MATIUS 20

Pinginud Lun Tebarin Luk Bang Kabun Anggur

1“Imet surga mepad kudeng aceh tuan ruma' luk neremuat pekak uka-uka, pad nabpar lemulun pelé ideh ngakem bang kabun anggurneh. 2Ieh nepejani' nabpar nedeh serigit seaco, idi ieh nengecuk nedeh amé' ngakem bang kabunneh. 3Kareb tangal mudik aco, idi ieh neremuat, idi ieh nenier lun baken tuped mo'-mo' déi' kadai, 4idi keburi'neh nedeh, ‘Amé' muyuh teh ngakem bang kabun anggurku, idi tabpar luk matu barénku nemuyuh peh.’ Idi ideh iné'. 5Idi sekua' teh ieh neremuat, kareb muned aco, idi kareb tangal musul aco teh, idi ieh nenganau' kudeng ineh teh. 6Idi kareb aco malé malem ieh neremuat sekua' teh, idi ieh kali' lun baken tuped mo'-mo' déi' kadai teh. Idi keburi'neh nedeh, ‘Ngudehké muyuh tuped mo'-mo' ieni tebaco-tebaco?’ 7Idi keburi'deh neneh, ‘Ngaceku na luk idi lemulun nabpar nekai.’ Keburi'neh nedeh, ‘Amé' muyuh teh ngakem bang kabun anggurku.’

8 # Uk 19.13; Bad 24.15 “Idi kareb malem aco, tuan kabun ineh nepebala inan lun matar kabunneh, ‘Do' nawar lemulun luk pangeh nengakem, idi maré tabpardeh, ngimun ratnan lemulun luk muci pad macing nedeh luk atun.’ 9Kareb lemulun luk nesemuet malem aco ineh nacing, ideh nengalap tabpardeh anid-anid burur aceh rigit. 10Idi kareb lemulun luk pun-pun ineh nacing, idi ideh ngerawé nedeh ngalap mela; iamo' anid-anid burur ineh pana' nengalap serigit teh. 11Kareb ideh nengalap tabpardeh, idi ideh iné' dengan tekedamut nan tuan ruma' ineh, 12keburi'deh, ‘Lun ini luk muci nengakem dengan segageh mo' kinioneh, idi iko nemaré tabpardeh mepad kudeng kai teh luk nengakem tebaco-tebaco kareb pelaba ét edang.’ 13Iamo' tuan nengor bala seburur, keburi'neh, ‘O aca'ku, na ui naluk namu. Naké iko nengamo negku ngalap aceh rigit? 14Do' ngalap tabparmu idi muli' pianku maré kuan lun ini luk muci tabpar luk mepad dengan tabparmu. 15Naké ui miak nganau' luk pianku ku binawehku sebuleng? Temaruhké iko ngaceku ui luk mekatu?’ ”

16 # Mat 19.30; Mrk 10.31; Luk 13.30 Idi kebala Yésus, “Idi kudeng ineh teh luk pa muci amé' pa atun, idi luk pa atun amé' pa muci.”

Tuhan Yésus Mada' Seketeluh Kua' Ratnan AtéNeh

(Mrk 10.32–34; Luk 18.31–34)

17Kareb Yésus amé' déi' Yerusalim idi Ieh nenguit pulu' dueh anak sekola' ineh, idi kebalaNeh nedeh, 18“Ninger muyuh, nekini tau amé' déi' Yerusalim; idi Anak-Lemulun miak barén bang palad imam-imam rayeh, idi guru-guru Ukum teh; idi ideh sikal ngaté Neneh. 19Idi ideh sikal maré Neneh bang palad lun pupu baken luk situnga Neneh, mebal Neneh, idi nalib Neneh; idi aco luk keteluh Ieh miak tuyen teh.”

Putuh Tinan Anak-Anak Sabdi

(Mrk 10.35–45)

20Kareb ineh tinan anak-anak Sabdi iné' matun Yésus dengan dueh-dueh anakneh, idi ieh netekeradung sembayang Neneh idi nemutuh luk pituen rat Neneh.

21Idi kebala Yésus neneh, “Anunké luk pianmu?”

Idi keburi' decur ineh Neneh, “Do' Iko ngecuk dueh anakku ini tudo denganMu bang ImetMu, sebuleng pa tinueh idi sebuleng pa kabingMu.”

22Iamo' kebala Yésus nan dueh anak Sabdi ineh, “Na medueh kali' luk pituen medueh. Miakké medueh ngirup ratnan sangkir luk rupenKu?”

Idi keburi' didueh Neneh, “Miak.”

23Kebala Yésus nedidueh, “Matu, medueh miak ngirup ratnan sangkirKu. Iamo' ratnan tudo pa tinueh idi pa kabingKu, na Ui melalud maré kuan medueh, iamo' babpat ineh tinina' kuan lemulun luk pinili' TamanKu.”

24Kareb pulu' anak sekola'Neh luk baken neninger ratnan ini, idi ideh museh nedenganak. 25#Luk 22.25–26 Iamo' Yésus nenawar nedeh amé' matun Neneh, kebalaNeh, “Muyuh kali' lun luk ngimet lun pupu baken metueh ngimet nedeh, idi lun rayeh-rayehdeh inan lalud pa luundeh. 26#Mat 23.11; Mrk 9.35; Luk 22.26 Iamo' na ieh miak kudeng ineh arang muyuh, iamo' idé'-idé luk sikal mangun rayeh rat arang muyuh, ieh ineh luk miak mangun ku lun ngasa' nemuyuh; 27idi idé-idé luk sikal mangun ku lun rayeh arang muyuh, ieh ineh luk miak mangun ku demulun muyuh teh, 28mepad kudeng Anak-Lemulun pana' na Ieh nacing pad Ieh miak uen ngasa', iamo' pad Ieh miak ngasa' idi maré ulunNeh mangun ku uli' kuan amung-amung lemulun.”

Yésus Ngedo' Dueh Burur Lemulun Luk Mebuser

(Mrk 10.46–52; Luk 18.35–43)

29Kareb ideh nenalan remuat rat Yeriko, idi pelaba ula' lemulun nemaya' Neneh. 30Idi inan dueh burur lun mebuser luk tudo iring dalan; idi kareb didueh neninger Yésus lemaba, didueh nengitang, keburi' didueh, “O Tuhan, Anak Daud, méi' nekai!”

31Idi lun mula' nemebpeng nedidueh, idi nengecuk nedidueh pirud, iamo' didueh meluun rayeh tang, keburi' didueh, “O Tuhan, Anak Daud, méi' nekai!”

32Yésus nugka' idi nenawar nedidueh, kebalaNeh, “Anunké luk piar, medueh Ui miak nganau' kuan medueh?”

33Idi keburi' didueh, “O Tuhan, kai mutuh kulat mateh!”

34Yésus méi' nedidueh, idi Ieh nengakem mateh didueh. Petacu mateh didueh kulat idi didueh nemaya' Neneh.

Currently Selected:

MATIUS 20: BLD

Highlight

Copy