SEKARIA 7
7
Lun Luk Mawa Na Kuman Dengan Siayu Inukum
1Tuhan namaré aceh bala ni Sekaria bang lak luk keapat kareb imet Raca' Darius. Idi bala ineh nacing apat aco bulan iwa', ieh ineh Bulan Kisleb.
2Lun Baitel pangeh nengecuk ni Sareser idi Regemelek dengan lun dukendeh amé' Ruma' Tuhan luk Melalud, pad ideh miak sembayang mutuh peruan Tuhan. 3Idi ideh nengitun imam-imam idi nabi-nabi, kebaladeh, “Petuluké kai temido ngaceku usag Ruma' Allah, idi mawa' na kuman bang bulan limeh, mepad kudeng luk inau' kai bang tuda'-tuda' lak kinioneh?”
4Idi bala Tuhan nacing negku. 5KebalaNeh, “Mada' nelun luk bang bawang ini dengan imam-imam, ieh ineh kareb ideh mawa' na kuman idi temido bang bulan limeh idi bulan tudu', kinio tudu' ngepulu' lak, idi na ideh nengubur Negku. 6Idi kareb ideh nekuman idi nengirup, ideh nengerawé bururdeh sebuleng.”
7Ini mepad kudeng luk bila Tuhan dengan tang nabi-nabi luk atun, kareb Yerusalim mepanu' ku lemulun dengan na susa', idiinan teh lemulun luk tudo bang bawang luk isuut luk libut-libut bawang rayeh, ieh ineh luk pa kabing busat aco, idi luun surud luk pa acep aco.
Lun Yahuda Tiban Ngaceku Ngelaba Ukum Tuhan
8Tuhan nemaré bala ini ni Sekaria: 9“Ui pangeh nengecuk nemuyuh mutut ukum luk matu. ‘Do' muyuh méi' seburur inan seburur. 10Aleg ngedereh tinula', anak maté, sakai luk tudo arang muyuh, idi lun luk masi' pana'. Idi aleg muyuh ngerawé dalan luk inan muyuh ngedereh nelun baken.’
11“Iamo' pupuKu ara' ninger balaKu. Idi ideh neteketed ratnan amung ukumKu ineh. 12Idi niatdeh metueh mepad kudeng batu, idi na ideh pian ninger bada' luk biréKu nelun nabi, luk mulun bang kareb luk mon, pad Ui pelaba useh. 13Ngaceku ideh na neninger kareb Ui nepebala, idi Ui na pian ngua' sembayangdeh. 14Mepad kudeng barui. Ui nemalid nedeh, pad ideh tudo bang bawang pupu baken. Ideh nenganau' bawang pupu baken. Ideh nenganau' bawang ini luk do' dat ali', pad seburur pana' nateh luk tudo su ini.”
Currently Selected:
SEKARIA 7: BLD
Highlight
Share
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
