MATIUS 3
3
Bada' Yahya Luk Ngerereb
(Mrk 1.1–8; Luk 3.1–18; Yah 1.19–28)
1Kareb ineh Yahya luk Ngerereb iné' mada' déi' su luk ali-ali bang bawang Yudia, 2#Mat 4.17; Mrk 1.15 kebalaneh, “Do' muyuh uren ratnan sala' muyuh, ngaceku Imet surga pangeh muneng.” 3#Yes 40.3 Ngaceku ini ieh luk pangeh bila Nabi Yesaya, keburi'neh,
“Seburur lemulun ngitang déi' su luk ali-ali,
kebalaneh, ‘Nganau' temina' dalan Tuhan,
idi ngesiri lisangen-lisangenNeh.’ ”
4 #
2 Rac 1.8
Idi ayung Yahya ineh buluh pung unta, idi abet awa'neh kubil pung, idi akanneh, ieh ineh kato idi duru' tebikan. 5Idi lemulun iné' neneh rat Yerusalim idi aput tana' Yudia, idi ratnan amung-amung bawang luk libut-libut Abpa' Yarden. 6Idi ideh nengamo sala'deh, idi Yahya nengerereb nedeh bang Abpa' Yarden.
7 #
Mat 12.34; 23.33 Kareb Yahya nenier nelun Parisi idi Saduki amé' mutuh rerebpen, keburi'neh nedeh, “O muyuh menipeh, idéké luk nemada' nemuyuh ratnan muyuh miak uen ngulun ratnan useh Allah luk macing? 8Do' muyuh ngeruat bua' luk petulu dengan uren. 9#Yah 8.33 Idi aleg muyuh ngerawé bang niat muyuh, ‘Ibrahim ineh taman tau,’ ngaceku ui pebala nemuyuh, Allah melalud ngisu' batu-batu ini mangun ku inul Ibrahim. 10#Mat 7.19 Idi uai pangeh temina' inan uat kayuh, idi anid-anid lawa kayuh luk na ngeruat bua' luk do' miak tebangen idi talan bang apui. 11Ui ngerereb nemuyuh bang abpa', mangun ku tanu' muyuh pangeh nuren, iamo' Ieh luk macing muci rat negku ngerereb nemuyuh ku Roh Meligan idi apui. Ieh meluun lalud ratnan ui, idi ngiding kasutNeh pana' ui na mayu. 12Idi Ieh ngimet bebperNeh, pad Ieh rumik amung padé. Idi Ieh ngamung padéNeh bang lepoNeh, iamo' lipangneh miak sabpenNeh ku apui luk na miak milep.”
Tuhan Yésus Rireb Yahya
(Mrk 1.9–11; Luk 3.21–22)
13Kareb idi Yésus iné' rat Galilia macing Yarden sikal rerebpen Yahya. 14Iamo' Yahya nemebpeng Neneh, kebalaneh, “Do' ui rerebpenMu, ngudehké Iko amé' mutuh negku ngerereb Namu?” 15Iamo' kebala Yésus, “Aganeh nekini, ngaceku do' tau maya' amung-amung luk pian Allah.”
Idi Yahya nemaya' balaNeh. 16Idi kareb Yésus pangeh rireb, Ieh petacu numak rat bang abpa'. Idi langit pana' mukab, idi Yésus nenier Roh Allah temuruhn kudeng aceh suit sukur idi nucep luunNeh. 17#Pud 22.2; Nani 2.7; Yes 42.1; Mat 12.18; 17.5; Mrk 1.11; Luk 9.35 Idi inan aceh tang rat bang langit luk nepebala, “Ini AnakKu luk inanKu mawa, idi Ui mawang niat Neneh.”
Currently Selected:
MATIUS 3: BLD
Highlight
Share
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
