SEKARIA 6
6
Luk Sinier Ratnan Apat Keréta
1Idi inan teh luk sinierku. Ui nenier apat keréta luk remuat rat arang dueh pegkung tekaling. 2#Lin 6.4; Lin 6.5 Keréta luk pun-pun ineh rinuid kuda luk mesia', luk kedueh rinuid kuda luk mitem, 3#Lin 6.2 luk keteluh rinuid kuda luk mebuda', idi luk keapat rinuid kuda luk mabuh. 4Idi ui nemutuh melaikat ineh mada' ilung ratnan keréta ineh?
5 #
Lin 7.1
Idi kebalaneh, “Ieh ineh apat bui, luk pangeh nacing rat pa kiung Tuhan amung tana' ini.” 6Keréta luk rinuid kuda luk mitem ineh amé' Babil luk pa tinueh busat aco. Kuda luk mebuda' amé' pa acep aco, idi kuda luk mabuh amé' inan bawang luk pa kabing busat aco. 7Kareb kuda luk mabuh neremuat, ideh pian miket nalan amé' nier tana' ini. Idi kebala melaikat nedeh, “Amé' nier tana' ini.” Idi ideh nenalan. 8Idi melaikat nengitang negku, “Kuda-kuda luk iné' Babil luk pa tinueh busat aco ineh pangeh nengagka' useh Allah.”
Sekaria Icuk Nganau' Pata Luun Uluh Yosua
9Idi bala ini biré Tuhan negku. 10KebalaNeh, “Ngalap amung baré luk biré Heldai, Tobia, idi Yedaya, lun luk tiban ineh. Idi bang aco sineh teh do' amé' ruma' Yosia Sepania. Amung lemulun ineh pangeh nuli' rat Babil, bawang luk inandeh tiban ineh. 11Do' ngalap pirak idi amas luk pangeh birédeh, idi nganau' aceh pata, idi nganau' neneh luun uluh Yosua Yosadak, Imam Rayeh ineh. 12#Yer 23.5; 33.15; Sek 3.8 Mada' neneh ratnan luk bila Tuhan luk Melalud, kebalaNeh, Lemulun luk titen Angat miak temubu' su luk inanNeh, idi mudut Ruma' Tuhan baruh. 13Ieh miak mudut neneh, id miak buren mepad kudeng Raca', idi Ieh miak ngimet pupuNeh. Idi aceh Imam miak tuped iring kerusi Raca' ineh, idi Didueh pad-pad ngakem dengan do'.’ 14Idi pata ineh miak mangun ku aceh terawé bang Ruma' Tuhan ratnan Heldai, Tobia, Yedaya, idi Yosia.”
15Lemulun luk tudo mado miak macing ngedengan nedeh luk mudut Ruma' Tuhan baruh. Kareb ruma' ineh pangeh pinudut, muyuh miak kali' idi Tuhan luk Melalud nengecuk negku amé' nemuyuh! Amung ini miak mangun kudeng muyuh maya' amung-amung ukum Tuhan Allah muyuh.
Currently Selected:
SEKARIA 6: BLD
Highlight
Share
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
