Lûke 9

Jezü wän adjisîpili ndə̂ yê 12

(Mat 10.5-15; Mar 6.7-13)

1Jezü ë adjisîpili ndə̂ yê lə̂ könô gbɛ̂ tchêpâ nə̈ bïchuû, kə̈ zâ gbôgbô la kümändëmä sə̈ andjê ndə̂kə̂ gro angbongbo atchozö gbɛ̂ lakə̂ tcha a-earə̂ tə̂kömbô. 2Pânə̈ tche wân andjê ndə̂kə̂ mu pö ndə̂ Gbölö gö-gbïɛ̈ ndə̂ Ndjapä, lakə̂ tcha a-earə̂ tə̂kömbô. 3Tche tö rə̂ sə̈ andjê päkëdə̂: «Nyë zäbô ngâ rə zâ potə̂ nyê ndə̂kə̂ ro la rə̂-ê: Arə batə̂ tchongbôlô, âdəndjë kədjâ, âdəndjë mâpa, âdəndjë makətche, akrə balë balë kʉ̈äbô lə̂ba kʉ̂ bïchuû-î. 4Nda gbɛ̂ ndə̂ nyê liadje lə̂nə̈, ânyë ngâ akrə kʉ̂ nyê bhândə̂ yê, nyë lö kütû lə̂ nda nə̈ lâme zoo kə̂ ro etə̂. 5Tchô gbɛ̂ ndə̂ azü gö nə̈ kôsə̂ kə̂ kʉ nyê bhândə̂ andjê, nyë wütu lə̂ gö nə̈ lakə̂ gʉgʉ cho tchâda nyê ndə̂kə̂ nyisə̂ ngbongbo rə ndə̂ andjê sə̈ andjê.» 6Adjisîpili nə̈ rô etə̂. Andjë rô lə̂ ayɛ̈yɛ̈ gö nə̈ gbɛ̂, lakə̂ mu Tchôtchô Pö sə̈ azü, lakə̂ tcha a-earə̂ tə̂kömbô kusə̂ tchô gbɛ̂.

Kə̂ dɨ su Hërôde

(Mat 14.1-12; Mar 6.14-29)

7 Hërôde ndə̂ tche wâtə̂ goverenëre pâ Galilë djê ndjë pö ndə̂ rə gbɛ̂ ndə̂ Jezü mbô rə̂. Tche zâ küma yê pâ pö lâme tʉrʉ-ê. Bëte angâ azü tö rə̂ päkëdə̂: «Jâan-Batîse ndə̂ tche tchû alême jô nə̂.» 8Angânə̈ tö rə̂ päkëdə̂: «Elïe, earə̂ ndə̂ma Ndjapä kä ndə̂ âkângbâ yê.» Angânə̈ kä tô rə̂ päkëdə̂: «A-earə̂ ndə̂ma Ndjapä ndə̂ andjë tchû alême, ngânə̈ balë jô nə̂.» 9Hërôde tô rə̂ päkëdə̂: «Më kû küma Jâan alême nə̂. Praâbalë tchabâ kä ndə̂ âdə̂ köchë ndə̂ mê dje angbängbä apö pâ yê âtə?» Käko tche pû köbo ndə̂kə̂ wun Jezü.

Jezü kʉ̈ kɨ̈zɨ̂ sə̈ azü sâke mïndûu

(Mat 14.13-21; Mar 6.30-44; Jan 6.1-14)

10 Abadjângele kângbâ andjê kə̈ tô tchêngbâ arə gbɛ̂ ndə̂ andjë mbô rə̂ sə̈ Jezü. Jezü kʉ̂ andjê, kə̈ wûtu la andjê lə̂ gbâtə̂ azü nə̈ bhâchï, kə̈ gîtə̂ yê la andjê ndola ngâ gö ndə̂ a ê rə̂ tâ pä Betesayidä. 11Praâbalë kpûlû azü nə̈ djê rə̂ kə̈ zâ tchêngbâ andjê. Jezü gâmba kə̂ nə ndə̂ andjê, kə̈ tô pö ndə̂ Gbölö gö-gbïɛ̈ ndə̂ Ndjapä sə̈ andjê, kə̈ tchâ azü ndə̂ andjë wâ la tə̂kömbô. 12Ndə̂ lo âsə̈ zɨ, abadjângele ndə̂ Jezü lə̂ könô gbɛ̂ tchêpâ nə̈ bïchuû gîtə̂ andjê ndola tchë, kə̈ tô rə̂ sə̈ tchë päkëdə̂: «Amö gro azü âtə gbɛ̂ andjë gû atə̂lə̂ ayɛ̈yɛ̈ gö la atchô ndə̂ âwâtə̂ ama kɨ̈ndɨ̈ ku ndrotə̂ azə̂ ndə̂kə̂ pu kɨ̈zɨ̂, kə̂ pu ndjë tchô ndə̂kə̂ lo tâ, bëte tchô ndə̂ azə̈ sə̂ tâ âtə azü mbôâbo gö tâ-a.» 13Praâbalë Jezü tô rə̂ sə̈ andjê päkëdə̂: «Nyënyê la tə̂ nyê nyë kʉ̈ kɨ̈zɨ̂ sə̈ andjê.» Andjë tô rə̂ ndə̂nə̈ päkëdə̂: «Ârâ wä kütû la mâpa mïndûu la agiangû bïchuû. Mo nyïndə̂ nə̈ pä ârâ e kə̂ yo kɨ̈zɨ̂ bëte azü âtə gbɛ̂?» 14Lə̂ gbâtə̂ azü nə̈ lâme, kə̂ ngba ndə̂ aköchë wä ndola sâke mïndûu. Jezü tô rə̂ sə̈ adjisîpili ndə̂ yê päkëdə̂: «Nyë tö rə̂ sə̈ andjê pä andjë sə ëbêche tə̂ azü bïchuû la lə̂ könô gbɛ̂ lə̂ kpûlû balë balë.» 15Adjisîpili nə̈ mbô tâ käko-ë, kə̈ mbô rə̂ pä andjë sə gbɛ̂ ëbêche. 16Jezü kʉ̂ mâpa mïndûu la agiangû bïchuû lâme, kə̈ kênga la yê atə̂ lafô, kə̈ ê tchôtchô pö pânə̈. Tche tchô tchə̂lə̂ nə̈ kə̈ kʉ̂ rə̂ sə̈ adjisîpili ndə̂ yê ndə̂kə̂ pa andjë krʉ tchə̂lə̂ nə̈ tə̂ akpûlû azü nə̈. 17Azü gbɛ̂ zɨ̂ rə tchə̂lə̂ andjê sɨ̂-î. A kʉ̂ adɨ̂ andöma nə̈ lə̂ agbasa lə̂ könô gbɛ̂ tchêpâ nə̈ bïchuû.

Pîêre tö rə̂ pä Jezü də̈ Krîsiti

(Mat 16.13-19; Mar 8.27-29)

18Tə̂ngâlo ndə̂ Jezü sə̂ bhâchï lakə̂ to pö sə̈ Ndjapä la kütû yê, adjisîpili ndə̂ yê pâlatə̂ andjê ndrotə̂ yê. Tche yû andjê päkëdə̂: «Azü gbɛ̂ tö rə̂ pä më də̈ tchabâ?» 19Adjisîpili nə̈ tô rə̂ ndə̂nə̈ päkëdə̂: «Angânə̈ tö rə̂ pä mo də̈ Jâan-Batîse, angânə̈ tô rə̂ pä mo də̈ Elïe earə̂ ndə̂ma Ndjapä, angânə̈ kä tô rə̂ pä ngâ earə̂ ndə̂ma Ndjapä lə̂ gbâtə̂ andjanə̈ ndə̂ andjë tchû alême kä ndə̂ âjô âtə.» 20Jezü yû adjisîpili päkëdə̂: «Â nyënyê? Nyë tö rə̂ pä më də̈ tchabâ?» Pîêre tô rə̂ ndə̂nə̈ päkëdə̂: «Mo də̈ Krîsiti ndə̂ mo tô bhândə̂ Ndjapä.»

Jezü tö pö ndə̂kə̂ tchu lakə̂ jo ndə̂ yê lə̂ kuzü

(Mat 16.20-28; Mar 8.30—9.1)

21Jezü yûkû nə̈ la gbôgbô sə̈ adjisîpili ndə̂kə̂ pa andjë toabô rə̂ tô sə̈ ngâ akrə balë-ê. 22Tche kä tô rə̂ päkëdə̂: «Äwäpä Modô ndə̂ Akrə wun yûkü tə̂ gbölösə̂nə̈. Akpôkpô azü la agbölö a-earə̂ kə̂ wa ngela sə̈ Ndjapä la a-earə̂ kə̂ nyisə̂ ndïɛ̈ koadje sə̂ yê. A âwon-adje tchë, ânyë pâ lö vötaâ tchê joadje lə̂ kuzü.»

23La tchêngbâ nə̈ Jezü tô rə̂ sə̈ azü gbɛ̂ päkëdə̂: «Âdə ngâ akrə ânyində̂ kə̂ nə ngbâ mê, äwäpä tche kosə̂ tə̂ yê la tə̂ yê, kə̂ za yö ndə̂ gba ndə̂ yê logbɛ̂, kə̂ nə ngbâ mê. 24Bëte akrə ndə̂ tche nyîndə̂ kə̂ tcha tchîsûwu ndə̂ tə̂ yê la tə̂ yê, ârə̂ âyuadje tə̂ yê. Praâbalë akrə ndə̂ tche nyîndə̂ nə̈ pä tchîsûwu ndə̂ yê yu bëte mê, tchê tchadje rə̂. 25Âdə ngâ akrə âgbo arə tchêbêche âtə gbɛ̂, ânyë kə̈ tchû, âdəndjë rə̂ ndə̂ tchîsûwu ndə̂ yê ndɨ̂, giamâ kä ndə̂ tche gbo rə̂ ngbânə̈? 26Bëte âdə ngâ akrə âmbo ganô mê, la apö ndə̂ mê, Modô ndə̂ Akrə âmboadje ndjë ganô yê, lo nə̈ ndə̂ tchê kadje lə̂ gbôgbô ndə̂ yê, ndjë lə̂ gbôgbô ndə̂ Bha nə̈, ndjë la andə̂ aânje ndə̂ andjë wâ ngbî ânyë kə̈ dâka gbɛ̂. 27Tə̂ lëge nə̈, më tö rə̂ sə̈ nyë: Angâ azü lə̂ gbâtə̂ nyê tchâtə tchuabô tee-a zoo, kə̂ wun Gbölö gö-gbïɛ̈ ndə̂ Ndjapä ânyë.»

Tə̂ Jezü dötə̂ yê kə̈ wâ ngbî lə̂ la adjisîpili

(Mat 17.1-8; Mar 9.2-8)

28Ârə̂ âsə̈ wa ndola lö mïndûu manə̈ vötaâ pânə̈ ndə̂ Jezü tô pö käko, tche zâ Pîêre la Jâan la Jâke potə̂ yê, kə̈ kênga atə̂lə̂ küma aga ndə̂kə̂ to pö sə̈ Ndjapä. 29Ndə̂ tche âsə̈ to pö sə̈ Ndjapä, tchâtchu yê dôtə̂ yê kə̈ wâ ngbî, lə̂ba ndə̂ yê kä grô kpɨ̂ki. 30Kpro kâkë, aköchë bïchuû wûtu ëtə̂ Jezü, ânyë andjë sə̂ lakə̂ to pö la tchë, aköchë lâme də̈ Möyîze la Elïe. 31Andjë wûtu lə̂ ngâ golowäre ndə̂ âtô bhâ lafô, ânyë kə̈ sə̂ lakə̂ to pö la Jezü pâ kuzü ndə̂ tchê eadje ndə̂kə̂ tchu rə̂ bhâ Jerûzalêmo lakə̂ ka kua ndə̂ yê. 32Dëkë Pîêre la angâ yê tchû la lö âmaɛ nə̂. Ndə̂ andjë jô, andjë wûn golowäre ndə̂ Jezü la andə̂ aköchë bïchuû ndə̂ andjë sə̂ ndrotə̂ yê. 33Sə̂nə̈ ndə̂ aköchë bïchuû lâme âsə̈ gbotə̂ Jezü, Pîêre tô rə̂ sə̈ Jezü päkëdə̂: «Earə̂ kə̂ nyisə̂ rə, äfü pä azə̈ sə tchâtə. Ârâ âmbo andokʉ̈ vötaâ: Andə̂ zə nə̈ balë, andə̂ Möyîze balë, la andə̂ Elïe balë.» Pîêre wûn-âbo sə̂ pö ndə̂ tche to rə̂-a. 34Ndə̂ gbô Pîêre ndə̂po lakə̂ to pö lâme käko, ngâ ndrö wûtu kə̈ vrô pâ andjê gbɛ̂. Adjisîpili âsə̈ wun ndrö ndə̂ âvrô pâ andjê gbɛ̂ lâme, wawa mbô andjê. 35A djê tchə̂lə̂ ngâ gɨ̈ ndə̂ âtô pö lə̂ ndrö lâme päkëdə̂: «Tchanə̈ âtə də̈ Modô ndə̂ mê, ndə̂ më dɨ̂ tchë, nyë djë tchë!» 36Pânə̈ ndə̂ andjë djê tchə̂lə̂ gɨ̈ lâme, a kä wûn bata ngâ akrə balë-a, kütû Jezü balë. Andjë sə̂ gii-ï. Tə̂ lo nə̈ lâme, andjë tôâbo pö ndə̂ rə ndə̂ andjë wûn rə̂ lâme sə̈ ngâ akrə balë-a.

Jezü tchä ngâ bechë la ngbongbo tchozö lə̂ yê

(Mat 17.14-18; Mar 9.14-27)

37Ndə̂ tchô krâ pânə̈, ndə̂ Jezü la adjisîpili vötaâ jrê tə̂ aga nə̈, ngâ kpûlû azü nə̂ lə̂ köbo yê. 38Lə̂ kpûlû azü nə̈ lâme, ngâ köchë ôn ngbôô päkëdə̂: «Earə̂ kə̂ nyisə̂ rə, më zä da zə̈, amö wun tchô pu modô ndə̂ mê, bëte tche də̈ kêlä modô ndə̂ mê. 39Logbɛ̂ ndə̂ ngbongbo tchozö li tchë, kpro kâkë, tche mbö tchë tche ta wârə̂, tche nyöänyoa tchë la gbôgbô, frötchë wütu lə̂ ma yê. Ngbongbo tchozö lâme mbö tchë tə̂ gêgêe nə̈, kə̈ gbôâbo tə̂ yê gasa-a. 40Më yükû nə̈ sə̈ adjisîpili ndə̂ zə̈ ndə̂kə̂ pa andjë gro ngbongbo tchozö lâme, praâbalë andjë grô tchë tʉrʉ-ê.» 41Jezü zâ pö kə̈ tô rə̂ sə̈ andjê päkëdə̂: «Nyënyê ndə̂ azü ndə̂ tchô angêta ndə̂ nyë zâbo su nyê zä sə̈ Ndjapä âtə, mê âkä sə ndrotə̂ nyê zoo ëtə̂ lö atöko? Mê ârʉatə̂ su mê la nyê zoo dalatchêbâ? Nə la modô ndə̂ zə̈ nə̈ atâ!» 42Bechë nə̈ âsə̈ gitə̂ yê ndola Jezü, ngbongbo tchozö nə̈ yî tchë ëbêche, lakə̂ bhi tchë tə̂ cho. Praâbalë Jezü hrô la ngbongbo tchozö lâme, kə̈ tchâ bechë nə̈, kə̈ zâ tchë sə̈ bha nə̈. 43Tchə̂lə̂ küma azü gbɛ̂ djîngɨli bëte gbôgbô ndə̂ Ndjapä lâme.

Jezü kä tô pö ndə̂kə̂ tchu ndə̂ yê

(Mat 17.22-23; Mar 9.30-32)

Ndə̂ gbô tchə̂lə̂ küma azü nə̈ sə̂ lakə̂ djingɨli tə̂ arə gbɛ̂ ndə̂ Jezü mbô rə̂ lâme, Jezü tô rə̂ sə̈ adjisîpili ndə̂ yê päkëdə̂: 44«Pö ndə̂ mê to rə̂ âtə, nyë zä rə̂ lə̂ küma nyê: A âgboadje tə̂ Modô ndə̂ Akrə ëtchânə̂ azü.» 45Praâbalë andjë djêâbo tchə̂lə̂ pö lâme-a. A vüsə̂ nə̈ tə̂ andjê ndə̂kə̂ pa andjë djeabô tchə̂lə̂ nə̈ djê-ê, ânyë wawa kə̂ yu tchë mbô andjê tə̂ pö lâme.

Tchabâ âwâ gbölö kə̈ rô angâ yê?

(Mat 18.1-5; Mar 9.33-37)

46Adjisîpili sə̂ lakə̂ gama andjê lə̂ gbâtə̂ andjê ndə̂kə̂ wunsə̂ akrə ndə̂ tche wâ gbölö kə̈ rô angâ yê. 47Jezü wûnsə̂ pö lâme bhâtə̂ su andjê. Tche zâ ngâ bechë, kə̈ gï tchë ndrotə̂ yê, 48kə̈ tô rə̂ sə̈ andjê päkëdə̂: «Akrə ndə̂ tche lûsə̂ bechë âtə la rə̈ mê, dëkë mëmê la tə̂ mê kä ndə̂ tche lûsə̂ mê. Akrə ndə̂ tche lûsə̂ mê, dëkë tche lü ndjë sə̂ akrə ndə̂ tche wân mê. Bëte akrə ndə̂ tche wâ kpîɛ̂kpîɛ̂ rə̂ ârô masə̂nə̈ lə̂ gûtə̂ nyê, akrə lâme kä ndə̂ âwâ gbölö!»

Akrə ndə̂ tche kôâbô sə̂ nyê kô-ê, tche də̈ tchandə̂ nye nə̈

(Mar 9.38-40)

49Jâan zâ pö kə̈ tô rə̂ ndə̂nə̈ päkëdə̂: «Earə̂ kə̂ nyisə̂ rə, ârâ wün ngâ akrə ndə̂ tche sə̂ lakə̂ gro angbongbo atchozö la rə̈ zə̈, ârâ nyïndə̂ kə̂ kitə̂ köbo tə̂ yê, bëte tche də̂âbo tchandə̂ azə̈ nə̈-a.» 50Jezü tô rə̂ ndə̂nə̈ sə̈ tchë päkëdə̂: «Nyë kïäbô kîtə̂ köbo tə̂ yê, bëte akrə ndə̂ tche kôâbô sə̂ nyê kô-ê, tche də̈ tchandə̂ nye nə̈.»

Azü lə̂ ngâ gö ndə̂ Samarï kösə̂ Jezü

51Ndə̂ lo ndə̂kə̂ pa a za Jezü kə̂ kenga la tchë atə̂ lafô âsə̈ ndo, tche nyîndə̂ nə̈ la su yê gbɛ̂ ndə̂kə̂ e atə̂ Jerûzalêmo. 52Tche wân angâ azü dokʉ̈tchê tchâtchu yê. Azü lâme ê, kə̂ lî lə̂ ngâ gö ndə̂ Samarï ndə̂kə̂ nyikrə kə̂ nə ndə̂ Jezü. 53Praâbalë azü gö nə̈ kôsə̂ kə̂ za tchë bhândə̂ andjê, bëte tche kä lakə̂ e atə̂ Jerûzalêmo. 54Ndə̂ Jâke la Jâan, adjisîpili ndə̂ Jezü âsə̈ dje rə̂ käko, andjë tô rə̂ sə̈ Jezü päkëdə̂: «Gbölö Gbïɛ̈, mo nyïndə̂ nə̈ pä ârâ yukû nə̈ pä wo to bhâ lafô kə̂ ju andjê gbɛ̂?» 55Jezü djêtə̂ yê pu andjê, kə̈ hrô la andjê. 56Andjë zâ köbo ndə̂kə̂ ro atə̂lə̂ ngâ yɛ̈yɛ̈ gö ngbî.

Azü ndə̂ andjë nyîndə̂ kə̂ nə ngbâ Jezü

(Mat 8.19-22)

57Ndə̂ gbô andjê ndə̂po lə̂ köbo, ngâ akrə tô rə̂ sə̈ Jezü päkëdə̂: «Tchô gbɛ̂ ndə̂ mô eadje tâ, mê ânə ngbâ zə̈.» 58Jezü tô rə̂ sə̈ tchë päkëdə̂: «Agrawe kä la grʉ̈ andjê tâ, anyïɛ̈nə̈ kä la kʉmâ andjê tâ, praâbalë Modô ndə̂ Akrə wâbo la ngâ tchô ndə̂kə̂ za küma yê tâ-a.»

59Jezü tô rə̂ sə̈ ngâ köchë nə̈ päkëdə̂: «Amö nə ngbâ mê.» Köchë lâme tô rə̂ päkëdə̂: «Gbölö Gbïɛ̈, amö gbotə̂ mê, më ê kə̈ chî bha mê ânyë.» 60Jezü tô rə̂ ndə̂nə̈ sə̈ tchë päkëdə̂: «Amö gbotə̂ akuzü andjë chî akuzü ndə̂ andjê, momö ndə̂ zə nə̈, amö e ndə̂kə̂ mu pö ndə̂ Gbölö gö-gbïɛ̈ ndə̂ Ndjapä.»

61Ngâ akrə nə̈ kä tô rə̂ päkëdə̂: «Mê nəadje ngbâ zə̈ Gbölö Gbïɛ̈, praâbalë amö gbotə̂ mê, më ê kə̈ pô ndə̂ azü lə̂ bûngrɨ̂ ndə̂ mê ânyë.» 62Jezü tô rə̂ sə̈ tchë päkëdə̂: «Akrə ndə̂ tche jêtə̂ kə̂ djo kɨ̈ndɨ̈ la machïni ndə̂ abâgala, ânyë kə̈ kâ wûn tchô atə̂ngbâ yê, akrə lâme kʉ̂âbo sə̂kə̂ mbo kua bëte Gbölö gö-gbïɛ̈ ndə̂ Ndjapä-a.»

Currently Selected:

Lûke 9: lnl

Highlight

Copy