Mi cilima 43

Jakob tuo ke Benjamen n yegi leni o kpeliba

1Mi koma den biagi ki pugini mi diema nni. 2Ban den dini ban ñani yaa ŋalikama Ejipiti nni ki gbeni, Jakob den yedi o bijaba: «Goa mani ki ban daa ti po mi jiema waamu.» 3Juda den guani ki yedi o: «Laa joa den maadi ti leni u paalu yaa maama n tie ne: ‹Yi waalo yàá yegi leni yi, yi kan go le n nunga.› 4Lanwani, a yaa bua ti waalo n yegi leni ti, ti baa gedi ki ban daa a po mi jiema. 5Ama a yàá bua ke wan yegi leni ti, ti kan gedi kelima laa joa den yedi ti: ‹Yi waalo yàá yegi leni yi, yi kan go le n nunga.› » 6Lanwani, Jakob den yedi ba: «Be yaa po yo ke yi den tieni n po laa biadima, ki waani laa joa ke yi go pia o waalo?» 7Bi den guani ki yedi o: «Laa joa den buali ti ti laabaalo leni ti denpo yaaba po, ki yedi: ‹Yi baa, o go baa ki ye bi? Naani yi go pia waalitoa?› Ti den guani o po o buali. Ti den baa tieni lede ki bandi ke o baa yedi: ‹Teni yi waalo n yegi leni yi ki cua?› »

8Juda den yedi o baa Jakob: «Cedi ki biga n yegi leni nni tin fidi ki gedi ke tin yaa ye ki da kpe, tinba, fini leni ti bila kuli. 9N baa guani o a kani. Lani yaa ka, ŋan go buali nni o po. N yàá go guani o a kani ki sieni o a nintuali, n baa yaa ye leni i tagili a nintuali hali yaa yogunu kuli. 10Ti yàá den waagi deni, ti bi gedi taalimilie no.»

11Bi baa Jakob den yedi ba: «Nani lan tie tiladi yeni, tieni mani yeni. Taa mani ti diema piama, yaama n ŋani ki cie mi piama kuli ki ŋuuni yi kpalipadi nni, ki gedini bu paabu laa joa po. Taa mani mi kpama waamu, ti siadi waamu leni yaa tibidi yaa sinma yaa nuulu n mani, ki yi ladanumi leni yaa bonbima n yi pisitasi leni amandie bonluonkaala. 12Taa mani i ligi lan pundi taalimilie, ki go guani ban den ŋuuni yaa ligi yi kpalipadi ñoana nni. Daalinba bi den tude. 13Taa mani yi waalo ki fii ki guani laa joa po. 14U Tienu yua n pia u paalu kuli n teni ke yin baa li ŋanbili laa joa kani, ke wan tuo yi kpelo leni Benjamen n yegi leni yi ki guani. Mini yaa po, bi yaa baa fie n bila, ban fie.»

Josefi kpeliba guani ki cua o kani leni bi waalo

15Bi den taa bu paabu leni i ligi ke li pundi taalimilie, ki go taa Benjamen ki fii ki gedi Ejipiti, ki pundi Josefi nintuali. 16Josefi n den laa ke Benjamen ye leni ba, o den yedi o naacemo: «Teni bi niba yeni n kua deeni. Kodi ki yanga ki ŋanbi, kelima laa niba baa je leni nni u yensiinu.» 17Laa joa den tieni Josefi n waani o yaala, ki kuani ba Josefi diegu nni. 18Bi den ye leni ti jawaandi ban den kuani ba Josefi diegu nni yaa yogunu. Bi den yedi: «Bi cuani ti kelima yaa ligi n den bili ti kpalipadi nni mi kpiama yeni yaa po. Bi baa cua ki bibi ti, ki cuo ti tontoni. Bi baa cuo ti, tin tua yonbi, ki fie ti ŋunbi.» 19Bi den pundi Josefi diegu buliñoabu kani, ki maadi leni o tuonsoanyudaano 20ki yedi o: «Canbaa, tieni ti po sugili, ti den kpa cua ne yenma ki daa mi jiema. 21Lanwani, tin den pundi tin den baa jiidi naani ku ñiagu, ti den lodi ti kpalipadi ki sua ke yuakuli ligi den ye o kpalipiagu nni. Yuakuli ligi den tie nani o ŋalikama n den biigi maama. Ti guani i ligi yeni. 22Ti go kubi ligitoe ki baa da mi jiema. Tii bani yua n den tieni ti ligi ti kpalipadi nni.»

23O naacemo den yedi ba: «Duani mani yi yama. Yin da jie liba. Li tie yi Tienu, yi baa Tienu n den kpieni laa ligi yi kpalipadi nni. Yi ligi den pundi n kani.» O den luodi Simeon mo ki cuani o bi kani.

24Laa joa den teni ke bi kua Josefi diegu nni, ki puni ba mi ñima ke bi nigidi bi taana. O go den puni bi ŋunbi mi jiema. 25Bi den ŋanbidi ban den cuani yaa paabu ki guu hali Josefi n baa cua u yensiinu, kelima bi den waani ba ke bi baa taani ki je leni Josefi. 26Josefi n den pundi o deni yaa yogunu, bi den puni o ban den cuani yaa paabu ki gbaani ki pugi o. 27O den buali ba bi yaa ye leni laafia ki yedi: «Yi baa o jakpelo yin den maadi yua yaa maama yeni, o ye leni laafia? Naani o go baa ki ye?» 28Bi den guani ki yedi o: «Ti baa, a naacemo, o ye leni laafia. O baa ki ye.» Bi go den gbaani ki pugi o. 29Josefi den yaadi ki diidi o waalo Benjamen o naataanu ki yedi: «Naani wani n tie yi waajuogu, yin den maadi nni yua yaa maama yeni?» O go den yedi o: «N bijua, U Tienu n gbadi a po mi ninñima.» 30O yama den lengidi boncianla kelima o waalo po, ke o bua ki buudi. O den sani ki kua o dieli nni ki buudi. 31Wan den faa o nunga yaa yogunu, o go den ñani ki moandi ki koli o nunsiidi. O den yedi: «Cuani mani mi jiema tin je.» 32Bi den teni Josefi mi jiema o ba, ki go teni o kpeliba bi yaa biinu. Bi go den puni Ejipiti yaaba, yaaba n den taagi ki di leni o ke bi di bi yaa jiema bi ba, kelima Ejipiti yaaba kan fidi ki je leni Hebilu yaaba. Li tie cagindi bi nuni po. 33Josefi den teni ke o kpeliba kali o nintuali, ki cili leni o nikpelo kelima o nikpedi po, ki ŋoadi bi bina ki gedi hali ku waajuogu. Bikuli den diidi biyaba leni li pakili. 34Josefi den teni Benjamen ke o yaa jiema den cie o lieba yaama taalimimuu. Bi den ñuni ki mangi bi pala leni o.

Currently Selected:

Mi cilima 43: BGP

Highlight

Copy