लूका 12
12
सीसिपामिमलाई चङचङया बाबेट्मिडिम मा सो हन्बेसाट्मिडिम
(मत्ती १०:२६-३३; १२:३२)
1मेकोतिलोङा छो़म सेर्पा मु़चु़मिम खोम्सिम्डिमका मेर्मिम उनी त्वाप-त्वापङा देम्बेत्तोङा लेट्मिडिम बाइडा। येशूका उनी सीसिपामिमलाई ङादो र्वामु चो़म्मिडी, “गानी फरिसीमिमकु लङखामडाम चङचङया बानी वो। मे लङखाम र्वाक्मा ने मु़चु़मिमकु मिक्सीलामडा जो़पा लिसिक्पा मेर्मिमकु खारी सो़।#मत्ती १६:६; मर्क ८:१५ 2हेङालोने ख्रेप्साका जु़ल्मा खोत्ले लुमी, मा थक्साका जु़ल्मामिम खोत्ले थेसिथेडी। 3मेम्मा गानी तुकुम्चिमडा जेनिमिम ल्वा ओलडा थो़सी। मेकोतिमा सु़पील्वाका जेनिमिम ल्वा खोत्ले मु़चु़का थो़मी।#मत्ती ४:२२; लूक ८:१७
4“ङोप्सो़नी, गो गानीलाई र्वाङु, उहेमका इनीमा साम फ्यामी, मा मेरामडाम वाङमिम हाम वो बोमु मेचाम्मी, मेर्मिम मु़चु़डाम मेङिनी। 5लावो गो गानीनुङ र्वाङु, इनीमा साम फ्याक्साक्पामा गानीलाई खादीगोयु़ घ्रोमु चापा यु़म बाट्पा माम्चु़नीनुङ ङिनी। आच्छाङा गो गानीलाई र्वाङु, गुमीनुङङा ङिनी। 6ङोले भँगेराकु थि नक पैसा कोङङा दु़म। मेर्मिमगोडाम कोलेलाई वो माम्चु़नीका मेप्ल्वामी। 7लावो इनीमा ने बुइडाम सेम ङा वो ङार्सिड्डाम बु। मेम्मिमका मेङिनी, सेर्पा भँगेरामिमडाम माम्चु़नीकाम लागि गानी हापा थिकाम बुनी।
8“गो गानीलाई र्वाङु, गो आमा सीसिपा र्वाक्साका गानी मु़चु़मिमलाई र्वानी माला माम्चु़नीकु पाह्रीचो़मिमकु ङादोडा मिनीचो़का वो गानीलाई उ सीसिपामिम र्वा। 9लावो उहेमका मु़चु़मिमकु ङादोडा आमा सीसिपा मेर्वा, माम्चु़नीका पाह्रीचो़मिमकु ङादोडा मेराम मु़चु़लाई गो आमा सीसिपा मेर्वाङु। 10उहेम मु़चु़का मिनीचो़कु कोर्थो़लाम जे मेरामकु छु़ल हेम्सिमु चाप्सु़, लावो उहेमका माम्चु़नी-पेललाई डक्साका जे मेरामकु छु़ल हेम्सिमु मेचाप्सु़।#मत्ती १२:३२; मर्क ३:२९
11 #
मत्ती १०:१९-२०; मर्क १३:११; लूक २१:१४-१५ “मु़चु़मिमका गानीलाई चु़म्नीमा घ्रो़म्दीनेमबाडे साखामचो़मिम नुङ किब्दी साखामचो़मिमकामबाडे हिलाहिसी बेप्डा रेनिमी, मेकोतिलो गो हाम र्वामु, हाम सो़मु र्वाक्साका मिम्ताम-सो़र्ताम मेबेनी, 12हेङालोने हाम र्वामु बासिक्पा ल्वा माम्चु़नी-पेलका मेकोतिलोङा गानीलाई सीनी।”
त्वाप कोङङा नु़मु न बेपा खाप्चीचो़कु सीसि-सो़म्दी
13मे सेर्पा मु़चु़मिमगोलामका कोले मु़चु़का येशूनुङ आरे र्वाक्ता, “ङाचो़, आकी पापकु खाप्ची गोनुङ दो़मु आमा वालाई र्वाङसाङनी।”
14लावो येशूका मेराम मु़चु़लाई र्वाम्डी, “ङोप्सो़, मेम्साका निया बेपा, मा मुलु़ बेप्साक्पा सु़का गोलाई थुट्ङिडिम बु मा?” 15गुमीका मेसिन्डा खोम्सिक्पा मु़चु़मिमलाई र्वाम्डी, “गानी चङचङया बानी वो, खोलेम थोक रारी बोमुडाम वाङ बानी, हेङालोने हापा खाप्चीनुङमा मु़चु़ बु, लावो मेराम मु़चु़का त्वारो़म ने मेग्वाकु़।”
16गुमीका मेर्मिमनुङ ओराम सीसि-सो़म्दी र्वाम्डी, “कोले खाप्चीचो़कु ये-दडा छो़म मा-के सिड्डु़म बाइडा। 17मेराम मु़चु़का उ नड्डा मिम्मु चो़म्डु़, ‘आमा मा-के जु़ल्खोप डोक्पु छेदेनेम गोनुङ मिबु, मेम्मिमका गो हाम बोमु?’
18“मेकोतिमा गुका र्वाक्ता, ‘गो आरे बेउ, याक्के-याक्केतो छेदेनेममिम फालु, मा डोक्पु छेदेनेम बनेबेउ, मा खोत्ले मा-के नुङ खाप्ची वो मेसिन्डाङा जु़लु़। 19मेम्मा आमा नड्डा र्वाङु, “गोलाई हापा थसम्म लिट्पा मा-के नुङ खाप्चीमिम फुट्तोम बु। खेल चार्थक्पुमा पेउ-डुउ, मा एलेङगी बेउ”।’
20“लावो माम्चु़नीका मेराम मु़चु़लाई र्वाम्डी, ‘ए नेप्ची मान्थिम मु़चु़, आनेप सिन्थाङा गाना सिना, मा इमा लागि फुट्नामा जु़ल्नाम खोत्ले खाप्ची सु़काम दु़म?’
21“त्वाकाम लागि खाप्ची फुट्पा, लावो माम्चु़नीडा खाप्चीचो़ मेदु़म्पा मु़चु़ ने आरेङा दु़म।”
मिम्ताम-सो़र्ताम मेबेनी
(मत्ती ६:२५-३४)
22मेकोतिमा येशूका उनी सीसिपामिमलाई र्वाम्डी, “मेम्मिमका गो गानीलाई र्वाङु, इनी साम जु़ल्मु लागि हाम पेउ मा मिरो़मडा हाम फसिङु र्वाक्साका मिम्ताम-सो़र्ताम मेबेनी। 23हेङालोने साम पोमु-डुमुडाम डोक्पु मा मिरो़म ये-सेमडाम डोक्पु सो़। 24चक्पुमिमलाई रेप्नी, मेर्मिमका भ्रल मेफोन्मी, मा मा-के मेहिम्मी, मेर्मिमका छेदेनेमडा मा-के ङा वो मेफुमी। लावो माम्चु़नीका मेर्मिमलाई पोमु-डुमु ग्वामी। गानी मे चक्पुमिमडाम हापा थिकाम बुनी। 25मिम्ताम-सो़र्ताम बेसाका गानीगोडाम उहेमका किचो़ उ सो़ररिप बर्बेन्मु चाप्सु़ मा? 26मेम्मिमका गानी मेकोति याक्के खारी लोवो बोमु मेचाम्नी माला, हेङा वाङमिम ल्वाकाम मिम्ताम-सो़र्ताम बोनी।
27“जो़पा बुङमालाई#१२:२७ ग्रीक बाइबलडा लिली बुङमा र्यामा बु। रेप्नी, मेर्मिम हेसाका बर्मी। मेर्मिमका ब्राम्दु़ल्वा वो मेबोमी, ये-सेम बनेबोमु लागि साले वो मेथु़न्मी। लावो गो गानीलाई र्वाङु, सोलोमन हप छो़म खाप्चीचो़ बाइडा, मा वो मे बुङमामिम कोतिम वो जो़पा दु़म्साका ब्ल्वासिड्डाम मेबायावा।#१ राज १०:४-७; २ इति ९:३-६ 28लावो आनेप बाट्पा मा उ दिकाम मुडडा घ्रु़पा क्वाडाम जेमलाई ने आरेसाका माम्चु़नीका ब्ल्वामी माला, ए याक्के थो़र बाट्पा मु़चु़नी, गानीलाई ओरामडाम हाङको हापा गुमीका ब्ल्वानिमी। 29मेम्मिमका हाम पोमु हाम डुमु र्वाक्साका मेमाल्नी, मा मिम्ताम-सो़र्ताम वो मेबेनी। 30माम्चु़नीडा थो़रमेलु़पा सु़म्दिसेरडाम खोत्ले मु़चु़मिमका कोङङा आरेसाका मिम्ताम-सो़र्ताम बोमी। लावो गानीलाई चाहेदु़म्पा ल्वा इनी माम्चु़नीका ङादोङा चमी। 31मेम मेएँ माम्चु़नीकु किब्दी ङादो माल्नी। मेम्मा गानी चाहेबोनिमिम खोत्ले गुमीका ग्वानी।
32“ए कति सेर्पा सीसिपानी, मेङिनी, हेङालोने माम्चु़नीका उनी किब्दी गानीलाई ग्वामु लागि छो़म गेर्सिद्वाक्पा बुमी। 33इनी खाप्चीमिम भ्रेट्नीमा उनी हाम वो मेबाट्पामिमलाई ग्वाक्साका इनी त्वाकाम लागि हेल्लो वो मेभ्रो़ट्पा फाजी बनेबेनी। मेम्मा हेल्लो वो मेदाम्पा खाप्ची पाह्रीला फुट्नी। मेला ने खुचु़वा मेरो, मा तु़मका वो मेकोकु़। 34हेङालोने बान्ते इनी खाप्ची बु मेसिन्डाङा इनीमा न वो दु़म।
झो़म्जो़ल्सिट्नी
(मत्ती ६:१९-२१)
35“इनी थ्वाक्पुरी खिप्निमा झो़म्सिट्नी, मा इनी धिप्रीमिम चान्जो़ल्नी।#मत्ती २५:१-१३ 36उनी नेमहप लालीकुन्दा बेम्डिम नेमडा ग्रुला पेसाका रोमिमसम्म लथाक्पा, मा गु रोक्साका हेला बु़लो लाम्चोको होल्थाक्पा डु़ल्चो़मिम होप्माम गानी दु़म्नी। 37उनी नेमडाम हप रोलो झो़म्जो़ल्सिट्पा डु़ल्चो़मिम आलाकाम सो़। आच्छाङा गो गानीलाई र्वाङु, मेरामका उ थ्वाक्पुरी खिम्सिमा मेर्मिमलाई गडु़मी, मा पोमु-डुमु ग्वाकु़मी। 38नेमहप सिन्था को-न (१२) जेमिम बिलि रोफा लोवो नेमसोसोका रोफा लोवो झो़म्जो़ल्सिट्पा उ डु़ल्चो़मिम आलाकाम सो़। 39लावो ओराम ल्वा चन्जो़ल्नी, बाम थारीका खुचु़वा रो र्वाक्साका चवाम माला ने नेमकु ङाउका खुचु़वालाई नेम पिमु ङा मेग्वाकु़वा। 40गानी वो झो़म्जो़ल्सिट्नी, हेङालोने गानी इनी नड्डा-थो़मडा मेमिम्निमिम थारीका ङा मिनीचो़ यो सो़।”
41मेकोतिमा पत्रुसका हिलाबु़डु़, “ङाचो़, हाम ओराम सीसि-सो़म्दी आकीमा लागि कोङङा सो़न्निम डे वाङमिम मु़चु़काम लागि वो?”
42ङाचो़ येशूका गुलाई र्वाम्डी, “मेम माला मेरामकु नेमहपका उ नेमडाममिमलाई जो़पा थारीका पोमु-डुमु ग्वाबेडु़मिम नेप्चीनुङमा नुङ थो़रलु़इमिम डु़ल्चो़ सु़? 43नेमहप रोफालो मे डु़ल्चो़का मेम्साका ङा जो़पा खारी बेत्तोङा बेपा डार्फाडु़मिम डु़ल्चो़ आलाकाम दु़म सो़। 44आच्छाङा गो गानीलाई र्वाङु, मेरामलाई उ नेमहपका खोत्ले उ खाप्चीमिम रेप्साक्पा दु़म्बेडु़। 45लावो मेराम डु़ल्चो़का ‘आमा नेमहप दाला मेरोमी’ र्वाक्पा मिम्सीमा वाङमिम डु़ल्चो़-डु़ल्चो़मेमिमलाई याल्मु चो़म्डु़, पु़-डुङु़मा डु़का सेडु़ माला, 46मेरामका मेमिम्डु़मिम थारीका नुङ मेलथाडु़मिम थारीका उ नेमहप रोफा। मेम्मा उ नेमहपका मेरामलाई यालु़, मा थो़रमेलु़पामिमका ल्वामिमिम दु़खा ल्वापा दु़म्बेडु़।
47“उ नेमहपकु नड्डाम ल्वा थेसिथेसाका वो मेराम होम्साका खारी मेबेपा, मा मेझो़म्जोल्सिट्पा डु़ल्चो़ ने छो़म याल्ला सो़सी। 48लावो उ नेमहपकु नड्डाम ल्वा थेसिमेथेसाका देन्दे ल्वापा खारी बेपा डु़ल्चो़ ने कि-कि याल्ला सो़सी। उहेमलाई हापा ग्वाम्डिम बु, मेरामलामका हापा ङा बिमी, मा उहेमलाई डोक्पु खुन्चु़म ग्वाम्डिम बु, मेरामकामलाम छो़म हापा ङा रपा न बोमी।
येशूका मु़चु़मिम मेदु़मी र्वाम्डिम
(मत्ती १०:३४-३६)
49“सुबुडा गो मु वाबेड्डा योङडोम सो़, मेराम मु ने ङादोङा वाकसोकावाम माला ने नु़यावा। 50गो आ दु़खाकु कु-रु़दु़म रमुङा बासिक्पा बु। मेराम गो मेरथु़मसम्म आमा गो मेभ्रसि।#मर्क १०:३८
51“हाम सुबुडाम मु़चु़मिमकु न-भ्रसिबेड्डा गो योङडोम र्वाक्पा मिम्नी? मेएँ, गो गानीलाई र्वाङु, मेर्मिमलाई मेदु़बेड्डा योङडोम सो़। 52आथाडा आनो कोले नेमडाम ङोले मु़चु़ उनी त्वाप-त्वापगोडाङा मेदु़मी, सुले मु़चु़ नले मु़चु़कु कोर्थो़लाम बमी, मा नले मु़चु़ सुले मु़चु़मिमकु कोर्थो़लाम बची। 53मेर्मिम मेदु़मी, पाप नुङ उ तारापाचो़ मेदु़ची, माम नुङ उ जाउमोचो़ मेदु़ची, साकुमा नुङ चेमे मेदु़ची।”#मीका ७:६
थारीकु छेखोप
(मत्ती १६:२-३; ५:२५-२६)
54येशूका मे सेर्पा मु़चु़लाई र्वाम्डी, “पश्चिमथो़ धामुला खासे बक्पा ल्वानिमा ‘व यो’ र्वानी, मा व यो। 55रायलालाम जु फुडु़मा#१२:५५ इस्राएलडा ग्वाल छो़मु ङादो रायलालामका जु फुथाल्लु़। ‘ग्वाल छो़’ र्वानी, मा ग्वाल छो़। 56माम्चु़नीकु मिक्सीलामडा जो़पा लिसिक्पा मु़चु़नी, गानी सुबु नुङ धामुकाम छेखोपकु दुथाम सो़मु थेनी, लावो ओम्लोम थारीकु दुथाम हेङा थेसिमेथेनिमिम?
57“हाम बोमु जो़पा दु़म, मेराम गानी हेङा मुलु़ बोमु मेचाम्नी? 58निया बेसाक्पा मु़चु़काडा मेरोक्थिट्थु़म ङा इनीमा नङडा मुद्दा ग्वाक्पा मु़चु़नुङ न-थो़म घ्रो़मबेट्नी। मेम मेबेनिवा माला ने मेरामका गानीलाई हेका लोवो निया बेसाक्पा मु़चु़काडा लनी, मा मे निया बेसाक्पाका गानीलाई झ्यालखानडाम डोक्पु मु़चु़काडा लनी, मा मेरामका गानीलाई झ्यालखानगोनो चनी। 59गो गानीलाई र्वाङु, सोमु बासिक्पा खउलुङ को पैसा वो मेसोक्थु़मसम्म गानी मेलाम लुमु मेल्वानी।”
Currently Selected:
लूका 12: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
