A Zakari 7

No-loeer Zeruzalɛm lʋɩɩsã tẽegr yĩnga

1Rĩm a Daryʋʋs sẽn deeg a naamã tɩ yʋʋm naaslẽ, Sẽn-Ka-Saab goma ne a Zakari kiuug a wɛ soabã b sẽn boond tɩ Kislɛv kiuugã rasem a naas daare. 2A Betɛll rag n tʋma a Saretsɛɛr ne a Regɛm-Melɛk ne yẽnda nebã, tɩ b tɩ yõk Sẽn-Ka-Saab sɛɛg n ges b sũurã kõn sigi, 3la b tɩ sok Saasẽ-Pãng-Soabã roogã maan-kʋʋdbã, ne no-rɛɛsdbã yaa: «Mam tog n kell n yãbame n tãag kiuug a nu soabã, la m loe noore, wa mam sẽn dag n maan hal yʋʋm zãrã bɩ?»

4Saasẽ-Pãng-Soabã goma ne maam n yeele:

5«Yeel tẽngã nebã fãa ne maan-kʋʋdbã yaa:

‹Yãmb sẽn loe noor n wiis kiuug a nu soabã

ne kiuug a yopoe soabã, hal yʋʋm pis-yopoe

sẽn loogã pʋgẽ wã, rẽ yĩnga, sɩd yaa mam

yĩng la yãmb loe noorã sɩda?

6Yãmb sẽn dɩt la y yũudã,

ka yãmb mensã yĩng la y rɩt la y yũud sɩda?

7Rẽ yĩnga, ka koe-kãng la Sẽn-Ka-Saab rag n tũnug b no-rɛɛsdbã hal kʋdem-wẽndẽ n moon n togsã sɩda? Wakat-kãng tɩ Zeruzalɛm ne tẽms nins sẽn dag n gũbg yẽnda wã rag n pida ne nebã, n gãe bãane. Rẽ tɩ Negɛɛv ne tẽms nins sẽn be kunkub sʋkã rag n pida ne nebã?»

8Sẽn-Ka-Saab goma ne a Zakari n yeele:

9«Saasẽ-Pãng-Soabã yetame:

‹Kao-y bʋʋdã tɩrga,

maan-y taab neere, la y zoe taab nimbãanega.

10Ra maan-y pʋg-kõor ne kɩɩb pãnga,

la y ra maan sãan ne naong soab pãng ye.

Da tags-y y sũyã pʋs n dat n maan taab wẽng ye.›

11La bãmb zãgsame tɩ b ka na n kelg ye. Bãmb kɩɩsame n yẽd b tʋba, sẽn na n yɩl n da wʋm ye. 12Bãmb diglma b sũyã wa diyama, sẽn na n yɩl n da kelg tõogã ne goam nins Saasẽ-Pãng-Soabã Sɩɩgã sẽn tũnug kʋdem-wẽndẽ no-rɛɛsdbã n kõ bãmbã ye.» Dẽ, bõn-kãng yĩng kɩtame tɩ Saasẽ-Pãng-Soabã sũurã yiki. 13Saasẽ-Pãng-Soabã yeelame: «Mam sẽn bool bãmbã, b ka kelg ye. Dẽ wã, bãmb sã n wa bool maam, mam me ka na n kelg ye. 14Mam sãeega bãmb n kẽes bu-zẽms nins fãa bãmb sẽn dag n ka mi wã sʋka. Bãmb loogame n bas b tẽngã t'a sãam zãnga, tɩ ned ka leb n kẽnd a pʋga, la b ka ne ned sẽn pɩʋʋgd beenẽ me ye. Tẽng ning sẽn dag n yaa tẽn-noogã sãamame.»

Currently Selected:

A Zakari 7: MPBU

Highlight

Copy