PUDUT 30

1Iamo' Rakel na anak, idi ieh temaruh inan kinanakneh luk rayeh, idi kebalaneh ni Yakub, “Maré negku inan anak, kudeng na luk idi, maté ui!”

2Idi Yakub museh neneh, kebalaneh, “Miakké ui ngelibal Allah luk maré namu na anak?”

3Idi kebala Rakel, “Siruh, ini demulunku Bilha. Do' iko pamung neneh, idi ieh inan anak kuanku, pad ui pana' ngalap anak rat neneh.” 4Idi ieh nemaré Bilha ni Yakub mangun ku apidneh. Idi Yakub nepamung neneh. 5Idi Bilha mali' idi nenganak aceh anak deléi kuan Yakub. 6Idi kebala Rakel, “Allah pangeh nengamo luk pianku. Ieh pangeh neninger putuhku idi nemaré seburur anak deléi kuanku.” Idi ieh nenganau' ngadan anakneh Dan. 7Idi Bilha mali' teh, idi ieh nenganak aceh anak deléi luk kedueh kuan Yakub. 8Idi kebala Rakel, “Idi ui sikal metueh ratnan kinanakku, pad ui nengelaya' neneh.” Idi ieh nenganau' ngadan anak ineh Naptali. 9Kareb Lia nekali' ieh nugka' na anak, idi ieh nemaré demulunneh, Silpa ni Yakub ku apidneh. 10Idi Silpa nenganak seburur anak deléi kuan Yakub. 11Idi kebala Lia, “Samal kuanku!” Idi ieh nenganau' ngadan anak ineh Gad. 12Pangeh ineh Silpa nenganak aceh anak deléi luk kedueh kuan Yakub. 13Idi kebala Lia, “Samal kuanku, ngaceku amung decur miak ngesamal negku.” Idi ieh nenganau' ngadan anak ineh Aser.

14Kareb uned ngeranih padé, idi Rubin neremuat idi nengalap uduh pelamai déi' bang pulung, idi ieh nenguit ineh kuan tinanneh Lia, idi kebala Rakel ni Lia, “Maré aceh uduh pelamai luk ilap anakmu ineh.”

15Idi kebala Lia neneh, “Iko pangeh nengalap deléiku? Nekini iko pian ngalap pelamai anakku teh?”

Idi kebala Rakel, “Kudeng iko maré pelamai anakmu negku, idi iko miak pamung rudap dengan Yakub dacem ini.”

16Kareb Yakub nacing rat luun lati' kareb malem aco, idi Lia iné' papu' neneh, kebalaneh, “Do' iko amé' rudap denganku dacem ini, ngaceku ui pangeh nenabpar namu ku pelamai anakku.” Idi ieh nepamung neneh bang dacem ineh.

17Idi Allah neninger sembayang Lia pad ieh mali', idi nenganak aceh anak deléi luk kelimeh kuan Yakub. 18Idi kebala Lia, “Allah pangeh nemaré samal kuanku, ngaceku ui nemaré demulunku kuan deléiku.” Idi ieh nenganau' ngadan anak ineh Iskar. 19Idi Lia mali' baruh teh, idi nenganak aceh anak deléi luk keanem kuan Yakub. 20Idi kebala Lia, “Allah pangeh nemaré aceh samal luk do' kuanku. Nekini deléiku miak tudo denganku, ngaceku ui pangeh nenganak anem anak deléi kuanneh.” Idi ieh nenganau' ngadan anak ineh Sebulon. 21Muci ratnan ineh, ieh nenganak aceh anak decur, idi ieh nenganau' ngadanneh Dina.

22Idi Allah nengerawé ni Rakel, idi Ieh neninger sembayangneh, pad Ieh nemaré neneh inan anak. 23Idi ieh mali' idi nenganak aceh anak deléi, kebalaneh, “Allah pangeh nengagka' igu'ku.” 24Idi ieh nenganau' ngadan anak ineh Yusup, kebalaneh, “Do' Tuhan maré aceh anak deléi baruh teh kuanku!”

Yakub Idi Laban Pesaad

25Kareb Rakel pangeh nenganak Yusup, idi kebala Yakub ni Laban, “Nima' negku muli'. 26Do' maré awan-awanku idi anak-anakku luk pangeh ilapku laba' ui ngakem kuanmu, pad ui miak nalan. Ngaceku iko kali' ratnan erurku ngakem kuanmu.”

27Idi kebala Laban neneh, “Nima' negku pebala: Ui pangeh nesibada' ratnan luk ginala' kuanku; ui kali' Tuhan nengeperuan negku ngaceku iko. 28Do' ngegala' tabparmu, idi ui miak maré ineh.”

29Idi kebala Yakub, “Iko kali' ratnan kélku ngakem kuanmu, idi kudeng apeh do' amung aya'mu luk bang paladku. 30Ngaceku sesuut mo' luk iko kuan kareb nateh ui nacing, idi nekini ideh iuk amé' mula'. Idi Tuhan pangeh nengeperuan namu ngaceku ui. Nekini ui pian ngakem kuan tetek ruma'ku sebuleng?”

31Idi kebala Laban, “Anunké luk barénku namu?”

Idi kebala Yakub, “Na ui pian ngalap tabpar anun-anun. Ui lutep maman idi matar amung-amung aya'mu baruh teh, kudeng iko maya' balaku. 32Bang aco sini nima' negku nier amung-amung aya'mu, idi ngatad amung-amung luk meburit idi mebulan rat arang dumbamu, idi amung0amung anak dumba luk mitem, idi amung0amung amék luk meburit idi mebulan. Ineh mangun ku tabparku. 33Idi muci iko miak kali' kudeng kekamenku mesiri, kareb iko macing nier tabparku. Idi anid-anid luk na meburit idi luk na mebulan rat arang amung-amung amék, idi luk na mitem rat arang amung-amung anak dumba ineh, ieh ineh miak belénmu pinoku, kudeng inan arang aya'ku.”

34Idi kebala Laban, “Do'! Miak kiteh nganau' kudeng luk bilamu.” 35Iamo' bang aco sineh teh Laban nengatad amung-amung amék deléi luk meburit idi mebulan, idi amung-amung amék tineh luk meburit idi mebulan, idi amung-amung luk bulan mebuda', idi amung-amung luk mitem rat arang amung-amung dumba, idi amung ineh biréneh bang palad anak-anakneh. 36Idi Laban nenguit amung aya' ineh nenalan teluh aco kiadoneh rat ni Yakub. Idi Yakub nematar amung-amung aya' Laban luk neketecan.

37Idi Yakub nengalap tuda'-tuda' angat luk mebata ratnan lawa aru', lawa berangan, idi lawa talun, idi ieh nenala' sebuang anitneh pad angat ineh mebuda' idi mebata'. 38Idi ieh nengerareng batang-batang luk pangeh kinulitneh ineh pa atun aya'neh su luk inandeh ngirup. Ngaceku ideh petebaneh kareb ideh macing ngirup. 39Kareb pangeh amung-amung amék ineh petebaneh iring batang ineh, idi ideh nenganak. Inan luk meburit, inan luk mitem, inan luk mebulan teh.

40Idi Yakub nengatad amung-amung dumba ineh ratnan amék, idi ieh nenium kiungdeh matun luk mepilang idi amung-amung luk mitem rat arang aya' Laban. Idi ieh nenganau' setau' amung-amung aya'neh sebuleng, pelé ideh na mepuar dengan amung-amung aya' Laban.

41Idi kareb aya'neh luk metueh ineh petebaneh, Yakub nengerareng batang-batang ineh pa kiung aya' ineh su luk inandeh ngirup, pad ideh petebaneh muneng ku batang ineh. 42Iamo' na ieh nengerareng batang ineh kuan amung-amung luk melaya'. Ratnan luk kudeng ineh amung aya' luk melaya' ineh kuan Laban, idi luk metueh kuan Yakub. 43Idi Yakub iuk mula' binaweh, pad inan tuda'-tuda' riudan amék, dumba, unta, idi keladai, dengan mula' demulun teh.

Currently Selected:

PUDUT 30: BLD

Highlight

Copy