MATIUS 8

Yésus Ngedo' Seburur Lemulun Luk Mét Susud

(Mrk 1.40–45; Luk 5.12–16)

1Yésus netemurun rat luun pegkung, idi mula' lemulun nemaya' Neneh. 2Idi inan aceh lemulun luk mét susud iné' Neneh, idi ieh netekeradung pa kiungNeh, keburi'neh, “Tuhan, kudeng Iko pian, miak Iko ngedo' negku.”

3Idi Yésus nenatang ticu'Neh idi nengakem neneh, kebalaNeh, “PianKu; do' iko meligan peh!” Idi petacu susudneh ineh nepali'. 4#Uk 14.1–32 Idi kebala Yésus neneh, “Ngerawé do'-do'! Aleg mada' kuan seburur lemulun pana', iamo' do' iko amé' mada' bururmu siren lun imam, idi maré baré luk icu Musa, pad miak mangun ku sebuleng luk nekali' kuandeh.”

Yésus Ngedo' Seburur Demulun Lun Rayeh Lun Pebunu'

(Luk 7.1–10)

5Kareb Yésus nesemuet bang bawang Kapernaum, idi inan aceh lun rayeh lun pebunu' iné' Neneh, idi nemutuh Neneh, 6keburi'neh, “O Tuhan, demulunku telubid bang ruma' idi ieh mét naté urat, idi ieh pelaba dereh.” 7Idi kebala Yésus neneh, “Ui pian amé' ngedo' neneh.” 8Idi kebala lun rayeh lun pebunu' ineh, “O Tuhan, ui na mayu uenMu ngikak bang ruma'ku; iamo' do' Iko mala sebila' bala mo', idi demulunku miak do' peh. 9Ui pana' selemulun luk pa liang ukum idi pa liang ukum dui pana' inan lun pebunu', idi ui pebala kuan sebururdeh, ‘Amé' iko,’ idi ieh pana' amé'; idi kuan seburur luk baken teh, ‘Amé' tungé',’ idi ieh macing, idi kuan demulunku, ‘Do' nganau' ini,’ idi ieh pana' nganau'.”

10Idi kareb Yésus neninger luk kudeng ineh, Ieh mawa idi kebalaNeh kuan lemulun luk nemaya' Neneh, “Ui pebala nemuyuh, rat arang lun Israil pana' nateh Ui nekali' anu luk kudeng ineh rayeh. 11#Luk 13.29 Ngerawé do'-do'! Inan mula' lemulun sikal amé' rat pa busat aco idi pa acep aco luk sikal tudo dengan Ibrahim, Isak, idi Yakub bang Imet surga. 12#Mat 22.13; 25.30; Luk 13.28 Iamo' lemulun luk petulu semuet bang Imet ineh talan bang dacem déi' liang, idi su ineh lemulun tangi'-tangi' idi pekatep lipen.” 13Idi kebala Yésus nelun rayeh lun pebunu', “Muli' iko, idi miak mangun kuanmu mepad kudeng luk iko pangeh nemanu.”

Idi kareb ineh teh demulun ineh do' peh.

Yésus Ngedo' Mula' Lemulun

(Mrk 1.29–34; Luk 4.38–41)

14Kareb Yésus numak ruma' Pétrus, idi Ieh nenier iban Pétrus telubid ngaceku medadem. 15Idi Yésus nengakem ticu'neh, idi dademneh ineh pana' nedo' peh; idi ieh netumui idi nengasa' Neneh.

16Kareb malem aco, ideh nenguit mula' lemulun luk sinuet ada' amé' matun Yésus. Idi Ieh nenala' amung ada' dengan sebila' bala. Idi Ieh nengedo' amung-amung lun luk mét, 17#Yes 53.4–5 pad ngacing luk bila Nabi Yesaya, kebalaneh, “Ieh sebuleng nengalap amung-amung laya' tau, idi nemabeh amung-amung luk kadan tau.”

Lemulun Luk Pian Maya' Yésus

(Luk 9.57–62)

18Yésus nenier inan mula' lemulun libut-libutNeh, idi petacu Ieh nengecuk anak-anak sekola'Neh guta amé' déi' dipar. 19Idi inan seburur guru Ukum iné' Neneh, keburi'neh, “O Guru, ui sikal maya' Namu pad iapeh luk suetMu.”

20Idi kebala Yésus neneh, “Bungalé inan lubangdeh, idi suit-suit déi' arang gawa' pana' inan arardeh; iamo' Anak-Lemulun na luk inanNeh ngerareng uluhNeh.”

21Idi seburur anak sekola' nepebala Neneh, “O Tuhan, nima' negku amé' nanem tamanku atun.”

22Iamo' kebala Yésus neneh, “Maya' Negku, idi nima' lun naté nanem lun dengandeh luk naté.”

Yésus Ngagka' Barui Idi Ribut

(Mrk 4.35–41; Luk 8.22–25)

23Yésus netemaleb bang aceh alud, idi anak-anak sekola'Neh nemaya' Neneh. 24Denak-denak inan aceh barui luk rayeh déi' bang takung ineh, pad alud ineh lélé mereb ku ribut ineh, iamo' Yésus rudap. 25Idi anak-anak sekola'Neh iné' Neneh idi nengalat Neneh, keburi'deh, “Ngulun nekai, O Tuhan, ngaceku kai lélé maté.”

26Idi kebala Yésus, “Ngudehké muyuh matot, O muyuh luk na petap anu?” Idi Ieh netumui idi nengagka' barui idi ribut abpa', pad ieh melitong peh.

27Idi amungdeh mawa, keburi'deh, “Kudeng apehké lemulun ini, ngaceku barui idi ribut abpa' pana' maya' balaNeh?”

Yésus Ngedo' Dueh Burur Lemulun Luk Sinuet Ada'

(Mrk 5.1–20; Luk 8.26–29)

28Yésus nacing déi' dipar, déi' tana' lun Gadara, idi inan dueh burur lemulun luk sinuet ada' iné' papu' Neneh. Idi didueh nacing ratnan lengutan dengan pelaba sangit, pad lemulun na miak lemaba maya' dalan ineh. 29Idi didueh nengitang, keburi' didueh, “Anunké luk pianMu nekai, O Anak Allah? Iko macing sikal ngedereh nekaiké kareb nateh tarekneh macing?”

30Idi na mado rat nedeh inan tuda'-tuda' barek luk uned nakap akan. 31Idi ada'-ada' ineh nemutuh Yésus, keburi'deh, “Kudeng Iko sikal nala' nekai, do' Iko ngecuk nekai semuet bang burur barek-barek ineh.”

32Idi kebala Yésus nedeh, “Do' muyuh amé'.” Idi ideh pana' neremuat, idi nesemuet bang burur barek-barek ineh, idi amungdeh ineh nupun musul maya' irang pegkung ineh, idi nubpa bang abpa' rayeh. Idi ideh naté nened bang abpa' ineh.

33Idi lemulun luk matar barek ineh pana' neburo idi nesemuet bang bawang, idi ideh nemada' ratnan amung-amung ineh, idi ratnan lemulun luk sinuet ada' ineh. 34Idi amung-amung lemulun neremuat rat bang bawang sikal mepapu' Yésus. Idi kareb ideh nekali' Neneh, ideh nemutuh Neneh buro rat bang bawangdeh.

Currently Selected:

MATIUS 8: BLD

Highlight

Copy