MALAKI 3
3
1 #
Mat 11.10; Mrk 1.2; Luk 1.76; 7.27 Idi Tuhan luk Melalud ngor bala muyuh, “Ui miak ngecuk nelun dukenKu nganau' temina' dalan kuanKu. Idi denak-denak Tuhan luk tekapen muyuh miak macing bang Ruma'Neh. Idi lun duken luk inan muyuh mawang niat miak macing idi mada' jani'Ku.”
2 #
Lin 6.17
Idé luk tuman kareb Ieh macing? Idé luk na matot kareb Ieh melagan? Ieh mepad kudeng apui luk ngederuno amas idi pirak, idi mepad kudeng sabun. 3Ieh miak macing idi ngukum mepad kudeng lemulun luk ngederuno idi maru' pirak. Ieh miak maru' imamNeh mepad kudeng pirak idi amas luk inau' ngederuno, pad ideh maré baré luk petulu kuan Tuhan. 4Idi baré luk iten lun Yahuda idi lun rat Yerusalim kuan Tuhan miak ngawang niatNeh, mepad kudeng luk atun.
5Kebala Tuhan luk Melalud, “Ui miak amé' ngukum nemuyuh idi ngegala' sala' lemulun luk mangun, idi lemulun luk pasét, idi lemulun luk mala luk na matu, idi lemulun luk naluk nelun luk tebarindeh ratnan tabpardeh, idi lemulun luk muyok decur tinula', idi anak maté, idi lun sakai, idi lemulun luk na ngerayeh Negku.
Ratnan Maré Babpat Pulu'
6“Ui ini Tuhan luk na misu'. Ngaceku ineh muyuh luk inul Yakub nateh inukum. 7Muyuh mepad kudeng tepun muyuh ngaceku muyuh nelemubed rat Negku idi na nengimet ukumKu. Do' muyuh lumi amé' Negku, idi Ui miak lumi nemuyuh. Iamo' kebala muyuh, ‘Anun luk miak ruen kai, pad kai lumi amé' Namu?’ 8KebalaKu, Petuluké selemulun naluk Allah? Na tu-tu! Iamo' muyuh naluk Negku Kudeng apeh? Ratnan babpat pulu' idi baré muyuh. 9Amung muyuh kidiman ngaceku amung pupu ini naluk Negku. 10#Uk 27.30; Iap 18.21–24; Bad 12.6; 14.22–29; Neh 13.12 Do' nguit amung babpat pulu' muyuh amé' bang Ruma' Allah pad inan akan bang Ruma'Ku. Nutun Negku, pad muyuh kali' Negku ngukab tanga' langit idi ngutang peruan kuan muyuh dengan mela. 11Na Ui nima' uled kuman tibu muyuh, pad anggur muyuh mula' bua'. 12Idi amung pupu miak mala nemuyuh pelaba samal, ngaceku tana' muyuh do' inan mulun.”
Allah Pejani' Méi'
13“Muyuh nengedat Negku,” kebala Tuhan. “Iamo' keburi' muyuh, ‘Kudeng apeh kai nengedat Namu?’ 14Keburi' muyuh, ‘Na ulek sembayang inan Allah. Anun ulek maya' balaNeh, idi nginuud ratnan sala' kai pa kiung Tuhan luk Melalud? 15Kai kali' lemulun luk medita' niat luk pelaba samal. Lemulun luk nganau' luk dat pana' inan peruan, idi ideh nutun Allah dengan kekamendeh luk dat dengan na susa'.’ ”
16Idi lemulun luk matot inan Tuhan pebada' seburur dengan seburur, idi Tuhan neninger baladeh. Pa kiungNeh inan surat luk inan ngayud kekamen lemulun luk matot inan Tuhan idi luk ngerayeh Neneh. 17Kebala Tuhan luk Melalud, “Ideh miak mangun ku pupuKu. Idi kareb aco luk inan ngukum, Ui miak ngalap nedeh. Ngaceku Ui méi' nedeh, mepad kudeng aceh taman luk méi' inan anakneh luk do' baya' bala. 18Kareb ineh muyuh miak nier luk mangun kuan lemulun luk matu idi kuan lemulun luk dat, idi kuan lemulun luk maya' Negku idi lemulun lu na maya'.”
Currently Selected:
MALAKI 3: BLD
Highlight
Share
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
