MATIUS 7

Ratnan Ngadu' Nelun Baken

(Luk 6.37–38, 41–42)

1“Aleg ngesala' nelun baken, pad muyuh pana' na uen ngesala' teh. 2#Mrk 4.24 Ngaceku Allah ngukum nemuyuh mepad kudeng muyuh pana' ngedat nelun baken. Idi dengan uad luk muyuh nguad kuan lun baken, kudeng ineh teh Allah nguad kuan muyuh. 3Ngudehké iko nier mumuk kayuh luk bang mateh kinanakmu ineh, iamo' na kali'mu batang luk bang matehmu sebuleng? 4Ngudehké iko mekuu' pebala nan kinanakmu, ‘Nima' negku ngeruat mumuk kayuh rat bang matehmu,’ iamo' inan batang bang matehmu sebuleng? 5O lun luk siayu, ngeruat batang rat bang matehmu sebuleng atun; idi muci iko miak nier dengan megala' pad miak ngeruat mumuk kayuh rat bang mateh kinanakmu ineh.

6“Aleg maré luk meligan kuan uko'-uko', idi aleg mepet bau mutiara muyuh pa kiung barek, pad ideh na ngeradu' neneh pa liang kukuddeh, idi lemubed amé' musing nemuyuh.

Ratnan Mutuh, Nakap, Idi Nateg

(Luk 11.9–13)

7“Do' mutuh, idi miak barén nemuyuh; do' nakap, idi muyuh miak ngalap; nateg tanga', idi tanga' ineh miak kabin kuan muyuh. 8Ngaceku anid-anid lemulun luk mutuh miak ngalap; idi lemulun luk nakap miak kali', idi kuan lemulun luk nateg, tanga' miak kabin kuanneh. 9Taman sapehké rat arang muyuh, kudeng anakneh mutuh ruti, ieh maré batu kuanneh? 10Idi kudeng ieh mutuh lawid, ieh maré menipeh? 11Ngaceku ineh kudeng muyuh luk dat, kali' teh maré luk do' kuan anak-anak muyuh, meluun teh Taman muyuh luk bang surga sikal maré luk do' kuan lemulun luk mutuh Neneh?

12 # Luk 6.31 “Anun-anun luk pian muyuh ruen lun baken kuan muyuh, kudeng ineh teh, do' muyuh nganau' kuandeh; ngaceku ini ilung Ukum Musa idi bada' nabi-nabi.

Tanga' Luk Meperi

(Luk 13.24)

13“Do' muyuh semuet maya' tanga' luk meperi'; ngaceku rayeh tanga' idi rayeh pipang dalan luk nguit amé' bang luk ngaté, idi mula' lemulun luk semuet bang ineh. 14Ngaceku meperi' tanga', idi isuut pipang dalan, luk nguit amé' bang ulun, idi pawa' lemulun luk semuet bang ineh.

Lawa Kayuh Idi Bua'neh

(Luk 6.43–44)

15“Do' muyuh matar do'-do' ratnan nabi luk mebalih luk amé nemuyuh, dengan ngayung ku buluh dumba, iamo' bang niatdeh mepad kudeng bungalé luk mesangit. 16Ratnan bua' kekamendeh muyuh miak ngiti nedeh. Lemulun na miak mureg bua' anggur ratnan lawa tabpa', idi mureg bua' gita' ratnan bitarung. 17Kudeng ineh teh lawa kayuh luk do' ngeruat bua' luk do'; iamo' lawa kayuh luk dat ngeruat bua' luk dat. 18Na miak lawa kayuh luk do' ngeruat bua' luk dat, idi lawa kayuh luk dat ngeruat bua' luk do'. 19#Mat 3.10; Luk 3.9 Lawa kayuh luk na ngeruat bua' luk do' ineh miak tebangen idi talan bang apui. 20#Mat 12.33 Ngaceku ratnan bua'-bua'deh muyuh miak ngiti nabi luk mebalih ineh.

Lemulun Luk Na Initi Tuhan

(Luk 13.25–27)

21“Baken anid-anid lemulun luk pebala Negku, ‘Tuhan, Tuhan,’ miak semuet bang Imet surga; iamo' lemulun luk maya' pian TamanKu luk bang surga. 22Kareb aco ineh mula' lemulun sikal pebala Negku, keburi'deh, ‘Tuhan, Tuhan, kai nemada' bang ngadanMu, idi bang ngadanMu kai nenala' ada', idi bang ngadanMu kai nenganau' kekamen luk rayeh.’ 23#Nani 6.8 Idi kareb ineh Ui pebala nedeh, ‘Na tu Ui miti nemuyuh. Buro muyuh rat Negku, O muyuh luk nganau' luk dat.’

Dueh Burur Lemulun Luk Mudut Ruma'

(Luk 6.47–49)

24“Ngaceku ineh anid-anid lemulun luk ninger balaKu ini, idi maya' ineh, ieh mepad kudeng lun mileh luk nemudut ruma'neh luun batu. 25Idi netemurun udah luk mula', idi abpa' netemubu', idi barui luk metueh nengeduyung ruma' ineh; idi na ieh neluka', ngaceku dirineh inau' luun batu.

26“Anid-anid lemulun luk ninger balaKu ini, idi na sikal maya' ineh, ieh mepad kudeng lun mebacé luk nemudut ruma'neh luun bada. 27Idi netemurun udan luk mula', idi abpa' netemubu', idi barui luk metueh nengeduyung ruma' ineh, idi petacu ieh neluka'; idi luka'neh pelaba bura'.”

Lalud Tuhan Yésus

28Idi pangeh Yésus nemada' bala ini, idi lun mula' mawa ku bada'Neh ineh. 29#Mrk 1.22; Luk 4.32 Ieh nemada' nedeh mepad kudeng lemulun luk inan lalud, baken tu-tu ratnan guru-guru Ukum.

Currently Selected:

MATIUS 7: BLD

Highlight

Copy