SEKARIA 14
14
Yerusalim Idi Amung-Amung Pupu
1Aco luk inan Tuhan nganau' amung ineh miak macing. Idi bawang Yerusalim miak uen ngaro, idi binaweh luk ilap miak uen mabpat su siren muyuh. 2Tuhan miak ngamung amung-amung pupu pad ideh munu' Yerusalim. Bawang rayeh ineh miak lapen, ruma'-ruma' miak uen ngaro, idi decur-decur miak inan pasét. Sebuang lemulun miak tebanen, iamo' lemulun luk ketecan na uen ngusu rat bang bawang rayeh ineh. 3Idi Tuhan miak amé' munu' amung pupu ineh, maya' kudeng luk inau'Neh rat mon. 4Kareb ineh Ieh miak tuped luun Pegkung Saitun, luk pa busat aco Yerusalim. Idi Pegkung Saitun ineh miak mekupa rat pa busat aco macing pa acep aco, pad inan aceh raked luk rayeh. Setangal pegkung ineh miak mubuh amé' pa tinueh busat aco, idi setangal miak mubuh amé' pa kabing busat aco. 5Muyuh miak buro maya' raked ineh, luk macing bal déi' pegkung ineh. Muyuh miak buro mepad kudeng luk inau' tepun muyuh kareb tana' meruyuh, kareb imet Usia, raca' Yahuda. Tuhan Allahku miak macing dengan amung melaiaktNeh.
6Kareb ineh na melau' idi meteneb. 7Idi na medacem teh. Idi kareb malem pana' macang kidi-kidi. Tuhan mo' luk kali' kareb amung ini miak mangun.
8 #
Yeh 47.1; Yah 7.38; Lin 22.1 Bang aco sineh, abpa' ulun miak manud rat Yerusalim, idi sebuang miak macing nan Abpa' luk Mepaci' idi sebuang nan Abpa' Rayeh. Idi abpa' ineh miak manud ruked lak. 9Idi Tuhan miak mangun ku raca' aput-aput tana'. Idi kareb ineh Tuhan sebuleng mo', idi ngadanNeh sebuleng mo'.
10Idi tana' luk libut-libut Yerusalim miak uen ngeraked rat Giba luk pa tinueh busat aco macing inan Rimon luk pa kabing busat aco, Yerusalim miak uen ngedita' meluun ratnan tana' luk libut-libutneh, ieh ineh rat Tanga' Beniamin macing nan Tanga' Lidung, su luk inan aceh tanga' atun, idi rat Pudut luk Medita' luk titen Hananel macing su luk inan raca' ngeradu' bua' anggur. 11#Lin 22.3 Idi lun mula' miak do' udeng su ineh. Idi na inan susa'.
12Tuhan miak ngacing aceh ét luk pelaba bura' kuan amung pupu luk munu' Yerusalim. Uangdeh miak melu kareb ideh tuped pana'. Ideh teh matehdeh idi dila'deh miak melu.
13Kareb ineh Tuhan miak nganau' nedeh pelaba gagau idi matot, pad anid-anid burur miak ngakem lemulun luk iringneh idi munu' neneh. 14Lun Yahuda miak munu', pad ideh matar Yerusalim. Ideh miak ngaro binaweh maung-amung pupu—ieh ineh amas, pirak, idi kibung luk mula' pana'.
15Idi teh aceh ét luk pelaba bura' miak macing luun kuda, idi aya' luk seupa kuda idi seupa keladai, unta idi keladai pana', ieh ineh amung aya' baweh bunu' ineh.
16 #
Uk 23.39–43
Kareb bunu' ineh pangeh linaya', idi amung-amungdeh luk neketecan miak amé' Yerusalim anid lak, pad sembayang inan Raca', ieh ineh Tuhan luk Melalud, idi pad ngerayeh Irau Lepo. 17Kudeng aceh pupu ara' amé' sembayang inan Raca', ieh ineh Tuhan luk Melalud, idi udan na mebpeh luun tana'deh. 18Kudeng lun Masir ara' ngerayeh Irau Lepo, ideh miak mekaneh ét luk barén kuan anid pupu luk ara' amé'. 19Ini ukum luk miak macing kuan Masir idi kuan amung pupu baken, kudeng na ideh ngerayeh Irau Lepo.
20Kareb ineh icung kuda miak uen ngarit dengan bala ini, “Linigan kuan Tuhan.” Idi lacang bang Ruma' Allah pana' mepad ligan kudeng ligan luk pa atun bubpun. 21Anid-anid lacang luk déi' Yerusalim idi Yahuda miak uen ngeligan kuan Tuhan luk Melalud. Lemulun luk maré baré miak amé' ngalap lacang ineh, ku nanek uang pung luk barén kuan Tuhan. Idi kareb ineh na luk idi lemulun luk pepua' bang Ruma' Tuhan luk Melalud.
Currently Selected:
SEKARIA 14: BLD
Highlight
Share
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
