PUDUT 20

Ibrahim Idi Abimelek

1Idi rat Mamré Ibrahim nenalan amé' Negeb. Idi ieh netudo arang bawang Kadis dengan bawang Sur. Idi ieh lun sakai bang bawang Gerar. 2#Pud 12.13; 26.7 Idi kebalaneh ratnan awanneh Sara, “Ieh ineh kinanakku.” Idi Abimelek raca' Gerar ineh nengecuk nelun ngalap ni Sara. 3Iamo' kebala Allah ni Abimelek bang nupineh, “Iko malé maté, ngaceku decur luk pangeh ilapmu ineh awan dulun.”

4Iamo' Abimelek nateh nepamung denganneh. Idi kebalaneh, “O Tuhan, ui na sala'! Kudeng apehké Iko miak ngaté negku idi pupuku? 5Kebala Ibrahim, ‘Decur ini kinanakku.’ Idi kebala decur ineh pana', ‘Deléi ini kinanakku.’ Idi dengan mesiri niat ui pangeh nenganau' ineh.”

6Idi kebala Tuhan neneh bang nupineh, “Mo, Ui kali' idi dengan mesiri niatmu, iko nenganau' ineh. Idi teh pangeh Ui nemebpeng namu na miak nganau' sala' pa kiungKu. Idi na Ui nenima' namu ngakem decur ineh. 7Iamo' nekini do' iko ngelubed decur ineh kuan awanneh; ngaceku ieh seburur lun nabi. Idi ieh miak mutuh kuanmu, pad iko mulun. Iamo' kudeng iko na ngelubed neneh, do' iko ngerawé, dengan matu-matu iko maté, idi dengan amung pupumu.”

8Idi pekak uka-uka Abimelek nenawar amung-amung lun tarehneh, idi ieh nemada' nedeh ratnan luk pangeh nangun, pad ideh pelaba tot. 9Idi Abimelek menawar ni Ibrahim, kebalaneh, “Anun luk inau'mu kuan kai ini? Anun sala'ku namu, pad iko pangeh nengacing susa' luk rayeh kuanku idi kuan imetku teh? Na petulu seburur pana' nganau' luk ruenmu kuanku. 10Ngudehké iko nenganau' kudeng ineh?”

11Idi kebala Ibrahim, “Ngaceku bang terawéku, dengan matu-matu lun bang bawang ini na matot inan Allah, kali' rungen ideh ngaté negku ngaceku ratnan awanku ini. 12Idi matu ieh kinanakku, ieh ineh anak tamanku. Iamo' baken ieh anak tinanku. Idi ieh pangeh mangun ku awanku. 13Idi kareb Allah nengecuk negku nalan rat ruma' tamanku, idi kebalaku neneh, ‘Do' iko méi' kuanku, idi iapeh-iapeh luk ulek kiteh do' mala negku kinanakmu.’ ”

14Idi Abimelek nemaré dumba, sapi', idi demulun kuan Ibrahim. Idi Sara awan Ibrahim ineh pana' linubedneh. 15Idi kebalaneh ni Ibrahim, “Idi amung-amung tana'ku ineh pa kiungmu. Tudo mo' iapeh-iapeh luk pianmu.” 16Idi kebalaneh ni Sara, “Idi kuan kinanakmu ini, ui pangeh nemaré meribu balad pirak mangun ku tanu' iko na mesala' siren amung lun denganmu. Idi amung-amung lemulun miak kali' iko na mesala'.”

17-18Allah pangeh nengitek nakan amung-amung decur bang ruma' Abimelek ngaceku ratnan Sara, awan Ibrahim ineh. Idi Ibrahim sembayang mutuh kuan Abimelek. Idi Allah nengedo' neneh dengan awanneh idi demulunneh, pad ideh inan anak teh.

Currently Selected:

PUDUT 20: BLD

Highlight

Copy