PUDUT 33

Yakub Papu' Ni Esau

1Yakub nekali' Esau nacing dengan apat ngeratu anak itinneh. Idi ieh nemabpat anak-anakneh ineh kuan i Lia, Rakel, idi dueh apidneh. 2Idi ieh nenganau' dueh apid ineh dengan anak didueh pa atun, idi Lia dengan anakneh pa muci. 3Idi Yakub sebuleng nenalan pa atundeh. Idi ieh netekunal luun tana' macing tudu' kua', pad macing muneng inan kinanakneh. 4Idi Esau nupun matun neneh, idi nengapel neneh, idi nemuen neneh, idi didueh perigéi' nangi. 5Idi Esau nenier amung-amung decur idi anak-anak ineh, idi kebalaneh, “Idé lemulun luk denganmu ineh?”

Idi kebala Yakub, “Ini anak-anak luk pangeh biré Allah kuanku.” 6Idi dueh apidneh ineh dengan anak-anak didueh nacing muneng neneh idi ideh netekunal. 7Idi Lia dengan anak-anakneh nacing, idi muci Yusup dengan Rakel nacing, idi netekunal teh.

8Kebala Esau, “Anunké babpat ineh luk nacing negku ina? Anunké ilungneh?”

Kebala Yakub, “Ieh ineh pelé iko miak méi' negku.”

9Iamo' kebala Esau, “Ui inan petap, O kinanakku; ngalap luk iko kuan kuan bururmu sebuleng.”

10Idi kebala Yakub, “Na miak kudeng ineh, ui mutuh namu, kudeng iko méi' negku, do' ngalap baréku ini; ngaceku ui pangeh nenier kiungmu mepad kudeng nier ayu Allah, idi iko mawang niat negku. 11Do' ngalap baré luk barénku namu, ngaceku Allah pangeh méi' negku pad Ieh nemaré amung-amung luk pianku.” Idi ieh nengubuk-ngubuk neneh pad ieh nengalap.

12Idi kebala Esau, “Do' tau nalan idi ui nalan pa atun muyuh.”

13Iamo' kebala Yakub, “Iko kali' ratnan anak-anak ini melaya', idi teh ui inan amék idi sapi' luk niti' anak. Kudeng ideh uen ngusu bang seaco kinioneh, kali' rungen ideh maté. 14Do' iko nalan pa atun kai, idi ui miak nguyut nedeh ulai-ulai maya' lawé pung luk pa atunku idi maya' lawé anak-anak, pad ui macing namu dei' Edom.”

15Idi kebala Esau, “Do' ui necan tuda'-tuda' anak itinku maya' namu.” Iamo' kebala Yakub, “Aganeh mo'! Na mekudeh kudeng iko méi' negku.” 16Idi bang aco sineh Esau nuli' maya' dalan amé' déi Edom. 17Iamo' Yakub iné' Sukot, idi ieh nemudut aceh ruma' kuan bururneh sebuleng idi libung kuan amung-amung pungneh, pad lemulun neneten su ineh Sukot.

18Idi Yakub nacing déi' bawang Sikem luk bang tana' Kanaan dengan do', maya' dalan rat déi' Mesopotamia, idi ieh nucu' muneng ku bawang. 19#Yus 24.32; Yah 4.5 Idi ieh nemelih selaleng tana' inanneh nemudut ruma'neh, ratnan anak-anak Hemor luk taman Sikem, dengan meratu balad pirak. 20Idi ieh nenganau' aceh bubpun déi', idi neneten ngadanneh, “El, ieh ineh Allah Israil.”

Currently Selected:

PUDUT 33: BLD

Highlight

Copy