Lûke 12

Jezü yükû nə̈ sə̈ adjisîpili pä andjë toabô alû tô-ê

(Mat 10.26-27)

1Lo nə̈ lâme, angbängbä azü pâlatə̂ andjê sâke sâke, ânyë âmbô rə̂ pä andjë sə̂ lakə̂ dɨkpu tə̂ andjê lə̂ gbâtə̂ andjê. Jezü tô rə̂ sə̈ adjisîpili ndə̂ yê dokʉ̈tchê päkëdə̂: «Äwäpä la nyê gbo tə̂ djëvö ndə̂ afarizïɛ̈n, ndə̂ ânyîndə̂ kə̈ to rə̂ pä azü ndə̂ pö ma andjê wâ ngbî tə̂kə̂ mbo rə̂ ndə̂ andjê. 2Rə gbɛ̂ ndə̂ âwâ wü, âwutuadje ësûwu. Pö gbɛ̂ ndə̂ a wûn-âbô sə̂nə̈ wûn, a âwun-adje sə̂nə̈. 3Bëte rə̂ kä ndə̂, pö gbɛ̂ ndə̂ nyê to rə̂ lə̂ bübü tchô, a âdjeadje rə̂ ndə̂sə̂ ngbänga. Pö ndə̂ nyë tô rə̂ lə̂ tü ngâ akrə bhâlə̂ darə ndə̂ a tchû manda nə̈ ëtâ, a âkrʉ me la rə̂ bhâlə̂ küma ginda ânyë kə̂ to rə̂.»

Nyë kpë wa Ndjapä

(Mat 10.28-31)

4«Më tö rə̂ sə̈ nyê ndə̂ araagü mê: Nyë mböäbô wa azü ndə̂ andjë won tə̂ azü ânyë kə̂ mboabô ngâ rə mbô la tchêngbâ nə̈ lâme mbô-ê. 5Mê toadje pö ndə̂ ngâ akrə ndə̂ nyë wâ ndə̂kə̂ mbo wa yê. Nyë mbö wa Ndjapä ndə̂ âdə tche âwon akrə, kə̂ wa la gbôgbô ndə̂kə̂ yi tchë bhâlə̂ wo ndə̂ âju pïï etə̂. Ɛn-ɛn, tə̂ lëge nə̈ më tö rə̂ sə̈ nyê, tchetchë kä ndə̂ nyë wâ ndə̂kə̂ mbo wa yê.

6«A kâbo ayɛ̈yɛ̈ anyïɛ̈nə̈ mïndûu bëte mîɛ̈-makətche bïchuû? Käko sə̂ ngâ nyïɛ̈nə̈ balë lə̂ gûtə̂ andjê yûâbo tə̂ Ndjapä-a. 7Tche dɨ̂ su küma nyê nə̂ gbɛ̂. Nyë mböäbô wa mbô-ê; nyë rö ayɛ̈yɛ̈ anyïɛ̈nə̈ lâme tə̂ gbölösə̂nə̈!»

Kə̂ gamba pö ndə̂ Jezü lə̂ la azü gbɛ̂

(Mat 10.32-33; 12.32; 10.19-20)

8«Më tö rə̂ sə̈ nyê: Akrə ndə̂ tchê toadje rə̂ tchâtchu azü gbɛ̂ pä anyë wätə̂ tchandə̂ me nə̈, Modô ndə̂ Akrə âto ndjë rə̂ me tchâtchu aânje ndə̂ Ndjapä pä anyë də̈ tchandə̂ ye nə̈. 9Praâbalë akrə ndə̂ tche vûsə̂ mê tchâtchu azü gbɛ̂ pä anyë wûn-âbo sə̂ mê-a, Modô ndə̂ Akrə âvu ndjë sə̂ yê me tchâtchu aânje ndə̂ Ndjapä pä anyë wûn-âbo sə̂ yê-a. 10Âdə ngâ akrə âto ngbongbo pö tə̂ Modô ndə̂ Akrə, a âkoadje pö lə̂ küma yê. Praâbalë akrə ndə̂ tche drô Kpɨ̂ki Yingö, a âkoabô pö lə̂ küma yê tee-a.

11«Âdə a âe la nyê ndə̂kə̂ wa ngbanga pâ nyê lə̂ anda kə̂ voga Ndjapä, âdəndjë tchâtchu agbölö azü gö, nyë dɨ̈äbô su nyê dɨ̂ pâ pö ndə̂ nyê toadje rə̂ ndə̂kə̂ kosə̂ pö tə̂ nyê, 12bëte kpôsə̂nə̈ lâme, Kpɨ̂ki Yingö ânyiadje sə̂ pö ndə̂ âwâ ndə̂kə̂ pa nyë to rə̂.»

Ndoka pâ earə̂ kə̂ gbo rə ndə̂ küma yê wâbô wâ lanə̈-ê

13Ngâ akrə ndə̂ tche sə̂ lə̂ kpûlû azü nə̈ tô rə̂ sə̈ Jezü päkëdə̂: «Earə̂ kə̂ nyisə̂ rə, to rə̂ sə̈ yîngâ mê tche krʉ̂ tchə̂lə̂ rə ngbâ bha ârâ ndə̂ tche gbôtâ sə̈ ârâ la tchë.» 14Jezü tô rə̂ ndə̂nə̈ sə̈ tchë päkëdə̂: «Agü mê, tchabâ âzâ mê ndə̂kə̂ wa tchə̂lə̂ ngbanga lə̂ gbâtə̂ nyê, lakə̂ krʉ tchə̂lə̂ rə ndə̂ nyê tə̂ nyê?» 15Pânə̈ Jezü tô rə̂ sə̈ azü gbɛ̂ päkëdə̂: «La nyê gbö-ê! Âwâbo pä nyë za su nyê pâ kə̂ gbo rə-a, bëte kə̂ gbo rə gbö ndə̂ ngâ akrə bâtabô tchîsûwu ndə̂ yê-a.»

16Käko Jezü tô pö la ndoka sə̈ andjê päkëdə̂: «Ngâ earə̂ kə̂ gbo rə kä la kɨ̈ndɨ̈ ndə̂ yê ndə̂ tche gbô rə lə̂nə̈ tə̂ gbölösə̂nə̈. 17Tche zâ küma yê kə̈ tô rə̂ päkëdə̂: ‹Më âmbo atöko? Më wâbo la tchô ndə̂kə̂ kʉ arəgʉ ndə̂ mê tâ-a.› 18Pânə̈ tche tô rə̂ päkëdə̂: ‹Rə ndə̂ mê mbo rə̂ wä kâkë: Më ândjo tchə̂lə̂ agro ndə̂ mê gbɛ̂, kə̂ mbo angâ agbölö nə̈, kə̂ kʉ andjî rəgʉ, la arə ndə̂ mê gbɛ̂ bhâlə̂ nə̈. 19Käko më âto rə̂ sə̈ mê la tə̂ mê päkëdə̂: Momö, rə ndə̂ zə̈ kä tâ tə̂ gbölösə̂nə̈, ârə̂ âmbo angbängbä ngû. Amö yatə̂ zə̈, kə̂ zɨ rə, kə̂ ndjo rə, kə̂ vu ngɨ̈.› 20Praâbalë Ndjapä tô rə̂ sə̈ tchë päkëdə̂: ‹Köchë ndə̂ küma zə̈ wâbô wâ lanə̈ âtə! Lə̂ bütchî âtə, a âyuadje kû vrö zə̈. Ânyë arə ndə̂ zə̈ gbɛ̂ ndə̂ mo bâta rə̂ lâme, mo bäta rə̂ bëte tchabâ?›» 21Pânə̈ Jezü kä tô rə̂ päkëdə̂: «Akrə ndə̂ tche pâla rə bëte tə̂ yê la tə̂ yê, ânyë kə̈ wâbô wâ la rə tchâtchu Ndjapä, tche wä batə̂ köchë lâme.»

Kə̂ za su pâ Ndjapä

(Mat 6.25-34)

22Jezü tô rə̂ sə̈ adjisîpili ndə̂ yê päkëdə̂: «Bëte rə̂ kä më tô rə̂ sə̈ nyê: Nyë dɨ̈äbô su nyê dɨ̂ bëte tchîsûwu ndə̂ nyê, tə̂ pö ndə̂ kɨ̈zɨ̂ ndə̂ nyê zɨ rə̂, âdəndjë tə̂ pö ndə̂ lə̂ba ndə̂ nyê yu rə̂ tê nyê. 23Bëte tchîsûwu ndə̂ akrə wä gbölö kə̈ rô kɨ̈zɨ̂. Tə̂ akrə wä gbölö kə̈ rô lə̂ba. 24Nyë wünsa angbâlambô; andjë lûâbo rəgʉ-a, kə̈ sôâbo ndjë ndjî rəgʉ-a, andjë wâbo la ngâ tchô ndə̂kə̂ bata rə tâ-a, âdəndjë gro-a, Ndjapä kä ndə̂ âkʉ kɨ̈zɨ̂ sə̈ andjê. Nyë rö anyïɛ̈nə̈ tə̂ gbölösə̂nə̈! 25Tchabâ lə̂ gûtə̂ nyê kä ndə̂ âwâ ndə̂kə̂ za ngâ lö ëpâ lö yê lə̂ köbosə̂ kə̂ dɨ su yê? 26Käko âdə nyë âwun-abô sə̂kə̂ mbo akpîɛ̂kpîɛ̂ rə mbô-ê, bëte giamâ kä ndə̂ nyê dɨ su nyê tə̂ adɨ̂ nə̈? 27Nyë wünsa anyînyî güsü, andjë mbôâbo kua-a, kə̈ sɨ̂âbo ndjë lə̂ba-a. Më tö rə̂ sə̈ nyê, Salomön la tə̂ yê ndə̂ tche wâ la rə tə̂ gbölösə̂nə̈, tche yûâbo lə̂ba ndə̂ âfû batə̂ anyînyî güsü lâme-a. 28Ndjapä ndə̂ tche yu abë-kɨ̈ndɨ̈ ndə̂ âwâ angêta ndə̂kə̂ pa lâmbo azü yi rə̂ atə̂lə̂ wo, ämbö atöko ânyë tchetchë la tə̂ yê yuabô lə̂ba yû ëtə̂ nyê? Nyënyê ndə̂kə̂ za su nyê sə̈ Ndjapä wâ kpîɛ̂kpîɛ̂ rə̂ âtə! 29Âwâbo pä nyë sə lakə̂ dɨ su nyê tə̂ rə ndə̂ nyê zɨadje rə̂, âdəndjë rə ndə̂ nyê ndjoadje rə̂-a. Tchə̂lə̂ küma nyê djingɨliabô djîngɨli. 30Azü tchêbêche âtə ndə̂ andjë wûn-âbô sə̂ Ndjapä wûn kä ndə̂ âpu rə käko logbɛ̂. Nyënyê ndə̂ nye nə̈, Bha nyê wûnsə̂ nə̈ nə̂ pä nyë nyïndə̂ arə käko-ë. 31Äwäpä nyë pu köbo Gbölö gö-gbïɛ̈ ndə̂ Ndjapä dokʉ̈tchê, käko Ndjapä âkʉadje adɨ̂ arə gbɛ̂ ëpânə̈ sə̈ nyê.»

Nyë päla arə ndə̂ nyê gbɛ̂ bhâ lafô

(Mat 6.19-21)

32«Nyë mböäbô wa mbô-ê, aɛ̈bro-ngbaga ndə̂ Ndjapä! Bëte äfü tə̂ Bha nyê ndə̂kə̂ za Gbölö gö-gbïɛ̈ sə̈ nyê. 33Äwäpä nyë ka arə ndə̂ nyê kə̂ kʉ makətche nə̈ sə̈ a-earə̂ yûkü. Äwäpä nyë pu köbo ndə̂kə̂ gbo kədjâ-makətche ndə̂ âwâbô wâ ndə̂kə̂ ndɨ-î. Nyë päla arə ndə̂ nyê bhâ lafô, ânyë âyuabô yû balë-ê. Bhâye, ngâ earə̂ ngbä ndoabô la rə̂ tee-a, ako zɨabô ndjë rə̂ tee-a. 34Bëte sə̂nə̈ ndə̂ rə ndə̂ nyê wâ tâ, su nyê kä ndjë tâ.»

A-earə̂ kua ndə̂ andjë sə̂ bëte gbölö akrə ndə̂ andjê

35«Äwäpä nyë sə tchêtchêtchê-ë, wû tchêpâ lə̂ba ndə̂ nyê wä kpôtə̂ nyê, wo lâmba ndə̂ nyê wrʉ̈äbô wrʉ̂-ê. 36Nyënyê ndjë, nyë sə̈ batə̂ a-earə̂ kua ndə̂ andjë sə̂ bëte gbölö akrə ndə̂ andjê ndə̂ tche ê ndə̂ kpülü ndə̂kə̂ totə̂ ndə̂ köchë la ɛ̈chë, ndə̂kə̂ pa tche âsə̈ kangbâ yê, ânyë kə̈ sə̂ lakə̂ gʉgʉ manda, andjë kro rə̂ tə̂ yê gasa-ê. 37Mômô kä tə̂ a-earə̂ kua ndə̂ gbölö akrə ndə̂ andjê kângbâ yê ânyë kə̈ gbô andjê la lala andjê nga-ë! Ɛn-ɛn, tə̂ lëge nə̈ më tö rə̂ sə̈ nyê: Gbölö akrə ndə̂ andjê lâme âyu lə̂ba kua, kə̂ to rə̂ sə̈ andjê pä andjë sə bêche ndə̂kə̂ zɨ kɨ̈zɨ̂, tchetchë la tə̂ yê âkʉ kɨ̈zɨ̂ sə̈ andjê. 38Âdə tche âkangbâ yê la tchə̂lə̂ agrʉ̂mi âdəndjë la tchêngbâ tchə̂lə̂ agrʉ̂mi, ânyë kə̈ gbô andjê la lala andjê nga-ë, mômô kä tə̂ andjê!

39«Nyë djë tchə̂lə̂ pö âtə: Âdə earə̂ nda âwunsə̂ dalo ndə̂ earə̂ ngbä nə la rə̂, tchê gboabô tə̂ earə̂ ngbä lâme tche koa manda ndə̂ yê ndə̂kə̂ kʉ arə ndə̂ yê tee-a. 40Nyënyê ndjë gbɛ̂, äwäpä nyë sə tchêtchêtchê, bëte Modô ndə̂ Akrə âkadje ngbâ yê lə̂ dalo ndə̂ nyê wun-abô sə̂nə̈ tee-a.»

Tchôtchô earə̂ kua, la ngbongbo earə̂ kua

(Mat 24.45-51)

41Käko Pîêre yû Jezü päkëdə̂: «Gbölö Gbïɛ̈, mo tö ndoka âtə kütû sə̈ ârâ? Âdəndjë rə̂ ndə̂ mo tö rə̂ sə̈ azü gbɛ̂?» 42Gbölö Gbïɛ̈ tô rə̂ ndə̂nə̈ sə̈ tche päkëdə̂: «Tchabâ kä ndə̂ âdə̂ djîrə̂ earə̂ kə̂ bata rə, ânyë kə̈ wûnsə̂ rə? Tche də̈ tchanə̈ ndə̂ gbölö akrə ndə̂ yê gbôtə̂ yê ndə̂kə̂ wun tchô pâ a-earə̂ kua ndə̂ yê, ânyë âdə lo nə̈ âta tâ, tche kʉ kɨ̈zɨ̂ ndə̂ andjê sə̈ andjê. 43Mômô kä tə̂ earə̂ kua lâme ndə̂ gbölö akrə ndə̂ yê kângbâ yê kə̈ gbô tchë tə̂ ma kua nə̈! 44Tə̂ lëge nə̈ më tö rə̂ sə̈ nyê, gbölö akrə nə̈ âgbotə̂ arə ndə̂ yê gbɛ̂ ëtchânə̂ earə̂ kua nə̈ lâme ndə̂kə̂ pa tche wun tchô pânə̈. 45Praâbalë âdə earə̂ kua nə̈ lâme âto rə̂ bhâtə̂ su yê päkëdə̂: ‹Gbölö akrə ndə̂ mê ndôâbo tə̂kə̂ ka-a›, ânyë kə̈ jêtə̂ kə̂ bhi aköchë la aɛ̈chë ndə̂ andjë mbo kua, ânyë âdə tche âzɨ rə, kə̂ ndjo rə, kə̂ ndjo pî âmbo tchë, 46gbölö akrə ndə̂ ngbâa lâme âkadje ngbâ yê kə̂ tro tchë trö, ndjë dalo ndə̂ tche ka la rə̂, tchê wûn-âbô sə̂nə̈ tee-a. Gbölö akrə nə̈ âgroadje earə̂ kua nə̈, kə̂ mbo rə̂ tə̂ yê batə̂ rə̂ ndə̂ a mbo rə̂ tə̂ azü ndə̂ andjë kôsə̂ ma Ndjapä. 47Earə̂ kua ndə̂ tche wûnsə̂ rə ndə̂ gbölö akrə ndə̂ yê nyîndə̂ nə̈, ânyë kə̈ nyîkrəabô ngâ rə nyîkrə balë-ê, âdəndjë rə̂ ndə̂kə̂ mbo rə gundə̂sə̂ pö ma yê-ê, gbölö akrə ndə̂ yê nə̈ âbhi tchë tə̂ gbölösə̂nə̈. 48Earə̂ kua ndə̂ tche wûn-âbo sə̂ rə wûn ndə̂ gbölö akrə ndə̂ yê nyîndə̂ nə̈, ânyë kə̈ mbô rə ndə̂ âwâ ndə̂kə̂ pa a bhi tchë, a âbhi tchë kpîɛ̂kpîɛ̂ rə̂. Akrə ndə̂ a kʉ̂ rə sə̈ tchë tə̂ gbölösə̂nə̈, a âyu ndjë tchë tə̂ gbölösə̂nə̈. Akrə ndə̂ a gbôtə̂ rə tchânə̂ yê tə̂ gbölösə̂nə̈, a âyu ndjë kû nə̈ tə̂ gbölösə̂nə̈.»

Azü âkrʉ tchə̂lə̂ tə̂ andjê tə̂ pö ndə̂ Jezü

(Mat 10.34-36)

49«Më nə̈ ndə̂kə̂ yi wo pâ cho âtə. Më nyïndə̂ nə̈ tə̂ gbölösə̂nə̈ ndə̂kə̂ pa wo nə̈ tcho wândâ wändä dokʉ̈tchê! 50Äwä ndə̂kə̂ pa më gbo ngâ batɛ̂me, më âwun yûkü batɛ̂me nə̈ zoo kə̂ gbo rə̂! 51Nyë wüntî pä më nə̈ la zɨtɨ su pâ cho âtə? Më tö rə̂ sə̈ nyê pä âdə̂âbo käko-a. Më nə̈ ndə̂kə̂ krʉ tchə̂lə̂ azü. 52Andə̂ tchô angaâtə, nda ndə̂ azü gü lə̂nə̈ mïndûu, azü nə̈ âkrʉ tchə̂lə̂ tə̂ andjê: Azü vötaâ âkosə̂ azü bïchuû, azü bïchuû âkosə̂ azü vötaâ. 53Bha bechë âkosə̂ modô ndə̂ yê, modô nə̈ kosə̂ bha nə̈. Anyï kosə̂ ɛ̈wünrə ndə̂ yê, ɛ̈wünrə kosə̂ anyï nə̈. Anyï köchë kosə̂ nyinə̂ nə̈, nyinə̂ kosə̂ anyï köchë nə̈.»

Nyë djë tchə̂lə̂ pö rə ndə̂ âwutu angêta

54Jezü kâ tô rə̂ sə̈ kpûlû azü nə̈ päkëdə̂: «Âdə nyë âwun ndrö ndə̂ ââlafô bhâ sə̂nə̈ ndə̂ lo li tâ, nyê to rə̂ gasa päkëdə̂: ‹Nyïvrö ânyiadje›, nyïvrö nə̈ nyi ndjë tə̂ lëge nə̈. 55Nyë âwun yi ndə̂ âtô də ginikî, kə̂ to rə̂ päkëdə̂: ‹Tchô âwo›, tchô nə̈ wö ndjë tə̂ lëge nə̈. 56Nyënyê ndə̂ pö ma nyê wâ ngbî tə̂kə̂ mbo rə ndə̂ nyê âtə! Nyë wünsə̂ kə̂ dje tchə̂lə̂ arə tchêbêche la arə tchêlafô, rə nə̈ mbo gundə̂sə̂ nə̈, atöko kä ndə̂ nyë wûn-âbô wûnsə̂ arə ndə̂ âmbo ndə̂ tchô angêta wûn-î?»

Nyë nyïkrə pö la a-earə̂ kə̂ kosə̂ nyê

(Mat 5.25-26)

57«Bëte giamâ nyënyê la tə̂ nyê, nyë wâbô ngbanga wâ pâ kə̂ mbo djîrə̂ rə-ê? 58Âdə momö la earə̂ kə̂ kosə̂ zə̈ nyë âsə̈ e atə̂lə̂ ngbanga, äwäpä mo mbo rə̂ gbɛ̂ ndə̂kə̂ pa nyë nyikrə pö lâme lə̂ köbo. Ârə̂ âdəabô də̂ käko, tche e la mö atə̂ tchâtchu gbölö earə̂ kə̂ wa ngbanga, ânyë earə̂ kə̂ wa ngbanga nə̈ za mö sə̈ aturûgu, aturûgu nə̈ yi mö atə̂lə̂ nda kânga. 59Më tö rə̂ sə̈ mö, mô wutuabô tee lə̂ nda kânga nə̈ zoo kə̂ kʉ makətche gbɛ̂ ndə̂ a yûkû nə̈ sə̈ mö lâme ânyë!»

Currently Selected:

Lûke 12: lnl

Highlight

Copy