Lûke 10
10
Jezü wän adjisîpili 72
1La tchêngbâ nə̈, Gbölö Gbïɛ̈ dɨ̂ angâ adjisîpili tə̂ azü vötaâ la lə̂ könô gbɛ̂ tchêpâ nə̈ bïchuû, kə̈ wân andjê bïbïchuû ndə̂kə̂ ro dokʉ̈tchê kulə̂ agö gbɛ̂, la atchô gbɛ̂ ndə̂ tchetchë la tə̂ yê, tche nyîndə̂ kə̂ e tâ. 2Tche tô rə̂ sə̈ andjê päkëdə̂: «Kɨ̈ndɨ̈ nə̈ lë tə̂ gbölösə̂nə̈, praâbalë a-earə̂ kə̂ mbo kua lə̂ kɨ̈ndɨ̈ nə̈ ngbâbo-a. Käko nyë tö pö sə̈ earə̂ kɨ̈ndɨ̈ nə̈ ndə̂kə̂ pa tche ka wân angâ a-earə̂ kua kɨ̈ndɨ̈ nə̈ ndə̂kə̂ soa rəgʉ nə̈. 3Nyë êë! Më wän nyê batə̂ angbavö ɛ̈bro-ngbaga lə̂ gûtə̂ amûrûndjâ. 4Nyë zäbô makətche zâ-ê, âdəndjë kədjâ, âdəndjë dakpo-ê. Nyë krʉ̈äbô krʉ̂ lə̂ köbo ndə̂kə̂ po ndə̂ ngâ akrə-ê. 5Âdə nyë âli lə̂ ngâ nda, äwäpä nyë to rə̂ päkëdə̂: ‹Äwäpä zɨtɨ su wa lə̂ nda âtə.› 6Âdə ngâ akrə ndə̂ zɨtɨ su âsə tchâalê nə̈, äwäpä zɨtɨ su wa pâ yê. Ârə̂ âdəabô də̂ käko, zɨtɨ su ndə̂ nyê nə̈ ka sə̈ nyê ëngbânə̈. 7Nyë sə̈ tchâalê nə̈ lâme, nyë zɨ̈ rə, kə̂ ndjo rə ndə̂ a kʉ rə̂ sə̈ nyê. Bëte earə̂ kua wä ndə̂kə̂ gbo rə ngbâ kua ndə̂ yê#10.7 Nyë dɨ̈ Mat 10.10; 1 Kor 9.14; 1 Tim 5.18.. Nyë nə̈äbô nə̂ lə̂ manda azü balë balë-ê. 8Lə̂ agö gbɛ̂ ndə̂ nyê wutuadje lə̂nə̈, ânyë azü nə̈ kʉadje nyê bhândə̂ andjê, äwäpä nyë zɨ kɨ̈zɨ̂ ndə̂ andjë kʉ rə̂ sə̈ nyê. 9Nyë tchä a-earə̂ tə̂kömbô lə̂ gö nə̈, kə̂ to rə̂ sə̈ azü gö nə̈ päkëdə̂: ‹Gbölö gö-gbïɛ̈ ndə̂ Ndjapä ndô la nyê nə̂.› 10Praâbalë lə̂ agö gbɛ̂ ndə̂ nyê wutuadje lə̂nə̈, ânyë azü nə̈ kʉ̂âbô nyê kʉ̂ bhândə̂ andjê, nyë wütu pâ agbölö köbo, kə̂ to rə̂ sə̈ azü nə̈ päkëdə̂: 11‹Ârâ âgʉgʉ acho ndə̂ gö ndə̂ nyê ndə̂ âpî tchâda ârâ ndə̂kə̂ gi rə̂ sə̈ nyê ëngbânə̈. Praâbalë äwäpä nyë wunsə̂ nə̈ pä Gbölö gö-gbïɛ̈ ndə̂ Ndjapä ndô la nyê nə̂.› 12Më tö rə̂ sə̈ nyê: Lo nə̈ ndə̂ Ndjapä wa ngbanga pâ azü, ngbanga ndə̂ azü gö ndə̂ Sodômo ârə̂ âwatə̂ mömö nə̈ tə̂ andə̂ azü gö nə̈ lâme.»
Agö ndə̂ âkôsə̂ Jezü
(Mat 11.20-24)
13«Nyonyo kä tə̂ nyê, azü gö ndə̂ Korazɛ̈n! Nyonyo kä tə̂ nyê, azü gö ndə̂ Betesayidä! Bëte âdə akpɨ̈ngbɨ̈ rə ndə̂ Ndjapä mbô rə̂ lə̂ gö ndə̂ nyê âtə, tche âmbo rə̂ alême lə̂ gö ndə̂ Tîre la Sidön, dëkë azü gö nə̈ gbôtə̂ bəndɨ kə̂ mbo rə ndə̂ andjê alême nə̂. Azü gö nə̈ lâme âyu lə̂ba müä tə̂ andjê, kə̂ ko kʉ̂tê andjê la vörə ndə̂kə̂ nyisə̂ nə̈ pä anyë nyîndə̂ kə̂ gbotə̂ ngbongbo rə ndə̂ anyê nə̂. 14Bëte rə̂ kä ndə̂, lo nə̈ ndə̂ Ndjapä wa ngbanga pâ azü, ngbanga ndə̂ arə̂mâ ndə̂ Tîre la Sidön âwatə̂ mömö nə̈ tə̂ andə̂ nye nə̈. 15Âdə andə̂ nye nə̈, azü gö ndə̂ Käpërënäyûmo, nyë wüntî pä Ndjapä âkengadje gö ndə̂ nyê ndjoa bhâ lafô? A âmboadje rə̂ pä nyë jre zoo bhâlə̂ tchô ndə̂ akuzü#10.15 Nyë dɨ̈ Eza 14.13-15..» 16Jezü kä tô rə̂ sə̈ adjisîpili ndə̂ yê päkëdə̂: «Âdə ngâ akrə âdje nyê, dëkë mëmê kä ndə̂ tche djê mê. Âdə ngâ akrə âkosə̂ nyê, dëkë mëmê kä ndə̂ tche kôsə̂ mê. Âdə akrə nə̈ âkosə̂ mê, dëkë tche kösə̂ akrə ndə̂ tche wän mê.»
Adjisîpili 72 kângbâ andjê
17Pânə̈ adjisîpili tə̂ azü vötaâ la lə̂ könô gbɛ̂ tchêpâ nə̈ bïchuû kângbâ andjê la mômô, kə̈ tô rə̂ päkëdə̂: «Gbölö Gbïɛ̈, angbongbo atchozö ndjë gbɛ̂ djë ârâ ndə̂ ârâ tô pö sə̈ andjê la rə̈ zə̈!» 18Jezü tô rə̂ sə̈ andjê päkëdə̂: «Më wün Satäa alême ndə̂ tche tô bhâ lafô kə̂ tê atə̂ bêche batə̂ nyïvrö ndə̂ âsrô kpôlə̂nyä. 19Nyë djë pö âtə! Më zä gbôgbô sə̈ nyê ndə̂kə̂ nə pâ aɛ̈krʉ̂ la akpâlâkʉ̈ngrʉ̈, ndə̂kə̂ ndɨ gbôgbô ndə̂ Jâbolo, ngâ ngbongbo rə balë âgboabô nyê tee-a. 20Nyë wäbô wâ la mômô bëte rə̂ ndə̂ angbongbo atchozö djê nyê lâme-ê, praâbalë nyë wä la mômô bëte rə̂ ndə̂ a mbô rə̈ nyê bhâ lafô nə̂!»
Jezü wä la mômô
(Mat 11.25-27; 13.16-17)
21Posə̂nə̈ lâme, Kpɨ̂ki Yingö sɨ̂ Jezü la mômô, tche tô rə̂ päkëdə̂: «Bha mê, Gbölö Gbïɛ̈ ndə̂ tchêlafô la tchêbêche, më zä ayîabâ sə̈ mö, bëte mo vüsə̂ rə lâme tə̂ azü ndə̂ küma andjê wâ lanə̈ la a-earə̂ kə̂ wunsə̂ rə, ânyë kə̈ nyîsə̂ nə̈ sə̈ akpîɛ̂kpîɛ̂ azü. Tə̂ lëge nə̈, mo mbö tâ käko bëte momö kä ndə̂ ânyîndə̂ nə̈.
22«Bha mê gbötə̂ rə gbɛ̂ ëtchânə̂ mê. Ngâ akrə balë wûn-âbo sə̂ Modô nə̈-a, kütû Bha nə̈ balë. Ngâ akrə balë wûn-âbo sə̂ Bha nə̈-a, kütû Modô nə̈ la andjanə̈ ndə̂ Modô nə̈ nyîndə̂ kə̂ nyisə̂ Bha nə̈ sə̈ andjê.»
23Pânə̈ Jezü djêtə̂ yê pu adjisîpili kə̂ tô rə̂ sə̈ andjê la kütû andjê päkëdə̂: «Nyë kä la mômô, nyënyê ndə̂ nyê wûn rə âtə. 24Bëte më tö rə̂ sə̈ nyê päkëdə̂: Angbängbä a-earə̂ ndə̂ma Ndjapä dokʉ̈tchê la agbïɛ̈ nyïndə̂ kə̂ wun rə ndə̂ nyë wûn rə̂ âtə, praâbalë andjë wûn-âbo rə̂-a. Andjë nyïndə̂ kə̂ dje pö ndə̂ nyê dje rə̂ âtə, praâbalë andjë djêâbo rə̂-a#10.24 Nyë dɨ̈ 1 Pie 1.10-12..»
Ndoka ndə̂ akrə gö ndə̂ Samarï ndə̂ tche mbô dâkâ
25Käko ngâ earə̂ kə̂ nyisə̂ ndïɛ̈ tô ngâ pö ndə̂kə̂ vu Jezü, tche yû tchë päkëdə̂: «Earə̂ kə̂ nyisə̂ rə, më âmbo atöko ânyë kə̂ gbo tchîsûwu ndə̂ logbɛ̂ logbɛ̂?» 26Jezü tô rə̂ sə̈ tchë päkëdə̂: «A mbö rə̂ lə̂ Mbëtï-ndïɛ̈ atöko? Mo dɨ̈ rə̂, âtô rə̂ sə̈ mö atöko?» 27Köchë lâme tô rə̂ ndə̂nə̈ päkëdə̂: «Äwäpä mo nyində̂ Gbölö Gbïɛ̈ Ndjapä ndə̂ zə̈ la su zə̈ gbɛ̂, la yingö ndə̂ zə̈ gbɛ̂, la gbôgbô ndə̂ zə̈ gbɛ̂, la kə̂ wunsə̂ rə ndə̂ zə̈ gbɛ̂. Kə̂ nyində̂ ngâ zə̈ batə̂ tə̂ zə̈#10.27 Nyë dɨ̈ Det 6.5; Lev 19.18..» 28Jezü tô rə̂ sə̈ tchë päkëdə̂: «Mo tö pö lâme la köbo nə̈. Amö mbo rə̂, ânyë kə̂ wadje la tchîsûwu ndə̂ logbɛ̂ logbɛ̂#10.28 Nyë dɨ̈ Lev 18.5..» 29Praâbalë earə̂ kə̂ nyisə̂ ndïɛ̈ lâme nyîndə̂ kə̂ nyisə̂ nə̈ päkëdə̂ pö ndə̂ anyë yû Jezü la rə̂ lâme wä la köbo nə̈, tche yû Jezü päkëdə̂: «Tchabâ kä ndə̂ âdə̂ ngâ mê akrə?» 30Jezü tô rə̂ sə̈ tchë päkëdə̂: «Ngâ akrə tö bhâ Jerûzalêmo ndə̂kə̂ e atə̂ Jerikö. Tche tê tchânə̂ angbongbo azü köbo, andjë kʉ̂ arə tə̂ yê gbɛ̂, kə̈ bhî tchë ëtə̂ kuzü, kə̈ gbôtə̂ yê kə̈ rô etə̂. 31Ngâ earə̂ kə̂ wa ngela sə̈ Ndjapä zâ köbo nə̈ lâme. Ndə̂ tche wûn köchë lâme, tche dô dəkalâ köbo, kə̈ rô etə̂. 32Ngâ akrə pâ mawo ndə̂ Levï#10.32 Azü pâ mawo ndə̂ Levï: Andjë də̈ azü pâ mawo ndə̂ Levï. Andjendjê kä ndə̂ Ndjapä nyîsə̂ andjê ndə̂kə̂ wa ngela sə̈ tchë lə̂ gbölö nda Ndjapä. wûtu ndjë sə̂ tchô nə̈ lâme, kə̈ wûn köchë lâme, kə̈ dô dəkalâ köbo, kə̈ rô etə̂. 33Praâbalë ngâ akrə gö ndə̂ Samarï ndə̂ tche sə̂ lakə̂ e atə̂lə̂ ngâ gö ngbî. Tche wûtu ndola köchë lâme, ndə̂ tche âsə̈ wun tchë nyonyo yê mbô tchë tə̂ gbölösə̂nə̈. 34Tche gîtə̂ yê ndola tchë, kə̈ sû kâdâ la vɛ̂n-ɛn ëla aku nə̈, ânyë kə̈ gʉ̂â rə̂. La tchêngbâ nə̈ tche zâ tchë ëpâ kûndiɛ ndə̂ yê la tə̂ yê, kə̈ rô la tchë atə̂lə̂ ngâ nda ndə̂ ayirə ndə̂kə̂ mbo rə̂ la tchë. 35Tchô krâ pânə̈, tche âsə̈ ro, kə̈ wûtu la mîɛ̈-makətche bïchuû, kə̈ kʉ̂ rə̂ sə̈ earə̂ nda nə̈, kə̈ tô rə̂ sə̈ tchë päkëdə̂: ‹Amö mbo rə̂ la köchë âtə! Âdə mo âza ngâ mîɛ̈-makətche ndə̂ zə̈ ngbî pâ anə̈ âtə ndə̂kə̂ mbo rə̂ la tchë, kə̂ gu ndə̂ mê, mê zadje rə̂ sə̈ mö ëngbânə̈.›»
36Jezü yû earə̂ kə̂ nyisə̂ ndïɛ̈ lâme päkëdə̂: «Lə̂ gbâtə̂ azü vötaâ lâme, tchanə̈bâ kä ndə̂ âwâtə̂ ngâ yê akrə ndə̂ tche tê tchânə̂ angbongbo azü köbo lâme?» 37Earə̂ kə̂ nyisə̂ ndïɛ̈ lâme tô rə̂ ndə̂nə̈ päkëdə̂: «Tchanə̈ ndə̂ tche wûn nyonyo köchë lâme kä.» Käko Jezü tô rə̂ sə̈ tchë päkëdə̂: «Amö gûgü, kə̂ mbo ndjë tâ käko.»
Jezü ë bhândə̂ Mârete la Malê
38Ndə̂ Jezü la adjisîpili ndə̂ yê âsə̈ ro, kə̈ wûtu lə̂ ngâ yɛ̈yɛ̈ gö, ânyë ngâ ɛ̈chë ndə̂ rə̈ yê wû pä Mârete zâ Jezü bhândə̂ yê. 39Ngâ nyînə̂ nə̈ kä tâ ndə̂ rə̈ yê wû pä Malê. Malê sə̂ bêche ndrotə̂ Gbölö Gbïɛ̈ lakə̂ dje pö ndə̂ tche to rə̂. 40Andə̂ Mârete, tche chî la yê kütû tə̂kə̂ fa kɨ̈zɨ̂. Mârete nə̂ kə̈ tô rə̂ sə̈ Jezü päkëdə̂: «Gbölö Gbïɛ̈, ndə̂ yûngâ mê gbôtə̂ mê la kua nə̈ ânyë mê mbo rə̂ la kütû mê âtə, äwä ämbänə̈ lə̂ la zə̈? Amö to rə̂ sə̈ tchë, tche ka ârâ mbo kua nə̈ la tchë.» 41Jezü tô rə̂ sə̈ tchë päkëdə̂: «Mârete, Mârete, su zə̈ wä ngbɨ̂ɨ̂, ânyë mo nyïndə̂ kə̂ mbo angbängbä arə. 42Praâbalë ngâ rə balë kä ndə̂ ârô adɨ̂ nə̈. Malê kä ndə̂ âzâ tchôtchô rə nə̈. Ngâ akrə balë ndə̂ tche krʉa rə̂ tchânə̂ yê wabô tee-a.»
Currently Selected:
Lûke 10: lnl
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
