PUDUT 31

Yakub Buro Necan Ni Laban

1Idi Yakub neninger bala anak-anak Laban, kebaladeh, “Yakub pangeh nengalap amung-amung binaweh taman tau. Idi ratnan binaweh taman tau ieh mangun ku lun do'.” 2Idi teh Yakub nenier kiung Laban, idi na ieh do' kudeng luk atun. 3Idi kebala Tuhan ni Yakub, “Muli' iko amé' bawang tepunmu idi matun pupumu. Ui miak ngedengan namu.”

4Idi Yakub neneteng ni Rakel idi Lia papu' neneh bang laman su luk inanneh matar aya' ineh. 5Idi kebala Yakub nedidueh, “Pangeh ui nekali' kiung taman medueh, na ieh do' negku kudeng luk atun. Iamo' Allah tamanku idi denganku. 6Idi medueh kali' kélku nengakem kuan taman medueh. 7Iamo' ieh nenaluk negku idi nengisu' tabparku macing pulu' kua'. Iamo' na Allah nima' neneh nganau' luk dat kuanku. 8Kareb ieh pebala, ‘Amung aya' luk meburit ineh miak mangun ku tabparmu,’ idi amung-amung riudan aya' ineh pana' nenganak anak luk meburit. Idi kareb ieh pebala, ‘Amung-amung luk mepilang ineh mangun ku tabparmu,’ idi amung-amung aya' ineh nenganak anak luk mepilang. 9Ratnan luk kudeng ineh Allah pangeh nengalap amung-amung riudan aya' taman medueh, idi nemaré nedeh negku.

10“Bang aceh kareb luk inandeh petebaneh, idi ui nenginupi idi nenier tuda'-tuda' amék deléi luk ngebaneh amék luk tineh. Inan luk mepilang, idi meburit, idi mebulan. 11Idi Melaikat Tuhan Allah nepebala negku bang nupi ineh, “O Yakub!” Idi kebalaku, ‘Anun idi, Tuhan?’ 12Idi kebalaNeh, ‘Siruh, amung-amung amék luk deléi luk ngebaneh amék tineh, ieh ineh mepilang, meburit, idi mebulan. Ngaceku pangeh Ui nekali' amung-amung luk inau' Laban kuanmu. 13#Pud 28.18–22 Idi Ui ini Allah luk nesilagan namu déi' Baitel, su luk inanmu nengutang umau saitun luun batu mangun ku aceh terawé, ieh ineh su luk inanmu pangeh nepejani' Negku. Idi nekini do' iko temina' remuat rat bang bawang ini, idi muli' amé' inan bawang pupumu.’ ”

14Idi kebala Rakel idi Lia ni Yakub, “Na luk idi babpat luk lapen kai ratnan taman kai teh. 15Kai ini bilaneh ku lun sakai. Ngaceku ieh pangeh nemasui nekai, idi amung-amung binaweh kai pana' pangeh nabudneh. 16Ngaceku amung-amung binaweh luk pangeh ilap Allah ratnan taman kai, ieh ineh luk kai kuan idi luk kuan anak-anak kai teh; idi nekini, do' iko nganau' anun-anun luk pangeh bila Allah namu ineh.”

17-18Idi Yakub netemina' lemubed amé' nan tamanneh déi' bang bawang Kanaan. Idi ieh nenganau' amung-amung anakneh idi awanneh luun unta. Idi ieh nenguit amung-amung aya'neh, idi amung-amung binaweh luk ilapneh déi' Mesopotamia. 19Laban pangeh nenalan iné' muting buluh dumbaneh, idi Rakel nemano akang tamanneh. 20Idi Yakub nenalan lulem dengan na nemaré kali' ni Laban. 21Idi Yakub nenguit amung-amung luk ieh kuan, idi neburo dengan mesaget. Ieh neguta Abpa' Pirat idi nenalan matun Pegkung Giliad.

Laban Ngerada' Ni Yakub

22Idi pangeh teluh aco lemulun nemada' ni Laban ratnan Yakub pangeh neburo. 23Idi ieh nenguit amung anak itinneh nengerada' ni Yakub tudu' aco kiadoneh, pad ieh nepigket neneh déi Pegkung Giliad. 24Iamo' Allah nesilagan ni Laban kareb medacem bang nupineh, kebalaNeh, “Matar do'-do', pad iko na ngesusa' ni Yakub.” 25Idi Yakub nelupo déi' luun pegkung ineh, idi Laban nelupo déi' luun Pegkung Giliad ineh.

26Idi kebala Laban ni Yakub, “Ngudeh iko naluk negku, idi nenguit anak-anakku buro mepad kudeng lun luk tiban baweh? 27Ngudeh iko nenaluk negku, idi neburo dengan na sibada' negku. Kudeng iko nesibada' negku, miak ui nated namu dengan awang niat idi dengan menani, idi uni karing idi gita. 28Idi teh iko na nemaré amung-amung mupunku idi anak decurku muen negku idi mala, ‘Do' tudo.’ Pelaba bacé luk inau'mu ineh. 29Ui inan lalud ngedat namu; iamo' malem ina, Allah tamanmu pangeh nemebpeng negku na ngesusa' namu. 30Ui kali' iko pangeh nenalan ngaceku pelaba geregan muli'. Iamo' ngudeh iko mano akangku?”

31Idi kebala Yakub, “Ui matot, ngaceku ui ngerawé kali' rungen iko ngalap anak-anakmu rat negku. 32Idi rat nidé iko kali' akangmu ineh, na ieh miak mulun teh. Pa kiung amung-amung kinanak tau, do' nakap anun-anun luk iko kuan, idi ngalap ineh.” Iamo' na Yakub kali' Rakel luk nemano akang ineh.

33Laban nesemuet bang lepo Yakub, idi bang lepo Lia, idi bang lepo dueh demulun decur ineh, iamo' na luk nekali'neh. Pangeh ineh ieh iné' bang lepo Rakel. 34Iamo' Rakel pangeh nengalap amung akang ineh inau'neh bang su luk inan tudo pa luun unta, idi ieh netudo luun ineh. Idi Laban nakap bang lepo ineh. Sebuleng pana' nateh nekali'neh. 35Idi kebala Rakel nan tamanneh, “Aleg iko museh negku. Na ui miak tuped pa kiungmu, ngaceku ui macing bulan.” Idi Laban nenakap akang ineh, iamo' na luk nekali'neh.

36Idi Yakub megateh niat, kebalahen, “Anun sala'ku idi datku pad iko nengerada' negku? 37Iko nengeluka'-ngeluka' amung binawehku. Anun luk nekali'mu iko kuan? Ngerareng amung ineh su ini, pa kiung anak itunmu, idi anak itunku. Nima' nedeh mutut ukum arang kiteh. 38Idi pangeh dueh ngepulu' lak ini ui nepamung namu, idi dumbamu, idi amékmu iuk amé' mula' idi luk deléi bang riudan dumbamu pana' na luk kinanku. 39Dumba luk pinaté pung, ui nengelibal. Na ui nenguit butungdeh bida'ku namu. Idi luk pino bang kareb macang aco, idi kareb medacem ieh ineh pangeh linibalku. 40Kareb macang aco ui mekaneh lau' ratnan idang, idi kareb medacem ui mekaneh teneb, pad ui na medacep mateh. 41Idi kudeng ineh teh ruked dueh ngepulu' lak ui netudo bang ruma'mu. Ui nengakem pulu' apat lak kuanmu pad ngalap anakmu luk dueh ini, idi anem lak ngaceku aya'mu. Idi macing pulu' kua' iko nengisu' tabparku. 42Kudeng Allah tepunku, luk inan Ibrahim idi Isak nesembayang na ngedengan negku, kali' rungen nekini ui icukmu muli' dengan na uang. Iamo' Allah nekali' derehku idi erur ticu'ku, idi Ieh luk nemebpeng namu ina dacem.”

Jani' Arang Yakub Idi Laban

43Idi kebala Laban ni Yakub, “Dueh decur ini anakku, idi amung-amung anak didueh pana' mupunku, idi amung-amung riudan aya' ini ui kuan. Idi amung-amung luk pa kiungmu ui kuan. Iamo' anunké luk miak ruenku kuan anak-anakku idi mupunku? 44Nekini ui temina' penaji' namu. Do' kiteh nganau' aceh bubpun batu mangun ku terawé ratnan jani' kiteh.”

45Idi Yakub nengalap aceh batu idi nenaped neneh mangun ku aceh terawé. 46Idi ieh nengecuk anak itinneh ngamung batu ku aceh bubpun. Idi ideh nekuman iring bubpun batu ineh. 47Idi Laban nenganau' ngadan bubpun batu ineh Yagar Saduta. Iamo' Yakub nenganau' ngadanneh Galid. 48Idi kebala Laban ni Yakub, “Bubpun batu ini mangun ku aceh terawé arang kiteh.” Idi ngaceku ineh ngadan natad ineh Galid. 49Idi teh kebala Laban, “Do' Tuhan matar arang kiteh, kareb kiteh mepatad seburur dengan seburur.” Idi ngaceku ineh natad ineh titen Mispa teh. 50Idi teh kebala Laban, “Kudeng iko ngedereh anakku idi iko ngaweh decur baken, sagan pana' ui na kali', ngerawé do'-do', Allah teh luk kali' arang kiteh. 51Siruh, bubpun batu luk ku terawé ini luk tipedku arangku denganmu. 52Idi bubpun ini idi batu luk ku terawé ini pana', mangun ku tanu', idi ui na miak ngelaba bubpun ini matun namu, idi iko pana' na miak ngelaba bubpun idi batu ini matun negku dengan niat luk dat. 53Idi Allah Ibrahim idi Allah Nahor mangun ku luk mutut arang kiteh.” Idi Yakub nepebulung ku ngadan Allah luk inan Isak tamanneh nesembayang. 54Idi ieh negeret aceh pung barén kuan Tuhan déi' luun surud ineh, idi ieh nenawar amung-amung pupuneh kuman pamung. Idi pangeh ideh nekuman idi ideh nerudap déi' luun surud ineh. 55Idi pekak uka-uka Laban netumui idi nemuen mupunneh idi anakneh idi nepetabi' nedeh, idi ieh nenalan nuli'.

Currently Selected:

PUDUT 31: BLD

Highlight

Copy