-ju ǎ. 5Nké ben bamu ba-tángê e banet ba/fu, â onet mu ne chwǒm ńkyí odakúng o-chwáp bonchí nang boné, nké â nyǐ o/raa o/fu, ńkyín kyi/já Osówo, 6nyǐ o*fí to ne bukwóp ḿbú odachîkye bonchí emen ofê*. Ké dyizong-bukwóp ḿbún nké ben bamu ba-né ng ejá nyí Osówo, eringe nyí badachi ńkyí ben bayén bamu ba-tángê e. 7Ben bannîm banet. Azáya mú o/mû mkpábé mú odasét byiraa-Osówo, o/sét ntûntû, ké nkéré o/raa kyi-kim ne ben. 8O/fu, Osówo o/fu, banet ḿbén ba-kyâ mě ofê ké ejá éja, nké atyém ebe nyi byikit byikíri. 9Mbé mbe ba-fâ mě dyikáá, ké ebóng, mbé mbe ba-tángê e byije ḿbyí banet ba/chi wǎ me nké n/chi kámbyí.
Byěm ḿbyí byidachi Onet ne o-firi Onet mú bada ǎ eciring
(Mâk 7:14-23)
10Jisos kâng o-kó bujê-banet ba-bâ ba-kâm ǎ, ne o-raa ne mbé o/fu, fwôo n̂g atông ba-jwo. 11*Chí chwǒm ńkyí kyidanung onet ké ocím nké kyida ǎ echi o-firi onet mú bada ǎ eciring* nké ńkyí kyida ǎ ebyí ké ocím nké kyida ǎ echi o-firi onet mú bada ǎ eciring.
12Ne bǎmgbán emen kâng ba-dim ba-kâm ǎ. Ba-bí ǎ ba/fu, wo amu a-nyît ng a/fu, banet-Fárasyî mbe ba-sa ng kafâ kyi-kim ne ńkyí a/raa éné?
13Jisos o-faa o/fu, kyichí nang kyirá ńkyí Bonchí ejí mú kyíbóng o*da/kwón kánkyí* o/chi o-zú kánkyí o-twóp. 14*Da n̂g ekérê kyi-kim ne mbé*. Mbé ba-chi i banet-ashí ḿbé ba*fí ne achi*. Ne nang nkéré orá nké nsêe achi mu o-tông ng óbe-nsêe achi bukwóp, mbé ashí amúmú ba-róng ng ké dyibíng.
15Pyíta o-faa ǎ o/fu, sét bě dyishí-dyitím-ekan ńdyín.
16Jisos o-faa kámbé o/fu, ben to ba/tôong ba*da/já ne bubong ba-shwôm banet ḿbé áku*? 17Ben ba*fí ba-nyît ng dyishí*? Chwǒm nang kyirá ńkyí kyidanung onet ké ocím kyi-jâ ké dyifít emen, ne fím ányi kyi-cen ké enyam-byiko kyi-byí kyíjí. 18Nké byěm ḿbyí byidabyí ké ocím-onet byi-fím m ké dyityém. Azong-byěm ányi a-chi i onet o-firi onet mú bada ǎ eciring. 19Ké ebóng, kyibî-okabe ńkyí kyida ǎ echi o-ju onet, o-chi kyinam, ne karíng erí ne banet byiryibyiryi ne kajii ejii ne kyisédéng esét ne barî-banet ebîn kyi-fím m ké dyityém emen. 20Byěm ḿbyín nké byidachi onet o-firi onet mú bada ǎ eciring. Nké byiryíng eryí, a*da/soo abwô eyên* wǎ eringe nyí mbé ba/fu, ben ba*fí ba-soo ng* kii*chi onet o-firi onet mú bada ǎ eciring*.
Dyityém ńdyí Onyinyi o/fé ne Jisos
(Mâk 7:24-30)
21Jisos o-mîng kyikit ánkyi, o-dim o-wâa ké esí nyí e/fárâng ne eshê nyí Táya ne Sádon. 22Onyinyi mú o/fím Kínan, mú mu o-kyú u ké esí ányi, o-dim o-kâm ǎ. O-wonge o/fu, wǎn-Otu Dívit, ri mě bafip, ǎ bonchí. Wǎn ejí mú onyinyi mu ne kyibî-bucí, ne mu o-ri ng busông kanong kanong.
23Nké Jisos o*da ǎ efaa nang ojá*. Bǎmgbán emen ba-bâ ba-kâm ǎ. Ba-tîm ǎ arông ba/fu, ró ǎ o-dim, ké ebóng, mu o-tii ng o-bâ ne be ké kyikû.
24Jisos o-faa kâng o/fu, me Osówo o/twóm mě n-kâm etám-ebû nyí banet-Ézerel nké nke nyí ee/tánê.
25Ké nkéré mú Jisos o/raa ńkyín, onyinyi ámu o-bâ o-ba-myii ǎ ké byiká. O-raa o/fu, chwáp mě, ǎ bonchí.
26Jisos o-faa o/fu, kii*nwa ńkyí badakúng byiryíng ḿbyí boǒbwásíng ba-pwó bubyî*.
27Onyinyi ámu o-faa to o/fu, nkyi éné, ǎ bonchí. Nké nang bubyî bu-ryí i ekén-byiryíng nyí edafím ké ókpákpúrúk-byiryíng mú bonchí ebe e-róng kyísí.
28Jisos o-faa ǎ kâng o/fu, wo a-chi i onyinyi mú o/fé dyityém emen ne me ńdyí dii*nwa eri*. Ńkyí amu a-ryuu ng kyi/chi kyi-chi kyi-kye ǒ. Ne ké abe ányi, wǎn emen o-waa o-nyange.
Jisos o/chi Banet Chwóó ba-nyange
29Jisos o-mîng kyikit ánkyi o-dim o-cen ḿbú bukô-baya ḿbé Gályílyi. O-yú kyíbóng-kaku o-kyú me. 30Bujê-banet ba-dim ba-kâm ǎ, ba-kpî bankwa ne bansêe achi ne bannyîim abwô ne biǐmyímé ne banet bakíri chwóó ḿbé mbe ba-rwôm m, ba-tî kámbé ké byiká emen. Nyǐ o-chi kámbé ba-nyange. 31Banet ámbe ba/waa ocím ké dyishí fúú, nkéré mú ba/ri biǐmyímé byi-kú byi-raa ng, bannyîim abwô kerededet, bankwa ba-kú ba-cen n, ne bansêe achi ba-kú ba-rángê e. Ne mbé ba-kpee Osówo mú Ézerel.
Jisos o/nen Égot-Banet Bujam
(Mâk 8:1-10)
32Jisos o-kó bǎmgbán emen ba-bâ ba-kâm ǎ. O-sét kámbé o/fu, byiko mbyi byi-kpú u mě ne banet ḿbén, ké ebóng, mbé baa/kyú ne me ké ací jangjang achât, ne kántîk ba*fí to ne chwǒm ńkyí badachîryí*. N*fí n-ryuu ng n/fu, n-sét ng kámbé ba-dim dyijê esong ésong* ké ebóng, katô ba/chi ba-jwâa ké bukwóp.
33Bǎmgbán emen ba-bí ǎ ba/fu, ebóng kyikit ńkyí be byi/chi byi-ri byiryíng ké kyikim-dyikán ńkyín ḿbyí byidanen bujê-banet ḿbún byi-kwárê kámbé.
34Jisos o-bí kámbé o/fu, berêt o/waa nǎ.
Mbé ba-faa ba/fu, byirim káchâtkányi ne boǒnyín-ekworê to.
35Jisos o-sét bujê-banet ámbe kâng o/fu, bakyú me kyísí. 36Jisos o-kúng kâng byirim-berêt ámbyi káchâtkányi ne ekworê ányi to, o-kó Osówo asǎma. O-ját kámbyí o-kye bǎmgbán emen, ne mbé ba-koo ba-kye banet ámbe. 37Mbé ashí kángkáng ba/ryí ba-zût. Bǎmgbán emen ba-bwóp ekén, ba-fé e-sú bookye káchâtkányi. 38Ocím-banyinchéng ḿbé ba/ryí ba/mû égot-banet bujam, ba*da/pan banyinyi ne ḿbé bwǎsíng*.
39Jisos o-sét kâng banet ámbe ba-dim, o-nung ké ókpǐ o-wâa Magádan.
Currently Selected:
Mátyuu 15: BKY
Highlight
Share
Copy
Want to have your highlights saved across all your devices? Sign up or sign in
Published by the Bible Society of Nigeria @ 1985
