Sɩngre 35

A Zakoob yii Sɩkɛm n kẽng Betɛlle

1 # Sɩng 28.11-17 Wẽnnaam yeela a Zakoob yaa: «Yik n kẽng Betɛll n tɩ zĩnd be. Fo sã n ta beenẽ, bɩ f lugl tẽn-kugr n pʋʋs Wẽnnaam ning sẽn dag n vẽneg b meng ne foom wakat ning fo sẽn wa n zoet n na n põs f kẽem a Ezayu wã.» 2A Zakoob yeela a zaka rãmb ne neb nins fãa sẽn dag n be yẽnda zakẽ wã yaa: «Yiis-y wẽn-naandsã sẽn be yãmb nengẽ wã, la y yɩlg y mense, la y tek futu. 3Tõnd na n yikame n kẽng Betɛlle. D sã n ta be, mam na n lugla tẽn-kugr n pʋʋs Wẽnnaam ning sẽn leok maam m sũ-sãangã wakatã, la b yãag maam m so-toakã pʋgẽ wã.» 4Bãmb wʋka b wẽn-naandsã b sẽn dag n tarã, ne b tʋblondã n kɩs a Zakoobe. La a Zakoob rɩk-b lame n bus terebẽnt tɩɩsã sẽn pẽ ne Sɩkɛmã tẽngre.

5Rẽ poore, bãmb loogame. La Wẽnnaam kɩtame tɩ rabeem yõk tẽms nins sẽn pẽ bãmbã nebã, la b ka babs a Zakoob kambã ye. 6La a Zakoob ne neb nins sẽn be ne yẽnda wã taa Luuz sẽn yaa Betɛllã, beenẽ yaa Kana soolem. 7La a Zakoob mee tẽn-kugr beenẽ, n pʋd zĩ-kãng yʋʋr tɩ Ɛll-Betɛlle, sẽn dat n togs tɩ ‹Betɛll Wẽnnaam.› Bala, yaa zĩ-kãng la Wẽnnaam vẽneg b meng ne yẽnda wakat ning yẽnda sẽn wa n zoet n na n põs a kẽem a Ezayu wã. 8A Rebeka bi-yaool a Deboora kiime, la bãmb mum-a-la Betɛll longẽ wã, sɛn tɩ-kẽeng tẽngre, la b pʋd zĩigã yʋʋr tɩ yãbr tɩɩga. 9A Zakoob sẽn yi Padan-Aram n wa wã, Wẽnnaam leb n vẽnega b meng ne yẽnda, la b ning-a-la barka. 10#Sɩng 32.29Wẽnnaam yeela a Zakoob yaa: «Fo yʋʋr la a Zakoobe. La b ka na n leb n bool foom t'a Zakoob ye, fo yʋʋr na n lebga a Israyɛlle.» Dẽ, Wẽnnaam pʋda a Zakoob t'a Israyɛlle. 11#Sɩng 17.4-8Wẽnnaam yeela a Zakoob yaa: «Mam yaa Pãng-Soab a Wẽnnaam. Bɩ f paam dogem n fɩɩg n lebg wʋsgo, fo na n yɩɩ bu-kãsenga, la buud wʋsg na n yii fo pʋgẽ. La rĩm-dãmb na n yii fo pʋgẽ. 12Mam na n kõo foom tẽng ninga, mam sẽn dag n kõ a Abrahaam ne a Izakã. La fo loogr zugẽ, mam na n kõo fo yagensã tẽn-kãngã.» 13La Wẽnnaam zẽkame n loog n bas yẽnda zĩig ninga bãmb sẽn dag n gom ne yẽnda wã. 14#Sɩng 28.18,19A Zakoob baoo kugr n lugl tẽn-kugr zĩig ning Wẽnnaam sẽn gom ne yẽnda wã, la a maana maoong kug-kãng zugu, la a walg kaam a zugu. 15A Zakoob pʋda zĩig ning Wẽnnaam sẽn dag n gom ne yẽnda wã yʋʋr tɩ Betɛlle.

A Benzame rogem, la a Rasɛll kũum

16Bãmb yii Betɛll n na n looge, la bãmb sẽn kolg Efrate, a Rasɛll rogame. A Rasɛll rogmã yɩɩ toog wʋsg ne-a. 17La a Rasɛll sẽn wa n kʋmd rogmã wakate, pʋg-roagsã yeel-a lame yaa: «Da zoe rabeem ye, fo leb n paama bi-ribla!» 18La wakat ning a Rasɛll sẽn namsd n dat n ki wã, a pʋda biigã yʋʋr t'a Bɛn-Oni, sẽn dat n togs tɩ ‹mam toog bi-ribla›, la a ba a Zakoob pʋda a yʋʋr t'a Benzame, sẽn dat n togs tɩ ‹mam nug-rɩtg bi-ribla.› 19A Rasɛll kiime, la b mum-a-la Efrat tẽngã sorẽ. B boonda zĩ-kãng rũndã-rũndã tɩ Betlehɛm. 20A Zakoob baoo kugr n lugl a Rasɛll yaoogã zugu. La a Rasɛll yaoogã kugr keta beenẽ hal tɩ ta rũndã. 21A Israyɛll yikame n kẽng n tɩ tilg a yirã Migdall-Edɛɛr taoore.

A Zakoob kamba

(1Kib 2.1-2)

22 # Sɩng 49.4 A Israyɛll sẽn wa n ket n be tẽn-kãngã, a Rubɛn kẽngame n tɩ gãand a ba wã pʋg-rɩkdg a Bila. La a Israyɛll wʋma yellã.

A Zakoob kambã sõor yaa bãmb piig la a yiibu: 23Ad a Leya kamba: Yaa Rubɛn sẽn yaa a Zakoob pipi biigã, a Sɩmyõ, a Leevi, a Zʋʋda, a Isakaar ne a Zabulõ. 24Ad a Rasɛll kamba: Yaa a Zozɛf ne a Benzame. 25Ad a Rasɛll yem-poak a Bila kamba: Yaa a Dan ne a Neftali. 26Ad a Leya yem-poak a Zilpa kamba: Yaa a Gaad ne a Asɛɛre. Bãmb yaa a Zakoob kom-dibli nins a sẽn dog Padan-Aram soolmẽ wã.

A Zakoob ba a Izak kũum

27 # Sɩng 13.18 A Zakoob waa mamre, a ba a Izak nengẽ, Kiryat-Arba sẽn be Ebrõ soolmẽ wã, zĩig ning a Abrahaam ne a Izak sẽn dag n be sãand weoogã. 28A Izak vɩɩmd n kaoosa yʋʋm koabg la pis-nii n yaool n maan kaalem. 29A Izak kiime tɩ b mum-a n naag a saam-dãmba. La rẽ t'a Izak kʋʋlame n lebg nin-kẽem-kʋdre. Yaa a Izak kambã, a Ezayu ne a Zakoob n mum-a.

Currently Selected:

Sɩngre 35: MPBU

Highlight

Copy