MATIUS 18

Idéké Luk Meluun Rayeh?

(Mrk 9.33–37; Luk 9.46–48)

1 # Luk 22.24 Kareb ineh anak-anak sekola' ineh iné' matun Yésus, keburi'deh, “Idéké luk meluun rayeh bang Imet surga?” 2Idi Yésus nenawar aceh anak isuut, idi Ieh nenaped neneh pa atun. 3#Mrk 10.15; Luk 18.17 Kebala Yésus, “Ngerawé do'-do'! Kudeng muyuh na misu' niat, idi mangun mepad kudeng anak luk isuut ini, na tu muyuh miak semuet bang Imet surga. 4Luk meluun rayeh bang Imet surga, ieh ineh lemulun luk ngebeneh niatneh sebuleng mepad kudeng anak luk isuut ini. 5Idi idé-idé luk nganak anak luk isuut luk kudeng ini bang ngadanKu, ieh nganak Negku teh.

Tutun Luk Ngacing Sala'

(Mrk 9.42–48; Luk 17.1–2)

6“Idé-idé luk ngesabeng seburur rat arang anak luk isuut luk manu Negku ini, meluun do' kuanneh kudeng aceh batu tekalan luk rayeh betin i dierneh pad ngerarem neneh nan uned abpa' rayeh. 7Mesusa' kuan tana' ini ngaceku sabeng. Ngaceku na miak na sabeng ineh macing, iamo' mesusa' kuan lemulun luk ngacing sabeng ineh.

8 # Mat 5.30 “Kudeng ticu'mu idi kukudmu ngesabeng namu, do' nangal neneh, idi talan rat namu; ngaceku meluun do' iko semuet bang ulun dengan ticu' luk sebuleng idi kukud luk sebuleng, ratnan iko talan bang apui luk meruked dengan ticu' luk dueh idi kukud luk dueh. 9#Mat 5.29 Idi kudeng matehmu ngesabeng namu, do' nakul neneh, idi talan rat namu, ngaceku meluun do' iko semuet bang ulun dengan mateh luk sebuleng ratnan iko talan bang apui dengan mateh luk dueh.

Pinginud Dumba Luk Neraruh

(Luk 15.3–7)

10“Matar do'-do' idi aleg muyuh ngedat sebuleng rat arang anak-anak luk isuut ini; ngaceku Ui pebala nemuyuh, déi' bang surga melaikat-melaikatdeh nier kidi-kidi kiung TamanKu luk bang surga. 11#Luk 19.10 Ngaceku Anak-Lemulun iné', pad ngulun lemulun luk netutu'.

12“Kudeng apehké terawé muyuh? Kudeng inan aceh lemulun luk inan meratu dumba, idi kudeng sebuleng neraruh, naké ieh necan luk iwa' ngepulu' iwa' dumba ineh, idi amé' luun pegkung-pegkung idi nakap neneh luk neraruh ineh? 13Idi kudeng ieh ngalap neneh, matu, Ui pebala nemuyuh, ieh pelaba awang niat neneh meluun ratnan iwa' ngepulu' iwa' burur luk na neraruh. 14Kudeng ineh teh TamanKu luk bang surga, baken pianNeh sebuleng pana' rat arang anak-anak isuut ini metutu' peh.

Kinanak Luk Mesala'

15 # Luk 17.3 “Kudeng kinanakmu mesala' namu, do' iko amé' mada' neneh ratnan sala'neh buleng-buleng; kudeng ieh sikal ninger balamu, pangeh iko nengalap kinanakmu. 16#Bad 19.15 Iamo' kudeng ieh ara' ninger balamu, do' iko nguit denganmu seburur kian dueh burur baken teh, pad dengan tang dueh teluh burur lun luk nekali' ineh anid-anid bala miak lutep peh. 17Kudeng ieh ara' ninger nedeh, do' iko mada' kuan lun sidang; idi kudeng ieh ara' ninger lun sidang teh, nima' neneh mangun mepad kudeng lun pupu baken idi mepad kudeng lemulun luk ngamung usin pupuk.

Ratnan Ngabet idi Neka

18 # Mat 16.19; Yah 20.23 “Matu, Ui pebala nemuyuh, anun-anun luk muyuh ngabet bang tana' ini, ieh ineh betin bang surga, idi anun-anun luk muyuh neka bang tana' ini, ieh ineh teh takan bang surga.

19“Idi teh Ui pebala nemuyuh, kudeng dueh burur rat arang muyuh sebuleng niat bang tana' ini ratnan anun-anun luk pituen didueh, kali' rungen miak baren nedidueh ratnan TamanKu luk bang surga. 20Ngaceku iapeh-iapeh inan dueh kian teluh burur luk tebubpun bang ngadanKu, su ineh teh Ui idi arangdeh.”

Pinginud Seburur Lun Tebarin Luk Na Maré Do' Nan Rurumneh

21Pétrus iné' matun Yésus idi keburi'neh, “O Tuhan, tuda' kua'ké ui miak maré do' nan kinanakku luk mesala' negku? Macing tudu' kua'ké?”

22 # Luk 17.3–4 Idi kebala Yésus neneh, “Na Ui pebala namu, macing tudu' kua' mo', iamo' tudu' ngepulu' kua' tudu'. 23Ngaceku ineh Imet surga mepad kudeng aceh raca' luk sikal mupud baleh ratnan lun tebarinneh. 24Idi kareb ieh nengimun ngelio ratnan balehdeh, inan aceh lun tebarin luk inan baleh tuda'-tuda' ngejuta rigit inuitdeh ame' matun neneh. 25Iamo' ngaceku na ieh miak ngua', idi tuanneh nengecuk nelun masui neneh mangun ku demulun dengan amung uang tetek ruma'neh perapu amung binawehneh, pad ieh miak ngua' balehneh. 26Demulun ineh netekeradung pa kiungneh, keburi'neh, ‘Tuan, do' iko mulai niat negku. Kali' rungen ui ngua' namu.’ 27Ngaceku ieh mé' neneh, tuan lun tebarin ineh nemuit neneh, idi ieh nemaré do' kuanneh ratnan balehneh.

28“Iamo' lun tebarin ineh neremuat, idi ieh nepapu' lun denganneh luk inan baleh neneh tuda'-tuda' rigit. Idi ieh nengakem neneh, idi nemarek dierneh, keburi'neh, ‘Ngua' balehmu negku.’ 29Idi lun denganneh netekeradung idi nemutuh neneh, keburi'neh, ‘Do' iko mulai niat negku. Kali' rungen ui ngua' namu.’ 30Iamo' na ieh sikal, idi ieh iné' nipa neneh bang tutup pad ieh nengua' balehneh. 31Idi kareb lun denganneh luk baken nenier luk inau'neh, idi ideh dat niat, idi iné' mada' inan tuandeh amung luk pangeh inau'neh. 32Idi tuanneh nenawar demulun ineh amé' matun neneh, keburi'neh, ‘O lun tebarin luk dat, ui pangeh nemuit namu ratnan amung-amung balehmu, ngaceku iko nemutuh negku. 33Naké do' kudeng iko méi' kuan lun denganmu teh, mepad kudeng ui pangeh méi' namu teh?’ 34Idi tuanneh museh neneh, idi ieh nemaré neneh tetupin lun matar tutup, pad ieh ngua' amung-amung balehneh.”

35Idi kebala Yésus, “Kudeng ini teh TamanKu luk bang surga sikal nganau' kuan muyuh, kudeng muyuh na sikal maré do' kuan kinanak-kinanak muyuh ratnan niat muyuh.”

Currently Selected:

MATIUS 18: BLD

Highlight

Copy