PUDUT 18

Pejani' Allah Ratnan Kareb Isak Ruen Nenganak

1Idi teh Tuhan nesilagan ni Ibrahim muneng ku lawa kayuh luk meraben déi' Mamré, kareb ieh tudo munung tanga' leponeh kareb mét idang. 2#Ibr 13.2 Ieh netukag idi nekali' teluh burur lemulun tuped pa kiungneh. Kareb ieh nenier nediteluh, ieh nupun ratnan tanga' ineh iné' papu' nediteluh, idi ieh netekunal. 3Kebalaneh, “O tuan-tuanku, kudeng meteluh méi' negku, aleg ngelaba negku, ui ini demulun meteluh. 4Nima' negku ngalap abpa' idi maru' kukud meteluh, idi do' meteluh tudo ngato erur meteluh liang kayuh ini. 5Ui miak ngalap sesuut ruti, pad ngetueh burur meteluh. Pangeh ineh miak meteluh nalan teh. Ngaceku meteluh pangeh nengikak demulun meteluh.”

Idi kebala diteluh, “Do'! Kai maya' balamu.”

6Idi Ibrahim saget-saget nesemuet bang lepo, idi kebalaneh ni Sara, “Miket ngalap banak luk meluun do'. Ngerabur neneh, idi nganau' ku ruti.” 7Idi Ibrahim nupun matun sapi'-sapi'neh, idi ieh nengalap sebuleng anak sapi' luk do' lamu, idi nemaré neneh inan demulunneh. Idi demulun ineh petacu nenanek neneh. 8Idi ieh nengalap lemak rata idi rata sapi' ineh idi uang teh, idi ieh nengerareng ineh pa kiungdeh. Idi ieh netuped iring diteluh liang kayuh ineh laba' diteluh kuman.

9Kebala diteluh neneh, “Iapehké Sara, awanmu ineh?”

Idi kebala Ibrahim, “Déi' ieh bang lepo.”

10 # Rum 9.9 Idi kebala sebururdeh, “Idi na miak na Ui lemubed matun namu pangeh iwa' bulan. Idi Sara, awanmu ineh miak nenganak aceh anak deléi.”

Idi Sara neninger rat pa ketedNeh, munung tanga' lepo ineh. 11Ibrahim idi Sara pangeh mengered, idi pangeh nepelaba ulun didueh. Idi Sara pana' pangeh nugka' ratnan dalan decur. 12#1 Pét 3.6 Idi Sara meriruh, keterawéneh, “Ui pangeh mengered idi awanku pana' mengered, miakké ui ngalap awang luk kudeng ineh?”

13Idi kebala Tuhan ni Ibrahim, “Ngudehké Sara meriruh idi pebala, ‘Miakké ui nenganak aceh anak, ngaceku nekini ui pangeh mengered?’ 14#Luk 1.37 Inanké luk pelaba ikat kuan Tuhan? Idi bang kareb luk petulu, pangeh iwa' bulan Ui miak lemubed matun namu, idi Sara miak nenganak aceh anak deléi'.”

15Iamo' Sara nengalum, kebalaneh, “Na ui meriruh”; ngaceku ieh matot.

Iamo' kebala Tuhan, “Matu, iko pangeh meriruh.”

Ibrahim Sembayang Mutuh Kuan Bawang Sodom

16Idi teluh burur lemulun ineh nenalan matun bawang Sodom. Idi Ibrahim iné' nated nediteluh maya' dalandeh. 17Idi kebala Tuhan, “Na Ui ngapung anun-anun luk ruenKu ineh pa kiung Ibrahim? 18Ngaceku Ibrahim miak mangun ku aceh pupu luk rayeh idi melalud, idi amung-amung pupu luk bang tana' miak ngalap peruan rat neneh? 19Ui pangeh nemili' neneh, pad ieh miak ngecuk anak-anakneh idi inulneh luk muci rat neneh ineh maya' ukumKu idi nganau' luk matu idi luk mesiri, pad Ui miak ngacing kuanneh anun-anun luk pangeh pijani'Ku neneh.”

20Idi kebala Tuhan ni Ibrahim, “Ngaceku adu' rat bawang Sodom idi Gemora pelaba rayeh idi sala'deh pelaba dat, 21idi nekini Ui sikal temurun nier kudeng kekamendeh petulu dengan adu' luk pindengerKu ineh.”

22Idi dueh burur ineh nenalan matun Sodom. Iamo' Tuhan ketecan dengan Ibrahim. 23Idi Ibrahim iné' muneng Neneh idi nepebala, “Miakké Tuhan ngaté lemulun luk matu puar-puar dengan lemulun luk dat? 24Kudeng inan limeh ngepulu' burur luk matu bang bawang ineh, miakké Iko ngusag bawang ineh dengan na méi' nedeh luk limeh ngepulu' burur luk matu ineh? 25Kali' rungen Iko na miak ngaté lemulun luk matu pad-pad dengan lemulun luk dat, idi ngukum lemulun luk na mesala' pad-pad dengan lemulun luk mesala'. Ngaceku Lun luk Mutut Besara' bang aput-aput tana' ini na miak na nganau' luk matu.”

26Idi kebala Tuhan, “Kudeng inan limeh ngepulu' burur lun bang bawang Sodom, luk matu kali'Ku, idi ngaceku lemulun ineh kali' rungen Ui ngulun bawangdeh ineh.”

27Idi kebala Ibrahim, “Matu, ui ini lemulun mo'. Ui mutuh do' ngaceku ui mekuu' pebala inan Tuhan. 28Kudeng arang luk limeh ngepulu' burur luk matu ineh inan limeh luk na matu, miakké Tuhan ngusag bawang ineh ngaceku limeh burur luk na matu ineh?”

Idi kebala Tuhan, “Ui na miak ngusag bawangdeh kudeng Ui nier apat ngepulu' limeh burur luk matu su ineh.”

29Idi teh kebala Ibrahim, “Kian inan apat ngepulu' burur mo' luk matu lek.”

Idi kebala Tuhan, “Ngaceku apat ngepulu' burur lemulun luk matu na Ui miak ngusag bawang ineh.”

30Idi kebala Ibrahim, “Do' Tuhan na museh ku balaku, ngaceku ui sikal pebala teh. Kian inan teluh ngepulu' burur mo' luk matu bang bawang ineh.”

Idi kebala Tuhan, “Na Ui miak ngusag bawang ineh kudeng Ui nier teluh ngepulu' burur luk matu.”

31Kebala Ibrahim, “Ui mutuh do' ngaceku ui mekuu' pebala inan Tuhan. Kian, inan dueh ngepulu' burur lemulun luk matu lek.”

Kebala Tuhan, “Ratnan dueh ngepulu' burur lemulun luk matu, na Ui miak ngusag bawang ineh.”

32Idi kebala Ibrahim teh, “O Tuhan, aleg museh, idi ui sikal pebala teh sekua' ini mo'. Kian, inan pulu' burur lemulun luk matu lek.”

Idi kebala Tuhan, “Ngaceku pulu' burur lemulun luk matu na Ui miak ngusag bawang ineh.” 33Kareb Ieh pangeh nepebala kuan Ibrahim, idi Tuhan neburo. Idi Ibrahim pana' nuli'.

Currently Selected:

PUDUT 18: BLD

Highlight

Copy