SEKARIA 5
5
Luk Sinier Ratnan Aceh Surat Luk Temulud
1Idi teh ui nenier aceh surat luk temulud. 2Idi melaikat ineh nengitun negku ratnan luk sinierku. Idi kebalaku neneh, “Ui nier aceh surat luk temulud, luk kikadang limeh depeh, idi pipangneh dueh depeh setangal.”
3Idi kebalaneh negku, “Bang surat ini pangeh inayud ratnan kediman luk miak remuat aput-aput tana'. Baladneh selipa ngegala' ratnan amung lun luk mano miak talan ratnan tana' ini. Idi baladneh selipa teh ngegala' ratnan amung-amung lemulun luk mebalih kareb pebulung miak talan teh. 4Tuhan luk Melalud pebala idi Ieh miak ngeruat kediman ineh, luk miak semuet bang ruma' anid-anid burur lun luk mano idi ruma' lemulun luk mebalih kareb pebulung. Idi kediman ineh miak tudo' bang ruma'deh pad kayuh idi batu ruma'-ruma' ineh uen ngusag.”
Luk Sinier Ratnan Decur Luk Bang Buan
5Idi melaikat ineh nesilagan sekua' teh, kebalaneh, “Nier luk miak macing nekini!”
6“Anun ineh?” kebalaku.
Idi kebalaneh, “Ieh ineh aceh buan, idi ieh mangun ku pinginud sala' luk aput tana' ini!”
7Idi kakeb buan ineh inau' ratnan semara'. Kareb ui nenier, kakeb luk inau' ratnan semara' ineh inukab, idi bang ineh inan seburur decur!
8Idi kebala amelaikat ineh, “Decur ini, ieh ineh pinginud sala'!” Idi ieh nengeranek neneh bang buan ineh teh idi nengakeb neneh. 9Idi ui netengook idi nekali' dueh burur decur luk inan ilad mepad kudeng suit rot luk temulud amé' matun negku. Idi teh ideh nenguit buan ineh amé' déi' dita'.
10Idi kebalaku kuan melaikat ineh, “Iten didueh amé' iapeh buan ineh?”
11Idi kebalaneh, “Ideh pian mudut aceh ruma' sembayang kuanneh déi' Babil. Kareb ieh pangeh pinudut, buan ineh miak uen ngerareng bang ruma' ineh pad ieh inan sembayang.”
Currently Selected:
SEKARIA 5: BLD
Highlight
Share
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
