A Zakari 8
8
Vɩ-bãan ne naar kãabgo
1Saasẽ-Pãng-Soabã goma ne maam n yeele:
2«Maam a Saasẽ-Pãng-Soabã yetame:
‹Mam nonga Sɩyõ, mam nong-a-la
ne nonglem-kãsenga,
nonglem ning mam sẽn tar yẽnda yĩngã
yaa kãseng n dɩt maam wa bugum.› »
3Sẽn-Ka-Saab yetame:
«Mam na n lebg n waa Sɩyõ,
la m na n zĩnda Zeruzalɛm pʋgẽ.
B na n pʋda Zeruzalɛm tɩ
«pʋ-peelem Tẽnga»
la Saasẽ-Pãng-Soabã tãn-sõngo.»
4Saasẽ-Pãng-Soabã yetame:
«Nin-kẽemba, pagb la raopa,
b ned kam fãa na n tika a rasaare,
n kẽng n tɩ zĩnd Zeruzalɛm nebã
seg taabã zĩisẽ,
bãmb yʋʋmã sẽn yaa wʋsgã yĩnga.
5Kom-dibli la kom-pugli na n pida tẽngã
nebã seg taabã zĩisẽ n deemdẽ.»
6Maam Saasẽ-Pãng-Soabã yetame:
«Sã n mikame tɩ badaare,
bu-kellã tagsdame tɩ yaa bũmb sẽn ka tõe n yɩ,
dẽ yĩnga, mam me tog n tagsame tɩ yaa bũmb
sẽn ka tõe n yɩ la?
Yaa maam a Saasẽ-Pãng-Soabã n yeele.»
7Saasẽ-Pãng-Soabã yetame:
«N-yẽe! Mam na n fãaga m nebã n yiis-b
tẽms sẽn be yaanga, la nin-taoorã pʋgẽ.
8Mam na n lebg n tall-b lame n wa,
la bãmb na n zĩnda Zeruzalɛm pʋgẽ.
Bãmb na n yɩɩ mam neba,
la mam na n yɩɩ bãmb Wẽnnaam,
n yaa sɩd soaba, la tɩrlem soaba.»
9Saasẽ-Pãng-Soabã yetame:
«Yãmb dãmb sẽn wʋm gom-kãensã
no-rɛɛsdbã sẽn togs wakat ning
b sẽn yẽbg Saasẽ-Pãng-Soabã roogã,
la wakat ning b sẽn na n me-a wã,
paam-y raoodo!
10Bala, sẽn deng rũndã,
ninsaalbã rag n ka tar yaoodo,
la rũmsã ka tʋmd n kẽesd yõod ye.
Bɛɛbã yĩnga, ned ka tõe n yi n gõ la a wa bãan ye.
Bala, mam dag n basa ninsaalbã fãa ne taaba.»
11Moasã, maam a Saasẽ-Pãng-Soabã yetame:
«Mam ka na n leb n maan bu-kellã
wa m sẽn maan pĩndã ye.
12Sɩd me, mam na n waa ne vɩ-bãan bõn-buudu.
Reezẽ tɩɩsã na n woma biisi,
tẽn-gãongã na n saka bõn-koaadla.
Sa-gãongã na n sika a meenem,
la mam na n kɩtame tɩ bõn-kãng fãa
lebg mam nebã bu-kellã rẽnda.
13Dẽ, Zʋʋda buudu, Israyɛll buudu,
yãmb sẽn dag n lebg kãab-wẽng
bãnd bu-zẽmsã sʋk to-to wã,
woto me, mam na n fãaga yãmba,
la yãmb na n lebga buud sẽn tar barka.
Da zoe-y rabeem ye, paam-y raoodo!»
14Bala, Saasẽ-Pãng-Soabã yetame:
Yãmb yaab-rãmbã rag n kɩtame tɩ mam
sũurã yiki, tɩ mam yãk yam n na n sɩbg yãmba,
la m ka maan m bãngẽ ye.
Maam a Saasẽ-Pãng-Soabã n yeele!
15Woto me, mam lebg n yãkda yam moasã,
n yeel tɩ badaare, m na n maana Zeruzalɛm
ne Zʋʋda buudã neere.
Dẽ wã, da zoe-y rabeem ye!
16 #
Efɛ 4.25
Ad yãmb sẽn tog n maan bũmb ninga:
«Gom-y sɩd ne taaba!
Kao-y bʋʋdã ne tɩrlem la ne sɩda,
y bʋ-kaoorã zĩisẽ.
17Bɩ ned ra tags a sũurẽ n dat n maan a to wẽng ye.
Bɩ y kisg zĩrẽ wẽenego.
Bala, mam kisa yel-bãmbã fãa.
Yaa maam a Sẽn-Ka-Saab n yeele!»
No-loeer daar sẽn lebg tigr daare
18Sẽn-Ka-Saab sẽn yaa Saasẽ-Pãng-Soabã goma ne maam a woto: 19Maam a Saasẽ-Pãng-Soabã yetame:
«Kiuug a naasẽ soabã no-loeerã,
ne a nu soabã no-loeerã,
la kiuug a yopoe soabã no-loeerã,
ne kiuug piig soabã no-loeerã,
na n lebga kɩdeng la sũ-noog rayã,
b na n lebga tigr kɩdeng day Zʋʋda buudã yĩnga.
Dẽ wã, nong-y sɩda, ne vɩ-bãane.»
20Saasẽ-Pãng-Soabã yetame:
«Neb buud toor-toor ne tẽms wʋsg neb na n
leb n wa pida Zeruzalɛm.
21Tẽng a yembr neb na n kẽng n tɩ
yeela tẽng a to rãmb yaa:
«Wa-y tɩ d kẽng n tɩ yõk Sẽn-Ka-Saab
sɛɛg n ges b sũurã ka na n sigi.
D kẽng n tɩ bao Saasẽ-Pãng-Soabã.»
La ned kam fãa na n leokame:
«Mam me na n tũume n kẽnge!»
22Neb kʋʋng wʋsg ne soolem-dãmb
sẽn tar pãng n na n wa Zeruzalɛm n wa bao
Saasẽ-Pãng-Soabã,
n yõk bãmb a Sẽn-Ka-Saab sɛɛg n ges
b sũurã ka na n sigi.
23Saasẽ-Pãng-Soabã yetame: «Badaare, neb sẽn gomd goam buud toor-toor pʋgẽ neb piig na n gãda Zʋɩf a yembr fãa fuug noor n yeele: ‹Tõnd na n tũu yãmb n kẽnge. Bala, tõnd wʋmame tɩ Wẽnnaam bee ne yãmba.› »
Currently Selected:
A Zakari 8: MPBU
Highlight
Share
Copy
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
