Mi cilima 42

Jakob soani o bijaba Ejipiti diema nni

1Jakob n den gbadi ke ŋalikama ye Ejipiti nni, o den yedi o bijaba: «Be yaa po ke yi kaa ki nua yiyaba?» 2O den yedi: «N gbadi ke ŋalikama ye Ejipiti nni. Gedi mani lipo ki ban daa ti po ŋalikama ke tin yaa ye ki da kpe.»#JTT 7.12. 3Josefi kpeliba bonba piiga den gedi Ejipiti, ki baa n da ŋalikama. 4Jakob naa den cedi ke Benjamen, Josefi waalo yegi leni ba, kelima o den jie ke bonbiadiliba n da tieni o. 5Nani biyaba kuli n den tiendi maama, Jakob bijaba moko den gedi Ejipiti nni ki baa daa ŋalikama, kelima mi koma den ye Kanana diema nni kuli.

Josefi tieni nani waa bani o kpeliba yeni

6Josefi den diedi mi diema, wani n den kuadi ŋalikama mi diema yaaba kuli po. Josefi kpeliba den cua ki gbaani ki pugi o. 7Josefi den laa o kpeliba ki bandi ba, ama o den tieni nani ke o tie nilamo bi kani. O den maadi yaa maama n pa, ki yedi ba: «Yi ñani le?» Bi den guani ki yedi: «Ti ñani Kanana diema nni, ki cua ki baa da mi jiema.»

8Josefi den bandi o kpeliba, ama bani, bi naa den bandi o. 9Josefi den tiadi wan den dangi yaa dangidi bi po ki yedi ba: «Yi tie dodiidiba, ki cua ki baa diidi ki le mi diema nni yaa kaani n tadi.»#Cil 37.5-10. 10Bi den guani ki yedi: «Ti yonbidaano, yeni ka ba! A naacenba cua ki bua ki da ŋalikama yo. 11Tikuli tie jamadiyendo bijabe. Ti li cua leni li papienle. A naacenba naa tie dodiidiba ka ba.» 12O den yedi ba: «Yeni ka ba! Yi li cua ki baa diidi ki le mi diema nni yaa kaani n tade. Yi li cua lani yaa po yo.» 13Bi den guani ki yedi o: «Tinba a naacenba, ti tie piiga n bilalie. Tikuli tie jamadiyendo yaa bila Kanana diema nni. Ti waajuogu ye leni ti baa dinla po, yendo mo naa go ye.» 14Josefi den yedi ba: «Mii bi yedi yi ke yi li tie dodiidiba ka? 15Diidi tin baa biigi yi maama. Hali Faraon yaa miali po, yi kan fii nekanba, se yi waajuogu cua. 16Soani mani niyendo yi siiga wan gedi ki woli yi waalo. Yinba, yi baa yaa ye nekanba, ki tie kpaada. Tin baa biigi yi maama n yeni. N baa bandi yi yaa maadi moamoane. Lani yaa ka, hali Faraon miali po, yi tie dodiidiba.» 17O den taani ki kuani bikuli li kpaadidieli nni danataa. 18Li dataali, Josefi den yedi ba: «Tieni mani min baa waani yi yaala, lani yi baa yaa ye. N fangi U Tienu. 19Yi yaa tie nimoanba, yendo yi siiga n kali ki yaa lo li kpaadidieli nni. Yinba, yin fii ki kuninni ŋalikama yi denpo yaaba po. 20Li yaa puoli, yin cuani yi waajuogu, lan doagidi ke yi maadi moamoane. Yeni yaa ka, yi baa kpe.» Bi den tieni yeni.

21Bi den yedi biyaba: «I moamoani po, ti den tudi ti waalo po, kelima ti den laa o yanyagidi, wan den miadi ti sugili yaa yogunu. Ama ti naa den cengi o ba waamu. Li tie lani yaa po yo ke o naa falaciamo baa ti.» 22Rubeni den yedi ba: «Mii den yedi yi yin da tieni bonbiadiliba kuli ki biga yeni? Ama yi naa den cengi n maama ba waamu. Diidi, moala bi go buali ti o soama.»#Cil 37.21-22. 23Baa den bani ke Josefi gba bi maama, kelima o den maadi bi po leni o soagindo. 24O den fii ki fuadi bi kani, ki ban buudi, ki yuandi ki guani ki boni leni ba.

Jakob bijaba guani Kanana diema nni

Li yaa puoli, o den teni ke bi ñani bi siiga Simeon ki loli, ki luoni o li kpaadidieli nni bi nintuali.

25Josefi den puogi ke ban gbieni bi kpalipadi ŋalikama, ki go yedi ke ban guani yuakuli ligi o kpalipiagu nni, ki go pa ba mi jiema u sanu po. Bi den tieni yeni. 26Bi den tuni bi ŋunbi ŋalikama ki fii. 27Ban den jiidi yaa kaanu ki baa duani ku ñiagu, yendo bi siiga den lodi o kpalipiagu ki baa pa o ŋunbo mi jiema. O den laa i ligi ke yi ye o kpalipiagu ñoabu nni. 28O den yedi o lieba: «Bi guani n ligi! Diidi, i ye n kpalipiagu nni.» Bikuli tugusoama den sani ke bi digibi ki yedi biyaba: «U Tienu tieni ti be mo nne?»

29Bi den guani ki kuni bi baa Jakob kani Kanana diema nni, ki waani o yaala n den tieni ba kuli. 30Bi den yedi: «O joa yua n tie mi diema yudaano den maadi leni ti yaa maama n pa, ki tama ke ti tie dodiidiba. 31Ti den yedi o: ‹Ti tie nimoanba, tii tie dodiidiba ka ba. 32Ti tie piiga n bilalie, jamadiyendo bijaba. Yendo naa go ye, ku waajuogu ye leni ti baa dinla Kanana diema nni.› 33O joa yeni, yua n tie mi diema yudaano den yedi ti: ‹Diidi min baa bandi yi yaa tie nimoanba maama. Ŋaa mani yendo yi siiga leni nni, ki taa yaala n baa dini yi denpo yaaba, ki fii ki kuni ki guani ki cuani yi waajuogu nekanba. 34Yeni, n baa bandi ke yii tie dodiidiba, ke yi tie nimoanbe. N baa guani yi yi kpelo, lani yi baa fidi ki yaa tiendi u kpendu mi diema nni yin bua maama.› »

35Ban den ñandi bi ŋalikama bi kpalipadi nni yaa yogunu, bi den sua ke yuakuli ligi gbiabi o kpalipiagu nni. Bikuli, bani leni bi baa den laa bi ligi ke i gbiabi, ke ti jawaandi cuo ba. 36Bi baa Jakob den yedi ba: «Yi fie nni n bila kuli. Josefi naa go ye, Simeon naa go ye, ke yi go bua ki taa Benjamen mo. Laa bonla kuli guani ki baa n yuli po.» 37Rubeni den yedi o baa: «N yàá guani a po Benjamen, ŋan kpa n bijaliediba. Piani nni o, n baa guani o a kani.» 38Jakob den yedi: «N bijua kan yegi leni yi abada, kelima o kpelo den kpe, wani bebe n sieni. Yin caa yaa yogunu u dogu, bonbiadila yaa tieni o u sanu nni, yi baa teni n yukobipiendi n jiidi bi tinkpiba diema nni leni li paboanli.»

Currently Selected:

Mi cilima 42: BGP

Highlight

Copy