Lûke 8
8
Aɛ̈chë ndə̂ andjë nə̂ ngbâ Jezü
1La tchêngbâ nə̈ Jezü ê kulə̂ agö la ayɛ̈yɛ̈ gö lakə̂ mu Tchôtchô Pö ndə̂ Gbölö gö-gbïɛ̈ ndə̂ Ndjapä. Adjisîpili ndə̂ yê lə̂ könô gbɛ̂ tchêpâ nə̈ bïchuû zâ tchêngbâ yê, 2la angâ aɛ̈chë ndə̂ tche grô angbongbo atchozö lə̂ andjê dokʉ̈tchê, kə̈ tchâ andjê lə̂ atə̂kömbô: Malê ndə̂ a ê rə̂ tə̂ yê pä Malê ndə̂ Magadalä ndə̂ angbongbo atchozö mïndûu manə̈ bïchuû wûtu lə̂ yê, 3la Jâne, ɛ̈chë ndə̂ Chuzä, earə̂ kə̂ bata arə ndə̂ Hërôde la Suzâne la angâ angbängbä aɛ̈chë ndə̂ andjë kʉ̂ rə ndə̂ andjê ndə̂kə̂ mbo rə̂ la Jezü la adjisîpili ndə̂ yê.
Ndoka pâ ndjî rəgʉ
(Mat 13.1-9; Mar 4.1-9)
4Pânə̈ ngâ gbölö kpûlû azü tô lə̂ agö ngbî ngbî, kə̈ nə̂ pu Jezü, andjë pâlatə̂ andjê, tche tô pö âtə la ndoka päkëdə̂: 5«Ngâ köchë wütu, kə̈ ê ndə̂kə̂ gɨ ndjî rəgʉ ndə̂ yê. Ndə̂ tche âsə̈ gɨ rə̂ angâ andjî rəgʉ nə̈ tû bêche ndroma köbo, azü dâ rə̂ ânyë anyïɛ̈nə̈ nə̂ kə̈ dê rə̂. 6Angânə̈ tû pâ cho ndə̂ âwâ pâ täme. Andjî rəgʉ lâme kʉ̂, kə̈ âsə̈ kʉche kə̈ hrô gbɛ̂, bëte ngû wâbo tchâtchâ nə̈-a. 7Angânə̈ tû lə̂ achi, kə̈ kpô la achi nə̈ hroa balë, chi nə̈ vû pâ rəgʉ nə̈-ê. 8Angânə̈ tû lə̂ tchôtchô cho. Arəgʉ lâme kpô kə̈ lê. Rəgʉ balë balë lë ngbangbo balë.» Jezü kä tô rə̂ ngbôô päkëdə̂: «Akrə ndə̂ tche wâ la tü ndə̂kə̂ dje pö, äwäpä tche dje pö âtə!»
Jezü tö pö la ndoka bëte giamâ?
(Mat 13.10-17; Mar 4.10-12)
9 Adjisîpili ndə̂ Jezü yû tchë päkëdə̂: «Dju ndoka lâme wä atöko?» 10Jezü tô rə̂ ndə̂nə̈ sə̈ andjê päkëdə̂: «Andə̂ nye nə̈, a zä rə̂ sə̈ nyê ndə̂kə̂ wunsə̂ arə ndə̂ âwâ lə̂ küwû nə̈ lə̂ Gbölö gö-gbïɛ̈ ndə̂ Ndjapä. Praâbalë andə̂ angânə̈, a nyïsə̂ nə̈ sə̈ andjê la ndoka ndə̂kə̂ pa: ‹Âdə andjë âwun tchô, kə̂ wun-abô rə tee-a, âdə andjë âdje pö, kə̂ djeabô tchə̂lə̂ nə̈ tee-a#8.10 Nyë dɨ̈ Eza 6.9-10..›»
Jezü nyïsə̂ dju ndoka pâ ndjî rəgʉ
(Mat 13.18-23; Mar 4.13-20)
11«Dju ndoka lâme wä kâkë: Ndjî rəgʉ nə̈ də̈ pö Ndjapä. 12Andjî rəgʉ ndə̂ âtû ndroma köbo də̈ azü ndə̂ andjë djê pö Ndjapä, praâbalë Jâbolo nə̂ kə̈ krʉ̂a pö nə̈ lə̂ su andjê, kə̈ kîtə̂ köbo tə̂ andjê ndə̂kə̂ pa andjë za su andjê sə̈ Ndjapä, ânyë kə̂ tcha lə̂ kuzü. 13Angânə̈ wä batə̂ cho ndə̂ âwâ la täme. Andjë djë pö Ndjapä nə̈, kə̈ gâmba rə̂ la mômô. Praâbalë pö Ndjapä nə̈ mbôâbo chëchë nə̈ bhâlə̂ su andjê-a. Andjë zä su andjê tâ kütû ndə̂ kpîɛ̂kpîɛ̂ lö, âdə ngâ gbôgbô rə âsə̈ gbo andjê, djîrə̂ andjë gbotə̂ köbo su andjê ndə̂ andjë zâ rə̂ sə̈ Ndjapä lâme-ê. 14Ndjî rəgʉ ndə̂ âtû lə̂ chi lâme wä batə̂ azü ndə̂ andjë djê pö Ndjapä nə̈, ânyë kə̂ dɨ su andjê, lakə̂ gbo rə ndə̂ andjê, ndjë la ngɨ̈ ndə̂ tchêbêche gʉ̂â andjê tâ, ânyë lêlê andjê gbôâbô köbo gbô ndə̂kə̂ negbe-ê. 15Ndjî rəgʉ ndə̂ âtû lə̂ tchôtchô cho wä batə̂ azü ndə̂ andjë djê pö Ndjapä nə̈, ânyë kə̈ bâta rə̂ bhâlə̂ su andjê ndə̂ âwâ djîrə̂ ânyë kə̈ dâka. Andjë kpökpo tə̂ andjê lə̂ angbongbo rə gbɛ̂, ânyë kə̈ lê la köbo nə̈.»
Ndoka pâ lâmba
(Mar 4.21-25)
16«Akrə tôâbo wo lə̂ lâmba ndə̂kə̂ za rə̂ bhâ tchâtchâ lüsû âdəndjë kʉ̈ngrʉ-a. Praâbalë a zä rə̂ pâ ngâ rə lafô, ânyë azü ndə̂ andjë li atə̂ tchâalê wun ngbänga nə̈. 17Rə gbɛ̂ ndə̂ âwâ wü, a âwun-adje rə̂. Rə gbɛ̂ ndə̂ âwâ lə̂ küwû nə̈, a âwun-adje sə̂nə̈, ânyë âwutuadje kraâ ësûwu. 18La nyê gbö tə̂ köbo kə̂ dje pö ndə̂ nyê! Bëte akrə ndə̂ tche wâ la ngâ rə, a âzadje ngânə̈ sə̈ tchë. Praâbalë akrə ndə̂ tche wâbô wâ la ngâ rə-ê, a âkrʉadje ndjë kpîɛ̂kpîɛ̂ nə̈ ndə̂ tche wûntî pä anyë kä la rə̂.»
Anyï Jezü la ayîngâ yê
(Mat 12.46-50; Mar 3.31-35)
19Anyï Jezü la ayîngâ yê nə̂ ndə̂kə̂ wun tchë. Praâbalë köbo ndə̂kə̂ nə ndola Jezü wâbo-a, bëte kpûlû azü nə̈. 20A tô rə̂ sə̈ Jezü päkëdə̂: «Anyï zə̈ la ayîngâ zə̈ kä sûwu, andjë nyïndə̂ kə̂ wun mö.» 21Praâbalë Jezü tô rə̂ ndə̂nə̈ sə̈ andjê päkëdə̂: «Anyï mê la ayîngâ mê də̈ azü ndə̂ andjë djê pö Ndjapä ânyë kə̈ mbô rə gundə̂sə̂ nə̈.»
Jezü hrö la gbölö yi
(Mat 8.23-27; Mar 4.35-41)
22Tə̂ngâlo, Jezü la adjisîpili ndə̂ yê â lə̂ ngâ külû. Tche tô rə̂ sə̈ andjê päkëdə̂: «Azə̈ zûzü atə̂ kalâ gbölö kpakpa ngû», andjë rô etə̂. 23Ndə̂ andjë âsə̈ ro la ngû nə̈, Jezü tê gbô kə̈ lô-ê. Posə̂nə̈ ngâ gbölö yi sə̂ lakə̂ mbo la gbölö ngû nə̈. Külû nə̈ sə̂ lakə̂ sɨ̂sɨ̈ la ngû ndə̂ âtu atə̂lə̂ nə̈, ânyë andjë wâ lə̂ ngbongbo rə ndə̂ kuzü. 24Adjisîpili nə̂ ndola Jezü, kə̈ jô tchë, kə̈ tô rə̂ sə̈ tchë päkëdə̂: «Earə̂ kə̂ nyisə̂ rə, Earə̂ kə̂ nyisə̂ rə, azə̂ âtchu!» Jezü jô lə̂ lö nə̈, kə̈ hrô la gbölö yi la kpabe nə̈, ânyë yi nə̈ krʉ̂-ê, tchô zɨ̂ tɨɨ. 25Jezü tô rə̂ sə̈ adjisîpili ndə̂ yê päkëdə̂: «Kə̂ za su nyê sə̈ mê nə̈ wä bhâ tchêbâ?» Wawa mbô andjê, tchə̂lə̂ küma andjê djîngɨli, ânyë andjë sə̂ lakə̂ to rə̂ lə̂ gbâtə̂ andjê päkëdə̂: «Köchë âtə də̈ tchabâ? Ânyë kə̈ tô pö sə̈ yi la gbölö ngû ânyë â djê ndjë tchë âtə?#8.25 Nyë dɨ̈ Aps 65.8; 89.10; 107.23-32..»
Jezü tchä ngâ köchë ndə̂ tche wâ la angbongbo atchozö
(Mat 8.28-34; Mar 5.1-20)
26Andjë wûtu dəkalâ gbölö kpakpa ngû nə̈, lə̂ gö ndə̂ Jerazɛ̈n ndə̂ âwûntə̂ yê la Galilë. 27Ndə̂ Jezü jrê lə̂ külû nə̈ ëbêche, ngâ akrə gö nə̈ nə̂ pu tchë. Köchë lâme wä la angbongbo atchozö lə̂ yê. Ndə̂nə̈ gû nə̂ ndə̂ tche yûâbô lə̂ba yû-î, kə̈ lôâbo tchâalê-a, praâbalë tche sə̈ kütû bhâlə̂ gûtə̂ cho akuzü. 28Ndə̂ tche wûn Jezü, tche sə̂ lakə̂ ta wârə̂, kə̈ tê tchâtchâ Jezü, kə̈ tô rə̂ ngbôô päkëdə̂: «Jezü, Modô ndə̂ Ndjapä ndə̂ mo sə̂ pâ arə gbɛ̂, giamâ kä ndə̂ mo wûn rə̂ tə̂ mê? Më zä da zə̈, amö djingɨliabô tchə̂lə̂ küma mê djîngɨli-î!» 29Käko Jezü zâma la gbôgbô sə̈ ngbongbo tchozö nə̈ pä tche wutu lə̂ yê. Dëkë ngbongbo tchozö lâme mbö tchë gasa-ë. A ï könô yê la da yê la djingɨ̂li ndə̂kə̂ pa tche roabô rô etə̂. Praâbalë tche söä tchə̂lə̂ nə̈, ânyë ngbongbo tchozö nə̈ za tchë, kə̂ ro la tchë atə̂lə̂ kpaɛ̈gâ. 30Jezü yû tchë päkëdə̂: «Rə̈ zə̈ wü atöko?» Tche tô rə̂ ndə̂nə̈ sə̈ tchë päkëdə̂: «Ârâ ngbângbä.» Bëte angbängbä angbongbo atchozö kä ndə̂ âlî tchë. 31Angbongbo atchozö lâme sə̈ lakə̂ dɨ tchə̂lə̂ ma andjê sə̈ Jezü ndə̂kə̂ pa tche groabô anyê grô atə̂lə̂ gbölö kudû ndə̂ tchə̂lə̂ nə̈ bû biî lâme-ê.
32Dëkë sə̂ tchô nə̈ lâme, ngâ kpûlû akoso kä lakə̂ pu kɨ̈zɨ̂ ndə̂kə̂ zɨ rə bhâlə̂ küma aga. Angbongbo atchozö nə̈ dɨ̂ tchə̂lə̂ ma andjê sə̈ Jezü pä tche gamba rə̂ anyë lî atə̂lə̂ akoso lâme. Jezü gâmba rə̂. 33Käko angbongbo atchozö nə̈ wûtu lə̂ köchë lâme kə̈ lî lə̂ akoso nə̈. Akoso nə̈ tô la rö bhâlə̂ küma aga lâme, kə̈ tû gbɛ̂ atə̂lə̂ gbölö kpakpa ngû, ngû nə̈ rô la andjê. 34Ndə̂ a-earə̂ kə̂ nyiale akoso nə̈ wûn rə ndə̂ âmbô lâme, andjë kpê kə̈ ê kə̈ tô pö ndə̂nə̈ lə̂ gö nə̈, ndjë la ayɛ̈yɛ̈ gö gbɛ̂ tə̂ ma kɨ̈ndɨ̈. 35Azü wûtu kə̈ ê ndə̂kə̂ wun kpɨ̈ngbɨ̈ rə ndə̂ âmbô lâme. Andjë nə̂ ndola Jezü kə̈ wûn köchë ndə̂ angbongbo atchozö wûtu lə̂ yê lâme. Tche sə̂ bêche tchâtchu Jezü, kə̈ yû lə̂ba ëtə̂ yê, ânyë tchə̂lə̂ küma yê dâka ëngbânə̈. Wawa mbô azü gbɛ̂. 36Azü ndə̂ andjë wûn rə nə̈ lâme, andjë nyîsə̂ köbo ndə̂ Jezü grô angbongbo atchozö lə̂ köchë lâme sə̈ azü ndə̂ andjë nə̂ lâme. 37Käko azü gbɛ̂ ndə̂ andjë sə̂ lə̂ agö lâme tô rə̂ sə̈ Jezü pä tche wutu lə̂ gö ndə̂ anyê, bëte wawa mbö andjê tə̂ gbölösə̂nə̈. Jezü â lə̂ külû ndə̂kə̂ dotə̂ yê. 38Köchë ndə̂ angbongbo atchozö wûtu lə̂ yê lâme yûkû nə̈ sə̈ Jezü pä tche gbotə̂ anyê, anyë sə̂ ndrotə̂ yê. Praâbalë Jezü grô tchë lakə̂ to rə̂ sə̈ tchë päkëdə̂: 39«Gu atə̂ndə̂ zə̈, kə̂ to tchêngbâ arə gbɛ̂ ndə̂ Ndjapä mbô rə̂ tə̂ zə̈ sə̈ azü.» Köchë lâme gû kə̈ mû pö ndə̂ rə gbɛ̂ ndə̂ Jezü mbô rə̂ tə̂ yê lâme lə̂ gö nə̈ gbɛ̂.
Jezü tchä ngâ ɛ̈chë, kə̈ jô ɛ̈wünrə ndə̂ Jäyïrûse
(Mat 9.18-26; Mar 5.21-43)
40Ndə̂ Jezü âsə̈ kângbâ yê, kpûlû azü nə̂ lə̂ köbo yê, bëte andjë gbɛ̂ sə̈ âme bëte tchë. 41Ngâ köchë ndə̂ rə̈ yê wû pä Jäyïrûse nə̂ ndjë, tche wätə̂ makündji ndə̂ nda kə̂ voga Ndjapä. Tche tê tchâtchâ Jezü, kə̈ dɨ̂ tchə̂lə̂ ma yê sə̈ tchë pä tche nə bhândə̂ anyê. 42Bëte kêlä ɛ̈wünrə ndə̂ yê ndə̂ tche wâ la ngû ndola lə̂ könô gbɛ̂ tchêpâ nə̈ bïchuû kä ësə̂ kə̂ tchu. Ndə̂ Jezü âsə̈ ro atə̂ndə̂ köchë lâme, angbängbä azü sə̂ lakə̂ frofro tchë.
43Dëkë lə̂ kpûlû azü nə̈, ngâ ɛ̈chë kä tâ ndə̂ jï sə̂ lakə̂ tu tə̂ yê ngû lə̂ könô gbɛ̂ tchêpâ nə̈ bïchuû. Ɛ̈chë lâme ndɨ̂ arə gbɛ̂ ndə̂ tche wâ la rə̂ sə̈ adokotöro, ngâ akrə balë tchâbo tchë-a. 44Tche nə̂ ndola Jezü dəngbâ yê, kə̈ grʉ̂ ma lə̂ba ndə̂ yê, posə̂nə̈ jï nə̈ krʉ̂-ê. 45Jezü yûkû nə̈ päkëdə̂: «Tchabâ kä âkə̈ grʉ̂ mê?» Azü gbɛ̂ tô rə̂ päkëdə̂, âdə̂âbo anyê kä me-a. Pîêre tô rə̂ päkëdə̂: «Earə̂ kə̂ nyisə̂ rə, angbängbä azü kä ndə̂ âtâkpa ndə̂ zə̈ ânyë kə̂ frofro mö katchôgbɛ̂ âtə!» 46Praâbalë Jezü tô rə̂ ndə̂nə̈ päkëdə̂: «Ngâ akrə grʉ̂ mê nə̂, bëte më wûnsə̂ nə̈ nə̂ pä ngâ gbôgbô wûtu lə̂ mê nə̂.» 47Ɛ̈chë lâme wûn rə̂ pä a wûnsə̂ rə ndə̂ anyë mbô rə̂ lâme nə̂, tche nə̂ kə̈ tê tchâtchâ Jezü lakə̂ gugu. Tche nyîsə̂ nə̈ la azü gbɛ̂ djusə̂nə̈ ndə̂ tche grʉ̂ tchë, kə̈ nyî ndjë sə̂ köbo ndə̂ tche tchâ posə̂nə̈ ndə̂ tche grʉ̂ tchë lâme. 48Praâbalë Jezü tô rə̂ sə̈ tchë päkëdə̂: «Ɛ̈wünrə ndə̂ mê, kə̂ za su zə̈ sə̈ mê tchâ mö nə̂, amö gu la zɨtɨ su.»
49Ndə̂ gbô Jezü âsə̈ to pö lâme, ngâ akrə tô bhâ tchâalê ndə̂ Jäyïrûse, makündji ndə̂ nda kə̂ voga Ndjapä lâme, kə̈ nə̂ kə̈ tô rə̂ sə̈ Jäyïrûse päkëdə̂: «Ɛ̈wünrə ndə̂ zə̈ nə̈ tchû nə̂, amö ka bata küma earə̂ kə̂ nyisə̂ rə kâ-ê.» 50Praâbalë Jezü djê pö lâme kə̈ tô rə̂ sə̈ Jäyïrûse päkëdə̂: «Amö mboabô wa mbô-ê, za kütû su zə̈ sə̈ Ndjapä, ɛ̈wünrə ndə̂ zə̈ âtchadje.» 51Ndə̂ Jezü wûtu bhândə̂ Jäyïrûse, tche kôsə̂ nə̈ ndə̂kə̂ pa azü li atə̂ tchâalê nə̈, kütû Pîêre la Jâan la Jâke la bha bechë nə̈ la anyï nə̈ kä ndə̂ âlî. 52Azü gbɛ̂ kä lakə̂ kɨ, lakə̂ dɨ tchə̂lə̂ ma andjê bëte bechë lâme. Käko Jezü tô rə̂ sə̈ andjê päkëdə̂: «Nyë kɨ̈äbô kɨ̂-î, tche tchûâbo tchü-a, tche lôlö.» 53Andjë sə̂ lakə̂ mo Jezü bëte andjë wûnsə̂ nə̈ nə̂ pä bechë nə̈ tchû nə̂ tratralë-ê. 54Jezü zâ könô bechë lâme, kə̈ tô rə̂ ngbôô päkëdə̂: «Bechë, amö alafô-ê!» 55Yingö ndə̂ yê kâ ëlə̂nə̈ ngbânə̈, posə̂nə̈ tche âlafô. Jezü yûkû nə̈ pä a za kɨ̈zɨ̂ sə̈ tchë tche zɨ̂ rə̂. 56Tchə̂lə̂ küma bha nə̈ la anyï nə̈ djîngɨli-î. Jezü yûkû nə̈ sə̈ andjê päkëdə̂: «Nyë töäbô pö ndə̂ rə ndə̂ âwûtu âtə tô sə̈ ngâ akrə balë-ê.»
Currently Selected:
Lûke 8: lnl
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
