MALAKI 1
1
1Ini bala Tuhan luk badén Malaki kuan lun Israil:
Awa Tuhan Kuan Lun Israil
2 #
Yes 34.5–17; 63.1–6; Yer 49.7–22; Yeh 25.12–14; 35.1–14; Am 1.11–12; Ob 1–14 Kebala Tuhan nan pupuNeh, “Ui pangeh mawa nemuyuh rat mon.”
Iamo' kebaladeh, “Kudeng apehké Iko nengegala' awaMu nekai?”
Kebala Tuhan, “Sagan pana' Esau idi Yakub denganak, Ui mawa ni Yakub idi inulneh, 3#Rum 9.13 iamo' Ui megateh ni Esau idi inulneh teh. Ui pangeh nengusag bawang Esau luk luun pegkung, pad tana' ineh inan pung luk meliput tudo.”
4Kudeng inul Esau, ieh ineh lun Edom, pebala, “Bawang tau pangeh inusag, iamo' tau miak mudut baruh,” Tuhan miak ngor baladeh, “Nima' nedeh mudut baruh — idi Ui miak ngusag neneh teh. Lun baken miak neten nedeh, ‘Bawang luk dat' idi ‘Pupu luk inan Tuhan megateh ruked-ruked.’ ”
5Pupu Israil miak nier ini dengan matehdeh sebuleng, idi ideh miak pebala, “Tuhan ineh melalud, sagan pana' mado rat bawang Israil!”
Tuhan Mada' Dat Lun Imam
6Kebala Tuhan luk Melalud kuan lun imam, “Anak ngedita' tamanneh id demulun matot nelun luk kuan neneh. Ui ini taman muyuh, ngudeh muyuh na ngedita' Negku? Ui luk kuan nemuyuh—ngudeh muyuh na matot Negku? Muyuh ngedat Negku, iamo' kebala muyuh, ‘Kudeng apehké kai nengedat Namu?’ 7Ngaceku muyuh nemaré akan luk dat luun bubpunKu. Idi kebala muyuh, ‘Kudeng apehké kai nengedat Namu?’ Ngaceku muyuh nengerawé bubpun Tuhan miak uen ngedat. 8#Bad 15.21 Kudeng muyuh maré pung luk mebuser Negku, petuluké ineh? Kudeng muyuh maré pung luk mekio' idi luk mét, petuluké ineh? Do' muyuh nutun maré aceh luk kudeng ineh kuan pengulu muyuh. Mawangké niatneh nemuyuh? Idi miakké ieh ngedengan nemuyuh?”
9Idi kebala Malaki, “Kudeng muyuh lun imam nutun mutuh Allah ngedengan netau nekini, kali' rungen Ieh na ninger sembayang muyuh, ngaceku dat muyuh. 10Idi kebala Tuhan luk Melalud, Meluun do' seburur muyuh ngitek tanga' Ruma' Allah, pad muyuh na nganau' apui luk na ulek luun bubpunKu. Na Ui mawang niat nemuyuh! Na Ui pian ngalap luk barén muyuh Negku. 11Aput-aput tana' lemulun ngerayeh Negku. Idi iapeh-iapeh pana' ideh ngeseb umau luk do' buen idi maré baré luk petulu kuanKu. Amung-amungdeh ngerayeh Negku! 12Iamo' muyuh ngedat Negku, kareb muyuh mala bubpunKu na ulek, idi ngedat akan luk barén muyuh Negku. 13Kebala muyuh, ‘Pelaba usam kai nganau' luk kudeng ini!’ Idi muyuh teketed rat Negku. Muyuh maré pung luk pino muyuh idi luk mekio' idi luk mét kuanKu. Petuluké Ui miak ngalap luk kudeng ineh rat nemuyuh? 14Kediman kuan lun luk naluk luk maré pung luk na ulek kuanKu, kareb ieh pangeh nepejani' maré luk do' rat arang aya'neh kuanKu. Ngaceku Ui ini aceh Raca' luk rayeh idi amung-amung pupu matot Negku, kebala Tuhan luk Melalud.”
Currently Selected:
MALAKI 1: BLD
Highlight
Share
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
