MATIUS 21

Yésus Semuet Bang Bawang Yerusalim

(Mrk 11.1–11; Luk 19.28–40; Yah 12.12–19)

1Kareb ideh macing muneng ku bawang Yerusalim idi ideh nesemuet bang bawang Baitpagi, luk déi' luun Pegkung Saitun. Yésus nengecuk dueh burur anak sekola'Neh amé' atun, keburi'Neh nedidueh, 2“Amé medueh semuet bang bawang luk pa atun medueh, idi petacu medueh miak papu' aceh keladai luk inabet dengan anakneh; do' neka dingetineh idi nguit amé' Negku. 3Idi kudeng inan lemulun luk pebala anun-anun nemedueh, do' medueh pebala neneh, ‘Tuhan luk pian ku ini,’ idi petacu ieh sikal ngecuk nemedueh nguit nedidueh.”

4Idi amung ini pangeh mangun, pad ngacing luk bila nabi, kebalaneh:

5 # Sek 9.9 “Do' mada' bawang Sion,

Nekini Raca'mu amé' namu.

Ieh mebeneh niat, Ieh tudo luun keted keladai,

luun keladai luk isuut, ieh ineh anak keladai.”

6Anak-anak sekola' ineh iné', idi ideh nenganau' luk icuk Yésus nedeh. 7Idi ideh nenguit keladai idi anakneh, idi ideh nengerareng kuyu'deh luun keted didueh, idi Yésus netudo luun ineh. 8Idi mula' lemulun nemalad ayungdeh luun dalan, idi lun baken nenutu' angat-angat kayuh, idi nengerareng angat-angat ineh uned dalan teh. 9#Nani 118.25, 26 Idi lun mula' luk nenalan pa atunNeh idi pa ketedNeh nengitang, keburi'deh, “Ngubur Anak Daud! Samal kuanNeh luk macing bang ngadan Tuhan! Ngubur Allah!”

10Kareb Yésus nesemuet bang bawang Yerusalim, idi amung-amung lemulun meria' peh, keburi'deh, “Idéké lemulun ini?”

11Idi lun mula' nepebala, “Ieh ineh seburur nabi, Yésus lun Nasarét, luk bang bawang Galilia.”

Yésus Semuet Bang Ruma' Allah

(Mrk 11.15–19; Luk 19.45–48; Yah 2.13–22)

12Yésus nesemuet bang Ruma' Allah, idi nemasut amung lemulun luk masui idi luk melih binaweh bang Ruma' Allah ineh. Ieh nengelukeb méja-méja lemulun luk ngelibal rigit, idi kerusi-kerusi lemulun luk masui suit sukur ineh, 13#Yes 56.7; Yer 7.11 kebalaNeh nedeh, “Pangeh inayud bang Surat Allah, ‘Ruma'Ku tetanen ruma' luk inan sembayang,’ iamo' muyuh nganau' ineh mangun ku su luk inan lun mano.”

14Lun mebuser idi lun meliai iné' Neneh bang Ruma' Allah, idi Ieh nengedo' nedeh. 15Imam-imam rayeh idi guru'-guru' Ukum ineh megateh niat kareb ideh nenier kekamen Yésus luk melalud, idi nekali' anak-anak luk bang Ruma' Allah ineh nengitang idi nepebala, “Ngubur Anak Daud!”

16 # Nani 8.3 Idi keburi'deh kuan Yésus, “Iko kali' baladehké?”

Idi Yésus nepebala nedeh, “Mo' Ui kali'. Naké muyuh nemaca' ayat ini bang Surat Allah? ‘Ratnan tang anak-anak luk isuut idi anak-anak luk niti' pana' uburMu pangeh meriput.’ ”

17Idi Yésus nenecan nedeh, idi neremuat rat bang bawang ineh, idi iné rudap déi' bawang Baitani.

Tuhan Yésus Mulung Aceh Lawa Gita'

(Mrk 11.12–14, 20–24)

18Idi pekak kareb Yésus nelemubed iné' bawang ineh, Ieh melau. 19Idi Ieh nenier aceh lawa gita' luk iring dalan, idi Ieh iné' matun ineh. Idi Ieh nenier na luk idi anun-anun pana', iamo' don sebuleng. Idi kebalaNeh neneh, “Do' iko na kebua' rat nekini macing ruked-ruked peh.” Idi lawa gita' ineh petacu melayuh peh.

20Kareb anak-anak sekola' ineh nekali' ratnan ini, ideh pelaba awa, keburi'deh, “Kudeng apehké lawa gita' ini petacu melayuh?”

21 # Mat 17.20; 1 Kor 13.2 Idi kebala Yésus, “Ngerawé do'-do'! Kudeng muyuh manu tu-tu dengan na merapang, baken muyuh melalud ngnau' kekamen luk kudeng ini kuan lawa gita' mo', iamo' kudeng muyuh pebala kuan pegkung ini pana', ‘Do' iko mubuh idi talan bang abpa' rayeh,’ idi luk icukmu miak mangun peh. 22Idi amung-amung luk pituen muyuh bang sembayang, kudeng muyuh manu, muyuh miak ngalap ineh teh.”

Itun Ratnan Lalud Tuhan Yésus

(Mrk 11.27–33; Luk 20.1–8)

23Kareb Yésus nesemuet bang Ruma' Allah, imam-imam rayeh idi lun rayeh ratnan pupu ineh, iné' Neneh kareb Ieh mada', idi keburi'deh, “Dengan lalud anunké Iko nganau' kekamen ini? Idi idéké luk nemaré lalud ini kuanMu?”

24Kebala Yésus nedeh, “Ui pana' sikal ngitun aceh itun rat nemuyuh; idi kudeng muyuh ngor balaKu, Ui teh miak mada' nemuyuh dengan lalud idéké Ui nganau' kekamen ini. 25Rat iapehké rereb Yahya: rat surgaké, kian ratnan lemulun lek?”

Idi ideh pesaad arangdeh sebuleng, keburi'deh, “Kudeng tau mala', Rat surga,’ idi Ieh miak pebala netau, ‘Ngudehké muyuh na manu neneh?’ 26Iamo' kudeng tau mala, ‘Ratnan lemulun,’ tau matot nelun mula' ini, ngaceku amung-amung deh ngerawé Yahya ineh seburur nabi teh.” 27Idi ideh nengor bala Yésus, kebaladeh, “Kai na kali'.”

Idi Yésus nepebala nedeh teh, “Ui pana' na sikal mala kuan muyuh dengan lalud idéké Ui nganau' kekamen ini.

Pinginud Dueh Burur Anak Deléi

28“Kudeng apehké terawé muyuh? Inan aceh lemulun luk inan dueh anak deléi; idi ieh nepebala kuan anakneh luk atun, keburi'neh, ‘Asi, amé' iko ngakem aco sini bang kabun anggur ineh,’ 29Idi kebala anak ineh, ‘Ara' ui amé',’ iamo' muci ieh nenginuud, idi ieh iné' peh. 30Idi ieh iné matun anakneh luk kedueh idi nepebala kudeng ineh teh; idi kebala anak ineh, ‘Mo, Ama', amé' ui,’ iamo' na ieh iné'. 31Sapehké rat arang dueh anak ineh luk nemaya' pian tamanneh?”

Idi keburi'deh Neneh, “Seluk atun.”

Idi Yésus nepebala nedeh, “Ui pebala nemuyuh, lemulun luk ngamang usin pupuk idi decur-decur luk mesawa' semuet bang Imet Allah pa atun muyuh. 32#Luk 3.12; 7.29–30 Ngaceku Yahya iné' nemuyuh dengan dalan luk matu, idi muyuh na manu neneh; iamo' lun luk ngamung usin pupuk idi decur-decur luk mesawa' manu neneh; sagan pana' muyuh pangeh kali', iamo' muci muyuh na uren idi manu neneh.”

Pinginud Lemulun Luk Ngacam Kabun Anggur

(Mrk 12.1–12; Luk 20.9–19)

33 # Yes 5.1–2 Kebala Yésus, “Ninger muyuh aceh luk pinginud luk baken teh: Inan seburur tuan ruma' luk nenibu aceh kabun anggur, idi ieh nengar libut-libutneh, idi nengukat aceh lubang anggur, idi ieh nemudut aceh lepo luk medita'. Ieh nemaré kabun ineh icam tuda'-tuda' lun matar kabun, idi ieh iné' bawang baken. 34Kareb malé macing karebneh kebua', ieh nengecuk demulun-demulunneh amé' inan lun matar kabun ineh, ngaceku pianneh ngalap babpat bua' ratnan kabunneh. 35Iamo' lun luk ngacam kabun ineh nengakem demulun-demulunneh, idi sebuleng bibaldeh, sebuleng pinatédeh, idi sebuleng binitungdeh ku batu. 36Sekua' teh ieh nengecuk demulunneh luk baken teh, meluun ula' ratnan luk atun; idi ideh nenganau' kudeng ineh teh kuandeh. 37Idi kekipedneh ieh nengecuk anak deléineh amé' nedeh, keburi'neh, ‘Kali' rungen ideh miak ngedita' anakku.’ 38Iamo' kareb lun matar kabun ineh nenier anakneh, idi ideh nepegayam seburur dengan seburur, keburi'deh, ‘Ini inulneh; do' tau ngaté neneh, pad tau ngalap babpatneh.’ 39Idi ideh nengakem neneh, idi nenala' neneh rat bang kabun anggur ineh, idi ideh nengaté neneh.

40“Ngaceku ineh kareb tuan kabun ineh macing, anunké luk ruenneh kuan lun matar kabun ineh?”

41Idi keburi'deh Neneh, “Dengan até luk pelaba dereh, ieh sikal ngaté lemulun luk dat ineh, idi kabun anggur ineh pana' barén uen lemulun baken ngacam, ieh ineh luk miak maré usag bua'neh bang anid-anid karebneh kebua'.”

42 # Nani 118.22–23 Yésus nepebala nedeh, “Naké muyuh nemaca' ayat ini bang Surat Allah?

‘Batu luk tila' lun luk mudut ruma' ineh

pangeh mangun ku batu lidung.

Ieh ineh inau' Tuhan,

idi pelaba do' siren mateh tau.’ ”

43Kebala Yésus, “Ngaceku ineh Ui pebala nemuyuh, Imet Alla miak lapen rat nemuyuh, idi barén kuan aceh pupu luk ngeruat bua' luk petulu. ( 44Idé-idé lemulun luk mebpeh luun batu ini ieh miak mareg peh, iamo' lemulun luk ritapin batu ini miak mekareg.)”

45Kareb imam-imam rayeh idi lun Parisi neninger luk pinginud-pinginudNeh, ideh nekali' Yésus pebala ratnan ideh. 46Idi ideh nenakap dalan sikal ngakem Neneh, iamo' ideh matot nelun mula' ngaceku ideh ngerawé Yésus ineh nabi.

Currently Selected:

MATIUS 21: BLD

Highlight

Copy