Mátyuu 14

Bukyû ḿbú Jǒn mú Nkye Banet Osoo mú Osówo

(Mâk 6:14-29; Lûk 9:7-9)

1Kyi/mû ké nkéré ámu nké Otu Hérot mú o/mû onet-dyishí mú esí nyí Gályílyi o/jwo kyi-kim ne Jisos. 2Otu Hérot o-kpet esét bankye bacê emen o/fu, onet ámu ké ntûntû o-chi i Jǒn mú Nkye banet osoo mú Osówo nké oo/bwa ké dyikpen. Nkyí nké nyǐ o/firi ne busa ḿbún ké enyam-byiko.

3Ké ebóng, Otu Hérot o/mû o/kye busa ba-kám Jǒn, o-fu ba-bwá ǎ ba-fé ké mgbokobá. Nyǐ o/chi ńkyín ké bubwô ḿbú Heródyas mú o/mû onyi-wǎn-boné emen mú odabángê Fyílip. 4Jǒn mú Nkye banet osoo mú Osówo o/mû mu o-sét ng Otu Hérot kángkáng nkéré o/fu, kyi*fí kanong ńkyí mú mǔ odabé Heródyas*. 5Otu Hérot o/mû mu o-kyé ng o/fu, nyǐ o-ju ng ǎ, nké nyǐ o/mû mu o-shî ng banet-Jûs, ké ebóng, mbé ba/mû ba/kúng Jǒn wǎ mkpábé mú odasét byiraa-Osówo.

6Ké dyicí ńdyí Otu Hérot o/chîkwárê dyije dyikíri ńdyí ba/fwon ǎ, wǎn-Heródyas mú onyinyi o/ne ane ké bushú ḿbú bacinbánet-Otu Hérot kángkáng. Dyityém dyi/nyîn Otu Hérot kanong kanong, 7ne o-ryí ǎ ocím o-sem o/fu, n-kyâ ǒ nang ebóng chwǒm ńkyí ada mě ebí.

8Ké okabe mú boné-wǎn ámu, o-bí Otu Hérot o/fu, kye mě dyishí ńdyí Jǒn mú Nkye banet osoo mú Osówo abe abe ké ékóryá. 9Otu Hérot o-firi bafip báfip, nké ké bubwô ḿbú nyǐ oo/ryí ocím ké bushú ḿbú bacinbánet emen kángkáng, o-kye busa o/fu, bachi eringe nyí mú wǎsíng-onyinyi ámu o/sét. 10O-fu kâng ba-da-két Jǒn dyishí ké mgbokobá. 11Ba-bâ ne ndyí ké ékóryá ba-kye mú wǎsíng-onyinyi ámu, mú o/kúng kándyí o-da-kye boné emen. 12Bǎmgbán-Jǒn ba-bâ, ba-ba-kúng kiikyuryukyuryu-enyam-byiko ba-da-ryii. Ne ba-dim kâng ba-da-sét Jisos.

Jisos o/nen Égot-Banet Bujam Esim Etánge

(Mâk 6:30-44; Lûk 9:10-17; Jǒn 6:1-14)

13Ké nkéré mú Jisos o/jwo kyiraa ánkyi, o-dim ké kyikit ánkyi ké ókpǐ nyǐ kǎnchí o-wâa ké kyikit ńkyí banet ba*fí*. Banet ba-jwo kyi-kim ne nkyí, ba-dim ba-mîng eshê ebe, ba-wâa ne nyǐ ké kyikû ḿbú abe kyísí. 14Jisos o-byí ké ókpǐ, ne ké nkéré mú o/ri bujê-banet, bafip ba-sú ǎ ké dyityém kyi-kim ne mbé. Ne o-chi banet ebe ḿbé mbe ba-rwôm m ba-nyange.

15Ké dyikurúku ándyi, bǎmgbán emen ba/ba ǎ ekâm, ba-sét ǎ ba/fu, dyikurúku dii/fyi, ne kyikit ńkyín banet ba*fí ba-kyú u*. Fu banet ḿbén ba-dim ba-wâa ké eshê, ba-da-ré byiryíng mbé bayén, ba-ryí.

16Jisos o-faa kámbé o/fu, kyi*fí ńkyí mbé badadim*. Ben bayén kye n̂g kámbé chwǒm ba-ryí.

17Mbé ba-faa ǎ ba/fu, ńkyí be byimu ne nkyí nyín kyi*da/shwôm byirim-berêt byitánge ne ekworê efee*.

18Jisos o-sét kámbé o/fu, bâ n̂g ne mbyí kwán ba-kye mě. 19O-sét banet ámbe o/fu, bakyú me ké biǐbyâa. O-kúng kâng byirim-berêt ámbyi byitánge ne ekworê ányi to efee, o-bêem achi o-tún kyíbóng, o-kó Osówo asǎma. O-ját byirim-berêt ámbyi o-kye bǎmgbán emen. Ne mbé ba-koo ba-kye banet ámbe. 20Nang yeě nang yeě o/ryí o-zût. Bǎmgbán emen kâng ba-bwóp ekén nyí e/waa kyísí, ba-fé ké bookye súsú diǐkpú ne bufee. 21Ocím-banyinchéng ḿbé ba/ryí ba/mû nang égot-banet bujam esim etánge, ba*da/pan banyinyi ne ḿbé bwǎsíng*.

Jisos o/cen Twóóm Kyíbóng-Kace

(Mâk 6:45-52; Jǒn 6:15-21)

22Jisos o-fu kâng bǎmgbán emen ba-nung ké ókpǐ, ba-bwóp ǎ kashú, ba-nyáng ba-jâ bukô-baya ḿbú bubónge, ńdyí nyǐ mu o-sét ng banet ámbe o/fu, bajâ. 23Ké nkéré mú oo/sét banet ámbe ba-dim, o-yú kǎnchí emen o-jâ kyíbóng-kaku nshwam edafé. Ké nkéré mú dyikurúku dii/fyi, Jisos o/mû áku kǎnchí. 24Ké nkéré ámu, ókpǐ oo/tíbî ké otyém-baya kanong kanong, bunâng-baya bu/mû mbu bu-náng ng kámú, ké ebóng, afú a/mû nyi a-tugi ng ké mǔ. 25Ké otyém ótyem mú égbáng echât ne a-kûribi égbáng nyâchât nyí abwô-dyicófóróng, Jisos o/bakâm kámbé, o-cen n o-bâ twóóm kyíbóng-kace. 26Ké nkéré mú bǎmgbán emen ba/ri ǎ mu o-cen n o-bâ twóóm kyíbóng-kace, bushî bu/chi kámbé kanong kanong. Ba-raa ba/fu, okúsí, ne ba-wonge ne bushî ké byiko.

27Nké Jisos o/waa o-raa ne mbé ké abe ányi o/fu, me. Kám m̂ dyityém. *Da n̂g eshî*.

28Ne Pyíta o-faa kâng o/fu, Otu Kyítá, â nkyi wo ké ntûntû, sét mě a/fu, byí ké ókpǐ a-bâ a-kâm mě.

29Jisos o-sét ǎ o/fu, bâ. Pyíta o-byí kâng ké ókpǐ, o-kpet ecen o-câ twóóm kyíbóng-kace Jisos edakâm. 30Nké ké nkéré mú o/ri afú nyí nyi a-tugi ng kâng, bushî bu-kám ǎ, ne o-kpet eríbî o-câ ké kafâ-kace. O-wonge o/fu, nyángê mě, ǎ Otu Kyítá.

31Ké abe ányi, Jisos o-tan bubwô o-níbî ǎ, ne o-raa ne nyǐ o/fu, dyityém eyên ńdyí a/fé ne me dyi*da/jê*. Ebóng kyi/chi ne amu ne atyém afee.

32Mbé ashí amúmú ba-nung ké ókpǐ, ne afú a-chee beem. 33Bǎmgbán-Jisos ḿbé ba/mû ké kafâ-ókpǐ ba-kye Jisos ofê. Ba-raa ba/fu, wo a-chi i Wǎn-Osówo ntûntû.

Jisos o/chi Banet ba-nyange ké Genézéret

(Mâk 6:53-56)

34Ba-nyáng baya ba-ba-tîm ké Genézéret, 35ké kyikit ńkyí banet ba/cêe Jisos. Ba-twóm kâng ba-sét banet ḿbé mbe ba-rwôm m, ḿbé mbe ké kángkáng eshê nyí nyi ányi fáráng, ba-bâ ne mbé kyikit-Jisos. 36Ba-tîm ǎ arông ba/fu, omîng banet ḿbé mbe ba-rwôm m ba-ta nang ocím-kyídí emen mǔ mu. Ne kángkáng banet to ḿbé ba/ta kámú ba/nyange.

Currently Selected:

Mátyuu 14: BKY

Highlight

Copy