Lûke 7
7
Jezü tchä earə̂ kua ndə̂ ngâ gbölö akrə ndə̂ aturûgu
(Mat 8.5-13)
1Ndə̂ Jezü tô pö ndə̂ yê gbɛ̂ sə̈ kpûlû azü âkâ, tche ê atə̂ Käpërënäyûmo. 2Bhâye, ngâ gbölö akrə ndə̂ aturûgu ndə̂ Rômo kä la ngâ earə̂ kua ndə̂ yê ndə̂ tche nyîndə̂ yê tə̂ gbölösə̂nə̈. Earə̂ kua lâme kä la tə̂kömbô, kə̈ wâ tchêtchêtchê ndə̂kə̂ tchu. 3Gbölö akrə ndə̂ aturûgu lâme âsə̈ dje pö ndə̂ Jezü, kə̈ wân angâ akpôkpô azü ndə̂ ajuîfu ndə̂kə̂ to rə̂ sə̈ Jezü pä tche nə kə̈ tchâ earə̂ kua nə̈. 4Andjë nə̂ kə̈ gbô Jezü, kə̈ jêtə̂ kə̂ yu tchë la su andjê gbɛ̂, lakə̂ to rə̂ päkëdə̂: «Turûgu âtə kʉ̈sə̂ nə̈ pä mo mbo rə̂ la tchë. 5Bëte tche nyïndə̂ azü gö ndə̂ azə̂, tchetchë kä ndə̂ âmbô nda kə̂ voga Ndjapä ndə̂ azə̂.» 6Käko Jezü gû la andjê. Ndə̂ Jezü wûtu ndola nda nə̈, gbölö akrə ndə̂ aturûgu lâme wân araagü nə̈ ndə̂kə̂ to rə̂ sə̈ Jezü päkëdə̂: «Gbölö Gbïɛ̈, wun-abô yûkü wûn-î, më kʉ̂âbo sə̂nə̈ pä mo li bhâ tchâalê ndə̂ mê-a. 7Bëte rə̂ kä ndə̂ më wûn-âbô sə̂ tə̂ mê wûn djîrə̂ ndə̂kə̂ e atə̂ tchâtchu zə̈-ê. Äwäpä mo to kütû pö la ma zə̈, ânyë earə̂ kua ndə̂ mê tchadje. 8Bëte mëmê la tə̂ mê, më wä tchâtchâ agbölö azü ndə̂ andjë wâ pâ mê, kə̈ wâ ndjë la aturûgu tchâtchâ mê. Më tö rə̂ sə̈ ngânə̈ päkëdə̂: ‹Amö e təbhâ›, tche e ndjë; âdə më âto rə̂ sə̈ ngânə̈ päkëdə̂: ‹Amö nə tchâtə›, tche nə ndjë. Më tö rə̂ sə̈ earə̂ kua ndə̂ mê päkëdə̂: ‹Amö mbo nə̈ âtə›, tche mbo ndjë rə̂.»
9Ndə̂ Jezü djê pö lâme, tche gâmba gbölö akrə ndə̂ aturûgu nə̈. Jezü djêtə̂ yê, kə̈ tô rə̂ sə̈ kpûlû azü nə̈ ndə̂ andjë zâ tchêngbâ yê päkëdə̂: «Më tö rə̂ sə̈ nyê: Më gbôâbo ngâ akrə ndə̂ tche zâ su yê sə̈ mê kâkë-a, âdəndjë lə̂ azü ndə̂ Isarayële-a.» 10Azü ndə̂ gbölö akrə ndə̂ aturûgu nə̈ wân andjê lâme dôtə̂ andjê atə̂lə̂ manda, kə̈ gbô earə̂ kua nə̈, dëkë tə̂ yê krâ nə̈ ngrôô.
Jezü jö modô ndə̂ ngâ ɛ̈chë lə̂ ndavrö
11La tchêngbâ nə̈ Jezü ê atə̂lə̂ ngâ gö ndə̂ rə̈ nə̈ wû pä Näyîne. Adjisîpili ndə̂ yê la kpûlû azü zâ tchêngbâ yê. 12Ndə̂ Jezü nə̂ ndola manda ndə̂kə̂ li atə̂lə̂ gö nə̈, a zâ ngâ kuzü, kə̈ ê la rə̂ ndə̂kə̂ chi rə̂. Ngâ kêlä modô ndə̂ ngâ ɛ̈chë lə̂ ndavrö alême kä ndə̂ âtchû. Kpûlû azü gö nə̈ zâ tchêngbâ kuzü nə̈. 13Ndə̂ Gbölö Gbïɛ̈ wûn ɛ̈chë ndə̂ modô ndə̂ yê tchû lâme, tche wûn nyonyo yê, kə̈ tô rə̂ sə̈ tchë päkëdə̂: «Amö gbotə̂ kə̂ kɨ-ê!» 14La tchêngbâ nə̈ Jezü nə̂ kə̈ grʉ̂ kʉ̈ngrʉ kuzü nə̈, a-earə̂ kə̂ za kʉ̈ngrʉ kuzü nə̈ krʉ̂ la rə̂. Jezü tô rə̂ päkëdə̂: «Bechë-ɛ̈köchë, më yükû nə̈ la gbôgbô sə̈ mö päkëdə̂: Alafô-ê!» 15Kuzü nə̈ kênga tə̂ yê kə̈ sə̂ la dju yê, kə̈ sə̂ lakə̂ po. Jezü zâ tchë sə̈ anyï nə̈. 16Wawa mbô azü gbɛ̂. Andjë vôga Ndjapä lakə̂ to rə̂ päkëdə̂: «Ngâ gbölö earə̂ ndə̂ma Ndjapä nə̂ lə̂ gbâtə̂ azə̂ nə̂!» Andjë tö ndjë rə̂ päkëdə̂: «Ndjapä nə̂ ndə̂kə̂ wun azü ndə̂ yê nə̂!» 17Lə̂ agö ndə̂ Judë gbɛ̂ la agö ndə̂ âwâ ndola rə̂, azü tö pö ndə̂ rə ndə̂ Jezü mbô rə̂ lâme.
Jâan-Batîse wän adjisîpili ndə̂ yê sə̈ Jezü
(Mat 11.2-19)
18Adjisîpili ndə̂ Jâan tô tchêngbâ pö ndə̂ arə lâme gbɛ̂ sə̈ tchë, Jâan ê angânə̈ bïchuû lə̂ gûtə̂ andjê, 19kə̈ wân andjê sə̈ Gbölö Gbïɛ̈ ndə̂kə̂ yu tchë päkëdə̂: «Mo də̈ Mesï ndə̂ a tô pö ndə̂ yê pä tche ânə lâme? Âdəndjë rə̂ pä ârâ wä ndə̂kə̂ sə bëte ngâ akrə ngbî?» 20Ndə̂ andjë wûtu ndrotə̂ Jezü, andjë tô rə̂ sə̈ tchë päkëdə̂: «Jâan-Batîse wän ârâ ndə̂kə̂ yu mö päkëdə̂: ‹Mo də̈ Mesï ndə̂ tche wâ ndə̂kə̂ nə lâme? Âdəndjë rə̂ ndə̂ ârâ wä ndə̂kə̂ sə bëte ngâ akrə ngbî?›» 21Sə̂nə̈ lâme, Jezü tchâ azü lə̂ atə̂kömbô tə̂ gbölösə̂nə̈, kə̈ tchâ azü ndə̂ andjë ngêwele, kə̈ grô angbongbo atchozö tə̂ azü, kə̈ mbô rə̂ pä a-earə̂ föla wûn tchô. 22Pânə̈ Jezü tô rə̂ sə̈ azü ndə̂ Jâan wân andjê lâme päkëdə̂: «Nyë kâkä kə̂ to tchêngbâ apö ndə̂ rə ndə̂ nyë wûn rə̂, la rə ndə̂ nyë djê rə̂ sə̈ Jâan. A-earə̂ föla wün tchô, azü ndə̂ da andjê ndɨ̂, andjë nə̂ la köbo nə̈, a-earə̂ broma tchâ-ê, a-earə̂ bïtü djê pö, azü ndə̂ andjë tchû jô-ê, a mû Tchôtchô Pö sə̈ a-earə̂ yûkü nə̂#7.22 Nyë dɨ̈ Eza 35.5-6; 61.1.. 23Mômô kä tə̂ akrə ndə̂ tche gbôâbo gbôtə̂ kə̂ za su yê sə̈ mê!»
24Ndə̂ azü ndə̂ Jâan wân andjê lâme dôtə̂ andjê, Jezü jêtə̂ kə̂ to pö ndə̂ Jâan sə̈ kpûlû azü nə̈ päkëdə̂: «Giamâ kä ndə̂ nyë ê ndə̂kə̂ wun rə̂ bhâlə̂ kpaɛ̈gâ? Ngâ wärə̈ ndə̂ yi sə̂ lakə̂ nyoanyoa rə̂? 25Giamâ kä ndə̂ nyë ê ndə̂kə̂ wun rə̂? Ngâ köchë ndə̂ tche yû alə̂ba ndə̂ âfû? Praâbalë azü ndə̂ andjë yu alə̂ba ndə̂ âfû, ânyë kə̂ sə tə̂ tchôtchô nə̈ lâme, andjë sə̈ bhâlə̂ gbadja ndə̂ agbïɛ̈. 26Giamâ kä ndə̂ nyë ê ndə̂kə̂ wun rə̂? Ngâ earə̂ ndə̂ma Ndjapä? Ɛn-ɛn, më tö rə̂ sə̈ nyê pä nyë wûn ngâ akrə ndə̂ tche rô earə̂ ndə̂ma Ndjapä nə̂. 27Bëte Jâan də̈ akrə ndə̂ Mbëtï Ndjapä tô pö ndə̂ yê päkëdə̂: Ndjapä tö rə̂ päkëdə̂:
‹Akrə ndə̂ më wân tchë dokʉ̈tchê tə̂ zə̈ kä âtə,
ndə̂kə̂ nyikrə köbo tchâtchu zə̈#7.27 Nyë dɨ̈ Mal 3.1..›»
28Jezü kä tô rə̂ päkëdə̂: «Më tö rə̂ sə̈ nyê päkëdə̂, lə̂ gbâtə̂ azü ndə̂ aɛ̈chë zɨ̂ andjê, ngâ akrə ndə̂ tche wâ gbölö kə̈ rô Jâan wâbo-a. Lə̂ rə lâme gbɛ̂, tchanə̈ ndə̂ tche wâtə̂ kpîɛ̂kpîɛ̂ nə̈ lə̂ Gbölö gö-gbïɛ̈ ndə̂ Ndjapä rö tchë. 29Azü gbɛ̂ djë Jâan, a-earə̂ kə̂ pala makətche-lapöo gbɛ̂ djê ndjë tchë. Andjë wünsə̂ nə̈ pä Ndjapä wä djîrə̂, ânyë Jâan zâ batɛ̂me ndə̂ ngû sə̈ andjê. 30Praâbalë afarizïɛ̈n la a-earə̂ kə̂ nyisə̂ ndïɛ̈ kôsə̂ rə ndə̂ Ndjapä nyîndə̂ kə̂ mbo rə̂ tə̂ andjê, kə̈ kôsə̂ kə̂ gbo batɛ̂me ndə̂ Jâan.»
31Jezü kä tô rə̂ päkëdə̂: «Azü ndə̂ tchô angêta wä batə̂ giamâ? Andjë kʉ̈ tchabâ? 32Andjë wä batə̂ abechë ndə̂ andjë sə̂ bêche sə̂ tchô ndə̂ azü pala tchê tə̂ andjê tâ, ânyë andjë sə̂ lakə̂ on sə̈ angâ andjê lə̂ gbâtə̂ andjê päkëdə̂: ‹Ârâ bhï ndûgû-ɛ̈ngbä, lakə̂ hrʉ küdambala, praâbalë nyë dâbo ɛ̈ngbä ndə̂sə̂ nə̈-a! Ârâ pä düwü-müä, praâbalë nyë kɨ̂âbo-a!› 33Bëte Jâan-Batîse nə̈, tche zɨ̂âbo mâpa-a, kə̈ ndjôâbo vɛ̂n-ɛn, nyë tô rə̂ päkëdə̂, tche kä la ngbongbo tchozö lə̂ yê! 34Modô ndə̂ Akrə nə̈, kə̈ zɨ̂ rə, kə̈ ndjô rə, nyë tô rə̂ päkëdə̂: ‹Wunsa köchë âtə ndə̂ kua ndə̂ yê wâ kütû ndə̂kə̂ zɨ rə, lakə̂ ndjo vɛ̂n-ɛn, tche mbö agü la a-earə̂ kə̂ pala makətche-lapöo, la a-earə̂ ngbongbo rə!› 35Praâbalë küma ndə̂ âwa lanə̈ wä djîrə̂ lə̂ la azü ndə̂ Ndjapä gbɛ̂.»
Jezü ë atə̂ tchâalê ndə̂ Chemön ndə̂ tche də̂ farizïɛ̈n
36Ngâ farizïɛ̈n ë Jezü ndə̂ kɨ̈zɨ̂ bhândə̂ yê. Jezü ê bhândə̂ köchë lâme kə̈ sə̂ mä kɨ̈zɨ̂. 37Ngâ ɛ̈chë kädje lə̂ gö nə̈ lâme ndə̂ tche wâtə̂ earə̂ ngbongbo rə. Ndə̂ tche wûnsə̂ nə̈ päkëdə̂ Jezü kä bhândə̂ farizïɛ̈n lâme lakə̂ zɨ rə, tche nə̂ la yömbö gbûû lə̂ ngâ ndütü ndə̂ a mbô rə̂ la täme ndə̂ rə̈ nə̈ wû pä älëbâtere. 38Tche nə̂ kə̈ krʉ̂ dəngbâ Jezü tə̂ kʉ̂tê da yê. Ɛ̈chë lâme sə̂ lakə̂ kɨ, ngûla yê sə̂ lakə̂ tu pâ da Jezü, tche sə̂ lakə̂ tro rə̂ la su küma yê. Tche â kʉ̂tê da Jezü lakə̂ su yömbö nə̈ pânə̈. 39Farizïɛ̈n ndə̂ tche ê Jezü lâme âsə̈ wun rə̂ käko, kə̈ tô rə̂ bhâtə̂ su yê päkëdə̂: «Âdə köchë âtə âwatə̂ lëge earə̂ ndə̂ma Ndjapä, dëkë tche wûnsə̂ pö pâ ɛ̈chë ndə̂ tche sə̂ lakə̂ grʉ tchë lâme nə̂. Ɛ̈chë lâme wätə̂ earə̂ ngbongbo rə.» 40Jezü tô rə̂ sə̈ farizïɛ̈n nə̈ päkëdə̂: «Chemön, më kä la ngâ pö ndə̂kə̂ to rə̂ sə̈ mö.» Chemön tô rə̂ ndə̂nə̈ sə̈ tchë päkëdə̂: «Earə̂ kə̂ nyisə̂ rə, amö to pö nə̈.» 41Jezü tô rə̂ päkëdə̂: «Ngâ akrə kä tâ ndə̂ geda ndə̂ yê wâ lə̂ küma azü bïchuû. Ngânə̈ wä la geda ndə̂ mîɛ̈-makətche ngbangbo mïndûu ndə̂kə̂ gi rə̂ sə̈ earə̂ nə̈. Ngânə̈ wâ la rə̂ mîɛ̈-makətche tə̂ azü bïchuû la lə̂ könô gbɛ̂. 42Batə̂ rə̂ ndə̂ andjë wâbô wâ la makətche ndə̂kə̂ gi rə̂ sə̈ tchë ëngbânə̈, tche gbôtâ sə̈ andjê bïchuû gbɛ̂. Lə̂ gbâtə̂ arə̂mâ bïchuû lâme, tchanə̈bâ kä ndə̂ ânyində̂ earə̂ kə̂ mbo geda lâme kə̂ ro ngâ yê?» 43Chemön tô rə̂ ndə̂nə̈ sə̈ tchë päkëdə̂: «Bhâtə̂ su mê, tchanə̈ ndə̂ a gbôtə̂ gbölö makətche sə̈ tchë lâme kä.» Jezü tô rə̂ päkëdə̂: «Pö ndə̂ zə̈ wä la köbo nə̈.»
44Pânə̈ Jezü djêtə̂ yê pu ɛ̈chë lâme, kə̈ tô rə̂ sə̈ Chemön päkëdə̂: «Mo wûn ɛ̈chë âtə nə̂? Më lï bhâ tchâalê ndə̂ zə̈, mo tûâbo ngû ndə̂kə̂ pa më djutu da#7.44 Pö ndə̂kə̂ djutu da bhândə̂ ajuîfu wätə̂ köbo ndə̂kə̂ kʉ ayirə tə̂ tchôtchô nə̈. Nyë wün Jen 18.4; 19.2. mê la rə̂-a. Praâbalë tchetchë ndə̂ ye nə̈, tche djûtu da mê la ngûla yê, kə̈ trô rə̂ la su küma yê. 45Mo âbo ma mê-a, praâbalë tchetchë ndə̂ ye nə̈, ndə̂ më lî tchâalê âtə, tche gbôâbo tə̂kə̂ a kʉ̂tê da mê-a. 46Mo sûâbo kâdâ pâ küma mê-a, praâbalë tchetchë ndə̂ ye nə̈, tche sû yömbö tə̂ kʉ̂tê da mê. 47Ârə̂ kä ndə̂ më tô rə̂ sə̈ mö päkëdə̂: A kô angbängbä apö lə̂ küma yê nə̂ bëte rə̂ ndə̂ tche nyîndə̂ mê tə̂ gbölösə̂nə̈. Bëte âdə a âko pö lə̂ küma akrə kpîɛ̂kpîɛ̂ rə̂, tche ânyində̂ azü kpîɛ̂kpîɛ̂ rə̂.»
48Jezü tô rə̂ sə̈ ɛ̈chë nə̈ päkëdə̂: «A kô pö lə̂ küma zə̈ nə̂.» 49Azü ndə̂ andjë sə̂ lakə̂ zɨ rə la tchë tô rə̂ bhâtə̂ su andjê päkëdə̂: «Köchë âtə də̈ tchabâ ânyë kə̂ ko pö lə̂ küma azü?» 50Praâbalë Jezü tô rə̂ sə̈ ɛ̈chë lâme päkëdə̂: «Kə̂ za su zə̈ sə̈ Ndjapä tchâ mö nə̂, amö gu la zɨtɨ su!»
Currently Selected:
Lûke 7: lnl
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
