SEKARIA 11
11
Ebpeh Amung Raca' Luk Rayeh
1O Lebanon, ngukab amung tanga'mu,
pad apui miak ngeseb amung kayuh tumuhmu!
2O kayuh tongor, do' nangi' idi temido,
ngaceku kayuh tumuh pangeh neluka':
kayuh luk pelaba do' ineh pangeh neseb!
O kayuh luk meraben déi' Basan,
do nangi' idi temido,
ngaceku pulung kara pangeh tibpeng!
3Lun luk ngimet ngitang ku dat niatdeh;
ngaceku uburdeh pangeh netutu'!
Ninger amung balang luk ngeku;
pulungdeh luk tangeb Abpa' Yarden pangeh neseb!
Dueh Burur Lun Luk Matar Dumba
4Kebala Tuhan Allahku negku, “Do' mangun ku lun luk matar sengeriudan dumba luk malé pitayen. 5Lun luk kuan nedeh ngaté nedeh idi nateh inukum. Ideh masui uangdeh idi ideh pebala, ‘Ngubur Tuhan! Kai mangun ku lun do'.’ Lun luk matar nedeh na méi' nedeh.”
(6Idi kebala Tuhan, “Nekini Ui na méi' nedeh luk tudo bang bawang ini. Ui sebuleng miak maré anid-anid lemulun bang palad lun luk ngimet neneh idi raca'neh. Lun luk ngimet ineh miak ngusag bawang ini, idi Ui na pian muit neneh ratnan laluddeh.”)
7Lemulun luk pebelih dumba ineh nenabpar negku, idi ui mangun ku lun luk matar dumba luk malé pitayen. Idi ui nengalap dueh rukud. Sebuleng titenku “Ei'”, idi sebuleng titenku “Rurum.” Idi ui nematar dumba ineh. 8Ui museh inan teluh burur lun luk matar dumba luk megateh negku, idi nengagka' nediteluh bang aceh bulan. 9Idi kebalaku kuan sengeriudan ineh, “Na ui mangun ku lun luk matar nemuyuh peh. Luk pian maté, do' ideh maté. Luk miak pitayen, do' ideh pitayeh. Idi luk ketecan miak pepaté.” 10Idi ui nengalap kayuh luk titen “Ei'” ineh idi nemutul neneh pad ngagka' jani' luk inau' Tuhan dengan amung pupu. 11Idi jani' ineh igka' bang aco sineh. Ideh luk pebelih dumba nenginita negku, idi ideh nekali' Tuhan nepebala nedeh bang luk inau'ku ineh. 12Idi kebalaku nedeh, “Kudeng petulu kuan muyuh, do' maré tabparku negku. Kudeng na, aleg maré.” Idi ideh nemaré negku teluh ngepulu' balad pirak ku tabparku.
13 #
Mat 27.9–10
Idi kebala Tuhan negku, “Do' nganug ineh bang su luk inan nganug binaweh Ruma' Allah, ieh ineh raga luk nepimelih negku.” Idi ui nengalap teluh ngepulu' balad pirak ineh, idi nenganug ineh bang su luk inan nganug binaweh Ruma' Allah. 14Idi ui nemutul rukud luk kedueh luk titen “Rurum.” Idi rurum Yahuda idi Israil inusag.
15Idi kebala Tuhan negku, “Do' iko mangun ku lun luk matar dumba sekua' teh, iamo' sekua' ini ieh lun luk matar dumba luk na mayu. 16Ui pangeh nengeletep seburur lun luk matar sengeriudan dumbaKu. Iamo' na ieh ngedengan dumba luk uen ngedereh. Idi na ieh nakap dumba luk meraruh. Idi na ieh ngedo' luk murat. Idi na ieh maman luk ketecan. Iamo' ideh kuman uang dumba luk pelaba lamu, idi mubput lisundeh. 17Lun luk matar ineh luk na mayu miak kumin! Ieh pangeh nenecan sengeriudanneh! Amung laludneh miak uen ngagka bang bunu'. Langenneh miak melaya', idi matehneh mebuser.”
Currently Selected:
SEKARIA 11: BLD
Highlight
Share
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
