Lûke 13

Nyë gbötə̂ bəndɨ köbo nyê-ê

1Lo nə̈ lâme, angâ azü nə̂ kə̈ tô pö pâ azü gö ndə̂ Galilë sə̈ Jezü, ndə̂ kömändâ Pïlâte wôn andjê, ndə̂ andjë sə̂ lakə̂ wa ngela sə̈ Ndjapä. 2Jezü tô rə̂ ndə̂nə̈ sə̈ andjê päkëdə̂: «Nyë wüntî pä, ndə̂ a wôn azü gö ndə̂ Galilë lâme, änyïsə̂ nə̈ pä andjë wätə̂ agbölö a-earə̂ ngbongbo rə kə̈ rô adɨ̂ azü gö ndə̂ Galilë gbɛ̂? 3Âdə̂âbo käko-a, praâbalë më tö rə̂ sə̈ nyê, âdə nyë âgboabô gbôtə̂ bəndɨ kə̂ mbo rə ndə̂ nyê, nyê âtchu ndjë me gbɛ̂ batə̂ andjê. 4Ânyë azü lə̂ könô gbɛ̂ tchêpâ nə̈ mïndûu manə̈ vötaâ bhâ Jerûzalêmo ndə̂ gbölö nda ndə̂ Silowë ndə̂ âgû atə̂ lafô tû pâ andjê kə̈ wôn andjê lâme, nyë wüntî pä andjë mbö ngbongbo rə kə̈ rô azü ndə̂ Jerûzalêmo gbɛ̂? 5Âdə̂âbo käko-a, praâbalë më tö rə̂ sə̈ nyê, âdə nyë âgboabô gbôtə̂ bəndɨ kə̂ mbo rə ndə̂ nyê-ê, nyê âtchu me gbɛ̂ batə̂ andjê.»

Ndoka pâ da yö ndə̂ fîge ndə̂ âlêâbô lê-ê

6Pânə̈ Jezü tô ndoka âtə sə̈ andjê päkëdə̂: «Ngâ akrə chï da yö ndə̂ fîge lə̂ kɨ̈ndɨ̈ vînye ndə̂ yê. Tə̂ngâlo, tche nə̂ ndə̂kə̂ pu lêlê fîge nə̈, kə̈ gbôâbo rə̂-a. 7Tche tô rə̂ sə̈ earə̂ kə̂ mbo kua kɨ̈ndɨ̈ nə̈ päkëdə̂: ‹Wunsa ngâ rə: Âmbô ngû vötaâ angêta nə̂ ndə̂ më nə̂ ndə̂kə̂ pu lêlê fîge nə̈ lə̂nə̈, kə̈ gbôâbo rə̂-a. Amö ku da nə̈ ëbêche! Äwä lə̂ kɨ̈ndɨ̈ nə̈ ämbämbänə̈ bëte giamâ?› 8Earə̂ kə̂ mbo kua kɨ̈ndɨ̈ nə̈ tô rə̂ päkëdə̂: ‹Gbölö akrə, amö gbotâ la ngû âtə azə̈ kä wûn rə̂ ânyë; më âdji tchô ndrotə̂ nə̈ gbɛ̂, kə̂ tu ngbro kɨ̈ndɨ̈ lə̂ da nə̈. 9Ngû ngbânə̈ âtə ambêteko âleadje, praâbalë ârə̂ âleabô lê ânyë mo ku da nə̈ ëbêche.›»

Jezü tchâ ngâ ɛ̈chë ndə̂ tche ndɨ̂ lə̂ lö sabäa

10Tə̂ngâlo, Jezü sə̂ lakə̂ nyisə̂ rə sə̈ azü lə̂ nda kə̂ voga Ndjapä lə̂ ngâ lö sabäa. 11Ngâ ɛ̈chë ndə̂ tche wâ la käfunga kä ndjë tâ. Âmbô ngû lə̂ könô gbɛ̂ tchêpâ nə̈ mïndûu manə̈ vötaâ nə̂ ndə̂ ngâ ngbongbo tchozö mbo tchë, köbo ndə̂kə̂ pa tche yorʉatə̂ yê ndjii ëlafô wâbo-a. 12Ndə̂ Jezü wûn tchë, tche ê tchë, kə̈ tô rə̂ sə̈ tchë päkëdə̂: «Ɛ̈chë, më tchâ mö lə̂ tə̂kömbô ndə̂ zə̈ nə̂.» 13Jezü tô könô yê lə̂ küma ɛ̈chë lâme, posə̂nə̈ tche yôrʉatə̂ yê ëlafô, kə̈ sə̂ lakə̂ voga Ndjapä.

14Praâbalë su makündji ndə̂ nda kə̂ voga Ndjapä nə̈ kʉ̂ tchë tə̂ rə ndə̂ Jezü mbô rə̂ ndə̂ tche tchâ tə̂kömbô lə̂ lö sabäa lâme. Tche tô rə̂ sə̈ kpûlû azü nə̈ päkëdə̂: «Alö kä mïndûu manə̈ balë ndə̂kə̂ pa a mbo kua lə̂nə̈, nyë nə̈ lə̂ alö nə̈ lâme ndə̂kə̂ pa a tcha nyê. Nyë nə̈äbô nə̂ lə̂ lö sabaä-ê.» 15Gbölö Gbïɛ̈ tô rə̂ ndə̂nə̈ sə̈ tchë päkëdə̂: «Nyënyê ndə̂ pö ma nyê wâ ngbî tə̂kə̂ mbo rə ndə̂ nyê âtə! Lə̂ lö sabäa, akrə balë balë lə̂ gbâtə̂ nyê zûâbo wû tə̂ bâgala ndə̂ yê âdəndjë kûndiɛ ndə̂ yê tə̂ ma rə ndə̂ tche zɨ rə lə̂nə̈, kə̂ e la tchë ndə̂kə̂ pa tche ndjo ngû? 16Ânyë ɛ̈chë âtə ndə̂ a zɨ̂ tchë pâ mawo ndə̂ Abrahâmo, ndə̂ Satäa ï tchë ngbâ ngû lə̂ könô gbɛ̂ tchêpâ nə̈ mïndûu manə̈ vötaâ âtə, âfûâbo ndə̂kə̂ pa më ji tchë lə̂ wû lâme lə̂ lö sabäa?» 17Pö ndə̂ Jezü tô rə̂ lâme zâ ganô tə̂ gbölösə̂nə̈ lə̂ la andjanə̈ ndə̂ andjë kôsə̂ yê. Praâbalë su kpûlû azü nə̈ gbɛ̂ wâ la mômô tə̂ pö ndə̂ agbölö arə ndə̂ Jezü sə̂ lakə̂ mbo rə̂ lâme.

Ndoka pâ ndjî yö ndə̂ mütârede

(Mat 13.31-32; Mar 4.30-32)

18Käko Jezü tô rə̂ päkëdə̂: «Gbölö gö-gbïɛ̈ ndə̂ Ndjapä kʉ̈tə̂ yê la giamâ? Më âto rə̂ me pä äwä batə̂ giamâ? 19Gbölö gö-gbïɛ̈ ndə̂ Ndjapä wä batə̂ ngâ ndjî mütârede ndə̂ ngâ akrə gɨ̂ rə̂ lə̂ kɨ̈ndɨ̈ ndə̂ yê. Ndjî yö ndə̂ mütârede lâme kʉ̂, kə̈ kpô, kə̈ wâ batə̂ gbölö da yö. Anyïɛ̈nə̈ mbô kʉmâ andjê tə̂ matö nə̈.»

Ndoka pâ djëvö

(Mat 13.33)

20Jezü kä tô rə̂ päkëdə̂: «Mê âto rə̂ me pä Gbölö gö-gbïɛ̈ ndə̂ Ndjapä wä batə̂ giamâ? 21Äwä batə̂ djëvö ndə̂ ngâ ɛ̈chë kʉ̂ rə̂, kə̈ gîâ rə̂ la gbölö zûwü zoo nyînyî nə̈ sûku.»

Jezü tö rə̂ pä azü li lə̂ yɛ̈yɛ̈ manda

(Mat 7.13-14,21-23)

22Ndə̂ Jezü sə̂ lakə̂ e atə̂ Jerûzalêmo, tche rô lə̂ ayɛ̈yɛ̈ gö la agbölö gö lakə̂ nyisə̂ rə sə̈ azü. 23Ngâ akrə yû tchë päkëdə̂: «Gbölö Gbïɛ̈, azü ndə̂ andjê tchadje lə̂ kuzü lâme, andjë ngbâbo?» Jezü tô rə̂ sə̈ andjê päkëdə̂: 24«Nyë kpökpo tə̂ nyê kə̂ li lə̂ yɛ̈yɛ̈ manda nə̈; bëte më tö rə̂ sə̈ nyê: Angbängbä azü âpu köbo ndə̂kə̂ li lə̂nə̈, kə̂ gboabô köbo tee-a.

25«Âdə earə̂ nda nə̈ âalafô ânyë kə̈ tchû manda nə̈ nə̂, nyë âsə me bhâ sûwu, kə̂ sə lakə̂ gʉgʉ manda nə̈, kə̂ to rə̂ päkëdə̂: ‹Gbölö Gbïɛ̈, amö kro manda tə̂ ârâ!› Tche âto rə̂ ndə̂nə̈ me sə̈ nyê päkëdə̂: ‹Më wûn-âbo sə̂ tchô ndə̂ nyë tô tâ-a!› 26Käko nyë âto rə̂ me sə̈ tchë päkëdə̂: ‹Azə̈ zɨ̈ rə, kə̈ ndjô rə la mö, mo nyîsə̂ rə alême pâ köbo gö ndə̂ ârâ.› 27Tche âkä to rə̂ me sə̈ nyê päkëdə̂: ‹Më wûn-âbo sə̂ tchô ndə̂ nyë tô tâ-a. Nyë gïtə̂ nyê tə̂ mê chï; nyënyê gbɛ̂ ndə̂ a-earə̂ kə̂ mbo ngbongbo rə!› 28Tchâme kä ndə̂ kɨ̈ lakə̂ zɨ tchə̂lə̂ da jï wa tâ, lo nə̈ ndə̂ nyê wun-adje Abrahâmo la Izâke la Jakôbo la a-earə̂ ndə̂ma Ndjapä gbɛ̂ bhâlə̂ Gbölö gö-gbïɛ̈ ndə̂ Ndjapä. Nyënyê ndə̂ nye nə̈, a âyi nyê me bhâ sûwu! 29Azü âto me dəsə̂nə̈ ndə̂ lo wutu tâ, kə̂ to ndjë dəsə̂nə̈ ndə̂ lo li tâ, dəpâ aga, də ginikî kə̂ nəadje kə̂ sə ma kɨ̈zɨ̂ bhâlə̂ Gbölö gö-gbïɛ̈ ndə̂ Ndjapä. 30Käko angâ azü lə̂ gbâtə̂ azü dəngbânə̈ ndə̂ tchô angêta, andjê âwa me tə̂ küma nə̈. Ânyë, angâ azü tə̂ küma nə̈ ndə̂ tchô angêta, andjê âwa me tə̂ azü dəngbânə̈.»

Jezü kɨ̈ tə̂ Jerûzalêmo

(Mat 23.37-39)

31Lo nə̈ lâme, angâ afarizïɛ̈n nə̂ ndola Jezü, kə̈ tô rə̂ sə̈ tchë päkëdə̂: «Amö wutu tchâtə, kə̈ ê atə̂lə̂ ngâ gö ngbî, bëte gbïɛ̈ Hërôde nyïndə̂ kə̂ won mö.» 32Jezü tô rə̂ ndə̂nə̈ sə̈ andjê päkëdə̂: «Nyë êë kə̈ tô rə̂ sə̈ köchë ndə̂ tche mbo rə batə̂ grawe lâme päkëdə̂: ‹Më grö angbongbo atchozö, kə̈ tchâ a-earə̂ tə̂kömbô angêta, la tchêlâmbo, lə̂ vötaâ lö nə̈ mê kadje kua ndə̂ mê.› 33Praâbalë äwäpä angêta, lâmbo, la mbinə̈, mê ndəpo lə̂ wrʉ̂ ndə̂ mê etə̂, bëte âwâbo pä a won ngâ earə̂ ndə̂ma Ndjapä lə̂ ngâ gö ngbî-a, kütû bhâ Jerûzalêmo.

34«Jerûzalêmo, Jerûzalêmo, momö ndə̂ mo wôn a-earə̂ ndə̂ma Ndjapä. Azü ndə̂ Ndjapä wân andjê sə̈ mö, mo nyê andjê la täme andjë tchû-î! Sûsunə̈ atöko kä ndə̂ më nyîndə̂ kə̂ pala abechë ndə̂ zə̈ ëtchâtchâ mê batə̂ anyï ngötö pala aɛ̈ nə̈ tchâtchâ mbrö yê, praâbalë mo nyîâbo ndə̂nə̈-a. 35Käko gö ndə̂ nyê âwa me bhuu la tə̂ yê#13.35 Nyë dɨ̈ Jer 7.1-15; Aps 118.26.. Më tö rə̂ sə̈ nyê: Nyê kä wun bata mê tee-a, zoo âwutu tə̂ lo nə̈ ndə̂ nyê to rə̂ päkëdə̂: ‹Äwäpä Ndjapä e tchôtchô pö pâ akrə ndə̂ tche nə̂ la rə̈ Gbölö Gbïɛ̈.›»

Currently Selected:

Lûke 13: lnl

Highlight

Copy