Yikri 2

A Moyiis rogem

1Leevi buudã rao a yembr peega Leevi buudã bi-pugl a yembr n maan a paga. 2#Tʋʋm 7.20, Ebr 11.23Pagã rɩka pʋg n dog bi-ribla. Yẽnda sẽn yãnd tɩ biigã yaa neerã, a solg-a-la kiis a tãabo. 3Yẽnda sẽn wa n ka leb n tõe n solg biigã n kaoosã, a baoo peoog sẽn maan ne rudum n bolg-a ne sũud la ne kontaale. Yẽnda rɩka biigã n sagl peoogã pʋgẽ n tɩ ning rudmã sẽn be Nill kʋɩlgã noorã sʋka. 4La biigã tão rag n yasa yɩɩg bilf n get bũmb ning sẽn na n maan biigã. 5Faarõ bi-puglã siga Nill kʋɩlgẽ wã n na n so koom, la pʋg-sadb nins sẽn dag n tũud yẽnda wã rag n yegda kʋɩlgã n kẽnda. Faarõ bi-puglã yãnda peoogã sẽn be rudmã sʋkã. La a tʋma a tʋmtʋmd-poakã t'a tɩ rɩk-a n wa. 6Yẽnda sẽn fõk peoogã, a yãnda biigã: Rag n yaa bi-ribl-bilf n dag n be beenẽ n yãbda. Biigã nimbãaneg yõka Faarõ bi-puglã, t'a yeele: «Yõwã yaa Ebre nebã biiga.» 7Dẽ, biigã tão-poak soka Faarõ bi-puglã yaa: «Yãmb datame tɩ mam tɩ bool pag a yembr Ebre pagbã sʋk t'a wa reeg biigã n yẽsem n kõ-y bɩ?» 8Faarõ bi-puglã yeelame t'a kẽnge. Dẽ, bi-puglã kẽngame n tɩ bool biigã ma. 9Faarõ bi-puglã yeela pagã t'a reeg biigã n tɩ yẽsem n kõ-a t'a na n yao-a lame. Dẽ, pagã rɩka biigã n tɩ yẽsme. 10#Tʋʋm 7.21Biigã sẽn bɩ, pagã tall-a lame n tɩ kɩs Faarõ bi-puglã, t'a lebg wa yẽnda meng biiga. Yẽnda pʋda biigã yʋʋr t'a Moyiisi, n yeele: «Bala, mam yaaga yẽnda koom pʋgẽ.»

A Moyiis zoeeme n kẽng Madiyã

11 # Tʋʋm 7.23-28 # Ebr 11.24 Wakat-kãnga, a Moyiis sẽn wa n lebg bi-kãsenga, a yiime n kẽng n na n tɩ ges a saam-biisã, la a yãnda tʋʋm-wɛglã b sẽn tʋmdã. Yẽnda yãnda Ezɩpt ned a yembr sẽn pãbd Ebre ned sẽn yaa yẽnda saam-biiga. 12Dẽ, yẽnda wẽnemdame n ges zĩigã fãa, la a sẽn ka yãnd neda, a kʋʋ Ezɩpt raoã n bus bĩisr pʋgẽ. 13La vẽkembeoogo, a Moyiis leb n yiime. Yẽnda yãnda Ebre raop a yiib sẽn zabd taaba. Dẽ, yẽnda soka sẽn ka-a bʋʋmã yaa: «Yaa bõe tɩ fo pãbd f to wã?» 14Raoã leoka yẽnda yaa: «Ãnda n kõ foom noor tɩ f soog tõndo la f yɩ tõnd bʋ-kaooda? Fo rat n kʋʋ maam wa fo sẽn kʋ Ezɩpt nedã bɩ?» Dẽ, rabeem yõka a Moyiisi, t'a yeel tɩ yellã pukame. 15#Tʋʋm 7.29, Ebr 11.27Faarõ sẽn wʋm yellã, a baoo a Moyiis n na n kʋ. La a Moyiis zoeeme n na n põs Faarõ, la yẽnda kẽnga Madiyã. Yẽnda zĩnda bulg a yembr noore. 16Madiyã tẽng maan-kʋʋdã rag n tara kom-pugli a yopoe. La bãmb waame n na n toog koom n ning kogendẽ wã n yũnug b ba wã rũmsi. 17La rũm-kɩɩmb n wa n dig bãmba. La a Moyiis yikame n zab n sõng kom-pugli wã tɩ b tõog n yũnug b rũmsã. 18Bãmb sẽn lebg n kẽng b ba a Rehuwɛll nengẽ, yẽnda soka bãmb yaa: «Maana a wãn tɩ yãmb lebg n wat tao-tao a woto rũndã?» 19Bãmb leokame: «Ezɩpt ned a yembr n fãag tõnd dũm-kɩɩmbã nusẽ, n tol n toog koom n yũnug tõnd dũmsã.» 20A Rehuwɛll soka a kom-pugli wã yaa: «Nin-kãng bee yɛɛnẽ? Yaa bõe tɩ yãmb bas raoã beenẽ? Kẽng-y n tɩ bool-y-yã-a t'a wa rɩ.» 21A Moyiis sakame n na n zĩnd rao-kãng yirã. La a Rehuwɛll rɩka a bi-pugl a Sefoora n kõ-a t'a maan a paga. 22A Sefoora roga bi-ribla, la a Moyiis pʋda yẽnda yʋʋr t'a Gersom, sẽn dat n togs tɩ ‹sãando.› Bala, yẽnda yeelame: «Mam yaa sãan tẽn-kãngã pʋgẽ.»

23Sẽn kaoos wʋsg rẽ zugẽ, Ezɩpt rĩmã kiime. La Israyɛll nebã rag n yãbdame la b kelemd b yembdã pʋga. Bãmb sẽn dag n kelemd n baood sõngr b yembdã pʋgẽ wã zẽk n taa Wẽnnaam nengẽ. 24#Sɩng 15.13,14Dẽ, Wẽnnaam wʋma bãmb yãbrã, n tẽeg kaool ning bãmb sẽn dag n maan ne a Abrahaam la a Izak ne a Zakoobã yelle. 25Wẽnnaam gesa Israyɛll nebã, la Wẽnnaam bãnga b namsgã.

Currently Selected:

Yikri 2: MPBU

Highlight

Copy