MALAKI 4
4
Kareb Acing Aco Tuhan
1Kebala Tuhan luk Melalud, “Ngerawé' do'-do', kareb aco ineh macing, amung-amung lemulun luk medita' niat idi luk dat miak meseb mepad kudeng geramih. Kareb aco ineh ideh meseb pad na luk ketecan. 2Iamo' kuan muyuh luk na maya' Negku, Ui miak maré laludKu luk ngulun, merasat luun muyuh mepad kudeng aco, pad ngedo' nemuyuh. Muyuh miak mepuit idi mawang niat, mepad kudeng anak sapi' luk rinuat rat bang libungdeh. 3Muyuh miak metueh ratnan lemulun luk dat; ideh mepad kudeng abuh riduen muyuh kareb aco luk inanKu ngacing ukum.
4“Do' ngerawé bada' demulunKu Musa, ieh ineh amung ukum luk biréKu neneh déi' luun Pegkung Sinai, luk miak bén amung pupu lun Israil.
5 #
Mat 11.14; 17.10–13; Mrk 9.11–13; Luk 1.17; Yah 1.21 “Iamo' kareb nateh aco Tuhan luk inan matot ineh macing, Ui miak ngecuk Nabi Elia amé' nemuyuh. 6Ieh miak nguit taman pedo' dengan anak, idi anak pedo' dengan taman, pad Ui na macing idi ngusag bawang muyuh.”
Currently Selected:
MALAKI 4: BLD
Highlight
Share
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
