MALAKI 2
2
1Kebala Tuhan luk Melalud kuan imam-imam, “Ini aceh ukum kuan muyuh: 2Do' muyuh ngedita' Negku dengan lu ruen muyuh. Kudeng muyuh na ninger balaKu, idi ngimet neneh do'-do', Ui miak ngacing kediman kuan muyuh. Peruan muyuh luk rat Negku mangun ku kediman kuan muyuh. Setuneh Ui pangeh nengediman peruan ineh, ngaceku muyuh na ngimet ukumKu do'-do'. 3Ui miak mada' dat anak-anak muyuh, idi ngelusi amung téi' pung luk barén muyuh luun kiung muyuh, idi Ui miak nala' nemuyuh dengan téi' ineh, 4#Iap 3.11–13 pad muyuh kali' Ui luk nemaré ukum ini kuan muyuh, pad pejani'Ku dengan lun imam, luk inul Liwi miak lutep.
5 #
Iap 25.12
“Ui nepejani' maré ulun luk do' nedeh, idi amung ini pangeh biréKu nedeh, pad ideh miak ngerayeh Negku. Idi kareb ineh ideh matot Negku pad ideh nengerayeh Negku. 6Ideh nemada' luk matu, idi na nemada' luk mesala'. Ideh do' rurum Negku; ideh nenganau' luk matu idi nengedenan nelun baken, pad ideh ugka' nganau' luk dat. 7Kekamen imam, ieh ineh mada' bada' luk matu ratnan Allah. Do' idé-idé pana' miak amé' nedeh idi sibada' ratnan luk pianKu, ngaceku ideh lun duken Tuhan luk Melalud.
8“Iamo' muyuh lun imam pangeh numai ratnan dalan luk matu. Bada' muyuh pangeh nenganau' mula' lemulun ngakem luk mesala'. Muyuh pangeh nengelaba jani'Ku luk nemuyuh. 9Ngaceku ineh Ui pana' miak nganau' nelun Israil ngedat nemuyuh, ngaceku muyuh na maya' badaKu, idi kareb muyuh mada' ratnan luk pianKu, muyuh na nganau' luk mepad kuan amung lemulun.”
Lun Israil Na Lutep Inan Awandeh
10Naké amung tau sebuleng Taman, ieh ineh sebuleng Allah luk nemudut netau? Ngudeh tau na maya' jani' tau inan kinanak tau luk baken? Ngudeh tau ngedat pejani' Allah inan tepun tau? 11Lun Yahuda na nemaya' jani'deh inan Allah, idi ideh nenganau' kekamen luk dat bang bawang Israil idi déi' Yerusalim. Ideh pangeh nengelutak Ruma' Allah luk inan Tuhan mawa. Deléideh nengaweh decur pupu luk sembayang inan akang. 12Do' Tuhan nala' idé-idé luk nganau' kudeng ineh, pad ieh na mangun ku pupu tau, ieh ineh pupu luk maré baré kuan Tuhan luk Melalud.
13Idi ini aceh kekamen luk inau' muyuh. Muyuh nangi' idi ngarod iring bubpun Tuhan, ngaceku Ieh na ngalap baré muyuh. 14Idi muyuh ngitun, “Anun punneh?” Ieh ineh ngaceku Tuhan kali' namu nengelaba jani'mu inan awan luk ilapmu kareb iko anak adi'. Ieh luk rurummu, idi iko na nemaya' jani'mu neneh, sagan tu pana' iko nepejani' inan Allah ku iko lutep neneh. 15Allah nenganau' nemedueh mangun ku sebuleng burur idi sebuleng roh. Ngaceku pian Allah tau inan anak luk mangun ku pupu Tuhan luk matu. Ngaceku ineh matar do'-do', pad seburur pana' na ngelaba jani'neh inan awan luk ilapneh kareb ieh anak adi'. 16Kebala Tuhan Allah lun Israil, “Ui megateh inan lemulun luk patad ratnan awanneh. Ui megateh inan deléi luk nganau' kudeng ineh kuan awanneh. Ngaceku ineh matar do'-do', pad muyuh na ngelaba jani' muyuh inan awan muyuh.”
Aco Luk Inan Ngukum Maté Macing
17Tuhan musam ninger bala muyuh. Iamo' kebala muyuh, “Musam ngudeh Ieh lek?” Ngaceku muyuh mala, “Tuhan luk Melalud ngerawé amung lun mesala' do', idi mawang niat nedeh.” Idi teh muyuh mala, “Iapeh Allah luk ruendeh matu di?”
Currently Selected:
MALAKI 2: BLD
Highlight
Share
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
