MATIUS 11

Itun Yahya Luk Ngerereb Rat Bang Tutup

(Luk 7.18–35)

1Kareb Yésus pangeh neperiteteng inan pulu' dueh anak sekola'Neh, idi Ieh nenalan rat déi' sikal mada' idi nated Bala luk Do' bang bawang-bawang luk muneng.

2Kareb Yahya luk Ngerereb neninger rat bang tutup ratnan amung-amung kekamen Keristus, idi ieh nengecuk anak-anak sekola'neh amé 3ngitun Yésus, keburi'deh, “Iko iniké luk miak macing ineh, kian petulu kai nginulat nelun baken lek?” 4Idi kebala Yésus, “Amé' muyuh idi mada' kuan Yahya ratnan anun-anun luk pindenger idi sinier muyuh, 5#Yes 35.5–6; 61.1 ieh ineh lun melun mebuser kulat mateh, lun meliai miak nalan, lun mét susud pangeh linigan, lun mebengel ninger, idi lun naté tinui peh, idi Bala luk Do' bida' kuan lun masi'. 6Samal kuan lemulun luk na mesabeng ngaceku Ui.”

7Idi litaddeh nenalan, Yésus nengimun pebala kuan lun mula' ineh ratnan Yahya, kebalaNeh, “Anunké luk iné' muyuh sira' déi' su luk ali-ali? Selawa bulu'ké luk megio ku bui? 8Kian, anunké luk iné muyuh sira'? Selemulun luk ngayung ku ayung luk do' saludké? Setuneh, lemulun luk ngayung ku ayung luk mesalud, ieh ineh mudeng bang ruma' raca'-raca'. 9Iamo' anunké punneh muyuh iné' déi'? Sikal nier aceh nabiké? Matu, Ui pebala nemuyuh, idi ieh selemulun luk meluun ratnan nabi. 10#Mal 3.1 Ngaceku lawé Yahya pangeh inayud kudeng ini, “Sirun, Ui ngecuk lun dukenKu amé' pa kiungMu, ieh ineh luk nganau' temina' dalanMu pa kiungMu.’ 11Ngerawé do'-do'! Rat arang amung-amung lemulun, na luk idi seburur pana' luk meluun rayeh ratnan Yahya luk Ngerereb; iamo' luk isuut tu bang Iemt surga, ieh ineh luk meluun rayeh ratnan neneh. 12#Luk 16.16 Idi rat kareb Yahya mada' macing nekini, Imet surga inaro lemulun, idi lemulun luk metueh nutun ngalap neneh. 13Amung-amung nabi idi Ukum Musa nemada' ratnan Imet ineh, pad acing Yahya ineh. 14#Mal 4.5; Mat 17.10–13; Mrk 9.11–13 Idi kudeng muyuh sikal ninger baladeh, Yahya ineh Elia luk macing maya' bala nabi. 15Lemulun luk inan lalid, do' ieh ninger.

16“Iamo' dengan anunké Ui miak maad inul luk bang kareb ini? Ieh ineh mepad kudeng anak-anak luk tudo déi' kadai, idi luk ngitang kuan lun dengandeh, 17kebaladeh, ‘Kai pangeh nengiup suling kuan muyuh, idi na muyuh nengalai; idi kai pangeh temido, iamo' nateh muyuh nangi'!’ 18Yahya nacing dengan na kuman idi ngirup, idi kebaladeh, ‘Ieh sinuet ada'.’ 19Anak-Lemulun nacing dengan kuman idi ngirup, idi kebaladeh, ‘Siruh, selemulun luk manga, idi luk ngirup anggur, Ieh perurum dengan lemulun luk ngamung usin pupuk idi lun mesala' teh.’ Iamo' bua'-bua'neh ngegala' ratnan ileh Allah ineh matu.”

Bawang-Bawang Luk Na Manu

(Luk 10.13–15)

20Idi Yésus nengimun remasang kuan bawang-bawang, su luk inanNeh pangeh nenganau' mula' kekamen luk melalud, ngaceku ideh na uren, kebalaNeh, 21#Yes 23.1–18; Yeh 26.1—28.26; Yo 3.4–8; Am 1.9–10; Sek 9.2–4 “Mesusa' kuanmu Korasin! Mesusa' kuanmu Baitsaida! Ngaceku kudeng kekamen luk melalud pangeh inau' bang Sur idi Sidon, kudeng luk pangeh inau' bang nemedueh, kali' rungen ideh pangeh nacung idi nuren mon. 22Ngerawé do'-do'! Kareb Aco Ngukum, Allah méi' nelun Sur idi Sidon meluun ratnan medueh. 23#Yes 14.13–15; Pud 19.24–28 Idi iko, O Kapernaum, pian uen ngedita' macing langit? Iamo' iko miak temurun macing inan até', ngaceku kudeng kekamen luk melalud luk inau' bang namu pangeh inau' déi' bawang Sodom, kali' rungen ieh idi macing aco sini. 24#Mat 10.15; Luk 10.12 Ngerawé do'-do'! Kareb Aco Ngukum, Allah méi' nelun Sodom meluun ratnan iko.”

Amé' Negku Pad Ui Ngato Erur Muyuh

(Luk 10.21–22)

25Kareb idi teh kebala Yésus, “O Ama', Tuhan langit idi tana', Ui ngubur Namu ngaceku Iko nengalum amung-amung ini ratnan lemulun luk mileh idi luk do' kali', idi nengegala' ineh kuan anak-anak. 26Mo, Ama', ngaceku ineh luk petulu pa kiungMu.

27 # Yah 3.35; 1.18; 10.15 “TamanKu pangeh nemaré Negku luk amung-amung idi seburur pana' na miti Anak, iamo' Taman mo', idi seburur pana' na miti Taman, iamo' Anak mo', idi teh lemulun luk pinili' Anak, ieh luk miak badénNeh ratnan Allah.

28“Amé' Negku, amung-amung muyuh luk ngakem idi luk mabeh luk meberat, idi Ui ngato erur muyuh. 29Do' muyuh ngalap paga'Ku idi sibada' rat Negku, ngaceku Ui mulai niat idi mebeneh niat, idi erur muyuh miak uen ngato. 30#Yer 6.16 Ngaceku paga'Ku malé idi babehKu meran teh.”

Currently Selected:

MATIUS 11: BLD

Highlight

Copy