MATIUS 10
10
Pulu' Dueh Rasul
(Mrk 3.12–19; Luk 6.12–16)
1Yésus nenawar pulu' dueh anak sekola'Neh amé matun Neneh, idi Ieh nemaré lalud nedeh pa luun ada'-ada', pad miak masut nedeh, idi pad ideh ngedo' amung-amung luk mét, idi amung-amung laya' burur lemulun. 2Ini ngadan pulu' dueh rasul: pun-pun Simun luk titen Pétrus, idi kinanakneh Andrias; Yakub Sabdi, idi Yahya kinanakneh; 3Pilipus, Bartolomius, Tomas, Matius luk ngamung rigit pupuk, Yakub Alpius, Tadius; 4idi Simun lun Selot,#10.4 Selot, ieh ineh aceh pati luk sikal metueh ratnan imet Rum. idi Yudas Iskariot luk nemasui Yésus.
Kekamen Pulu' Dueh Rasul
(Mrk 6.7–13; Luk 9.1–6)
5Yésus nengecuk pulu' dueh rasul ini,idi Ieh neperiteteng nedeh, kebalaNeh, “Aleg muyuh semuet bang bawang lun pupu baken, idi aleg semuet bang bawang-bawang Samaria. 6Iamo' do' muyuh amé' inan amung dumba luk neraruh ratnan lun pupu Israil. 7#Luk 10.4–12 Amé' mada', kebala muyuh, ‘Imet surga pangeh muneng.’ 8Ngedo' lun luk mét, idi nui lun luk naté, ngeligan lun luk mét susud, idi masut amung-amung ada. Muyuh pangeh nengalap mo'-mo', idi do' muyuh maré mo'-mo' teh. 9Aleg muyuh nguit amas, pirak, idi usin bang kapil muyuh, 10#1 Kor 9.14; 1 Tim 5.18 idi luk inan balu' kareb nalan, idi dueh kuyu', kasut, idi rukud pana'. Ngaceku anid-anid lemulun luk ngakem petulu ngalap luk kenenneh.
11“Kareb muyuh semuet bang bawang idi bang ruma' iapeh-iapeh pana', do' muyuh nakap lemulun luk do' niat; idi mudeng dengandeh pad muyuh nalan. 12Kareb muyuh umak ruma', idi do' maré tabi' kuandeh. 13Idi kudeng lun luk bang ruma' ineh do' niat, do' maré peruan muyuh kuandeh, iamo' kudeng ideh na do' niat, nima' peruan muyuh ineh muli' amé' nemuyuh. 14#Kek 13.51 Idi idé-idé luk ara' nganak nemuyuh, idi luk ara' ninger bala muyuh, kareb muyuh remuat rat bang ruma'deh idi bawangdeh, do' muyuh ngegkar abuh ratnan kukud muyuh. 15#Mat 11.24; Pud 19.24–28 gerawé do'-do'! Meluun meran ukum bawang Sodom idi Gemora, kareb Aco Ngukum, ratnan bawang ineh.
Luk Ruen Lun Kareb Uen Ngedereh
(Mrk 13.9–13; Luk 21.12–17)
16 #
Luk 10.3
“Ngerawé do'-do'! Ui ngecuk nemuyuh kudeng dumba arang uned bungalé. Do' muyuh mileh mepad kudeng menipeh, idi do' niat mepad kudeng suit sukur. 17Matar do'-do'! Ngaceku muyuh miak barén lemulun bang besara', idi ideh sikal mebal nemuyuh bang ruma' sembayangdeh. 18Idi teh muyuh miak itendeh amé' besara' pa kiung lun luk ngimet idi raca'-raca' ngaceku Ui, pad muyuh mada' Bala luk Do' pa kiungdeh idi pa kiung lun pupu baken teh. 19Kareb muyuh itendeh amé' besara', aleg megagau ratnan kudeng apeh idi anun luk miak belén muyuh; ngaceku kareb ineh miak barén nemuyuh bala luk belén muyuh. 20#Mrk 13.9–11; Luk 12.11–12; 21.12–15 Ngaceku baken muyuh luk pebala, iamo' Roh Taman muyuh luk pebala lemaba bibir tang muyuh.
21 #
Mrk 13.12; Luk 21.16 “Kinanak miak maré kinanakneh pitayen, idi taman miak maré anakneh; anak-anak sikal metueh ratnan taman-tinandeh, pad ideh maré nedeh pitayen. 22#Mat 24.9; 13; Mrk 13.13; Luk 21.17 Muyuh miak inan amung-amung lemulun megateh ngaceku ngadanKu; iamo' lemulun luk tuman pad macing kekipedneh uen ngulun. 23Kareb ideh ngedereh nemuyuh, bang aceh bawang, do' muyuh buro amé' inan bawang luk baken. Ui pebala nemuyuh, kareb nateh muyuh nesemuet bang amung-amung bawang libut-libut tana' Israil, Anak-Lemulun macing.
24 #
Luk 6.40; Yah 13.16; 15.20 “Seburur anak sekola' na meluun rayeh ratnan guruneh, idi seburur demulun na meluun rayeh ratnan tuanneh. 25#Mat 9.34; 12.24; Mrk 3.22; Luk 11.15 Idi miak mo' kudeng anak sekola' ineh mepad dengan guruneh, idi kudeng demulun mepad dengan tuanneh. Kudeng ideh pangeh neneten tuan ruma' Balsebul, meluun teh ideh sikal ngedat anak itinneh.
Idé Luk Inan Matot?
(Luk 12.2–7)
26 #
Mrk 4.22; Luk 8.17 “Aleg muyuh matot nan lemulun. Sebuleng pana' na luk idi luk melinged luk na miak uen ngegala', idi luk inapung luk na miak kali' lemulun. 27Anun-anun luk Ui mala nemuyuh bang dacem, do' muyuh mala bang acang; idi luk pindenger muyuh ayek-ayek, do' muyuh mada' rat luun buduk ruma'. 28Idi aleg matot nedeh luk ngaté burur mo', idi na melalud ngaté niat; iamo' do' muyuh matot nan Allah luk melalud ngaté niat idi burur pana' bang apui. 29Suit pirit luk dueh pisuen lemulun aceh sin mo'. Iamo' sebuleng pana' na miak mebpeh luun tana', kudeng na pian Taman muyuh. 30Iamo' abpuk luk luun uluh muyuh pangeh iniap. 31Ngaceku ineh, aleg muyuh matot, ngaceku muyuh meluun raga ratnan suit pirit luk mula'.
Ratnan Ngamo Idi Ngalum Keristus Pa Kiung Lemulun
(Luk 12.8–9)
32“Anid-anid lemulun luk ngamo Negku pa kiung lemulun. Ui pana' ngamo neneh pa kiung TamanKu luk bang surga. 33#2 Tim 2.12 Iamo' anid-anid lemulun luk ngalum Negku pa kiung lemulun, ieh pana' luminKu pa kiung TamanKu luk bang surga.
Baken Pedo' Iamo' Pelapet
(Luk 12.51–53; 14.26–27)
34“Aleg ngerawé Ui pangeh nacing pad maré pedo' luun tana'; baken Ui nacing pad nguit pedo', iamo' aceh pelapet. 35#Mik 7.6 Ui nacing matad deléi ratnan tamanneh, idi decur ratnan tinanneh, idi iban ratnan ibanneh. 36Idi lun bang ruma'neh mangun ku bunu'neh.
37“Lemulun luk mawa inan taman idi tinanneh meluun ratnan Ui, na ieh mayu kuanKu; idi lemulun luk mawa inan anakneh luk deléi idi anakneh luk decur meluun ratnan Ui, na ieh mayu kuanKu. 38#Mat 16.24; Mrk 8.34; Luk 9.23 Idi lemulun luk na maan salibneh idi maya' Negku, na ieh mayu kuanKu. 39#Mat 16.25; Mrk 8.35; Luk 9.24; 17.33; Yah 12.25 Lemulun luk ngerawé ulunneh sebuleng, na miak ngalap ulun luk matu; iamo' lemulun luk na ngerawé ulunneh sebuleng ngaceku Ui, ieh luk miak ngalap ulun luk matu.
Ratnan Tabpar
(Mrk 9.41)
40 #
Mrk 9.37; Luk 9.48; 10.16; Yah 13.20 “Lemulun luk nganak nemuyuh, ieh teh luk nganak Negku, idi lemulun luk nganak Negku, ieh teh luk nganak Neneh luk nengecuk Negku. 41Lemulun luk nganak seburur nabi ngaceku ieh nabi, ieh teh luk miak ngalap tabpar mepad kudeng nabi; idi lemulun luk nganak selemulun luk matu ngaceku ieh lemulun luk matu, ieh teh luk miak ngalap tabpar mepad kudeng selemulun luk matu. 42Ngerawé do'-do'! Idé-idé luk maré aceh sangkir abpa' talang rupen seburur ratnan luk isuut ini, ngaceku ieh anak sekola'Ku, tabparneh na metutu'.”
Currently Selected:
MATIUS 10: BLD
Highlight
Share
Copy

Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.