MATIUS 4

Sétan Nutun Tuhan Yésus

(Mrk 1.12–13; Luk 4.1–13)

1 # Ibr 2.18; 4.15 Idi Yésus kinuyut Roh iné' su luk ali-ali pad Ieh tetunin Iblis. 2Idi Ieh mawa' apat ngepulu' aco idi apat ngepulu' alem. Pangeh ineh Ieh melau peh. 3Idi Iblis iné' Neneh, kebalaneh, “Kudeng matu Iko Anak Allah, do' Iko ngisu' batu-batu ini mangun ku ruti kenenMu.”

4 # Bad 8.3 Iamo' kebala Yésus, “Pangeh inayud bang Surat Allah, ‘Baken ratnan ruti mo' lemulun miak mulun, iamo' ratnan anid-anid bala luk bila Allah.’ ”

5Idi Iblis nenguit Yésus semuet bang Bawang luk Meligan, idi nenganau' Neneh luun buduk Ruma' Allah, 6#Nani 91.11; Nani 91.12 idi kebalaneh Neneh, “Kudeng matu Iko Anak Allah, do' Iko ubpa amé' déi' liang, ngaceku pangeh inayud bang Surat Allah,

‘Allah miak mada' melaikat-melaikatNeh ratnan Iko;

ideh miak ngimet Namu ku ticu'deh,

pelé kukudMu na matuk ku batu.’ ”

7 # Bad 6.16 Idi kebala Yésus, “Pangeh inayud teh bang Surat Allah, ‘Aleg iko nutun Allah Tuhanmu.’ ”

8Pangeh ineh Iblis nenguit Yésus iné' luun pegkung luk medita', idi ieh nemada' sirenNeh amung-amung imet tana' ini dengan rayehdeh. 9Idi kebala Iblis Neneh, “Amung-amung imet ini barénku Namu, kudeng Iko tekeradung sembayang negku.” 10#Bad 6.13 Idi kebala Yésus neneh, “Buro iko, Sétan, ngaceku pangeh inayud bang Surat Allah, ‘Do' iko sembayang inan Tuhan Allahmu, idi maya' Neneh mo'.’ ”

11Idi Iblis neburo rat Neneh, idi melaikat-melaikat nacing idi nengasa' Neneh.

Yésus Ngimun Ngakem Déi' Galilia

(Mrk 1.14–15; Luk 4.14–15)

12 # Mat 14.3; Mrk 6.17; Luk 3.19–20 Kareb Yésus neninger Yahya pangeh kikem, idi Ieh nelemubed iné' Galilia. 13#Yah 2.12 Idi na Ieh tudo déi' Nasarét, iamo' Ieh iné' Kapernaum, luk iring tangeb Takung Galilia luk bang babpat Sebulon idi Naptali. Idi Ieh tudo déi', 14pad nacing luk bila Nabi Yesaya, kebalaneh,

15 # Yes 9.1–2 “Tana' Sebulon idi tana' Naptali

luk déi' dipar Abpa' Yarden, idi luk muneng ku takung,

ieh ineh Galilia, tana' lun pupu baken!

16Pupu luk tudo bang dacem,

miak nier acang luk rayeh.

Idi kuan lemulun luk tudo bang lungung su luk inan até

acang miak macing.”

17 # Mat 3.2 Rat kareb idi Yésus nengimun mada', kebalaNeh, “Do' muyuh uren, ngaceku Imet surga pangeh muneng!”

Yésus Nawar Apat Burur Lun Ngerabat

(Mrk 1.16–20; Luk 5.1–11)

18Kareb Yésus nenalan tangeb Takung Galilia, Ieh nenier dueh lun ngerabat luk denganak, ieh ineh Simun luk titen Pétrus, idi kinanakneh Andrias, luk uned ngerabat déi' bang takung ineh. 19Idi kebala Yésus nedidueh, “Do' medueh amé' maya' Negku, idi Ui nganau' nemedueh ku lun ngerabat lemulun.” 20Idi petacu didueh nenecan rabat ineh, idi nemaya' Neneh.

21Idi Ieh nenalan teh, idi Ieh nenier dueh denganak luk baken teh, ieh ineh Yakub idi Yahya Sabdi, luk tudo bang alud dengan Sabdi taman didueh, idi diteluh ngii' rabatdeh, idi Ieh nenawar nedidueh. 22Idi petacu didueh nenecan alud ineh dengan taman didueh, idi nemaya' Yésus.

Yésus Mada' Idi Ngedo'

(Luk 6.17–19)

23 # Mat 9.35; Mrk 1.39 Yésus nenalan aput tana' Galilia, idi nemada' bang ruma' sembayangdeh, idi Ieh nemada' Bala luk Do' ratnan Imet ineh, idi Ieh nengedo' amung-amung lun luk mét, idi melaya' burur. 24Idi bala ratnan Yésus nepiar aput bawang Siria, idi ideh nenguit amung-amung lun luk mét amé' Neneh, idi sebuang mét dengan riput-riput luk mét. Inan sebuang luk sinuet ada', inan teh luk mét meruai, idi inan teh sebuang luk meliai, idi Ieh nengedo' nedeh. 25Idi pelaba ula' lemulun nemaya' Neneh rat Galilia idi Pulu' Bawang rat Yerusalim idi Yudia, idi rat déi' dipar Abpa' Yarden.

Currently Selected:

MATIUS 4: BLD

Highlight

Copy