PUDUT 32
32
Yakub Temina' Papu' Ni Esau
1Idi Yakub petacu nalan idi nepapu' dengan melaikat-melaikat Allah. 2Kareb Yakub nenier nedeh, kebalaneh, “Ini baweh Allah!” Idi ieh nenganau' ngadan su ineh Mahanaim.
3Idi Yakub nengecuk tuda'-tuda' lun amé' atun matun kinanakneh Esau déi' bawang Edom. 4Idi ieh neperiteteng nedeh, kebalaneh, “Kudeng ini balamu ni Esau, tuanku: Idi kebala demulunmu Yakub, kudeng ini, ‘Ui pangeh netudo dengan Laban macing nekini. 5Idi ui inan sapi', keladai, amék, dumba, idi demulun. Ini punneh ui ngecuk maré kali' kuan tuan, pelé iko méi' negku.’ ”
6Kareb lun luk icuk ineh nelemubed matun ni Yakub, idi kebaladeh, “Kai pangeh nepapu' ni Esau kinanakmu, idi ieh macing papu' namu, idi inan teh apat ngeratu lemulun maya' neneh.” 7Idi Yakub matot idi megegker. Idi amung-amung lemulun luk maya' neneh, idi amung-amung dumba, amék, sapi', idi untaneh pana', bibpatneh dueh babpat. 8Ngaceku keterawéneh, “Kudeng Esau macing inan sebuleng babpat idi ngelaya' nedeh, idi babpat luk baken ineh miak buro.”
9Idi Yakub nesembayang, “O Allah tepunku Ibrahim, luk Allah tamanku Isak, O Tuhan luk pangeh nepebala negku kudeng ini, ‘Muli' iko amé' inan bawangmu idi matun pupumu, idi Ui nganau' do' kuanmu.’ 10Idi ui ini na mayu ngalap sesuut pana' ratnan amung-amung éi' idi awa luk lutep luk pangeh ginala'Mu kuanku, ngaceku dengan aceh rukudku mo' ui neguta Abpa' Yarden; idi nekini ui mangun ku dueh babpat. 11Ui mutuh Namu muit negku rat bang palad kinanakku Esau. Ui matot neneh, kudeng ieh macing ngaté negku idi ngaté decur idi anak-anakdeh. 12#Pud 22.17 Naké Tuhan nepebala kudeng ini, ‘Ui miak nganau' luk do' kuanmu, idi nganau' inulmu mangun kudeng bada tangeb abpa' rayeh luk na mekiap?’ ”
13-15Idi Yakub nerudap déi' malem ineh. Idi ieh nengalap sebuang aya'neh mangun ku baré kuan kinanakneh Esau: 200 amék tineh idi 20 deléi, 200 dumba tineh idi 20 deléi, 30 unta tineh luk inan anak, 40 sapi' tineh idi 10 deléi, 20 keladai tineh idi 10 deléi. 16Amung-amung pung ineh biréneh inan demulunneh, manid sengeriudan pitarindeh. Idi kebala Yakub nedeh, “Nalan muyuh atun, idi nganau' riudan pung ineh petala-petala.” 17Idi ieh nepebala nan luk pun-pun, “Kareb kinanakku Esau ineh papu' namu, kudeng ieh ngitun namu kudeng ini, ‘Idéké kuan namu ini? idi ‘Amé' iapeh iko?’ idi ‘Idéké kuan amung-amung luk pa atunmu ini?’ 18iko miak pebala, ‘Amung-amung ineh Yakub kuan, ieh ineh aceh baré kuan tuanku Esau, ieh pana' idi pa puet kai.’ ” 19Kudeng ineh teh balaneh kuan luk kedueh idi luk keteluh, idi kuan amung-amung luk nenguyut riudan pung ineh, kebalaneh, “Kudeng ineh luk miak belén muyuh kuan Esau kareb muyuh mepapu' neneh. 20Idi muyuh miak pebala teh, ‘Matu Yakub demulunmu ineh idi pa puet.’ ” Ngaceku keterawé Yakub, “Ui sikal ngagka' usehneh ku baré luk tinated atun rat negku. Kareb ui papu' neneh, merapet neneh do' negku.” 21Kudeng ineh tinated atun rat neneh; iamo' ieh sebuleng nelupo su ineh.
Yakub Pekakem Déi' Peniel
22Bang dacem ineh Yakub netumui, idi ieh nengalap dueh awanneh, dueh apidneh, idi pulu' aceh anakneh, idi neguta Abpa' Yabuk. 23Pangeh ieh nengecuk nedeh guta, idi ieh nengecuk nedeh nguit amung-amung luk ieh kuan teh. 24Iamo' ieh sebuleng neketecan.
Idi inan seburur Lemulun luk pekakem neneh kedangan-kedangan pad aco macang. 25Kareb Lemulun ineh nekali' Yakub na miak melaya' ruenneh, idi Ieh nemukut pun tipan Yakub. Idi tipan Yakub pana' nepesiba'. 26Idi kebalaNeh, “Do' ngelegkan Negku, ngaceku malé aco macang.”
Iamo' kebala Yakub, “Na ui sikal ngelegkan Namu kudeng Iko na ngeperuan negku.”
27Idi kebalaNeh neneh, “Idé ngadanmu?”
“Yakub,” kebalaneh.
28 #
Pud 35.10
Kebala Lemulun ineh, “Na iko miak tetanen Yakub peh, iamo' Israil, ngaceku iko pangeh mangun kudeng aceh raca' pa kiung Allah, idi pa kiung lemulun pana', idi iko pangeh metueh.”
29Idi kebala Yakub, “Do' Iko mada' ngadanMu.”
Iamo' keburi'Neh, “Anunké punmu ngitun ngadanKu?” Idi Ieh nengeperuan ni Yakub su ineh.
30Idi kebala Yakub, “Ui pangeh nenier Allah kiung dengan kiung, idi ui mulun teh.” Idi ieh neneten ngadan su ineh Peniel. 31Idi kareb ieh nenalan rat Peniel ineh, idi aco ineh pana' masat, idi Yakub pana' mekio' ngaceku tipanneh. 32Ngaceku ineh macing nekini lun Israil na miak kuman urat tipan, ngaceku Ieh nengakem urat tipan Yakub.
Currently Selected:
PUDUT 32: BLD
Highlight
Share
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
