लूका 11
11
येशूका सो़म्दी बोमु सीट्मिडिम
(मत्ती ६:९-१३; ७:७-११)
1कोलेम येशूका कोले खोमडा सो़म्दी बेत्तोङा लेट्मिडी। गुमीका सो़म्दी बोमु दु़म्मिडी, मा उनी सीसिपामिमगोडाम कोलेका गुमीनुङ र्वाक्ता, “ङाचो़, यूहन्नाका उ सीसिपामिमलाई सीड्डु़मिम होम्साकाङा गुकुलाई वो सो़म्दी बोमु सीकिनी।” 2गुमीका मेर्मिमलाई र्वाम्डी, “गानी आरे र्वाक्साका सो़म्दी बेनी:
‘ए पाह्रीला बाट्पा आकीमा पाप,
इनीमा सेपा नङ कोसिनु़,
इनीमा किब्दी रोनु़,
3हेल्लो लोवो गुकुलाई चाहेदु़म्पा पोमु-डुमु
आनेप वो ग्वाक्किनी।
4आकी कोर्थो़लाम बक्पामिमकु छु़ल
हेप्साक्तोकोम होङङा
आकी छु़लमिम हेप्साक्किनी।
मेजो़पा ल्वालाम न-छाम्सिमु मेग्वाक्किनी’।”
5गुमीका मेर्मिमनुङ र्वाम्डी, “उदाहरणकाम लागि मिम्नी, गानीगोडा कोङनिमकाम कोले ङोप्सो़ बु। गु सिन्थाम को-न (१२) जेस्ताम चङडा गु उ ङोप्सो़काडा ल, मा र्वा ङोप्सो़ गोलाई सुले सो़बेम लोखा ग्वाङनी का। 6हेङालोने आमा कोले ङोप्सो़ हापा दु़पा लाम्दी लाम्दिडामा आमाडा रोक्ताम बु, मा गुलाई ग्वाक्पा पोमु-डुमु गोनुङ हाम वो मिबु।
7“मेरामकु ङोप्सो़का नेमगोनोलामका र्वा, आ अम्खोमगोडा दु़खा मेग्वाक्ङी। गो लाम्चोको ख्लु़त्तोमा आमा चो़च्चो़मिमनुङ अम्पा बुङु। ओम्लो बक्साका गानालाई गो हाम वो ग्वामु मेचाम्नी। 8मेकोतिमा गो गानीनुङ र्वाङु, गुका मेराम उ ङोप्सो़ङा लोवो हाम वो मेग्वाकु़। लावो उ ङोप्सो़का बियु़मिम-बियु़मिम ङा बु़मिमका गु ब, मा गुका चाहेबु़मिम कोति उ ङोप्सो़का गुलाई ग्वाकु़।
9“मेम्मिमका गो गानीलाई र्वाङु, बिनी, मा गानी ल्वानी। माल्नी, मा गानी डार्नी। नेमगोनो हुमु लागि हेला बेनी, मा इनीमा लागि लाम्चोको होल्सी। 10हेङालोने उहेमका बियु़, मेरामका ल्वासु़, उहेमका मालु़, मेरामका डारु़। उहेमका नेमगोनो हुमु लागि हेला बु़ मेरामकाम लागि लाम्चोको होल्सी।
11“गानीगोडाम सु़काम पाप बु, उ तारापाचो़का ङो बियु़लो ब्लो ग्वाक्पा? 12डे पोकु डि बियु़लो मेरामलाई दावाखाम ग्वाक्पा? 13मेम्मिमका गानी छु़लचो़ बुनीमा वो इनी चो़मिमलाई जो़पा-जो़पा ल्वामिम ग्वामु थेनी माला पाह्रीलाम इनी माम्चु़नीका गुमीनुङ बिपा मु़चु़मिमलाई हाङको छो़म उनी-पेल ग्वामी।”
येशू नुङ मुनाङमिमकु डोक्पु बालजिबुल
(मत्ती १२:२२-३०,४३-४५; मर्कूस ३:२०-२७)
14कोलेम येशूका उ सि मेजेपा मु़चु़कुगोलामका मुनाङ कोल्मिडी। मे मुनाङ लुक्साका लस्तामा मे मु़चु़ जेमु चो़म्डु़। ओराम ल्वाम्डिमा मु़चु़मिम ङाङाया दु़म्मिडी। 15लावो मेर्मिमगोडाम याङ-याङका र्वाम्डी, “ओरामका ने मुनाङमिमकु डोक्पु बालजिबुलकु यु़मका मुनाङ कोलु़।” 16वाङमिमका ने मेजो़पा नका येशूकु न-छाम्मु माल्तो र्वाम्डी, “ओराम खारी माम्चु़नीकु यु़मलाम बेन्निम माला पाह्रीलाममिम हेल्लो वो मेल्वाम्मा कोले छेखोप रेम्बेनी।”#मत्ती १२:३८; १६:१; मर्क ८:११
17येशूका मेर्मिमकु नड्डाम ल्वा चम्डिमा मेर्मिमनुङ र्वाम्डी, “उहेम किब्दीडा मु़चु़मिम उनी त्वाप-त्वापडा ङा क्वाल्बा बोमी, मेराम किब्दी दाम्मा ल। मेम्साकाङा उहेम नेमगोडाम मु़चु़मिमका उनी त्वाप-त्वापगोडा क्वाल्बा बोमी, माला मे उनी नेम झार। 18मेम्साकाङा शैतानकु किब्दीगोडा उनी त्वाप-त्वापडा क्वाल्बा बोमी माला मेरामकु किब्दी हेसाका दु़महोम बु? मेमङा लोवो गानी गोलाई बालजिबुलकु यु़मका मुनाङमिम कोल्तोङा लेट्पु र्वाक्साका र्वानी। 19गो बालजिबुलकु यु़मका मुनाङपेल कोलु माला, इनी मु़चु़मिमका सु़कु नङडा मुनाङ कोल्मी? ओरामलामका ङा गानी इनी नडा ख्लो़ट्निम बु र्वाक्पा मेर्मिमका रेम्बोमी। 20लावो गो माम्चु़नीकु यु़मका मुनाङपेल कोलु़ माला गानीगोडा माम्चु़नीका साखाम थो़पा थारी रोक्ल्याड्डाम बु।
21“कोले सोनुङमा मु़चु़का गिजो-वाजो झेसाका उ नेम लडु़ माला उ खाप्चीमिम मेदाम। 22लावो गुडाम वो घ्ल्वापा सोनुङमा मु़चु़ रोक्तामा गुनुङ क्वाल्बा बेसाका घ्ल्वास्तु़ माला, मेराम सोनुङमा मु़चु़का थो़रबु़डु़म गिजो-वाजो रोडु़मा ल। मेकोतिमा रोडु़मा लमिम खोत्ले खाप्चीमिम वाङमिमलाई दो़यु़साडु़मी।
23“उहेम मु़चु़ गोलाम मेबासी, मेराम मु़चु़ आमा कोर्थो़लाम दु़म। उहेमका गोनुङ मेखोप्डु़, मेरामका फोडु़।#मर्क ९:४०
24“मुनाङपेल मु़चु़लामका लुमा र्याङगो-र्याङगोडा ङेसिक्पा खोम मालु़। मेम्मा बान्ते वो मेल्वासु़लो मेरामका आरे र्वा, ‘गो उहेम मु़चु़लामका लुक्साका रोङडो मेराम मु़चु़काडा ङा लङु।’ 25मेम्मिमका मे मुनाङपेल ख्लोसिमा रोलो जो़होम बेम्थाट्मा नेम होप्माम मे मु़चु़कु नगो डार्रु़। 26मेकोतिमा मे मुनाङपेलका उ त्वापडाम वो छो़म मेजो़पा येतले (७) मुनाङपेलमिमलाई रेड्डु़मा रोक्ता, मा मेर्मिम खोत्ले मेराम मु़चु़गोनो हुमी मा बुमी। मेम्मा मेराम मु़चु़ ङादो दु़स्तामडाम वो चङडा छो़म मेजो़पा दु़म।”
27येशूका ओर्मिम ल्वा सो़त्तोङा लेट्मिडिलो सेर्पा मु़चु़मिमगोलामका कोले मेसेमका डोक्पु लो़लामका आरे र्वाक्ता, “गानीलाई कक्पा, मा दु़दु़ थो़पा माम आलाकाम सो़।”
28लावो येशूका र्वाम्डी, “उहेमका माम्चु़नीकु सिजेम जो़होमका थो़मी, मा मेराम होम्साका बोमी, मेर्मिम मु़चु़ डे आलाकाम सो़।”
योनाकु छेखोप
(मत्ती १२:३८-४२)
29येशूकु होनोलाम-आथो़लाम मु़चु़मिम छो़म सेर्पा दु़म्तो लम्डिलो येशूका र्वाम्डी, “आथामबिलिम मु़चु़मिम छो़म मेजो़पा न-गोनुङमा बुमी। मेर्मिमका हेल्लो वो मेल्वाम्मा छेखोप रेम्बेट्की र्वाक्साका गोनुङ र्वामी। लावो मेर्मिमलाई योनाकु छेखोप कोङङा ग्वाक्पुमी।#११:२९ योनाकु छेखोप#मत्ती १६:४; मर्क ८:१२ 30योना निनवे शहरडाम मु़चु़मिमगोडाम छेखोप दु़स्ताम होम्साकाङा आथामबिलिम मु़चु़मिमकाम लागि मिनीचो़ छेखोप दु़म।#योना ३:४ 31आथामबिलिम मु़चु़मिमकाम निया दु़म्मिम नेम रायला नेब्दीडाम हपमे बमा मेर्मिम मु़चु़मिमलाई मुमा बेडु़मी। हेङालोने गुका सोलोमन हपलामका नेप्चीनुङमा सिजेम थो़प्डा सुबुबिर्खोपलाम रोक्ताम बाइडा। लावो रेप्नी, आसिन्डा सोलोमनडाम वो छो़म घ्ल्वापा कोले बु।#१ राज १०:१-१०; २ इति ९:१-१२ 32निया दु़म्मिम नेम निनवे शहरडाम मु़चु़मिम बमिमा ओर्मिम मु़चु़लाई मुमा बेन्मी। हेङालोने योनाका माम्चु़नीका सो़बेट्मिडिम सिजेम थो़बेड्डु़मिलो मेर्मिमका उनी छु़ल न-गोलामका मिम्सिम्डिमा माम्चु़नीडा ख्लोसिम्डी। लावो आसिन्डा रेप्नी, योनाडाम वो घ्ल्वापा कोले बु।#योना ३:५
मु़चु़कु गोगोनोम ओल
(मत्ती ५:१५; ६:२२-२३)
33“सु़का वो धिप्री चायु़मा थक्साका मेजु़लु़, खचाका चु़प्डु़मा मेजु़लु़, लावो नेमगोनो हुपा खोत्लेका ल्वामिनु़ र्वाक्साका बोर्सोडला जु़लु़।#मत्ती ५:१५; मर्क ४:२१; लूक ८:१६ 34इनी मिरो़मलाई ओल ग्वाक्पा होप्माम धिप्री ने इनी मिक्सी सो़। इनी मिक्सी जो़पा दु़स्ता माला खोत्ले इर्नी मिरो़मडा ङा ओलका दो़। लावो इनी मिक्सीङा मेजो़पा बु माला ने मिरो़मङा तुकुम्चिम होप्माम दु़म। 35मेम्मिमका चङचङया बानी, गानीगोडा बाट्पा ओल तुकुम्चिम मेदु़म्नु़। 36इनी मिरो़म ओलडा बु माला, इनी मिरो़म तुकुम्चिमका हुप्डु़म मिबु माला, धिप्रीकु ओल गानीडला झ्वामिम होङङा गानी झ्वानी।”
फरिसीमिम नुङ डु़म्ला सीपा पातु़म्रीमिमलाई मुमा बेट्मिडिम
(मत्ती २३:१-३६; मर्कूस १२:३८-४०)
37येशूका ओर्मिम ल्वा जेमु दु़म्मिडी, मा कोले फरिसीका गुमीलाई ग्रुला पेप्डा उमा नेमडा येड्डु़। गुमी मेरामकु नेमडा लम्डिमा ग्रुला पेप्डा गन्मिडी। 38लावो ग्रुला पोमु ङादो येशूका उनी ल्वा मेसो़ल्मिवाम ल्वास्तु़मा मे फरिसी ङाङाया दु़स्ता।
39मेकोतिमा ङाचो़ येशूका मेरामलाई र्वाम्डी, “गानी फरिसीमिमका कान्चु़रे नुङ थाल उडलामका क्लो़नी। लावो गानी इनी गोगोनो रारी बोनी, मा मेजो़पा न-गोनुङमा बुनी। 40ए नेप्ची मान्थिम मु़चु़नी, इनी मिरो़म बनेबेपा माम्चु़नीका ङा न-गो बनेबेम्डिम मेएँ मा? 41गानी उनी हाम वो मेबाट्पामिमलाई इनी न-गो ग्वाक्नी। मेम्मा इनीमा लागि खोत्ले छेको-छेको दु़म।
42“गानी फरिसीमिमलाई वाइतो, हेङालोने इनी जडीबूटीमिम नुङ मसलामिम होप्माम याक्के-याक्के ल्वामिमकाम वो दशांश माम्चु़नीलाई ग्वानी। लावो मु़चु़मिमलाई जो़पा मेबोनी, मा माम्चु़नीकु रिखाम मेद्वानी। गानी ने मु़चु़मिमलाई जो़पा बेनिवा, मा माम्चु़नीलाई रिखाम बेनिवा, मेम्मा दशांश (को-धु़म फ्वा) ग्वाक्निवानी।#लेवी २७:३०
43“गानी फरिसीमिमलाई वाइतो, हेङालोने गानी घ्रो़म्दीनेमडा डोक्पु-डोक्पु मु़चु़ गन्खोपडा गन्मु नुङ मु़चु़मिमकु ङादोडा सेव सान्ला सो़सिमु द्वानी।
44“गानी फरिसीमिमलाई वाइतो, हेङालोने गानी क्वागोयु़ङा दाम्ल्याक्पा सु़लु़म होप्माम बुनी। मेम्साका ल्वामु मेझापा सु़लु़मडला#११:४४ गन्ती १९:१६ सु़लु़मडला लाम्दिमु र्वाक्मा यहूदीमिमकाम लागि मेसेपा दु़म। मु़चु़मिमका मेछेसाकाङा मेर्मिमडभाल लाम्दिमी।”
45कोले मोशाकु डु़म्ला छो़म थेट्पा मु़चु़का येशूनुङ र्वाक्ता, “ङाचो़ गानी ओर्मिम ल्वा सो़साका आकी नो़-कल पार्साक्तिकी।”
46येशूका मेराम मु़चु़लाई र्वाम्डी, “गानी मोशाकु डु़म्ला छो़म थेट्पा मु़चु़मिमलाई वाइतो, हेङालोने डु़म्ला होम्साका मु़चु़मिम दोमु मेचापा दु़म्बेनिमा दोबेनी। लावो इनी त्वाका ने मेराम होम्साका दोमु मेर्मिमलाई कति कल्पा ल्वाडा वो मेख्लो़नी।
47“गानीलाई वाइतो, इनी त्वाकु ङाउ-खुउमिमका माके-माके सेट्मिडिम माम्चु़नीलाम-जेपालाई डोक्पु मिम्निमिम रेम्बोमु जो़पा-जो़पा उनी सु़लु़म बनेबोन्सानी। 48आरेसाका इनी ङाउ-खुउमिमका हाम बेम्डी गानी वो मेमङा बोमु बिन्सिनिमिमका इनी ङाउ-खुउमिमका हाम बेम्डिम बाइडा र्वाक्पा चनी। मेर्मिमका माम्चु़नीलाम-जेपामिमलाई सेट्मिडी, मा गानी ने माम्चु़नीलाम-जेपामिमकु सु़लु़म बनेबोन्सानिमी। 49माम्चु़नीकु नेप्चीका वो इनी दुथाम आरे र्वाक्ताम बाइडा, ‘गोलाम जेपामिम नुङ थु़र्मामिमलाई गो मेर्मिमकाडा थु़रु़मी। मेर्मिमका कोङनिमलाई सेन्मी, मा कोङनिमकु थो़मतेर्सामी।’ 50मेम्मिमका सु़म्दिमोलो आथाम माम्चु़नीलाम-जेपामिम खोत्लेलाई सेट्मिडिमकु देन्दे गानी आथामबिलिम मु़चु़का ल्वानी। 51गो गानीलाई आच्छाङा र्वाङु, हाबिल सेट्मिडिम आथाम सासेन्खोप खोमडा नुङ सो़रनेमकु थेतेडा जकरियालाई सेट्मिडिमसम्मकाम देन्दे गानी आथामबिलिम मु़चु़मिमका डार्नी।#११:५१ हाबिल जकरिया#उत ४:८; २ इति २४:२०-२१
52“गानी मोशाकु डु़म्ला छो़म थेट्पामिम ने हाउरेमा, हेङालोने माम्चु़नीलाई छेपा नेप्ची गानी ल्वान्नी। गानी माम्चु़नीलाई आच्छाङाका मेछेनी। मेम्मा माम्चु़नीलाई छेमु न बेपामिमलाई वो छेमु मेग्वानी।” 53येशू मेराम नेमलामका लुम्डिलो यहूदीकु डु़म्ला सीपा पातु़म्री नुङ फरिसीमिम छो़म येशूकु कोर्थो़लाम बम्डिमा गुमीलाई भुर्मु लागि गुमीनुङ छो़म हिलाहिसी बेम्डी। 54हेङालोने गुमीका हाम-हुम ल्वा र्वामी माला चु़म्मुकाम बाम्डी।
Currently Selected:
लूका 11: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
