SEKARIA 12
12
Puit Yerusalim Luk Miak Mangun Muci
1Ini aceh bala Tuhan ratnan Israil, ieh ineh Tuhan luk nemalad langit, idi luk nemudut tana' ini, idi luk nemaré niat kuan lemulun. KebalaNeh, 2“Ui miak nganau' Yerusalim mangun mepad kudeng aceh sangkir abpa' anggur, idi amung pupu luk libut-libutneh miak ngirup macing mabuk. Idi kareb ideh ngerieng Yerusalim, amung-amung bawang Yahuda luk baken pana' miak uen ngerieng. 3Kareb ineh Ui miak nganau' Yerusalim mangun mepad kudeng aceh batu luk meberat—bawang sapeh luk nutun ngiding neneh miak meritep. Amung-amung bawang bang tana' ini miak perurum ngerieng neneh. 4Kareb ineh Ui miak ngatot amung kudadeh, idi nganau' amung lun luk maya' kuda meruden. Ui miak nginita nelun Yahuda, iamo' Ui miak ngebuser mateh kuda bunu'deh. 5Idi amung pupu Yahuda miak pebala arangdeh sebuleng, ‘Tuhan Allah luk Melalud ngetueh pupuNeh luk tudo déi' Yerusalim.’
6“Kareb ineh Ui miak nganau' amung inul Yahuda mangun mepad kudeng aceh apui bang pulung idi mepad kudeng aceh lati' luk malé uen ngeranih. Ideh miak ngusag amung bawang luk muneng. Idi lun Yerusalim miak do' udeng bang bawangdeh ineh.
7“Ui ini Tuhan miak maré tueh kuan baweh-baweh Yahuda atun, pad ubur luk lapen inul Daud idi lun Yerusalim na meluun rayeh ratnan ubur bawang Yahuda luk baken. 8Kareb ineh Tuhan luk miak matar lemulun luk tudo déi' Yersualim, idi lemulun luk meluun laya' pana' miak mangun metueh mepad kudeng Daud. Inul Daud miak nguyut nedeh mepad kudeng Allah, ieh ineh mepad kudeng aceh melaikat Tuhan. 9Kareb ineh Ui miak ngusag anid bawang luk nutun munu' Yerusalim.
10 #
Yah 19.37; Lin 1.7 “Ui miak ngutang kuan inul Daud idi kuan lun Yerusalim Roh éi' idi Roh sembayang. Idi ideh miak nier Neneh luk pangeh tibpekdeh. Idi ideh temido Neneh, mepad kudeng lemulun luk temido anak buleng. Ideh miak temido dengan pelaba susa' niat, mepad kudeng lemulun temido anak deléideh luk atun. 11Kareb ineh inan tido luk rayeh déi' Yerusalim, mepad kudeng tido kuan Baal déi' Raked Megido. 12Anid-anid tetek ruma' bang bawang ineh miak temido. Anid-anid deléi luk inul Daud petala temido, idi awandeh pana' petala temido' deléi luk inul Natan petala temido, idi awandeh pana' petala temido; 13idi tetek ruma' luk inul Liwi, dengan awandeh; tetek ruma' Simi dengan awandeh; 14idi amung-amung tetek ruma' luk baken miak petala temido, idi awandeh pana' petala temido.”
Currently Selected:
SEKARIA 12: BLD
Highlight
Share
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
