MATIUS 12

Itun Ratnan Ngeletu' Runguh Padé Kareb Aco Luk Inan Mudeng

(Mrk 2.23–28; Luk 6.1–5)

1 # Bad 23.25 Kareb ineh teh Yésus nenalan lemaba lati'-lati' bang Aco luk inan Mudeng. Idi anak-anak sekola'Neh pana' melau, idi ideh nengalap runguh padé ineh, idi ideh nekuman ineh. 2Kareb lun Parisi nenier luk kudeng ineh, idi kebaladeh kuan Yésus, “Siruh, anak-anak sekola'Mu nganau' luk bibpeng kareb Aco luk inan Mudeng.”

3 # 1 Sem 21.1–6 #Uk 24.9 Iamo' kebala Yésus, “Naké muyuh nemaca' luk inau' Daud idi lun denganneh kareb ideh melau? 4Ieh nesemuet bang Ruma' Allah, idi nekuman ruti luk biré kuan Allah, sagan pana' bibpeng na kenendeh. Imam-imam mo' luk miak kuman ineh. 5#Iap 28.9–10 Naké muyuh nemaca' bang Ukum Musa, kudeng apeh lun imam-imam, kareb Aco' luk inan Mudeng, semuet bang Ruma' Allah idi ngelaba ukum ratnan Aco luk inan Mudeng, idi na ideh mesala'? 6Ui pebala nemuyuh, inan Sebuleng tungé' luk meluun rayeh ratnan Ruma' Allah. 7#Mat 9.13; Hos 6.6 Bang Surat Allah pangeh inayud, ‘Idi luk pianKu ineh éi', baken pung luk kereten.’ Kudeng muyuh pangeh nekali' ilungneh, kali' rungen muyuh na nengukum lemulun luk na mesala'. 8Ngaceku Anak-Lemulun luk Tuhan pa luun Aco luk inan Mudeng.”

Seburur Lemulun Luk Naté Ticu' Selipa Pangeh Dino'

(Mrk 3.1–6; Luk 6.6–11)

9Yésus nenecan bawang ineh, idi nesemuet bang aceh ruma' sembayang. 10Idi Ieh nenier aceh lemulun luk pangeh naté selipa ticu'neh; idi ideh nengitun Neneh, keburi'deh, “Naké bibpeng na ngedo' lemulun bang Aco luk inan Mudeng?” pelé ideh miak ngadu' Neneh.

11 # Luk 14.5 Idi kebala Yésus, “Idéké rat arang muyuh luk inan sebuleng dumba, idi kudeng dumba ineh mebpeh bang lubang kareb Aco luk inan Mudeng, naké ieh sikal ngalap neneh rat bang lubang ineh? 12Lemulun meluun meraga ratnan sebuleng dumba! Ngaceku ineh na bibpeng nganau' luk do' bang Aco luk inan Mudeng.” 13Idi kebala Yésus kuan lemulun ineh, “Natang ticu'mu.”

Idi ieh nenatang ticu'neh, idi ticu'neh do' peh, mepad kudeng ticu'neh selipa. 14Iamo' lun Parisi ineh neburo, idi ideh nepegayam pian ngaté Yésus.

Demulun Luk Pinili' Allah

15Idi kareb Yésus nekali' piandeh, Ieh neburo rat déi'. Idi mula' lemulun nemaya' puetNeh, idi Ieh nengedo' amung-amungdeh. 16Idi Ieh neperiteteng nedeh, pad ideh na mada' ratnan kekamenNeh, 17pad ngacing luk bila Nabi Yesaya, kebalaneh,

18 # Yes 42.1–4 “Ini demulun luk pangeh pinili'Ku,

Ieh luk inanKu mawa, idi Ui mawang niat Neneh.

Ui sikal maré RohKu tudo luunNeh,

idi Ieh sikal mada' ukum kuan amung-amung lun pupu baken.

19Na Ieh sikal pesaad idi ngitang,

na Ieh mada' dengan rayeh tang luun anid-anid dalan.

20Na Ieh sikal mutut bulu' luk pekuyut,

idi ngilep sibabu luk uned merabpun.

Ieh ngakem pad macing luk matu ruen metueh;

21idi amung pupu miak merapet Neneh.”

Yésus Idi Balsebul

(Mrk 3.20–30; Luk 11.14–23)

22Idi ideh nenguit seburur lemulun luk sinuet ada' luk mebuser idi mebegkeh amé' matun Yésus. Idi Yésus nengedo' neneh, pad lun mebegkeh ineh pebala idi nier teh. 23Idi lun mula' ineh mawa, keburi'deh, “Naké ini Anak Daud?”

24 # Mat 9.34; 10.25 Kareb lun Parisi neninger bala ini, keburi'deh, “Lemulun ini nala' ada' ku lalud Balsebul, lun rayeh ada' ineh.”

25Yésus nekali' terawédeh, idi kebalaNeh nedeh, “Anid-anid bawang luk sikal metueh sebuleng ratnan sebuleng, musag peh; idi anid-anid ruma' idi tetek ruma' luk sikal metueh sebuleng ratnan sebuleng, na ieh miak tuped. 26Idi kudeng Sétan nala' Sétan, ieh sikal metueh ratnan bururneh sebuleng; idi kudeng apehké imetneh miak tuped? 27Idi kudeng Ui nala' ada' ku lalud Balsebul ineh, ku lalud idéké anak-anak muyuh nala' nedeh? Ngaceku ineh ideh miak ngegala' sala' muyuh. 28Ui nala' ada' ku lalud Roh Allah. Idi megala' Imet Allah pangeh nacing nemuyuh.

29“Seburur lemulun pana' na miak semuet bang ruma' lemulun luk metueh, pad mano binawehneh, kudeng ieh na ngaling lemulun luk metueh ineh atun. Pangeh ineh idi teh ieh miak mano binaweh luk bang ruma'neh ineh.

30 # Mrk 9.40 “Lemulun luk na perurum Negku, ieh sikal metueh rat Negku, idi lemulun luk na ngamung denganKu, ieh ineh luk matad peh. 31Ui pebala nemuyuh, anid-anid sala' idi kuyo lemulun miak inan maré do', iamo' nguyo Roh ineh na tu-tu miak inan maré do'. 32#Luk 12.10 Idi idé-idé luk nguyo Anak-Lemulun miak teh ngalap do', iamo' idé-idé luk nguyo Roh Meligan, na tu-tu miak ngalap do', do' bang tana' ini, idi bang kareb luk macing muci teh.

Lawa Kayuh Idi Bua'neh

(Luk 6.43–45)

33 # Mat 7.20; Luk 6.44 “Kudeng kayuh ineh titen do', idi bua'neh pana' do'; kudeng kayuh ineh titen dat idi bua'neh pana' dat teh; ngaceku tau miti kayuh ratnan bua'neh. 34#Mat 3.7; 23.33; 15.18; Luk 3.7; 6.45 O muyuh menipeh, kudeng apehké muyuh miak pebala luk do', kudeng muyuh sebuleng luk dat? Ngaceku ela ratnan niat lemaba bibir tangneh. 35Lemulun luk do' ngeruat anun-anun luk do' ratnan binaweh luk do', idi lemulun luk dat ngeruat anun-anun luk dat ratnan binaweh luk dat.

36“Ui pebala nemuyuh, kareb Aco Ngukum, lemulun miak mabeh anid-anid bala luk mo'-mo' luk remuat rat bang tangdeh. 37Ngaceku ratnan balamu iko miak ruen matu, idi ratnan balamu iko miak kumin teh.”

Ratnan Nakap Aceh Tanu'

(Mrk 8.11–12; Luk 11.29–32)

38 # Mat 16.1; Mrk 8.11; Luk 11.16 Kareb ineh teh inan tuda'-tuda' guru Ukum idi lun Parisi luk nepebala, “O Guru, kai sikal nier aceh tanu' rat Namu.”

39 # Mat 16.4; Mrk 8.12 Iamo' kebala Yésus, “Inul luk dat idi luk na lutep nakap aceh tanu', iamo' na tanu' barén nedeh, iamo' tanu' Nabi Yunus mo'. 40#Yun 1.17 Ngaceku mepad kudeng Yunus netudo teluh aco idi teluh dacem kinioneh bang batek lawid rayeh, kudeng ineh teh Anak-Lemulun miak tudo bang lubang tana' teluh aco idi teluh dacem kinioneh. 41#Yun 3.5 Lemulun rat bawang Ninewé sikal tumui kareb Aco Ngukum peranga' dengan inul ini, idi ideh miak ngesala' inul ini, ngaceku ideh nuren ngaceku ratnan bada' Yunus; idi inan tungé' Seburur Lemulun luk meluun rayeh ratnan Yunus. 42#1 Rac 10.1–10; 2 In 9.1–12 Idi Raca' Decur rat tana' pa kabing busat aco sikal tumui kareb Aco Ngukum peranga' dengan inul ini, idi ieh miak ngesala' inul ini; ngaceku ieh nacing rat iring tana' sikal ninger ratnan ileh Selimun; idi inan tungé' Seburur Lemulun luk meluun rayeh ratnan Selimun!

Ada' Lemubed

(Luk 11.24–26)

43“Iamo' ada', kareb ieh pangeh neremuat ratnan lemulun, idi ieh nalan lemaba su luk na abpa', idi nakap luk inanneh ucu', iamo' na luk idi. 44Idi keburi'neh, ‘Ui sikal muli' amé' ruma'ku, ieh ineh luk inanku neremuat atun.’ Idi kareb ieh macing ieh kali' ruma'neh na uang, idi pangeh inapuh, idi inau' temina'. 45Idi ieh amé' ngalap tudu' ada' luk baken teh denganneh, ieh ineh luk meluun dat ratnan ieh, idi ideh semuet idi tudo déi' idi ratnan lemulun luk sinuet ineh, kekipedneh mangun meluun dat ratnan luk pun-pun. Kudeng ineh teh luk mangun muci kuan inul luk dat ini.”

Ratnan Tinan Idi Kinanak Tuhan Yésus

(Mrk 3.31–35; Luk 8.19–21)

46Uned Yésus pebala nelun mula', tinanNeh idi kinanak-kinanakNeh netuped déi' liang ruma', sikal pebala Neneh. 47Kebala seburur lemulun Neneh, “Siruh, tinan idi kinanak-kinanakMu tuped déi' liang ruma', idi ideh sikal pebala Namu.” 48Iamo' kebala Yésus, “Idéké luk tinanKu? Idi idéké luk kinanak-kinanakKu?” 49Idi Ieh nenatang ticu'Neh idi nicul anak-anak sekola'Neh, kebalaNeh, “Siruh, tinanKu idi kinanak-kinanakKu. 50Ngaceku idé'-idé luk nganau' luk pian TamanKu luk bang surga, ieh luk kinanakKu deléi, idi kinanakKu decur idi tinanKu teh.”

Currently Selected:

MATIUS 12: BLD

Highlight

Copy