Yikri 1
1
ISRAYƐLL NEBÃ YEMBD YIIBU
Israyɛll nebã namsgo
1 #
Sɩng 46.8-27
Ad a Israyɛll b sẽn boond t'a Zakoobã kamb nins sẽn tũ a yẽnda n kẽng Ezɩpt tẽngã yʋyã, la yaa ned kam fãa ne a zak rãmba: 2Yaa a Rubɛn ne a Sɩmyõ, a Leevi ne a Zʋʋda, 3a Isakaar ne a Zabulõ la a Benzame, 4a Dan ne a Neftali la a Gaad ne a Asɛɛre. 5A Zakoob yagensã fãa rag n yaa neb pis-yopoe. Wakat-kãng t'a Zozɛf bee Ezɩpt tẽnga.
6A Zozɛf ne a ba-biisã fãa, la zamaan-kãng nebã fãa wa n kiime. 7#Tʋʋm 7.17La Israyɛll yagensã rogame n fɩɩg n pid tẽngã, la b pãngã rag n tara paasgo.
8 #
Tʋʋm 7.18
La rĩm-paalg sẽn dag n ka bãng a Zozɛf n wa n na n soog Ezɩpte. 9Rĩmã yeela a nebã yaa: «Ade, Israyɛll nebã sõor yɩɩda tõndo, la b pãngã yɩɩda tõndo. 10#Tʋʋm 7.19Dẽ wã, wa-y tɩ d maan yam ne-ba, tɩ b ra wa fɩɩg n lebg wʋsg ye. Bala, zabr sã n yiki, b na n naaga tõnd bɛɛbã n zab ne tõndo, la b zoe n yi tẽngã.» 11Dẽ, b yãka yembd tʋʋm taoor dãmba, sẽn na n yɩlẽ tɩ b modg Israyɛll nebã n kɩt tɩ b tʋm tʋʋm-wɛgla. Yɩɩ woto tɩ b me teed bĩngr tẽmse, Faarõ yĩnga: Yaa Pitom ne Ramsɛɛse. 12La baa ne b sẽn dag n namsd Israyɛll nebã, Israyɛll nebã rag n tara fɩɩgre, tɩ b sõorã tar paasgo. Bõn-kãng kɩtame tɩ b rag n kis Israyɛll nebã. 13Dẽ, Ezɩpt nebã modga Israyɛll nebã n kɩt tɩ b maan yembd tʋʋm sẽn yaa toog hal wʋsgo. 14Bãmb kɩtame tɩ Israyɛll nebã maan yembd tʋʋm sẽn yaa toogo, n kɩt tɩ b vɩɩmã lebg toogo: Yaa tãnd buiibu, tãn-koɛɛm wẽebo, la pʋt pʋsẽ tʋʋm buud fãa. Woto n dag n yaa yembd tʋʋm nins fãa b sẽn dag n modgd bãmb tɩ b tʋmdẽ wã.
A Faarõ namsa Israyɛll nebã
15Ezɩpt rĩmã goma ne Ebre nebã pʋg-roagsdbã me. Pʋg-roags a yembr yʋʋr la a Sɩfra t'a yembr yʋʋr yaa a Puwa. 16Rĩmã yeela bãmb yaa: «Yãmb sã n wa rogsd Ebre nebã pagbã, yãmb sã n ges b rogmã zĩigẽ n mik tɩ bi-pɛɛlgã yaa bi-ribla, bɩ y kʋ-a, la a sã n yaa bi-pugla, bɩ y bas-a t'a vɩɩmde.» 17La pʋg-roagsdbã zoee Wẽnnaam n ka maan wa Faarõ sẽn yeel bãmbã ye. Bãmb basa kom-dibli wã n ka kʋ ye. 18Dẽ, Ezɩpt rĩmã boola pʋg-roagsdbã tɩ b wa, la yẽnda soka bãmb yaa: «Yaa bõe tɩ yãmb maan a woto? Bõe yĩng tɩ yãmb basd kom-dibli wã n ka kʋʋda?» 19Pʋg-roagsdbã leoka Faarõ n yeel yaa: «Ade, yaa tɩ Ebre nebã pagb ka wẽnd Ezɩpt pagbã ye. Bãmb yaa pagb sẽn tar pãnga, dẽ, bãmb dogda tao-tao tɩ pʋg-roagsã nan ka wa ye.» 20Wẽnnaam maana pʋg-roagsdbã neere, la Ebre nebã fɩɩgame n paam pãng wʋsgo. 21Pʋg-roagsdbã sẽn zoe Wẽnnaamã yĩnga, Wẽnnaam kõ-b-la yagense.
22 #
Tʋʋm 7.19
Dẽ, Faarõ yeela a nebã fãa yaa: «Kom-dibli nins fãa sẽn na n dogã bɩ y lob-b Nill kʋɩlgã pʋgẽ, la y bas kom-pugli wã fãa tɩ b vɩɩmde.»
Currently Selected:
Yikri 1: MPBU
Highlight
Share
Copy
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
