Lûke 11

Jezü nyïsə̂ rə pâ kə̂ to pö sə̈ Ndjapä

(Mat 6.9-13; 7.7-11)

1Tə̂ngâlo, Jezü sə̂ lakə̂ to pö sə̈ Ndjapä bhâsə̂ ngâ tchô. Ndə̂ tche tô pö sə̈ Ndjapä gbɛ̂ âsə̈ ka, ngâ djisîpili ndə̂ yê balë yû tchë päkëdə̂: «Gbölö Gbïɛ̈, amö nyisə̂ köbo ndə̂kə̂ to pö sə̈ Ndjapä sə̈ ârâ batə̂ Jâan-Batîse nyîsə̂ nə̈ sə̈ adjisîpili ndə̂ yê.» 2Jezü tô rə̂ sə̈ andjê päkëdə̂: «Âdə nyë ânyində̂ kə̂ to pö sə̈ Ndjapä, nyë tö rə̂ kâkë:

‹Bha ârâ,

äwäpä azü gbɛ̂ wunsə̂ nə̈ pä mo də̈ Ndjapä ndə̂ tche dâka gbɛ̂.

Äwäpä kə̂ mbo kümändëmä ndə̂ zə̈ nə.

3Kʉ kɨ̈zɨ̂ ndə̂ ârâ la sə̂nə̈ sə̈ ârâ ndə̂ lö balë balë.

4Amö ko pö lə̂ küma ârâ,

batə̂ rə̂ ndə̂ ârâ ko ndjë pö lə̂ küma azü ndə̂ andjë mbo ngbongbo rə tə̂ ârâ.

Amö gboabô gbôtə̂ ârâ ndə̂kə̂ pa ârâ te lə̂ arə ndə̂ âbolo azü-î.›»

5Jezü kä tô rə̂ sə̈ andjê päkëdə̂: «Âdə ngâ akrə lə̂ gûtə̂ nyê âwa la ngâ agü nə̈ tâ, ânyë tche ê atə̂ndə̂ yê lə̂ agrʉ̂mi ânyë kə̈ tô rə̂ sə̈ tchë päkëdə̂: ‹Agü mê, amö mbo geda ndə̂ mâpa vötaâ sə̈ mê, 6bëte ngâ agü mê ndə̂ tche tô lə̂ wrʉ̂, tche wûtu nə̂ bhândə̂ mê, praâbalë më wâbo la ngâ rə ndə̂kə̂ za rə̂ sə̈ tchë-a.› 7Âdə agü nə̈ lâme âsə kütû bhâ tchâalê ânyë kə̈ tô rə̂ ndə̂nə̈ sə̈ tchë päkëdə̂: ‹Gbotə̂ mê gii! Ârâ tchû manda nə̂ ëtâ, ânyë mëmê la abechë ndə̂ mê gbɛ̂, ârâ lô nə̂, mê abô lafô tee ndə̂kə̂ kʉ mâpa sə̈ mö-a.› 8Më tö rə̂ sə̈ nyê, agü nə̈ lâme âadje lafô ndə̂kə̂ za rə̂ sə̈ tchë bëte rə̂ ndə̂ tche hrô ngû lə̂ gɨ̈ yê lâme, praâbalë âdə̂âbo bëte rə̂ ndə̂ tche wâtə̂ agü nə̈ lâme kä-a. 9Mëmê ndə̂ me nə̈, më tö rə̂ sə̈ nyê päkëdə̂: Nyë yükû rə, ânyë a zadje rə̂ sə̈ nyê; nyë pü rə, ânyë kə̂ gboadje rə̂; nyë gʉ̈gʉ manda, ânyë a kroadje rə̂ sə̈ nyê. 10Bëte akrə ndə̂ tche yûkû rə, a âzadje rə̂ sə̈ tchë; akrə ndə̂ tche pû rə, tchê gboadje rə̂; akrə ndə̂ tche gʉ̂gʉ manda, a âkroadje rə̂ sə̈ tchë. 11Tchanə̈bâ bha bechë lə̂ gûtə̂ nyê âtə kä ndə̂, âdə bechë ndə̂ yê âyukû giangû, tche za ɛ̈krʉ̂ sə̈ tchë? 12Ndjë âdə bechë nə̈ âyukû prö ngötö, tche za kpâlâkʉ̈ngrʉ̈ sə̈ tchë? 13Nyënyê ndə̂ nyë wâtə̂ angbongbo sə̂ azü, nyë wünsə̂ kə̂ kʉ atchôtchô arə sə̈ abechë ndə̂ nyê. Käko, Bha azə̂ ndə̂ tche sə̂ bhâ lafô, zabô Kpɨ̂ki Yingö ndə̂ yê sə̈ azü ndə̂ andjë yûkû nə̈-ê?»

Jezü tö pö pâ pö ndə̂ a yî rə̂ lə̂ küma yê

(Mat 12.22-30; Mar 3.22-27)

14Jezü sə̈ lakə̂ gro ngâ ngbongbo tchozö ndə̂ tche sə̂ lakə̂ mbo ngâ köchë ânyë kə̈ zâ pö ma yê. Ndə̂ ngbongbo tchozö nə̈ âsə̈ wutu, köchë ndə̂ tche pôâbô pô lâme jêtə̂ kə̂ po-ê; ânyë tchə̂lə̂ küma akpûlû azü nə̈ gbɛ̂ djîngɨli. 15Praâbalë abâtîɛ̂ azü nə̈ tô rə̂ päkëdə̂: «Bëlëzëbûlu, makündji ndə̂ angbongbo atchozö kä ndə̂ âzâ gbôgbô lâme sə̈ tchë ndə̂kə̂ gro angbongbo atchozö lâme.» 16Angânə̈ nyïndə̂ kə̂ vu tchë, andjë yûkû nə̈ sə̈ tchë ndə̂kə̂ pa tche mbo ngâ kpɨ̈ngbɨ̈ rə ndə̂ ânyîsə̂ nə̈ pä tche tö bhândə̂ Ndjapä. 17Jezü wûnsə̂ pö lâme bhâlə̂ su andjê gbɛ̂, kə̈ tô rə̂ sə̈ andjê päkëdə̂: «Gö-gbïɛ̈ gbɛ̂ ndə̂ azü tchə̂lə̂ nə̈ mbo kʉ̈ʉ̈ lə̂ gbâtə̂ andjê, gö-gbïɛ̈ lâme ândɨadje, anda ndə̂ âwâ lə̂nə̈, tchə̂lə̂ nə̈ ândjoadje kə̂ tu ëpâ angânə̈. 18Âdə Satäa âkä mbo kʉ̈ʉ̈ tə̂ yê la tə̂ yê, gö-gbïɛ̈ ndə̂ yê nə̈ âkrʉ lafô tchïtchïnə̈ atöko? Ndə̂ nyë tô rə̂ päkëdə̂ më grö angbongbo atchozö la gbôgbô ndə̂ Bëlëzëbûlu lâme. 19Âdə më âgro angbongbo atchozö la gbôgbô ndə̂ Bëlëzëbûlu, käko, azü ndə̂ nyê nə̈ grö andə̂ andjë nə̈ angbongbo atchozö nə̈ la gbôgbô ndə̂ tchabâ? Azü ndə̂ nyê nə̈ la tə̂ andjê nyïsə̂ nə̈ päkëdə̂ pö ndə̂ nyê nə̈ wâbo la köbo nə̈-a! 20Praâbalë âdə lə̂ köbosə̂ gbôgbô ndə̂ Ndjapä kä ndə̂ mê gro angbongbo atchozö la rə̂, dëkë Gbölö gö-gbïɛ̈ ndə̂ Ndjapä wûtu nə̂ ëtə̂ nyê.

21«Âdə ngâ gbôgbô köchë âwa la arə kʉ̈ʉ̈ ndə̂ yê tâ ânyë kə̈ sə̂ lakə̂ wun tchô pâ nda ndə̂ yê la rə̂, ngâ rə balë mboabô arə tchâalê ndə̂ yê tee-a. 22Praâbalë âdə ngâ gbôgbô köchë ndə̂ tche rô tchë âwutu, ânyë kə̈ rôpâ yê la kʉ̈ʉ̈, tche âkʉ arə kʉ̈ʉ̈ ndə̂ âmbô rə̂ pä tche wa la gbôgbô lâme, arə ndə̂ tche kʉ̂ rə̂ lâme, tche krʉ tchə̂lə̂ nə̈ gbɛ̂.

23«Akrə ndə̂ tche wâbô wâtə̂ tchandə̂ me nə̈, dëkë tche də̈ akrə ndə̂ tche kôsə̂ mê, ânyë akrə ndə̂ tche wâbô wâ ndə̂kə̂ pala rə la mê, dëkë tche wätə̂ akrə ndə̂ tchê ndjondjo tchə̂lə̂ rə katchôgbɛ̂.»

Ngbongbo tchozö ndə̂ tche dôtə̂ yê atə̂lə̂ akrə

(Mat 12.43-45)

24«Âdə ngâ ngbongbo tchozö âwutu lə̂ ngâ akrə nə̂, ngbongbo tchozö lâme âsə me lakə̂ wrʉ lə̂ kpaɛ̈gâ lakə̂ pu sə̂ tchô ndə̂ tche yatə̂ yê tâ. Âdə tche âgboabô tchô nə̈ gbô-ê, tche âto rə̂ päkëdə̂: ‹Më âdotə̂ mê atə̂lə̂ nda ndə̂ mê, ndə̂ më wûtu lə̂nə̈ âme.› 25Ndə̂ tche âsə̈ kâ atə̂lə̂ nda nə̈, kə̂ gbo tchâalê nə̈ dëkë a grô rə̂ nə̈ gbɛ̂, kə̈ nyîkrə arə tchə̂lə̂ nə̈ nə̂ gbɛ̂. 26Tchâme, tche âkä e, kə̂ kʉ angâ angbongbo atchozö mïndûu manə̈ bïchuû ndə̂ andjë rô tchë la gbôgbô, andjë kangbâ andjê, kə̂ sə gbɛ̂ ë tchâalê nə̈. Pânə̈ rə nə̈ âkä watə̂ köchë lâme ngbo kə̂ ro anə̈ dokʉ̈tchê.»

Tchôtchô kə̂ sə

27Ndə̂ Jezü ndə̂po lakə̂ to pö nə̈, ngâ ɛ̈chë lə̂ gûtə̂ azü nə̈ pô ngbôô sə̈ Jezü päkëdə̂: «Mômô kä tə̂ ɛ̈chë ndə̂ tche zâ guzü zə̈, ânyë kə̈ zâ ngo ëma zə̈!» 28Jezü tô rə̂ ndə̂nə̈ sə̈ tchë päkëdə̂: «Mômô nə̈ wätə̂ azü ndə̂ andjë djê pö Ndjapä, ânyë kə̈ mbô rə gundə̂sə̂ nə̈!»

Azü yükû nə̈ ndə̂kə̂ wun ngâ kpɨ̈ngbɨ̈ rə

(Mat 12.38-42)

29Ndə̂ akpûlû azü nə̈ tâkpa ndə̂ Jezü, tche sə̂ lakə̂ to rə̂ päkëdə̂: «Azü ndə̂ tchô angêta də̈ angbongbo azü, andjë yükû nə̈ pä më mbo ngâ kpɨ̈ngbɨ̈ rə. Andjê wun-abô rə̂ tee-a, kütû kpɨ̈ngbɨ̈ rə ndə̂ Ndjapä mbô rə̂ balë lə̂ köbosə̂ earə̂ ndə̂ma Ndjapä Jönâse lâme. 30Batə̂ rə̂ ndə̂ azü gö ndə̂ Nïnîve wûn kpɨ̈ngbɨ̈ rə lə̂ köbosə̂ Jönâse, azü ndə̂ tchô angêta wun-adje kpɨ̈ngbɨ̈ rə lə̂ köbosə̂ Modô ndə̂ Akrə. 31Tə̂ lo kə̂ wa ngbanga, ɛ̈chë ndə̂ tche wâtə̂ ɛ̈chë-gbïɛ̈ lə̂ gö ndə̂ âwâ də Ginikî adjelafô ndə̂kə̂ krʉ tchâtchu azü ndə̂ tchô angêta ndə̂kə̂ wa ngbanga lə̂ küma andjê, bëte tche tö lə̂ ngrɨ̈ngrɨ̈ tchô ânyë kə̈ nə̂ ndə̂kə̂ dje pö ndə̂ gbïɛ̈ Salomön ndə̂ küma yê wâ lanə̈ tə̂ gbölösə̂nə̈. Tchâtə, ngâ akrə ndə̂ tche wâ gbölö kə̈ rô Salomön kä tâ! 32Tə̂ lo kə̂ wa ngbanga, azü gö ndə̂ Nïnîve âadje lafô la azü ndə̂ tchô angêta ndə̂kə̂ wa ngbanga pâ andjê bëte andjë gbôtə̂ bəndɨ kə̂ mbo rə ndə̂ andjê lə̂ köbosə̂ pö Ndjapä ndə̂ Jönâse mû rə̂ lâme nə̂. Tchâtə, ngâ akrə ndə̂ tche wâ gbölö kə̈ rô Jönâse kä tâ!»

Ndoka pâ wo ndə̂ lâmba

(Mat 5.15; 6.22-23)

33«Akrə tôâbo wo lə̂ lâmba ndə̂kə̂ za rə̂ wü âdəndjë ndə̂kə̂ za rə̂ tchâtchâ lüsû-a. Tche âza rə̂ pâ ngâ rə lafô ndə̂kə̂ pa azü ndə̂ andjë li atə̂ tchâalê nə̈ wun tchô ndə̂ sɨ̂nyî nə̈. 34La zə̈ wä batə̂ lâmba ndə̂ tə̂ zə̈. Âdə la zə̈ âwatə̂ tchôtchô nə̈, tə̂ zə̈ âwa lə̂ ngbänga nə̈; âdə la zə̈ ândɨ, käko tə̂ zə̈ gbɛ̂ kä lə̂ bübü tchô. 35Käko la zə̈ gbö-ê, ânyë ngbänga tchô ndə̂ âwâ lə̂ zə̈ lâme doabô tə̂ yê dô kə̂ watə̂ bübü tchô-ê. 36Âdə ndundu tə̂ zə̈ gbɛ̂ âwa lə̂ ngbänga tchô, ânyë ngâ tchâme-tə̂ zə̈ wâbô wâ lə̂ bübü tchô-ê, käko ndundu tə̂ zə̈ nə̈ gbɛ̂ âwa kraâ lə̂ ngbänga tchô, batə̂ rə̂ ndə̂ ngbänga lâmba tcho, ânyë kʉ̂tê zə̈ wa ngrôô lâme.»

Jezü hrö la afarizïɛ̈n la a-earə̂ kə̂ nyisə̂ ndïɛ̈

(Mat 23.4-36; Mar 12.38-40)

37Ndə̂ Jezü tô pö nə̈ gbɛ̂ âkâ, ngâ farizïɛ̈n ê tchë ndə̂kə̂ zɨ kɨ̈zɨ̂ bhândə̂ yê. Jezü lî kə̂ sə̂ ma kɨ̈zɨ̂ lakə̂ zɨ rə̂. 38Sə̂nə̈ ndə̂ farizïɛ̈n lâme wûn rə̂ pä tche djûtuabô könô yê ânyë kə̈ sə̂ lakə̂ zɨ kɨ̈zɨ̂ lâme, tchə̂lə̂ küma yê djîngɨli-î. 39Gbölö gbïɛ̈ tô rə̂ sə̈ tchë päkëdə̂: «Nyënyê ndə̂ afarizïɛ̈n, nyë djûtu kütû kʉ̂tê kangûchi la kʉ̂tê kalângʉ, praâbalë tchə̂lə̂ su nyê sɨ̂sɨ̈ la gʉ kə̂ zɨ ngbä la ngbongbo su. 40Nyënyê ndə̂ küma nyê wâbô wâ lanə̈ âtə! Ndjapä ndə̂ tche mbô tchô də sûwu, tche mbôâbo ndjë tchô dələ̂nə̈? 41Nyë kʉ̈ arə ndə̂ âwâ lə̂ kangûchi la kalângʉ ndə̂ nyê gbɛ̂ sə̈ a-earə̂ yûkü, ânyë arə gbɛ̂ wadje vuu tə̂ pö ndə̂ nyê.

42«Nyonyo kä tə̂ nyê, afarizïɛ̈n! Nyë kʉ̈ dîme ndə̂ akʉ̈kʉ̂-gûsû balë balë la akanyïɛ̈ arə kɨ̈ndɨ̈ gbɛ̂ sə̈ Ndjapä. Praâbalë djîrə̂ rə, lakə̂ nyində̂ Ndjapä, nyë wün rə̂ batə̂ mbämbä rə. Dëkë rə ndə̂ âwâ ndə̂kə̂ pa nyë mbo rə̂ âme kä lâme, kə̂ gboabô gbôtə̂ adɨ̂ nə̈-ê.

43«Nyonyo kä tə̂ nyê, afarizïɛ̈n! Nyë nyïndə̂ kə̂ sə tchê pâ adokʉ̈ ngendë ndə̂ âwâ lə̂ anda kə̂ voga Ndjapä. Nyë nyïndə̂ nə̈ pä azü po ndə̂ nyê sə̂ tchô ndə̂ azü pala tchê tə̂ andjê tâ. 44Nyonyo kä tə̂ nyê! Nyë wä batə̂ acho akuzü ndə̂ a wûn-âbô rə̂ wûn-î, ânyë âdə akrə ânə pânə̈ kə̈ wûn-âbo sə̂nə̈ pä acho akuzü kä me-a.»

45Ngâ earə̂ kə̂ nyisə̂ ndïɛ̈ tô rə̂ sə̈ tchë päkëdə̂: «Earə̂ kə̂ nyisə̂ rə, ndə̂ mo to pö kâkë âtə, mo sə̈ lakə̂ dro ndjë ârâ drö kä âtə-a!» 46Jezü tô rə̂ ndə̂nə̈ sə̈ tchë päkëdə̂: «Nyonyo kä ndjë tə̂ nyê, a-earə̂ kə̂ nyisə̂ ndïɛ̈! Bëte nyë zä rə ndə̂ âlû, ndə̂ sə̂kə̂ za rə̂ kâkä ë küma azü, kə̈ grʉ̂âbo ndjë rə̂ la ɛ̈ küma könô nyê ndə̂kə̂ za tîɛ̂ ngânə̈ tə̂ andjê-a. 47Nyonyo kä tə̂ nyê! Nyë nyïkrə acho akuzü a-earə̂ ndə̂ma Ndjapä âfû tə̂ gbölösə̂nə̈. A-earə̂ ndə̂ma Ndjapä lâme, araâta nyê kä ndə̂ âwôn andjê. 48Lakə̂ mbo tə̂ rə käko, nyë nyïsə̂ nə̈ päkëdə̂ nyë gâmba pö ndə̂ rə ndə̂ araâta nyê mbô rə̂ alême nə̂, bëte andjë wön a-earə̂ ndə̂ma Ndjapä, ânyë nyënyê ndə̂ nye nə̈, nyë nyîkrə acho-kuzü andjê. 49Bëte rə̂ kä, lə̂ köbosə̂ nə̈ ndə̂ küma Ndjapä ndə̂ âwâ lanə̈, tche tô rə̂ päkëdə̂: ‹Mê wan-adje a-earə̂ ndə̂ma Ndjapä la abadjângele, andjê won-adje angânə̈ lə̂ gûtə̂ andjê, kə̂ mboadje angânə̈ la yûkü.› 50Käko a âwadje ngbanga pa azü ndə̂ tchô angêta bëte a-earə̂ ndə̂ma Ndjapä ndə̂ a wôn andjê gasa alême, ätö tə̂ lo nə̈ ndə̂ Ndjapä mbô tchîsûwu. 51Ätö tə̂ kuzü Äbêle ndjoa ëtə̂ kuzü Zakarï ndə̂ a wôn tchë lə̂ gbâtə̂ gbalâka-ngela la tchô ndə̂ âdâka gbɛ̂ lə̂ gbölö nda Ndjapä#11.51 Nyë dɨ̈ Jen 4.8; 2 Akn 24.20-22.. Ɛn-ɛn, tə̂ lëge nə̈ më tö rə̂ sə̈ nyê, Ndjapä âwadje ngbanga pa azü ndə̂ tchô angêta bëte azü ndə̂ a wôn andjê lâme.

52«Nyonyo kä tə̂ nyê, a-earə̂ kə̂ nyisə̂ ndïɛ̈! Nyë zä kûlïɛ̈ ndə̂ âwâ ndə̂kə̂ pa a kro manda kə̂ wunsə̂ rə la rə̂, praâbalë nyë lîâbo andə̂ nye nə̈-a, kə̈ kîtə̂ manda tə̂ azü ndə̂ andjë nyîndə̂ kə̂ li.»

53Ndə̂ Jezü wûtu tchâalê ndə̂ farizïɛ̈n nə̈ lâme, su a-earə̂ kə̂ nyisə̂ ndïɛ̈ la afarizïɛ̈n jêtə̂ kə̂ kʉ andjê tə̂ yê tə̂ gbölösə̂nə̈, ânyë andjë sə̂ lakə̂ yu tchë la pö pâ arə gbɛ̂. 54Andjë vü tchë ndə̂kə̂ pa âdə ngâ ngbongbo pö âwutu lə̂ ma yê, andjë gbo tchë lə̂nə̈.

Currently Selected:

Lûke 11: lnl

Highlight

Copy