MATIUS 19

Yésus Mada' Ratnan Ngelagkan Awan

(Mrk 10.1–12)

1Kareb Yésus pangeh nemada' bala ini, idi Ieh nenalan rat Galilia iné' bang babpat Yudia, luk déi' dipar Abpa' Yarden. 2Idi mula' tu-tu lemulun nemaya' Neneh, idi Ieh nengedo' nedeh déi'.

3Idi lun Parisi nacing sikal nutun Neneh, keburi'deh, “Miakké seburur deléi ngelagkan awanneh ngaceku anun-anun?”

4 # Pud 1.27; 5.2 Idi kebala Yésus, “Naké muyuh nemaca' Surat Allah, ‘Idi Ieh luk pangeh nenganau' lemulun pun-pun, nenganau' nedeh ku deléi idi decur?’ 5#Pud 2.24 Idi kebalaNeh, ‘Ngaceku ineh do' lemulun necan taman-tinanneh idi pamung dengan awanneh, idi diduen miak mangun ku sebuleng burur peh.’ 6Idi didueh ineh baken dueh burur peh, iamo' sebuleng burur mo'. Ngaceku ineh, luk pangeh tinutup Allah aleg seburur lemulun matad peh.”

7 # Bad 24.1–4; Mat 5.31 Idi keburi' lun Parisi Neneh, “Kudeng matu balaMu, anunké punneh Musa nengecuk maré surat patad, pad ngelagkan neneh?”

8Idi kebala Yésus nedeh, “Musa nenima' nemuyuh ngelagkan awan muyuh ngaceku muyuh metueh niat. Iamo' rat pun-pun na ieh kudeng ineh. 9#Mat 5.32; 1 Kor 7.10–11 Ui pebala nemuyuh, idé-idé luk ngelagkan awanneh, kudeng baken ratnan pasét, idi ngaweh lun baken teh, ieh pasét teh. Idi lemulun luk ngaweh decur luk pangeh ligkan ineh, ieh pana' pasét teh.”

10Idi anak-anak sekola'Neh nepebala Neneh, “Kudeng matu lawé ini ratnan deléi idi awanneh, na ulekneh paweh.”

11Iamo' keburi'Neh nedeh, “Bala ini baken kuan amung lemulun, iamo' barén Allah kuan sebuang lemulun mo'. 12Ngaceku inan sebuang lemulun luk pinani', luk pinani' ku lun baken; idi inan sebuang lemulun luk tinganak kudeng ineh rat bang nakan tinandeh; idi inan teh lemulun luk pinani' luk nemani' bururdeh sebuleng, ngaceku Imet surga. Idé-idé lemulun luk mileh kali' ilungneh, do' ieh ngalap neneh.”

Yésus Maré Peruan Kuan Anak-Anak

(Mrk 10.13–16; Luk 18.15–17)

13Kareb ineh lemulun nenguit anak-anak luk isuut amé' matun Neneh, pelé Ieh miak ngerareng ticu'Neh luundeh idi sembayang kuandeh, iamo' anak-anak sekola'Neh nemebpeng nedeh. 14Idi kebala Yésus nedeh, “Nima' anak-anak luk isuut amé' Negku idi aleg mebpeng nedeh, ngaceku lemulun luk kudeng ini luk kuan Imet surga.” 15Idi Yésus nengerareng ticu'Neh luundeh, idi Ieh nenalan.

Ratnan Seburur Anak Adi' Luk Lun Do'

(Mrk 10.17–31; Luk 18.18–30)

16Inan aceh lemulun luk iné' matun Yésus, keburi'neh, “O Guru, anunké kekamen luk do' luk miak ruenku pad ui miak ngalap ulun luk meruked?”

17Idi kebala Yésus, “Ngudehké iko ngitun Negku ratnan luk do'? Inan Sebuleng mo' luk do'; iamo' kudeng iko sikal semuat bang ulun luk meruked, do' iko maya' ukum-ukum ineh.”

18 # Pur 20.13–16; Bad 5.17–20 Idi ieh nengitun Yésus, keburi'neh, “Ukum-ukum anunké ineh?”

Idi kebala Yésus neneh, “Aleg iko ngaté, aleg iko pasét, aleg iko mano, aleg iko mangun ku lun nekali' luk mebalih; 19#Pur 20.12; Bad 5.16; Uk 19.18 ngedita' taman-tinanmu; idi do' iko mawa nelun denganmu mepad kudeng bururmu sebuleng.”

20Idi kebala anak adi' ineh, “Amung-amung ukum ini ui pangeh nemaya'; anunké luk nateh inau'ku?”

21Kebala Yésus neneh, “Kudeng iko sikal mangun meriput, muli' iko, masui binawehmu, maré kuan lun masi', pad iko ngalap binaweh déi' surga: idi amé' maya' Negku.”

22Kareb anak adi' ineh neninger balaNeh, idi ieh neburo dengan susa' niat, ngaceku ieh mula' binaweh.

23Idi Yésus nepebala kuan anak-anak sekola'Neh, “Matu, Ui pebala nemuyuh, mikat tu-tu kuan lemulun luk mula' binaweh semuet bang Imet surga. 24Idi Ui pebala nemuyuh teh, meluun malé aceh pung unta semuet bang lubang pinu, ratnan lemulun luk mula' binaweh semuet bang Imet Allah.”

25Idi kareb anak-anak sekola'Neh neninger balaNeh, idi ideh pelaba awa, keburi'deh, “Kudeng pieh kudeng ineh, idéké luk miak ngalap ulun?”

26Idi Yésus nenier nedeh, kebalaNeh, “Kuan lemulun ini na miak mangun iamo' kuan Allah amung-amung miak mangun.”

27Idi kebala Pétrus, “Siruh, kai pangeh nenecan luk amung-amung pad maya' Namu; anunké luk lapen kai teh?”

28 # Mat 25.31; Luk 22.30 Kebala Yésus nedeh, “Ui pebala nemuyuh: idi bang Imet luk mebaruh, kareb Anak-Lemulun tudo luun kerusi rayehNeh, muyuh pana' luk pangeh nemaya' Negku miak tudo luun pulu' dueh kerusi, idi ngukum pulu' dueh babpat pupu lun Israil. 29Idé-idé lemulun luk pangeh nenecan ruma'neh, kinanakneh deléi, kinanakneh decur, taman-tinanneh, anak-anakneh, idi tana'neh, ngaceku ngadanKu, ieh miak ngalap meratu kua' ula'neh, idi ulun luk meruked teh. 30#Mat 20.16; Luk 13.30 Iamo' mula' lemulun luk pa atun miak amé' pa muci, idi luk pa muci amé' pa atun.

Currently Selected:

MATIUS 19: BLD

Highlight

Copy