MATIUS 2

Tuda'-Tuda' Lun Luk Ngikak Rat Pa Busat Aco

1Yésus tinganak déi' Baitlahim bang bawang Yudia, kareb imet Raca' Herodés, idi tuda'-tuda' lun luk mileh nier gituen nacing rat pa busat aco iné' Yerusalim, 2keburi'deh, “Su apehké Raca' lun Yahudi luk tinganak mebaruh? Ngaceku kai pangeh nenier gituenNeh luk pa busat aco. Idi kai macing sikal sembayang Neneh.”

3Kareb Raca' Herodés neninger bala ineh, ieh megagau. Kudeng ineh teh amung lun bang bawang Yerusalim teh. 4Idi ieh nengamung amung imam rayeh idi guru-guru Ukum, keburi'neh, “Iapehké su luk inan Keristus tinganak?”

5Idi kebaladeh, “Déi' Baitlahim luk bang bawang Yudia. Kudeng ineh luk inayud nabi, kebalaneh,

6 # Mik 5.2 ‘O Baitlahim luk bang bawang Yudia,

na iko isuut rat arang lun luk ngimet raca' Yudia;

ngaceku rat namu miak remuat aceh lun luk ngimet

luk sikal nguyut pupuKu lun Israil.’ ”

7Idi Herodés nelulem nawar nelun luk mileh nier gituen ineh, idi nengelio nedeh do'-do' idan gituen ineh nekali'deh. 8Idi ieh nengecuk nedeh amé' déi' Baitlahim, keburi'neh, “Amé' muyuh nakap do'-do' anak luk isuut ineh. Kareb muyuh kali' Neneh, do' muyuh mada' negku, pad ui pana' miak amé' sembayang Neneh.”

9Idi ideh nenalan; idi gituen luk sinierdeh pa busat aco ineh nenalan pa atundeh, idi gituen ineh nugka' pa luun su luk inan anak ineh. 10Kareb ideh nenier gituen ineh ideh pelaba awang niat. 11Idi ideh iné' bang ruma' idi ideh nenier anak ineh dengan tinanNeh Mariam, idi ideh netekeradung sembayang Neneh. Pangeh ineh ideh nengukab pati'deh, idi nemaré baré Neneh, ieh ineh amas, idi luk sabpen luk do' buen, idi mur.#2.11Mur, ieh ineh aceh ilu' luk do' buen ratnan kayuh. 12Allah nemebpeng nedeh bang nupideh na lemubed amé' inan Raca' Herodés teh, idi ideh nuli' maya' dalan baken.

Yusup Idi Mariam Buro Amé' Masir

13Litad ideh nuli', inan aceh melaikat Tuhan nesilagan ni Yusup bang nupineh, idi kebalaneh, “Tumui iko, idi nated anak dengan tinanNeh, idi buro amé' Masir, idi tudo déi' pad ui mada' namu, ngaceku Herodés nakap anak ineh pian ngaté Neneh.”

14Idi Yusup netumui idi nenated anak ineh dengan tinanNeh kareb medacem, idi iné' Masir. 15#Hos 11.1 Idi ieh netudo déi' pad macing Herodés naté, pad ngacing luk bila Tuhan dengan tang nabi, kebalaNeh, “Ui pangeh nenawar AnakKu lu deléi rat Masir.”

Raca' Herodés Ngecuk Ngaté Anak-Anak Luk Isuut

16Kareb Herodés nekali' ieh sinaluk lun mileh luk rat pa busat aco ineh, idi ieh pelaba gateh niat. Idi ieh nengecuk lemulun amé' ngaté amung anak deléi luk déi' Baitlahim idi luk bang amung-amung babpatneh, luk ulun dueh lak amé' pa beneh, maya' kareb luk pangeh linio lun luk mileh ineh neneh.

17Kudeng ini luk pangeh mangun luk bila Nabi Yeremia, kebalaneh:

18 # Yer 31.15 “Inan aceh tang pindenger déi' Rama,

inan luk nangi' idi temido teh.

Rakel nangi' ku anakneh;

na ieh mia buken,

ngaceku amung anakneh luk isuut pangeh naté.”

Yusup Idi Mariam Muli' Rat Masir Amé' Nasarét

19Kareb Herodés pangeh naté, idi aceh melaikat Tuhan nesilagan ni Yusup bang nupineh déi' Masir. 20Idi keburi' melaikat neneh, “Tumui iko idi nated anak luk isuut ineh dengan tinanNeh, idi muli' amé' bawang Israil; ngaceku ideh luk sikal ngaté anak ineh pangeh naté.” 21Idi Yusup netumui idi nenated anak luk isuut ineh dengan tinanNeh idi iné' bawang Israil.

22Kareb ieh neninger Arkilaus pangeh nengelibal tamanneh Herodés mangun ku raca' Yudia, idi Yusup matot amé' déi', iamo' ngaceku pangeh bida' Allah kuanneh bang nupi, idi ieh nelemubed iné' bang bawang Galilia. 23#Mrk 1.24; Luk 2.39; Yah 1.45; Yes 11.1 Idi ieh iné' tebawang bang bawang Nasarét; pad ngacing luk bila nabi-nabi, kebaladeh, “Ieh miak tetanen Lun Nasarét.”

Currently Selected:

MATIUS 2: BLD

Highlight

Copy