PUDUT 19

Sala' Lun Sodom

1Kareb dueh melaikat ineh nacing déi' Sodom kareb malem aco, Lut tudo munung tanga' bawang ineh. Kareb ieh nenier nedidueh, petacu ieh iné' papu' nedidueh. Idi ieh netekeradung pa atun didueh, 2kebalaneh, “Do' medueh umak ruma'ku, idi rudap déi', maru' kukud medueh, idi pekak nebpa medueh miak nalan uka-uka.”

Iamo' kebala didueh, “Na, kai dueh sikal rudap tungé' luun natad bawang ini.”

3Iamo' ieh mesaad nguit nedidueh, pad didueh maya' neneh idi numak bang ruma'neh. Idi ieh nenganau' irau kuan didueh dengan ruti luk na lamud. Idi ideh nekuman.

4Iamo' kareb nateh didueh nerudap, idi amung-amung deléi bang bawang ineh nacing, do' lun rayeh idi anak adi' pana', idi ideh nengelibut ruma' ineh. 5Idi ideh nenawar ni Lut, kebaladeh, “Iapehké lemulun luk nacing namu malem ini? Nguit nedidueh amé' nekai, pad kai pamung nedidueh.

6Idi Lut neremuat rat bang ruma'neh. Idi ieh nengitek tanga' ineh. 7Kebalaneh, “O kinanakku, aleg muyuh nganau' luk dat kudeng ineh. 8Ui inan dueh anak decur luk nateh nekali' deléi. Ui miak nguit nedidueh amé' nemuyuh, pad muyuh nganau' anun-anun luk pian muyuh kuan didueh. Iamo' aleg muyuh nganau' anun-anun kuan dueh deléi ineh, ngaceku didueh sakai, idi ui na miak na matar nedidueh.”

9Iamo' kebaladeh, “Buro iko! Iko lun pupu baken! Iko na miak mada' nekai. Buro, pad kai na ngedereh namu, meluun rat nedidueh.” Idi ideh nengerieng ni Lut, idi teh ideh nacing sikal ngusag tanga'. 10Iamo' dueh burur ineh nengulang ticu' didueh idi nengalap Lut semuet bang ruma'neh, idi nengitek tanga'. 11Idi didueh nemuser nedeh luk muneng ku tanga' ineh, pad ideh na kali' tanga'.

Lut Necan Bawang Sodom

12Idi kebala didueh ni Lut, “Inanké pupumu tungé', ieh ineh iban, anak deléi idi decur, idi idé-idé luk iko kuan bang bawag ini? Do' nguit nedeh remuat rat ieni. 13Kai sikal ngusag bawang ini, ngaceku Tuhan pangeh neninger adu' luk rayeh ratnan bawang Sodom. Idi Ieh pangeh nengecuk nekai ngusag neneh.”

14Idi Lut iné' mada' deléi luk sikal ngaweh anak decurneh, kebalaneh, “Miket remuat rat bang bawang ini, ngaceku Tuhan sikal ngusag neneh.” Iamo' didueh ngerawé Lut marot nedidueh.

15Idi kareb masat aco, idi melaikat ineh nengubuk ni Lut, kebala didueh, “Tumui iko, nguit awanmu idi dueh anak decurmu, pad iko na maté kareb Tuhan ngukum bawang ini.” 16#2 Pét 2.7 Iamo' Lut mepedueh niat. Iamo' Tuhan méi' neneh. Idi dueh melaikat ineh nengimet ticu'neh idi ticu' awanneh dengan dueh anakneh luk decur, idi didueh nenated nedeh remuat rat bang bawang ineh. 17Idi kareb didueh pangeh nenguit nedeh remuat, idi kebala didueh, “Upun muyuh; aleg muyuh lumi pa puet idi aleg ucu' luun raked ini. Upun muyuh matun pegkung, pad muyuh na maté.”

18Idi kebala Lut, “Mutuh do', O Tuan; 19kali' rungen medueh méi' negku ngaceku medueh pangeh nemuit negku. Iamo' ui na miak upun matun pegkung ineh, ngaceku kudeng luk dat ineh macing negku, kali' rungen ui maté kareb nateh ui macing déi'. 20Siruh, bawang luk isuut ineh! Miak ui buro amé' déi', ngaceku muneng. Do' ui amé' sigapung déi'. Medueh kali' bawang ineh isuut. Idi ui miak mulun!”

21Idi kebala melaikat ineh, “Mo miak! Na ui ngusag bawang luk bilamu ineh. 22Miket muyuh! Upun! Ngaceku na ui miak nganau' anun-anun kareb nateh iko macing déi.”

Ngaceku Lut nemala bawang ineh isuut, idi ideh nenganau' ngadan bawang ineh Soar.

Tabpa Bawang Sodom Idi Gemora

23Idi kareb aco masat Lut nacing bawang Soar. 24Idi Tuhan nenurun batu apui rat déi' langit pa luun Sodom idi Gemora. 25#Mat 10.15; 11.23–24; Luk 10.12; 17.29; 2 Pét 2.6; Yhu 7 Idi Ieh nengusag amung-amung bawang ineh, idi aput raked ineh, dengan amung-amung lemulun luk bang bawang ineh, idi amung-amung tibu luk mulun luun tana' ineh. 26#Luk 17.32 Iamo' awan Lut nelumi pa puet, pad ieh nisu' ku diri tucu'.

27Idi pekak uka-uka Ibrahim petacu iné' su luk inanneh pangeh netuped pa kiung Tuhan ineh. 28Idi ieh nenier pa bawang Sodom idi Gemora dengan aput tana; raked ineh. Idi ieh nenier inan rabpun umak ratnan tana' ineh mepad kudeng rabpun ratnan tetel luk rayeh. 29Iamo' kareb Tuhan Allah nengusag amung bawang luk luun raked ineh, idi Ieh nengerawé Ibrahim, pad Ieh nemuit ni Lut ratnan dereh ineh.

Punneh Lun Moab Idi Lun Amon

30Idi Lut neremuat rat bawang Soar, idi iné' déi' luun pegkung dengan dueh anakneh luk decur, ngaceku ieh matot tudo déi' Soar. Idi diteluh netudo bang lubang batu. 31Idi kebala anakneh luk rayeh nan kinanakneh luk isuut, “I Ama' pangeh mengered, idi na luk idi deléi bang bawang ini luk miak pamung rudap dengan kiteh mepad kudeng lawé luk pekalai bang tana' ini. 32Do' kiteh maré abpa' anggur rupen i Ama', idi kiteh miak pamung rudap denganneh, pad kiteh inan anak.” 33Idi didueh nemaré abpa' anggur rupen taman didueh bang alem ineh, idi aceh luk rayeh nesemuet idi rudap dengan tamanneh. Idi tamanneh na kali' idan ieh netelubid idi idan ieh netumui teh.

34Idi kenebpa, kebala aceh luk rayeh nan kinanakneh luk isuut, “Malem ina ui nerudap dengan i Ama'. Do' kiteh maré abpa' anggur rupenneh teh bang alem ini, idi iko amé' rudap denganneh, pad kiteh inan anak.” 35Idi didueh nemaré abpa' anggur rupenneh bang alem ineh. Idi luk isuut ineh pana' nepamung rudap denganneh. Idi na Lut kali' idan ieh netelubid idi idan ieh netumui. 36Idi dueh anak Lut ineh pana' mali', ieh ineh ratnan taman didueh. 37Idi luk rayeh ineh nenganak aceh anak deléi. Idi ieh nenganau' ngadanneh Moab, ieh ineh taman lun Moab macing nekini. 38Idi luk isuut ineh nenganak aceh anak deléi teh. Idi ieh nenganau' ngadanneh Benami, ieh ineh taman amung-amung lun Amon macing nekini.

Currently Selected:

PUDUT 19: BLD

Highlight

Copy